Uduak Abasi Edi ndida Mbufo Nnyɔŋ Ufɔkiduŋ

Ami nyema ediwut ekɔm ke akam mbufo nte ami ntɔŋɔde usuŋ edibeŋe idem nnɔ ikoot oro, otode President Nelson, ndinam utom nte Apostle Ɔbɔŋ Jesus Christ kiet. Afo emekeme edinehede ŋkere emi ekedide suŋ-suŋ eketre, ndien ekedi utibede ini mbumede ye ata ediduŋɔre-idem nse. Oro ke, nte ededi, ke akpanikɔ ekedi ŋkpɔ ukpono ke ndinam-ŋkpɔ nnɔ Andinyaŋa, ke ndaha ekededi, nyuŋ nam utom ye mbufo ke edibuana nti mbuk eke gospel idorenyin Esie.

Akande oro, esitiŋ ete ke enyek-idem eka ŋwan kiet esida ke edem ofuri obufa Apostle emi ekotde. Ami mfiɔkke mme oro edi nte esitiŋde, edi ke ndaha enye emi, ekeme edi-di akpanikɔ. Ndien ami mmekere ke ntak edide ke eka ŋwan mi iduhe aba ye nnyin inamke ŋkpɔ ndomokiet ndisuhɔde nnyek-idem esie.

Ediwak mme ɔfiɔŋ ekebede, ini emi ŋwan mi ye ami ikikade idut efen ke ntak nsio-nsio ubiɔŋ-utom Ufɔk Abasi, ami mbak ndemere ke usenubɔk kiet nyuŋ nse anwa-esien eke window hotel nnyin ye ekaha-idem. Ke isɔŋ ekedi akwa efak kiet, ami nkut ke ema enim ubiɔŋɔre-usuŋ ye mbon polisi edade ekpere nditeme moto ete ekanare enyɔŋ ke nte mmɔ esimde ubiɔŋɔ oro. Ke akpa ini, esisit ibat moto ekewat ke usuŋ oro ndien ema enam mmɔ efiak edem. Edi ke nte ini akade iso ndien moto ediwak, udim moto ama ɔtɔŋɔ edibɔp nda.

Otode ke window enyɔŋ oro, ami nse nte owo polisi oro ebietde ke ɔyuhɔ ke odudu esie ndibiɔŋɔ moto edika iso ndien edibin mme owo ete efiak edem. Ke akpanikɔ, enye etie ekenyene usɔp ke ikpat esie, nte ke enye ekeme editɔŋɔ ŋkwɔ ekpri ikwɔ, nte moto kiet-kiet ekperede ŋkpɔubiɔŋɔ oro. Edieke andiwat okopde edikpu ke ubiɔŋɔ oro, owo polisi oro iwutke esit-mbɔm mme ke iyeŋwam. Enye eyefuŋ ibuot esie awak onyuŋ owut nsak-iso usuŋ emi edikade.

Mme ufan mi, mme nsaŋa utom mi ke usuŋ uwem isɔŋ, ediye uduak eke Ete nnyin, kpa “utibede” uduak Esie,¹ ekenam man ada mbufo ɔnyɔŋ ufɔkiduŋ,idige man edibin mbufo osio.² Owo ndomokiet ibɔpke ŋkpɔ-ubiɔŋɔ ndien edinim owo do man ediwɔŋɔre mbufo akanare onyuŋ edibin mbufo osio. Ke akpanikɔ, edi ata asak-iso edinam oro. Abasi odu ke nsuhɔ-esit ediyom mbufo. Enye “oyom kpukpru nditɔ Esie emek ndifiak ntiene Enye,”³ ndien Enye anam ofuri ŋkpɔ emi ekemede ndifiak nda mbufo nnyɔŋ ufɔk.

Edima Ete nnyin akanam Edibot eke ata isɔŋ emi ke ntak edinɔ eti-ifet man afo ye ami idinyene ediye ye nsasana ifiɔk-ukpep eke uwem isɔŋ, ufaŋ ndida unen edimek emi Abasi ɔnɔde man imek Enye,⁴ ibɔ ukpep inyuŋ ikɔri, inam ndudue, ikabare-esit, ima Abasi ye mbɔhiduŋ nnyin, ndien ke usen kiet inyɔŋ ufɔkiduŋ ibine Enye.

Enye ɔkɔnɔ ɔsɔŋurua Edima Eyen Esie edi idiɔk ererimbot emi man ediduŋ ke ɔyɔhɔ idaha eke ifiɔk owo, ndinɔ uwutŋkpɔ esɔk nsuhɔ nditɔ Esie nditiene, man osio-isop onyuŋ afak-osio. Enɔ akwa usio-isop eke Christ edisio ofuri ŋkpɔ-ubiɔŋɔ eke mkpa ikpɔkide ye eke spirit emi ekpebahade nnyin osio ke nsinsi ufɔkiduŋ nnyin.

