Daha ke enyɔŋ! Enye Kokot Fi

Ke ini kiet ke edem ami mma mbup ŋwan mi, “afo emekeme ndidɔhɔ mi ntak, kpa nte ami ntide, akananam nnyin inyeneke akamba mfina ndomokiet ke uwem nnyin?”

Enye ese mi anyuŋ ete, “akpanikɔ. Ami nyedɔhɔ fi ntak emi nnyin minyeneke akamba mfina akananam; edi ke afo enyene ata ekpri editi ŋkpɔ!”

Usɔp usɔp ye eti ibɔrɔ esie ama anam mi mfiɔk ini kiet efen ke ndinam ikɔ Abasi Jesus Christ imenke ubiak ye idomo ifep, emi edide akpan ŋkpɔ ke ndikɔri.

Ikɔ Abasi idihe usuŋ nditre ndinyene idomo ye mme mfina edi edi usuŋ ke ndikɔri mbuɔtidem nnyin ye ndikpep adaŋa nte idiyɔde ye mmɔ.

Ami mmenyene ifiɔk eke akpanikɔ emi ke mme ɔfiɔŋ ifaŋ emi ekebede ke ini emi ami nkesaŋade ke usen kiet ndien ke ndo ndo oro enyin mi abiara, okim, onyuŋ enyeŋ. Ami mma nkop ndik. Ndien mme mbiaibɔk ema edɔhɔ mi ete, “edieke afo mutɔŋɔke usɔbɔ ke usɔp, afo emekeme nditre ndikut usuŋ ke ŋkpɔ nte urua ifaŋ.” Ami mma nehede nkop ndik.

Ndien nko mmɔ edɔhɔ ete, “Afo omoyom ibɔk emi ekimde ke enyin—ibɔk ekimde ke ata enyin, ke ndinehede ntad enyin—kpukpru urua inaŋ, ke ofuri eyo uwem fo.”

Oro ekedi ikoot edidemede emi minyeneke inem.

Ndien ekikere amadi ke edu mbume. Ami mma mbup idem mi, “Ɔfɔn! Enyin ikpɔk idem mi ifɔnke, edi nso kabaŋa enyin eke spirit mi? Ndi ami meyom usɔbɔ ndomo kiet do? Nko nso ke ada ɔnɔ ke ndinyene eti enyin eke spirit?”

Ami mma nkere mbaŋa mbuk eke owo naan, emi ekekotde Bartimaeus, emi eketiŋde ebaŋa ke Gospel Mark. Ŋwed Abasi ɔdɔhɔ ete, “Ndien ke ini enye ekekopde ke ekedi Jesus eyen Nazareth, enye ama ɔtɔŋɔ ndifiori uyo ɔwɔrɔ, onyuŋ ɔdɔhɔ ete, Jesus, afo Eyen David, yene mbɔm baŋa mi.”¹

Ke nditum nse, ke enyin eke ediwak, Jesus ekedi eyen Joseph kpɔt, edi ntak emi Bartimaeus okotde Enye “Eyen David”? Ke ntak edide ke enye ama ɔfiɔk ete ke Jesus kakpan ekedi Andinyaŋa, emi eketiŋde ebaŋa ete ke edimana ke ubon David.²

Edi ŋkpɔ inem ete ke owo naan emi, emi mikinyeneke enyin obukidem, ama ɔfiɔk Jesus. Enye ama okut ke spirit ŋkpɔ emi enye mikikemeke ndikut ke ikpɔkidem, ke ini ediwak eken ekekutde Jesus ke obukidem edi ekedi nnan ofuri ofuri ke spirit.

Otode ke mbuk emi nnyin ikpep ediwak kabaŋa ata nkukut spirit.

Nnyin ikoot, “Ndien ke ini ediwak eke ebiomde enye ke ana nte enye omum emem esie: edi enye aka iso ofiori okpon, Afo Eyen David tua mi mbɔm.”³

Kpukpru owo emi ekedude ye enye edɔhɔ enye ete odop uyo, edi enye enehede ofiori koro enye ama ɔfiɔk owo emi Jesus ekedide. Enye ikikopke mme uyo oro ndien enehede ɔbɔŋ ke ɔkpɔsɔŋ uyo.

Enye akanam utu ke ndiyime enam enɔ enye. Ke misehe ekpri ndaha esie, enye ama akama mbuɔtidem esie ke ndika mbɔhɔ ndaha esie.

Edi, akpa akpan ekikere emi ikpepde edi nnyin inaam anwa anwa nkukut eke spirit ke ini nnyin iwukde enyin ke Jesus Christ ndien idu ke akpanikɔ ke se nnyin ifiɔkde ke akpanikɔ.

