Yene Mbuɔtidem ke Abasi.

Ke ufɔkemana nnyin, ndusuk ini nnyin isibre mbre emi nnyin ikootde “Idad Mbre Mbuɔtidem.” Ekeme ndi-di afo emesibre enye nko. Mme owo ia eda ke ikpat ifaŋ ediaŋade, kiet akpade edem owut kiet eken. Ke idiɔŋɔ otode owo emi adade ke edem, owo emi odude ke iso ɔduɔ ɔnyɔŋ edem oduk ke ubɔk ufan mmɔ eke ebetde.

Mbuɔtidem edi itiat idak isɔŋ kpukpru ebuana. Ekpri mbume enɔde ebuana kiet ekededi edi “Nte ami mmekeme ndinim owo enye eken ke akpanikɔ?” Etɔŋɔ ebuana kpɔt ke ini mme owo eduakde ndinim kiet eken ke akpanikɔ. Ebuana ididuhe edieke owo kiet enimde ke akpanikɔ ofuri ofuri edi enye eken etre.

Nnyin kiet kiet idi ndima nditɔ spirit eke edima Ete eke heaven.¹ Edi ke ini mbuk ubon eke spirit ɔnɔde itiat idakisɔŋ, enye anam ke idem esie ɔtɔŋɔ eti ebuana ye Abasi. Ekeme nditɔŋɔ ebuana kpɔt ke ini nnyin eduakde ndidot enyin ke Enye.

Ete eke Heaven oyom inyene eti, ebuana idem nnyin ye nditɔ spirit Esie kiet kiet.² Jesus ama owut udɔŋ oro ke ini Enye ɔkɔbɔŋde akam, “Man mmɔ kpukpru ekpakam edi kiet, nte Afo, Ete, odude Mi ke idem, man mmɔ enyuŋ edu ye nnyin.”³ Ebuana emi Abasi oyomde edi enye emi enehede ekpere onyuŋ edi eke idem man enye ekpekeme ndbuana kpukpru se Enye enyenede ye se Enye edide.⁴ Oruk ntotuŋɔ oro, enyene ime ebuana ekeme ndinam kpɔt ke ini ebɔpde ke mfɔn mma, ofuri mbuɔtidem.

Ke nkaŋ Esie, Ete eke Heaven ama anam utom tɔtɔŋɔ ke eritɔŋɔ ke ndineme ata mbuɔtidem Esie ke edisana ukeme eke nditɔ Esie kiet kiet. Mbuɔtidem ɔsɔŋɔ uduak emi Enye ekewutde ɔnɔ nkɔri nnyin ye editɔt mbemiso nnyin idi ke isɔŋ. Enye eyekpep nnyin nsinsi ibet, obot isɔŋ, ɔnɔ nnyin ikpɔk idem, ɔnɔ nnyin enɔ ndimek ke idem nnyin, onyuŋ ayak nnyin ikpep inyuŋ ikɔri ke ndimek ke idem nnyin. Enye oyom ete nnyin imek nditiene ibet Esie inyuŋ ifiak ika ikikop inem nsi nsi uwem ye Enye ye eyen Esie.

Ke ɔfiɔkde ete ke nnyin idinamke eti ndumek kpukpru ini, Enye nko ama enim usuŋ ɔnɔ nnyin ndibe ke mme idiɔk ŋkpɔ emi mme idiɔk mbumek akamade. Enye ama ɔnɔ Andinyaŋa—Eyen Esie, Jesus Christ—ndisio isop ke mme idiɔk ŋkpɔ nnyin nyuŋ nam nnyin ifiak isana ke ndaha nkabare esit.⁵ Enye okot nnyin ete isin ediye enɔ nkabare esit ke edinam kpukpru ini.⁶

Ofuri ete ye eka efiɔk adaŋa nte ɔsɔŋde ke ndinim eyen ɔwɔŋ ke akpanikɔ ke ndinam mbumek mmɔ, akpan akpan ke ini ete ɔfiɔkde ke eyen oro eyenam ndudue onyuŋ ɔbɔ ufen ke ibɔrɔ. Edi Ete nnyin ke Enyɔŋ enyene mbuɔtidem ke nnyin iyenam ndumek emi ediwamde nnyin isim edisana ukeme nnyin! Nte Elder Dale G. Renlund ekekpepde, “Uduak [Esie] ke ndidi ete ye eka idihe ndinyene nditɔ nam se ifɔnde; edi ndinyene nditɔ Esie mek ndinam se ifɔnde ye ke akpan ndidu nte Enye.”⁷

Ke misehe mbuɔtidem Abasi ke nnyin, ebuana nnyin ye Enye eye edikɔri kpɔt isim ndaha emi nnyin iduakde ndinim ke nnyin ima mbuɔtidem ke Enye. Mfina edi ke nnyin idu ke idiɔk ererimbot ye kpukpru iminyene ifiɔk ibaŋa abiaŋa eke mbuɔtidem ke ntak nsu, nkari, editabi, mme mme idiɔk edidiana ye mbon efen. Ini kiet ema ekebiaŋa, nnyin iyewana ndifiak nnyene mbuɔtidem. Ndiɔi mbuɔtidem esinyene mme ukwaŋ owo ekeme ndinyene ŋkpɔ ndinam ye mbuɔtidem nnyin ke Ete eke Heaven.

