Ndinam-akpanikɔ nsim Utit

Akananam ndi mbufo emekere nte mbufo ekemede edinam akpanikɔ nnɔ Abasi kini mbufo eduŋde ke ererimbot idiɔkŋkpɔ? Mmɔŋ ke mbufo eda ɔsɔŋɔ edisin ifik nyuŋ nkaiso edi-nam nti ŋkpɔ? Didie ke mbufo esifiɔk ata idara?

Ami nkere ke ifiɔk-ukpep eke David ye Goliath¹ ekeme ndiŋwam.

Ke Akani Testament, udim-ekɔŋ eke mbon Philistines ekeŋwana ekɔŋ ye nditɔ Israel, ndien ofuri usenubɔk ye ofuri mbubreyo, anyan-owo-ubom Philistine kiet ekekerede Goliath ama oyom eŋwan ye owo Israel kiet ekededi.

Ndise

David ye Goliath.

Kotu mbon Israel ama odu David, ekpri ekpeme erɔŋ emi ekenehede ekpri akan Goliath edi enyene ata akamba mbuɔtidem ke Jesus Christ! David ama enyime ndikiŋwana. Kpa nte edidem akaŋwanade ndikpan enye, edi David ama emek edinim iberedem esie ke Jesus Christ.

Ke usen edem, David ama aŋwana ye ekpe ye ɔmɔn nko. Otode ke ifiɔk-ukpep esie, enye ama ɔfiɔk ke Abasi ekekpeme enye onyuŋ anam enye akan. Eke David, ŋkpɔ eke ebehede Abasi ekedi ata akpan ŋkpɔ. Ntem, ndinyene ɔyɔhɔ mbuɔtidem ke Abasi eke midikpɔŋke enye, enye akataŋ ndɔnɔ itiat ition, emen utop-itiat esie, ndien aka ndiŋwana anyan-owo-ubom emi.

Ndise

Itiat ition eke David.

Ŋwed Abasi etiŋ ɔnɔ nnyin ete ke akpa itiat emi David okotopde ɔtɔ Goliath ke ɔkpɔ-iso, emi eketrede uwem esie.²

Kini David akadade itiat kiet man owot Goliath, enye akakama itiat ition. Ye ition! Emi anam mi nkere mbaŋa nte ami ndibeŋeke idem mi man nsobo ye ererimbot.

Nso kedi edieke mme itiat kiet-kiet eke David akpadade ɔnɔ ɔsɔŋɔ kiet emi nnyin iyomde man inyene edikan ke uwem nnyin? Nso ke mme itiat ition oro edi? Ami mmekere mme mmɔ ekpedi:

1. Itiat eke ima eke ami nnyenede nnɔ Abasi.

2. Itiat eke mbuɔtidem mi ke Andinyaŋa mi, Jesus Christ.

3. Itiat eke ifiɔk mi kabaŋa ata idiɔŋɔ mi.

4. Itiat eke ami ndikabare-esit kpukpru usen.

5. Itiat eke ami ndikut odudu Abasi.

Yak itiŋ ibaŋa nte nnyin ibɔde edidiɔŋ otode mme ɔsɔŋɔ emi.

Akpa, itiat eke ima eke ami nnyenede nnɔ Abasi. Ndima Abasi edi akpa akamba mbet.³ Ŋwed Enɔde ke Nsɔŋɔnda eke Iwaad ekpep nnyin ke: “Abasi ama mbufo. Enye edi Ete mbufo. Nsana-mma ima Esie ekeme ndi-nam mbufo ema Enye. Ini eke ima emi afo enyenede ɔnɔ Ete eke Heaven edide ata akpan odudu ke uwem fo, ediwak ubiere akabare emem.”⁴

Ima emi nnyin inyenede inɔ Abasi ye ata ebuana nnyin ye Enye ɔnɔ nnyin ɔsɔŋɔ emke nnyin iyomde edikpuhɔ esit nnyin ndien eneŋede emem ke ndikan afanikɔŋ nnyin.

