Ikoot, Ku Duɔ

Mfin emi ami nyema nditɔŋɔ ke editie ntiense mbaŋa ofuri akpanikɔ emi odude ke esit mi ke Abasi okop akam nnyin onyuŋ ɔbɔrɔ mmɔ ke usuŋ idem esie.

Ke ererimbot ekedude ke mme ini unana-idorenyin, ubiak, edikpu, ye iduɔesit, nnyin imikeme ndidue nkere edinyene akwa iberedem ke ukeme idem owo ye edimemek, ukem nte ifiɔk ye ubiɔŋ emi otode ererimbot edi. Emi ekeme ndinam nnyin inim ata usuŋ ubɔhɔ ye uŋwam emi ekemede edibin mme afanikɔŋ eke uwem isɔŋ nduɔk ke edem.

Ndise

Ubet Ufɔkibɔk.

Ami mmeti ini kiet eke ami nkedude ke ufɔkibɔk nnɔ udɔŋɔ kiet, ndien ama ɔsɔŋ ɔnɔ mi ndide idap. Ini eke ami nnimede mme ikaŋ ndien ufɔk oro ekim, ami nyekut mbiet idiɔŋɔ kiet odude ke ceiling ke iso mi eke ɔdɔhɔde, “koot, ku duɔ.” Ke mkpaidem mi, ke edem usen oro ami nsuk nkut ukem etop oro afiakde odu ke ediwak ebiet eke ubet-ufɔk oro.

Ndise

koot, ku duɔ idiɔŋɔ.

Nsidi ntak emi etop oro ekenehede edi akpan-ŋkpɔ? Ini eke ami mbupde nurse mbaŋa etop oro, enye ete, “Enye edi man ɔbiɔŋɔ itah emi akpanamde ubiak eke ami nkenyenede ke akpa okpon.”

Uwem emi, ke uduot-obot esie, adada ubiak edi, usuk otode utip eke ikpɔkidem nnyin, usuk oto ke mmemidem mme ukut nnyin, usuk oto ke usuŋ nte mbon efen ekamade unen-edimek mmɔ, ndien usuk oto ke nte ikamade unen-edimek nnyin.

Nte odu eŋwɔŋɔ emi ɔsɔŋde odudu akan enye emi Andinyaŋa ke Idemesie akanamde kini Enye ɔdɔhɔde ete, “Ebeŋe, ndien eyenɔ mbufo; eyom, ndien mbufo eyekut; etuak, ndien eyesio usuŋ enɔ mbufo”?¹

Akam edi usuŋ nneme ye Ete nnyin ke Heaven emi enyimede nnyin ete “ikoot ndien ikuduɔ.” Nte ededi, odu mme ndaha emi nnyin ikpikerede ke owo ikopke ikoot koro nnyin ibɔhɔ iwiwa ibɔrɔ mme ibɔrɔ kiet emi edide se nnyin ikiyomde.

Emi ke ubakini adada ekesim ɔkpɔsɔŋ-ekiekere, mfuhɔ, mme edikpu. Edi ti ikɔ Nephi kabaŋa mbuɔtidem ke Abasi kini enye ɔdɔhɔde, “Didie kedi ke enye ikemeke nditeme mi, ete yak ami nkɔŋ ubom?”² Idahaemi, ami mbup mbufo, didie kedi ke Abasi ikemeke editeme mbufo, ete yak mbufo ekuduɔ?

Ndibuɔt-idem ke ibɔrɔ Abasi ɔwɔrɔ ndinyime ke mme usuŋ Esie idige mme usuŋ nnyin³ ndien ke “kpukpru ŋkpɔ eyetibe ke edikem ini mmɔ.”⁴

Akpanikɔ ke edidiɔŋɔ ke nnyin idi nditɔ eke edima ye enyene-mbɔm Ete ke Heaven akpana edi udɔŋ “ndikot” ke ɔkpɔsɔŋ akam diana ye ido “edi[bɔŋ] akam ke kpukpru ini, unyuŋ ukpaha [mba]; … man edinam [nnyin] ekpedi ke ufɔn eke [mme] ukpɔŋ [nnyin].”⁵ Kere-baŋa se ekikere eke Ete Heaven edide koro ke akam kiet-kiet nnyin iminam mkpe-ubɔk ke enyiŋ Eyen Esie Jesus Christ. Nso oruk odudu ye mbɔm, ami mmonim, ke ekewut ke ini nnyin inamde ntre!