Ke ediwak isua emi ekebede, mme ufan mi iba, Leonid ye Valentina, enam udɔŋ ndidi mme owo Ufɔk Abasi. Nte Leonid ɔtɔŋɔde ndikpep ikɔ Abasi, enye ama enyene mfina ke ndibɔŋ akam. Ke ntɔŋɔ uwem esie, Leonid ama enyene mfina otode mme ada ibuot ndien ama anam unana edinyene mbuɔtidem ke mme adaibuot. Mme ifiɔk ukpep emi ama afina ukeme esie ke ndikubɔre esit esie nyyuŋ ntiŋ ekikere esie nnɔ Ete eke Heaven. Ye ini ye ndikpep, Leonid ama enyene eti mbufiɔk kabaŋade edu uwem Abasi onyuŋ ɔtɔŋɔ ndinyene ekikere mbaŋa ima Abasi. Ke ndise, akam akabare edi ata usuŋ ɔnɔ enye ndiwut ekɔm ye ima emi enye ekenyenede ɔnɔ Abasi. Edikɔri mbuɔtidem esie ke Abasi ama ada enye usuŋ ke ndiduk edisana ediomi ekemede ndisɔŋɔ ebuana mmɔ ye Abasi ye kiet eken.

Edieke akpa unana mbuɔtidem edide ŋkpɔ emi akpande fi ndinyene mbuɔtidem ke Abasi, mbɔk tiene uwutŋkpɔ Leond. Ke ie aka iso ndipep ediwak kabaŋa Ete, edu Esie, ido Esie, ye mme uduak Esie. Yom nyuŋ wet mme ifiɔk ekopde ke ima Esie ye odudu ke uwem mbufo. Odu uwem prophet nnyin, President Russell M. Nelson, ama ekpep ete nte nnyin ikpepde awak kabaŋa Aasi, mmem mmem ke edidi inɔ nnyin ndinyene mbuɔtidem ke Enye.

Ndusuk idaha mfɔn-ma usuŋ ke ndikpep ndinyene mbuɔtidem ke Abasi edi ndibuɔtidem ke Enye. Nte “Edidnam Ndisime Edinim,” ndusuk ini nnyin iyom ndiduak ndiduɔ nka edem nyuŋ nyak Enye omum nnyn. Uwem isɔŋ edi udomo.” Mme idomo emi enehede ada nnyin akan ukeme nnyin esidi ke usɔp. Ke ini ifiɔk nnyin ye mbufiɔk mikemke, nnyin isiyom unwam ito mme usuŋ efen. Ke ererimbot ɔyɔhɔde ye mme etop, ŋkpɔ isipke ke ndikut mme usuŋ ndiyom mɔ. Nte ededi, mmem mmem, udomo ini item ke Mme Nke ɔnɔ nnyin eti usuŋ “Buɔtidem ke Abasi ke ofuri esit fo.”⁹ Nnyin iwut ndibuɔtidem ke Abasi ke ndifiak mbine Enye akpa ke ini nnyin isobode ye mme idomo uwem.

Ke mma nkekure ufɔk ŋwed ke Utah, ufɔk emana nnyin ema ekut akamba ndumek eke ebiet emi ndinamde utom nnyuŋ nam ufɔk nnyin. Ke ikurede ndibɔ item ye kiet eken ye Jehovah, nnyin imaikop ndausuŋ ndimen ufɔk nnyin nka ke usiak utin United States, ɔniɔŋde usuŋ ɔkpɔŋ ete mme eka ye nditɔ eka. Ke akpa, ŋkpɔ am aka ɔfɔn, ndien nnyin ima inim ndumek nnyin. Ekem ŋkpɔ ɔkpuhɔre. Ema esioŋo mme owo ke itie utom mbet, ndien ami mma nkut unana utom mme okuk ke ata ini oro eyen anwaŋ nnyin Dora ama amana enyenede akamba mfina nsɔŋidem ye unana anyan ini. Nte ikidude ye mme mfina emi, ami mbɔ ikoot ke Ufɔk Abasi emi ediyomde ata ini ye nwaidem.