Udiana, itiat eke mbuɔtidem mi ke Andinyaŋa mi, Jesus Christ. Ke ini emi Jesus Christ ekedide ke isɔŋ, Enye ɔkɔbɔ ndutuhɔ ke idiɔkŋkpɔ nnyin⁵ ndien Enye ekemen mfuhɔ, ubiak, mmemidem, ye udɔŋɔ eke ikpɔkidem ye eke ibuot nnyin odori ke Idemesie. Oro edi ntak emi Enye ɔfiɔkde usuŋ nte aŋwamde nnyin. Edinyene mbuɔtidem ke Jesus Christ ɔwɔrɔ edineŋede nnyene mbuɔtidem ke ifiɔk, ini, ima, ye odudu Esie ndisio isop ɔnɔ mme idiɔkŋkpɔ nnyin. Itiat mbuɔtidem ke Jesus Christ eyekan “ubiɔŋɔ“ ekededi ke uwem nnyin.⁶ Nnyin imikeme ndikan idiɔk ererimbot emi koro Enye ama akan oro ke akpa.⁷

Ɔyɔhɔ ita, itiat eke ifiɔk mi kabaŋa ata idiɔŋɔ mi. Edima prophet nnyin, President Russell M. Nelson, ekekpep nnyin ke mme ata akpan idiɔŋɔ nnyin edi nte nditɔ Abasi, nditɔ ediomo, ye mme mbet Jesus Christ.⁸

Ofuri ŋkpɔ ɔkpuhɔ kini ami ndiɔŋɔde owo eke ami nehede ndi.⁹ Ke ini eke ami nyikde ukeme mi, ami mmesiwakndifiak ntiŋ nnɔ idem mi ke ekikere mi mme ke ɔkpɔsɔŋ uyio, nte “ami ndi eyen-aŋwan nnɔ Abasi, ami ndi eyen-aŋwan nnɔ Abasi,” ke ediwak ini nte ami nyomde tutu ami ndifiak nkop uko ndika iso.

Ɔyɔhɔ inaŋ, itiat eke ami ndikabare-esit kpukpru usen. Ke ŋwed Enɔde ke Nsɔŋɔnda eke Iwaad , nnyin ikoot ke: Edikabare-esit idihe ufen eke idiɔkŋkpɔ; edi usuŋ emi Andinyaŋa osiode nnyin ke idiɔkŋkpɔ. Ndikabare-esit ɔwɔrɔ ndikpuhɔ―ndiŋwɔŋɔde mkpɔŋ idiɔkŋkpɔ nyuŋ ntiene Abasi. Oro ɔwɔrɔ ndinam-ɔfɔn nyuŋ mbɔ erifen-nnɔ. Oruk edikpuhɔ emi idihe edinam emi edinamde inikiet; edi ŋkpɔ eke edikade iso inam.”¹⁰

Iduhe ŋkpɔ ndomokiet emi ɔnɔde ntat-nyak nte edikop erifen-nnɔ eke Abasi nyuŋ ndiɔŋɔ ke nnyin imisana inyuŋ inam emem ye Enye. Erifen-nnɔ odu ɔnɔ kpukpru owo.

Ɔyɔhɔ itiat ition edi itiat eke ami ndikut odudu Abasi. Ediomi emi nnyin ikanamde ye Abasi, oruk nte mbon emi nnyin ikanamde ke edinam uduɔkmmɔŋ, ɔnɔ nnyin usuŋ ndikut odudu Abasi.¹¹ Odudu Abasi edi ata odudu emi aŋwamde nnyin ndiyɔ afanikɔŋ, inam nti ubiere, inyuŋ inam ukeme nnyin okpon ke ndiyɔ mkpɔsɔŋ ndaha. Oro edi odudu emi nnyin ikemede ndikɔri ke mme asaŋa-asaŋa ukeme emi nnyin iyomde.¹²

Ŋwed Enɔde ke Nsɔŋɔnda eke Iwaad anam aŋwaŋa ke: “Ediomi adian mbufo ye Ete Heaven ye Andinyaŋa. Mmɔ etara odudu Abasi ke uwem mbufo.”¹³

Yak itiŋ ibaŋa edidian oro. Emeti ini emi Christ ekpepde ukpuhɔde ekedude ke kotu ufɔk kiet emi ebɔpde edori ke itiat ye enye emi odorode ke ntan?¹⁴ Elder Dieter F. Uchtdorf anam aŋwaŋa: “Ufɔk isibɔhɔke oyobio koro ufɔk oro ɔsɔŋidem. Ufɔk nko isibɔhɔke oyobio koro itiat oro ɔsɔŋidem. Ufɔk oro esibɔhɔ oyobio koro esɔŋɔ etuak enye eyit ke ɔkpɔsɔŋ itiat oro. Edi ɔsɔŋɔ edidian ke itiat oro edi se inyenede ufɔn.”¹⁵

Ndise

Ufɔk emi ebɔpde edori ke itiat.