Ekenam kpukpru ŋkpɔ kabaŋa uduak emi Ete enyenede ɔnɔ ndima nditɔ Esie ndida kpukpru owo nnyɔŋ ufɔkiduŋ.

Nso ke mme isuŋutom Abasi, mme prophet Esie, ekot uduak emi ke Mfiak-men-ndi ŋwed Abasi? Mmɔ ekot oro uduak erifak,⁵ uduak mbɔm,⁶ akwa uduak inemesit,⁷ ye uduak erinyanga-ukpↄŋ, emi edide eke kpukpru owo, “otode ke iyip Ikpɔŋ-ikpɔŋ okim emi Mbonde.”⁸

Udɔŋ eke akwa uduak inemesit eke Ete edi inemesitmbufo, ke ata itie emi, ata idahaemi, ye ke mme nsinsi. Oro idige edikpan inemesit mbufo nyuŋ nam fi enyene mfina nyuŋ ŋkop ndik.

Udɔŋ eke uduak erifak eke Ete ke akpanikɔ edi erifak, mbufo, ndinyaŋa mbufo nsio ke ukut ye mkpa Jesus Christ,⁹ ɔkpɔkde nnyin osio ke ebuka idiɔkŋkpɔ ye mkpa. Oro idige ke ediyak mbufo nim ke nte mbufo edide.

Udɔŋ eke uduak mbɔm Ete edi edinyan mbɔm ke nte mbufo efiakde edem etiene Enye enyuŋ ekpono ediomi akpanikɔ mbufo ye Enye. Oro idige ke edi-nam inana mbɔm nyuŋ nnɔ ubiak ye mfuhɔ.

Udɔŋ eke uduak erinyaŋa-ukpↄŋ eke Ete ke akpanikɔ edi erinyaŋa mbufo ke obio-ubɔŋ celestial ke nte mbufo ebɔde “ikɔ-ntiense Jesus”¹⁰ enyuŋ eyak ofuri ukpɔŋ mbufo enɔ Enye.¹¹ Oro idige edibin mbufo nsio-mfep.

Ndi emi ɔwɔrɔ ke ŋkpɔ ekededi eyedu kabaŋa nte nnyin idude uwem nnyin? Koro usuŋ nte nnyin imekde edida unen-edimek nnyin nam ŋkpɔ ibeheke owo nte kiet Koro nnyin imikeme edinim mme edikpɔŋ edinim ibet Abasi? Iŋ-iŋ, oro idige ntre. Ke akpanikɔ kiet kotu akpan ikoot ye ebeŋe emi Jesus eyiride anam kini utom ukwɔrɔ-ikɔ Abasi Esie ke isɔŋ ekedi man nnyin ikpuhɔ inyuŋ ikabare-esit ndien idi itiene Enye.¹² Ata nnen-nnen akpan-ŋkpɔ ke ofuri ukpepŋkpɔ Esie ndidu ke edikɔŋ ndaha eti edu uwem¹³ edi ikoot edikɔri ke idem nnyin, edikpuhɔ ndaha mbuɔtidem ke Christ, ŋkesim edinyene akwa edikpuhɔ ke esit.¹⁴

Abasi oyom nnyin ɔnɔ ata erifiak ŋkara mme udɔŋ edima idem ye ntaŋidem nnyin, edibin ido eke ata owo nsio,¹⁵ man nnyin “inyɔŋ-ika, ndien inamke idiɔkŋkpɔ aba.”¹⁶

Edieke nnyin inimde ke udɔŋ eke kpukpru edikem-uduak eke Ete edi ndinyaŋa nnyin, mfak nnyin, nnyan mbɔm nnɔ nnyin, ndien ke ekemde ada inemesit ɔsɔk nnyin, nso idi udɔŋ eke Eyen ke edida akwa uduak emi ndi?

Eyen etiŋ abaŋa Idemesie ete: “Koro Ami nto ke heaven nsuhɔre ndi, idige man nnam uduak idem mi, edi man nnam uduak andidɔŋ mi.”¹⁷

Udauk Jesus edi ntat-ubɔk uduak eke Ete! Eny oyom ndinam emem ɔnɔ ata akpatre eyen kiet eke Ete edibɔ akpatre edidiɔŋ ke uduak oro edide edinyene—uwem nsinsi ye Mmɔ. Iduhe eke esiode-eduɔk ke edisana ndaha emi.