Akananam ami nkutke utɔ mfina oro nko ama akan mi. Ami mma ntɔŋɔ ndibup mbume ke ndumek nnyin ikinamde ye mme edisɔŋɔ esie. Nnyin ima inyene idorenyin ke Jehovah, ka ana nte ɔfɔn. Ami ma nduɔ nnyɔŋ edem, ndien eketie nte iduhe owo emi edimumde mi.

Usen kiet mme ikɔ “Ku ubup ntak; bup se ami nyomde afo ekpep” edi ke ekikere ye esit mi. Idahaemi ami nehede ndu ke ndutimede. Ke ini ami nkanwana ye akap ndumek mi, Abasi okokot me ete enehede mbuɔtidem ke Enye. Ke ndise edem, emi ekedi ɔkpɔsɔŋ ini ke uwem mi—enye ekedi ini ami nkefiɔkde nte ke nkukure usuŋ ke ndikpep ndidot enyin ke Abasi ekedi ndidorenyin ke Enye. Ke mme udua etienede, ami nkut ye mkpaidem nte Jehovah ke utibede owutde uduak Esie ke ndidiɔŋ ufɔk emana nnyin.

Mme nti mme andikpep ye mme andikpene efiɔk ete ke nkɔri eke ifiɔk etibe kpɔt ke ini enɔde ekikere ye asip mfina. Ke ukem oro, Abasi okoot nnyin ete ikɔri ke ndidot enyin ke Enye ndibɔ ukpep otode ke ndiyom ke mfina ukpɔŋ. Ke ntre, nnyin imi inyene ɔsɔŋɔ te ke mbuɔtidem eke ededi nnyin ikinamde ke edem, mme mfina mbuɔtidem efen ke ebet ke iso. Abasi ke esese nkɔri ye nkaiso nnyin. Enye edi Adausuŋ ye ata Andikpeo emi ke kpukpru ini anamde man anwam nnyin ifiɔk awak kabaŋa edisana ukeme nnyin. Oro ke kpukpru ini eyesine mme ikoot ke iso ndinyene mbuɔtidem ke Enye esisit.

Ŋwed Mormon ekpep mme ndaha Abasi asidade ekpep nnyin ke ndinam eti ebuana ye nnyin. Ke Edi, Tiene Mi, nnyin ke mimi emi imikpep ibaŋa adaŋa nte Abasi ekedomode mbuɔtidem Nephi ese ke ini mme nditɔ eka esie ekedɔhɔde ete efiak eka Jerusalem ekebɔ usan brass. Ke akpa ndomo nse mmɔ ekekpude,mme nditɔ eka esie efiak edem ndien ema ebeŋe idem ndifiak edem ke mikamake usan brass. Edi Nephi emek ndisin ofuri mbuotidem esie ke Abasi ndien ama akan ɔbɔ usan oro.¹⁰ Ifiɔk oro ama ɔnɔ Nephi ɔsɔŋɔ ke Abasi ke ini utigha esie ɔkɔbuŋɔre ndien ufɔk emana ekesobo ye ɔbiɔŋ ke edisat isɔŋ Ŋko, Nephi emek ndinyene idorenyin ke Abasi, ndien ema enyaŋa ufɔk emana.¹¹ Mme ifiɔk edikan emi ama ɔnɔ Nephi ɔsɔŋɔ uko ke Abasi kabaŋa akama, utom mfina mbuɔtidem efen ke ndibɔb ubom.¹²

Otode ke ifiɔk emi, Nephi ama ɔsɔŋɔ ebuana esie ye Aasi ke ndiyire nnyuŋ nkaiso mbuɔtidem ye Enye. Abasi akama ukem udomo oro ye nnyin. Enye ɔnɔ nnyin ikoot ke ndisɔŋɔ ye ntotuŋɔ mbuɔtidem ye Emye.¹³ Ini kiet eke nnyin inyimede inyuŋ inamde ke ikoot, mbuɔtidem nnyin ke Aasi ɔkɔri. Edieke nnyin mibɔrɔke ikoot, nkɔri nnyin etre tutu nnyin imibeŋe idem ndinam ke obufa ikoot.

Eti mbuk edi ke misehe mbuɔtidem emiminyenede mme minyimeke ndinam ke Abasi ke edem, nnyin imikeme ndinyene mbuɔtidem mfin ye kpukpru usen ke akade iso. Ami menwɔŋɔ nte ini kiet kiet emi inamde, Abasi eyedu do ndimum nnyin, ndien ebuana nnyin ke ndidot enyen eye kɔri ɔsɔŋ tutu usen emi nnyin ididide kiet ye Enye ye Eyen Esie. Ntem nnyin iyikeme nditiŋ nte Nephi , “O Ɔbɔŋ, ami mmenyene mbuɔtidem ke afo, ndien nyebuɔtidem ke afo ke nsi nsi.”¹⁴ Ke enyiŋ Jesus Christ, amen.