Ŋwed Abasi ɔyɔhɔ ye mme uwutŋkpɔ eke mbon emi ekekotde Abasi mbak mmɔ ediduɔ. Helaman ye udim-ekɔŋ esie, kini ekutde ukut mmɔ, ema-ekot Abasi, eŋwaŋa ukpɔŋ mmɔ ke akam. Mmɔ ema ebɔ ɔsɔŋɔ, emem, mbuɔtidem, ye idorenyin, enyene uko ye nsinifik tutu mmɔ edinyene utit-uduak mmɔ.⁶

Kere-baŋa nte Moses ekpeke okotde onyuŋ atuade eyet ɔnɔ Abasi ke ini okutde idemesie ke ufɔt Ididuot Inyaŋ ye mbon Egypt emi ekperede man edinwana, mme Abraham ke ini anamde item ke ediwa eyen-eren esie Isaac.

Ami mmonim ke mbufo owo kiet-kiet emenyene ndien eyenyene ifiɔk-ukpep ke ebiet eke ibɔrɔ ikoot edidide ku duɔ.

Isua Edip-ye-duop ekebede, kini ŋwan mi ye ami ikibeŋede idem inɔ ndɔ eke obio ye ndɔ temple nnyin, nnyin ima ibɔ ikoot ɔdɔhɔde nnyin ete ke ebiat mme ndɔ obio efep otode ke edisin-ndinam-utom. Nnyin ikɔbɔ ikoot oro ke ɔyɔhɔ usen ita mbemiso edisim usen usɔrɔ oro. Ke ima ikiwana ukeme ke mme itie utom efen ndien ikwe itie emi ekpenamde, nnyin iditɔŋɔ edikop mmemidem ye eyihe ke nnyin idikemeke ndi-nam ndɔ nte ikiduakde.

Ŋwan mi ye ami “ikikot,” ediŋwaŋa ukpɔŋ nnyin inɔ Abasi ke akam. Ke akpatre, owo kiet edidɔhɔ nnyin abaŋa itie-utom kiet ke ekpri iduŋ kiet emi odude ke mkpere obio oro eke owo emi enye ɔfiɔkde ekedide mayor. Ke mibiatke ini, nnyin ima ika ikisobo ye enye inyuŋ ibup enye mme enye eyekeme ndidian nnyin ndɔ. Ke idaresit nnyin, enye ama enyime. Ewet-ŋwed esie ama eyire etiŋ ɔnɔ nnyin ete ke nnyin inyene ndibɔ ŋwed-itoro ke obio oro nyuŋ mmen kpukpru ŋwed eke ediyomde idi mbemiso ufɔt uwemeyo eke edem usen oro.

Edem usen oro, nnyin idika ekpri obio oro inyuŋ ika anwa polisi oro man ikiyom ŋwed emi ekeyomde. Ke mkpaidem nnyin, anam-utom oro ete ke imɔ idinɔhɔ nnyin ŋwed oro koro ediwak mkpri mme ɔdɔ-ndɔ esifefehe ekpɔŋ ufɔkemana mmɔ man edidibe enam ndɔ ke obio oro, emi nte ededi ikidige ntre ke eke nnyin. Nko, ndik ye mfuhɔ ama omum nnyin.

Ami nditi suŋ-suŋ nte ami nkotde Ete mi ke Heaven mbak ami ndiduɔ. Ami ndibɔ aŋwaŋa ekikere ke esit mi, afiakde etiŋ awak ete, “Ŋwed eke temple, ŋwed eke temple.” Ami ke usɔp nsio ŋwed temple mi nyuŋ nyak nnɔ owo-utom oro, ke mkpaidem eke ŋwan mi.

Ekedi mkpaidem ŋkpɔ ke nnyin ikinyene kini nnyin ikopde nte owo-utom oro etiŋde ete, Nsidi ntak eke afo mukutiŋke unɔ mi ke mbufo eto Ufɔk Abasi Jesus Christ mme Ndisana Owo ke Ukperedem Usen? Ami mmediɔŋɔ ufɔk Abasi mbufo mfɔn-mfɔn.” Enye ke usɔp ama ɔtɔŋɔ ndinam ŋwed oro. Ama enehede akpa nnyin idem kini owo-utom oro ɔkpɔŋde anwa oro itiŋke ikɔ ndomokiet.