Nditɔ eka iren ye iban, ke ndinim enyin nkukut nnyin, ana nte nnyin ibioro nditre ndikpaŋ utɔŋ nnɔ uyom ererimbot ke nkan nkuk nnyin. Ke ndutime ye ndutimede ererimbot emi, ana nte nnyin idu ke mbuɔtidem ke se nnyin ifiɔkde, ndinam mbuɔtidem ye mme ediomi nnyin, ndinyene mbuɔtidem ke ndinim ibet ye ke ndifiak nsɔŋɔ se inimde kpa ke ndinam ɔsɔŋɔ, kpa nte owo emi akanamde. Ana nte nnyin inehede ifiori ɔsɔŋ ikɔ ntiense nnyin kabaŋa Ɔbɔŋ inɔ ererimbot. Owo emi ama ɔfiɔk Jesus, odu ke mbuɔtidem kabaŋa se enye enimde ke akpanikɔ, nko uyo ererimbot ke ebiet iduŋ ikitimedeke enye.

Odu mme ediwak uyo mfin edomode ndisuhɔre mme uyo nnyin nte mme mbet Jesus Christ. Mme uyom ererimbot ke edomo ndinam owo okukop uyom nnyin, oro edi ntak anade nte nnyin inam anwa anwa ikɔ ntiense eke Andinyaŋa ndien ɔsɔŋɔ. Ke otu kpukpru mme uyom eke ererimbot, Ɔbɔŋ ke esese mi ye afo ke ndinam anwa anwa mme ikɔ ntiense nnyin, ke ndidibede mme uyo nnyin, ye ke ndidi uyo Esie. Edieke nnyin minamke ntre, anie editiŋ ikɔ ntiense ibaŋa Jesus Christ? Anie owo editiŋ ibaŋa enyiŋ Esie onyuŋ etiŋ edisana utom?

Nnyin iminyene edisɔŋɔ eke spirit otode ke ifiɔk eke spirirt nnyin.

Edi nso ke Bartimaeus akanam ke emi okurede?

Ke unyime Jehovah ke ndidahade ke enyɔŋ, enye afiak anam ke mbuɔtidem.

Ŋwed Abasi ɔdɔhɔ ete, “Ndien enye, ɔduɔkde ɔfɔŋ esie, adaha ke enyɔŋ, onyuŋ ebine Jesus.”⁴

Osuhɔre idem ye owo mbuɔtidem emi ama ɔfiɔk ke enye ekeme ndinyene edidibede ke enyɔŋ ke eti uwem ke ewuk Jesus. Enye ama ɔfiɔk ete ke enye ama ɔfɔn akan mme ndaha esie, ndien ata akpa ŋkpɔ emi enye akanamde ke ini enye okopde adaŋa nte Jesus okotde enye ekedi enye nditop ɔfɔŋ ebeŋe esie nduɔk.

Nko enye akanam utu ke ndiyime enam enɔ enye.

Ekeme ndidi enye ama ekere, “ami nyomke emi aba, idahaemi Jesus ama ekedi ke uwem mi. Emi edi obufa usen. Akak mi ye idiɔk uwem emi. Ye Jesus ami mmekeme nditɔŋɔ obufa uwem eke inemesit ye idara, ye Enye, ye ke otode Enye. Ndien nyomke ndifiɔk se ererimbot ekerede ebaŋa mi. Jesus kokoot mi, nko Enye eyenwam mi ndidu obufa uwem.”

Ewe ɔwɔrɔ etop ukpuhɔre ŋkpɔ!

Nte enye okotopde ɔfɔŋ ebeŋe esie ɔduɔk, enye ama asana kpukpru mme efaŋa.

Ndien emi edi udiana akpan ekikere: nnyin inim nkukut spirit ɔfɔn ke ini nnyin ikpɔŋde ata owo, ikabare esit, inyuŋ itɔŋɔ obufa uwem ye Christ.

Usuŋ ndinam emi edi ke ndinam ye ndinim me ediomi ke edidibede ke enyɔŋ ke eti uwem otode ke Jesus Christ.

Kpa nte nnyin inɔde ebeŋe ke nditua mkpɔfiɔk mbaŋa idem nnyin, mkpɔfiɔk mbaŋa ndaha nnyin ye mme mfina ye ekpe ke kpukpru mme ndiɔk ŋkpɔ ke uwem nnyin, ye ke kpukpru mme ndiɔk owo emi nnyin ikerede anam nnyin ikop inem, nnyin imenim ɔfɔŋidem abeŋe ebeŋe ke mme afara nnyin. Edi akpanikɔ ke ndusuk idaha mme owo, ke efiɔkde mme ifiɔke, efina nnyin. Edi ana nte nnyin ibiere ndinam ke mbuɔtidem ke Christ ke ndisio ɔfɔŋidem ekikere ibuot ye ekikere esit emi nnyin ikemede ndinyɔ ke ndidib mme ebeŋe mme idiɔk ŋkpɔ inyuŋ itop enye iduɔk, ifiɔkde ite ke Enye ekeme onyuŋ aduak ndikɔk nnyin.