Edieke esiwakde ndikere ke afo udukemek ndinam man ekekem, mme ke edima anan-adaŋa mbɔm eke Erisio-isop Andinyaŋa ofuk kpukpru mbon eken edi ifuk-ke fi, do ke afo mufiɔk-ke. Anana-adaŋa ɔwɔrɔ minyeneke-adaŋa. Anana-adaŋa ofufuk fi ye mbon emi afo amade.¹⁸

Nephi anam ediye akpanikɔ emi aŋwaŋa ete: “Enye inamke ŋkpɔ ndomokiet ke mibɔhɔke ke ufɔn ererimbot; koro enye amade ererimbot, kpa ke oro enye ayak uwem esie man enye ekpeda kpukpru owo ɔnɔ idemesie. Ke ntre, enye ikpanke owo ndomokiet ete ekutabi ke erinyaŋa esie.”¹⁹

Andinyaŋa, Eti Ekpemerɔŋ, aka ediyom erɔŋ Esie emi osopde tutu Enye edikut mmɔ.²⁰ Enye “iduakke ite owo ndomokiet atak.”²¹

“Ubɔk mbɔm mi anyan edisim mbufo, ndien owo eke edidide, enye ke Ami ndibɔ.”²²

Nte mbufo emenyene owo udɔŋɔ kotu mbufo? Eda mmɔ ekpere. Ndi mbufo emenyene owo ndomokiet emi edide mbuŋɔ, mme nnan, mme owo enyenede unɔmɔ, mme owo akpa-mfia, mme mbon akpaubeŋ, mme inan, mme owo emi enyene oruk ukut ekededi? Eda mmɔ ekpere ndien Ami nyekɔk mmɔ, koro Ami mmeyene mbɔm mbaŋa mbufo”²³

Enye ikibinke ŋwan oro ekenyene udɔŋɔ uwɔrɔ-iyip iduɔk; Enye ikiŋwineke idem ikpɔŋ owo akpa-mfia; Enye ikisinke ŋwan emi ekemumde ke efibe; Enye ikisinke owo emi akatuade mkpɔfiɔk—ke se idiɔkŋkpɔ mmɔ ekpedide. Ndien Enye idikaŋke fi mme mbon emi afo anmade ke ini afo adade mmɔ ɔsɔk Enye ke mbuŋɔ esit ye edinuaha spirit. Oro idige udɔŋ Esie mme ubono-ŋkpɔ Esie, mme edi-di uduak, ufɔn, ekikere, mme idorenyin Esie.

Iŋ-iŋ, Enye inimke mme ubiɔŋɔre ye ikpafak ke usuŋ; Enye emen mmɔ osio. Enye ibinke mbufo isio; Enye adara mbufo ada esin.²⁴ Akpaimɔ utom ukwɔrɔ-ikɔ Esie ekedi ndifiori odu-uwem udɔŋ emi.

Ekem nte ededi nwaidem usio-isop Esie edidu, emi ɔsɔŋde ɔnɔ nnyin ndifiɔk, okponde akan ukeme nnyin nte owo ndidiɔŋɔ. Edi, ndien emi edi akpan ŋkpɔ kiet “edi,” nnyin imifiɔk, imikeme edidiɔŋɔ, edisana, udɔŋ erinyaŋa eke uwa isop Esie.

Ema esiak ikpehe temple mbiba kini Jesus akakpade ke cross, owutde ke ema etat usuŋ erifiak nka iso Ete enim iŋwaŋ—enɔ kpukpru mbio emi ewɔŋɔde etiene Enye, ebuɔtde-idem ye Enye, eyakde mbiomo mmɔ enɔ Enye, enyuŋ emene ɔkpɔnɔ Esie ekɔŋɔ ke itɔŋ mmɔ ke ubiɔŋ ediomi.²⁵

Ke mme ikɔ efen, uduak eke Ete idige kabaŋa edinim ubiɔŋɔ ke usuŋ. Enye ikidige oro, enye idinyuŋ idige oro. Nte odu mme ŋkpɔ emi nnyin inyenede ndinam, ibet ndinim, mme ndaha uduot-obot nnyin emi ikpikpuhɔde? Iŋ odu. Edi ye mfɔn Esie, mme ŋkpɔ oro odu ekpere nnyin, iyomke usuŋ ibe se ikpisimde.

Emi edi eti mbuk! Ami ŋkanke editiŋ esit-ekɔm nnɔ ndimem akpanikɔ emi. Ubono-ŋkpɔ eke Ete, uduak Esie, ufɔn Eise, udɔŋ Esie, ekikere Esie, ye idorenyin Esie ofuri edi man edikɔk mbufo, ofuri edi ndinɔ mbufo emem, ofuri edi man ada mbufo, ye mbon emi mbufo emade, ɔnyɔŋ ufɔkiduŋ. K’emi ke ami ndi ntiense ke enyiŋ Jesus Christ, Eyen Esie, amen.