Minit Aba-ye-duop edibe, ndien enye ifiakke idisim. Ekedi ke ata 11:55 ke usenubɔk oro, ndien nnyin ikinyene ufɔt uwemeyo kpɔt man ikiyak mme ŋwed oro inɔ. Ibighike enye ɔbiɔŋɔde akama ediye eyen-ebua onyuŋ ɔdɔhɔ nnyin ke ebua oro edi enɔ ndɔ nnyin ndien ayak ebua oro ɔnɔ nnyin diana ye ŋwed oro.

Nnyin imaifehe ika itie-utom eke mayor oro ye ŋwed nnyin ye obufa ebua nnyin. Ekem nnyin ikut ŋkpɔ-isaŋ eke itie-utom awatde etiene nnyin. Ami ntuak-nda kiso moto oro. Moto oro odop ada, ndien nnyin ikut ewet-ŋwed ke esit moto oro. Ke okutde nnyin, enye ete, “Ami mmedue; ŋkɔdɔhɔ mbufo uwemeyo. Ami nnyene ndika nkanam ekpri utom efen.”

Ami ndisuhɔde idem mi ke ndobo uyo, nkoot Ete Heaven mi ke ofuri esit mi, mbup inikiet efen nyom uŋwam mbak “ndi duɔ.” Usɔp-usɔp utibe-ŋkpɔ oro ama etibe. Ewet-ŋwed oro editiŋ ye nnyin ete, “Mbufo emenyene ediye ebua. Mmɔŋ ke ami mkpekeme ndikut ebua kiet ntem nnɔ eyen-eren mi?”

Nnyin iwiwa ibɔrɔ ete, “Enye edi okuo.”

Ewet-ŋwed edise nnyin ye mkpaidem ndien ete, “Ɔfɔn, yak nnyin ika itie-utom ikinam mbeŋeidem oro.”

Ke ufaŋ usen iba, ema edian Carol ye ami ke ndɔ obio, nte ikiduakde, ndien ekem, ema edian nnyin ɔtɔkiet ke Lima Peru Temple.

Nte ededi, nnyin inyene nditi ke ikoot edi ŋkpɔ mbuɔtidem ye edinam—mbuɔtidem man ɔfiɔk ke nnyin iminyene Ete Heaven kiet emi ɔbɔrɔde mme akam nnyin nte asaŋade ye anana-adaŋa ifiɔk Esie, ndien ekem edinam emi ekemde ye se nnyin ikibupde iyom. Edibɔŋ-akam—ikoot—ekeme edi-di idiɔŋɔ idorenyin nnyin. Edi ndinam ŋkpɔ ke ikurede akam edi idiɔŋɔ ke mbuɔtidem nnyin edi akpanikɔ—mbuɔtidem emi edomode ke mme ndaha eke ubiak, ndik, mme edikpu.

Ami nkere yak mbufo ekere-ebaŋa se itienede emi:

1. Ofuri ini ekere ebaŋa Jehovah nte akpa ŋkpɔ unwam emi eyomde.

2. koot, ku duɔ. Ewɔŋɔde etiene Abasi ke akam akpanikɔ.

3. Ke ekurede edibɔŋ akam, enam kpukpru se ekemede man ebɔ mme edidiɔŋ emi mbufo ekebɔŋde akam eyom.

4. Esuhɔre idem mbufo man enyime ibɔrɔ ke ini Esie ye ke usuŋ Esie.

5. Ekutre! Ekaiso esaŋa ke usuŋ ediomi kini mbufo ebetde eyom ibɔrɔ kiet.

Ndusuk odu owo kiet ke ata idahaemi emi, otode ke mme ndaha, ekekopde ke ebiet nte ke enye ekpere ediduɔ ndien ke eyema man okot nte Joesph Smith akanamde kini atuade osioro uyo ete: “O Abasi, afo odu ke mmɔŋ? … Adaŋa didie ke ubɔk fo editre?”⁷

Kpa ke mme oruk ndaha nte emi, ebɔŋ akam ye “ndaha ŋkpɔ Abasi,” nte President Russell M. Nelson ekekpede,⁸ koro ekop mme akam mbufo kpukpru ini!

Ti ikwɔ emi:

Nte nnyin ibɔŋde akam nnyin imikeme ndikop mfari eke Ete Heaven nnyin, emi ɔkɔnde Ikpɔŋ-ikpɔŋ Eyen Esie emi Enye Obonde man edi-nam mbiomo nnyin efere, koro edieke nnyin ikotde iyom Abasi, ami nnɔ ikɔ-ntiense ke nnyin ididuɔhɔ. Ke enyiŋ Jesus Christ, amen.