Akananam iduhe eti ebeŋe ndidɔhɔ, “Ami ndi ntak ntiede ntem ke ntak ndusuk ndiɔkiso ye mme anana inem ndaha. Ndien ami nkemeke ndikpuhɔre, ndien ami menen.”

Ke ini nnyin ikerede ke usuŋ ntem, nnyin imibiere ke edinam nnɔ.

Nnyin imenim ɔfɔŋidem eke owo-ebeŋe.

Ndinam ke mbuɔtidem ɔwɔrɔ ke ndibed edem ke Andiyaŋa, inimde ite ke oto ke Erisio-isop Esie ke nnyin imikeme ndikpon nkan kpukpru ŋkpɔ ke uyo Esie.

Ɔyɔhɔ akpan ekikere ita odu ke mme akpatre ikɔ inaŋ: “[enye] aka ebine Jesus.”

Didie ke enye editiene Jesus ke ini enye ekedide nnan? Nkokure usuŋ ekedi ndisaŋa mkpere Jesus ke ndikop uyo Esie.

Ndien emi edi ɔyɔhɔ akpan ekikere ita: nnyin inim eti nkukut spirit ke ini nnyin ikopde uyo Ɔbɔŋ inyuŋ iyak Enye ada nnyin usuŋ.

Kpa nte owo emi ekemenere uyo esie okpon akan me uyo emi okodude ke nkankuk esie, enye ama enyene ukeme ndikpaŋ utɔŋ nnɔ uyo Ɔbɔŋ ke ufɔt kpukpru mme uyo efen.

Emi edi ukem mbuɔtidem emi akanamde Peter asaŋa ke mmɔŋ kpa ke nte enye ekewukde enyin esie ke Ɔbɔŋ ndien ofim okodude ke nkan nkuk esie ikitimekede.

Ndien mbuk owo naan emi etre ye mme ikɔ emi “enye okut usuŋ, ndien etiene Jesus ke usuŋ.”⁵

Ata akpan ukpep kiet ke mbuk emi edi ke owo emi ama anam ata eti mbuɔtidem ke Jesus Christ ndien ɔbɔ utibe ŋkpɔ koro enye ama obup ke ata eti esit, ata eti esit nditiene Enye.

Ndien emi edi ata akpan ntak ke mme edidiɔŋ emi nnyin ibɔde ke uwem nnyin, emi edide ke nditiene Jesus Christ. Abaŋa ndifiɔk Enye, ndinam nnyuŋ nim mme ediomi ye Abasi ke ntak Esie, ndikpuhɔre uduot nnyin otode ke Enye, nnyuŋ nyɔ tutu utit ke nditiene Enye.

Ke okim, ndinim eti nkukut spirit edi ke ndiwuk enyin ke Jesus Christ.

Ntre ke enyin spirit mi akanwaŋa nte ami nkebɔde ukim ibɔk eke enyin? Ndien, ami ndi anie owo ndidɔhɔ? Ami mmenem esit mbaŋa se nkutde.

Ami menehede nkut ubɔk Abasi ke edisana utom emi ye ke uwem mi.

Mmokut mbuɔtidem eke ediwak owo ke kpukpru ebiet eke ami nkade emi ɔsɔŋɔke mbuɔtidem mi.

Aami nkut mme angel ekande mi ekuk.

Ami nkut mbuɔtidem ediwak emi mikutke Abasi ke ikpɔkidem edi efiɔk Enye ke spirit, koro mmɔ efiɔk Enye ke esit-idem.

Ami ntie ntiense nte ke ikɔ Abasi emi edi ibɔrɔ ɔnɔ kpukpru ŋkpɔ, koro Jesus Christ edi ibɔrɔ ɔnɔ kpukpru owo. Ami mmenem esit mbaŋa se nkutde nte ami ntienede Andinyaŋa.

Ami menwɔŋɔ nte ke nte nnyin ikopde uyo Jehovah inyuŋ iyak Enye ada nnyin usuŋ ke usuŋ Andinyaŋa, eyediɔŋ nnyin ye eti nkukut, mbufiɔk eke spirit, ye emem ke esit ye ekikere ke ofuri eyo uwem nnyin.

Yak nnyin ifiori ikɔ ntiense kabaŋa Enye ɔsɔŋ akan mme uyom edude ke nkan nkuk nnyin ke ndikop ediwak mbaŋa Jesus Christ ndien iduhe efen. Yak nnyin isio ɔfɔŋidem ebeŋe emi nyin isuk isinede inyuŋ ikoŋ ikan ererimbot ika ke eti uwem ke ye otode Christ. Yak nnyin isio kpukpru ebeŋe ke nditre nditiene Jesus Christ inyuŋ iyom kpukpru eti ntak nditiene Enye nte nnyin ikopde uyo Esie. Emi edi akam mi ke enyiŋ Jesus Christ, amen.