Edidian idem nnyin ye Jesus Christ eyenɔ nnyin uko ye mbuɔtidem ndika iso kotu mbon eke mikponoke se nnyin inimde ke akpanikɔ mme mbon eke efiikde nnyin. Christ okot nnyin ete inim Enye ke ekikere nnyin kpukpru ini;“Enye ɔdɔhɔ nnyin ete, “Ese mi ke ofuri ekikere mbufo.”¹⁶ Ndikere mbaŋa Andinyaŋa ɔnɔ aŋwaŋa ekiekere ndinam ubiere, ndinam ŋkpɔ ukopke ndik, ye ndidɔhɔ iŋ-iŋ ke ŋkpɔ emi misaŋake ye ukpepŋkpɔ Abasi.¹⁷ Ini eke usen mi ɔsɔŋde ndien editie nte ke ami ndikanke nyɔ aba, ndikere mbaŋa Christ eyeda emem ɔsɔk mi onyuŋ ɔnɔ mi idorenyin.

Didie ke nnyin ikpida ukeme ito odudu Jesus Christ emi? Ibɔrɔ edi ndinim ediomi nnyin ye edikɔri mbuɔtidem nnyin ke Jesus Christ.

Ami nkpenehere nyom David akama itiat kiet adian do; oro ekpedi itiat eke ikɔ ntiense mi. Ebɔp ikɔ ntiense nnyin eto mme ifiɔk-ukpep eke ŋkpɔ Abasi eke idem nnyin ke emi nnyin ifiɔkde edisana odudu oro ke uwem nnyin.¹⁸ Owo ndomokiet iduhe eke edimende ifiɔk oro ikpɔŋ nnyin. Ndidiɔŋɔ ŋkpɔ se nnyin idiɔŋɔ otode ke edidu uwem eke ifiɔk-ukpep ŋkpɔ Abasi inyeneke ekɔm-urua. Edinam akpanikɔ nnɔ ifiɔk oro ɔnɔnɔ nnyin uwɔrɔ-ufin. Oro ɔnɔnɔ nnyin idara! Edieke nnyin imade akpanikɔ, nnyin iyeyom enye, ndien inikiet eke nnyin ikutde enye, nnyin iyekpeme enye.¹⁹

Ukem nte ami mmekde itiat ɔyɔhɔ itiokiet, ami nkot mbufo nte esobo ye class, eboho, mme ufɔkemana mbufo enyuŋ ekere ebaŋa ewe ɔsɔŋɔ ke mbufo eyom ndinyene man edinyene mbuɔtidem ke Abasi ndien, ke ntre, ekan ererimbot.

Ndima ufan, Christ enyene udɔŋ ndisanŋa ye nnyin ke usuŋ isaŋ uwem nnyin. Ami ŋwɔŋɔ nnɔ mbufo, ke nte mbufo emumde esaŋ ukwak oro ekama, mbufo eyesaŋa ubɔk ke ubɔk ye Jesus Christ.²⁰ Enye eyenɔ mbufo ndausuŋ, ndien Enye eyenɔ mbufo ukpepŋkpɔ²¹ Otode ke ubɔk Esie , mbufo eyenyene ukeme edisuhɔde kpukpru Goliath eke ɔwɔrɔde ɔbiɔŋɔ ke uwem mbufo.

Ami nnɔ ikɔ ntiense nte ke idara odu ke edibɔŋ akam kpukpru usen, ke edikot Ŋwed Mormon kpukpru usen, ke edidia udia-ɔbɔŋ ofuri Usen-ederi, ye ke edika seminary—kpa ke edika ata usenubɔk. Idara odu ke ndinam eti-ŋkpɔ.

Idara odu ke edi-nam akpanikɔ nnɔ Abasi ofuri ekondo, Andinyaŋa ererimbot, Edidem mme ndidem. Idara odu ke ndidi mbet Jesus Christ.

Abasi edi Ete nnyin. Enye ɔdiɔŋɔ mme udɔŋ esit ye ukeme nnyin, ndien Enye enyene mbuɔtidem ke idem nnyin.

Ndima iwaad, Jesus Christ eyeŋwam mbufo ndinyene mbuɔtidem nkesim utit. Kabaŋa mme akpanikɔ emi ke ami ntiŋ ikɔ-ntiense mi ke enyiŋ Jesus Christ, amen.