“Edobo, eyuŋ Efiɔk Ke Ami Ndi Abasi”

Ke 1833, ikɔt Abasi emi ekedude ke Missouri ekedi mbon emi enehede ekɔbɔ. Mbon-ntime ema ebin mmɔ esio ke ufɔkiduŋ mmɔ ke Jackson County, ndien ubak mbon Ufɔk Abasi ema edomo edidian idem mmɔ ke mme obio efen emi ekekperede. Edi ukɔbɔ okosuk akaka iso, ndien ndik mkpa ama awak. Ke mme ndaha afanikɔŋ emi, Jehovah akayarare item emi ɔnɔ Prophet Joseph Smith ke Kirtland, Ohio ete:

“Mmɔdo, yak esit fo ɔbɔ ndɔŋesit ke Zion; koro kpukpru ukpɔŋ esine ke ubɔ mi; Edobo enyuŋ efiɔk ke Ami ndi Abasi”³

Ami mmonim item Jehovah ete edobo esine awak akan edinehede ntre editiŋ-ikɔ mme edisasaŋa. Ndusuk uduak Esie edi man nnyin iti inyuŋ iberedem ke Enye ye odudu Esie “ke kpukpru ini ye ke kpukpru ŋkpɔ, ye ke kpukpru ebiet emi [nnyin] ikpidude.”⁴ Ntem, “edobo” ekeme edidi usuŋ nditi nnyin edise Andinyaŋa ke ofuri ini nte akpatre usuŋ ndobo ŋkpɔ-Abasi eke ukpɔŋ emi ɔsɔŋɔde nnyin idem ndinam nyuŋ nkan mkpɔsɔŋ ŋkpɔ.

Kpukpru ini ata mbuɔtidem esiwuk-enyin ke onyuŋ ese Obɔŋ Jesus Christ—ke Enye nte Edisana ye Ikpɔŋ-ikpɔŋ Eyen eke Ete Nsinsi ye ke Enye ye erifak utom emi Enye akanamde okure.

“Koro enye ama ɔbɔrɔ utit ibet, ndien onyuŋ ada kpukpru mmɔ eke enyenede mbuɔtidem ke enye, ndien mmɔ eke enyenede mbuɔtidem ke enye eyemum kpukpru nti ŋkpɔ ekama, mmɔdo enye eyebɔ ntak nditɔ owo.”⁵

Jesus Christ edi Andifak nnyin,⁶ Esin-emem nnyin,⁷ ye Iberedem nnyin⁸ ye Nsinsi Ete ye itiat emi nnyin ikpibɔpde ɔsɔŋɔ ŋkpɔ-Abasi eke uwem nnyin idori.

Helaman anam anwaŋa ete, Ti, ti ke edi itiat eke Andifak nnyin, emi edide Christ, eyen Abasi, ke ana nte afo ɔbɔp ukot-ufɔk; fo kini andidiɔk edidɔŋde akwa ofum esie, iŋ, mme eto-eduat esie ke ɔkpɔsɔŋ ofim, iŋ, kini kpukpru mfina esie ye ɔkpɔsɔŋ oyobio esie edimiade fi, enye idinyeneke odudu ndiduri fi nsin ke ndutahade ukpe ye anana-utit nsobo, ke ntak itiat emi ekebɔpde fi edori, emi edide ɔsɔŋɔ ukot-ufɔk, ukot-ufɔk emi edieke mme owo ebɔpde ididuɔhɔ.”⁹

Idiɔŋɔ Christ nte “itiat” eke nnyin ikpibɔpde ɔsɔŋɔ uwem nnyin idori edi ata akpan ŋkpɔ item. Mbɔk ese ke ufaŋ-ŋwed emi ke Andinyaŋa idige ukot-ufɔk. Edi, ema eteme nnyin ete ibɔp ɔsɔŋɔ ŋkpɔ-Abasi eke idem nnyin idori ke Enye.¹⁰

Ukot-ufɔk edi ubak ŋkpɔ eke edibɔp ufɔk emi adade enye adiana ke isɔŋ. Ata ukot-ufɔk ɔnɔnɔ ukpeme ke edibuat ŋkpɔ uduot-obot ye ediwak odudu ndubiara efen. Eti ukot-ufɔk ŋko eyedeme udobi ufɔk esin ke akamba ebiet man etre edifik esit isɔŋ ndien ada ukem-ukem enyɔŋ ɔnɔ se edibɔpde.

Ndise

Ufɔk emi enyenede ɔsɔŋɔ ukot-ufɔk.

Ata ye eti ediyiri-kiet ke ufɔt isɔŋ ye ukot-ufɔk edi akpan ŋkpɔ edieke ufɔk oro anade nte odu onyuŋ ɔsɔŋidem ebighe. Ndien eke akpan mme utɔ edibɔp emi, ekeme edikama ediwuk-eŋwen ye mme ukwak edian ukot-ufɔk eke ufɔk kiet enɔ “itiat-isɔŋ”, ɔkpɔsɔŋ, ɔsɔŋɔ itiat emi odude ke ŋkpɔ-utom idak-isɔŋ oruk nte ntan ye nkwaha-ntan.

Ndise

Ufɔk emi eyitde ke ana-idak itiat.

Ke ukem usuŋ oro, ukot-ufɔk eke uwem nnyin ana adiana ke itiat Christ edieke nnyin inade nte isɔŋɔ idu inyuŋ ituak-ida. Ekeme edida ndisana ediomi ye edinam eke mfiak-men-ndi ikɔ Abasi Andinyaŋa edomo ye mkpri ukuak eŋwen ewukde ye mme ukwak emi edade man eyire ufɔk enɔ itiat-isɔŋ. Ini ekededi nnyin inehede ibɔ, ifiak-inam, iti, itɔŋɔ-ntak inam ndisana ediomi, mme iwuk ŋkpɔ-Abasi nnyin enehede eyire ɔsɔŋ ndien atuak-ada ke “itiat” Jesus Christ.

“Ke ntre, owo eke enimde Abasi ke akpanikɔ ekeme ye ɔsɔŋɔ idorenyin ɔnɔ edifɔn ererimbot, iŋ, kpa ebiet kiet ke ubɔk nnasia Abasi, idorenyin emi edide oto mbuɔtidem, anamde iwuk kiet ɔnɔ ukpɔŋ nditɔ owo, emi edinamde mmɔ esɔŋɔ etuak-eda, kpukpru ini edu ke nti utom, esinde mmɔ enɔ Abasi ubɔŋ.”¹¹

Editɔt ye edikɔri ke “ini akade iso,”¹² “eti-ido [eyeyɔhɔ nnyin] ekikere aka iso,” “uko nnyin [eyeka iso enyene nsɔŋɔ nda] kiso Abasi,” ndien Edisana Spirit [edi] nsaŋa [nnyin] ikpukpru ini.”¹³ Nnyin ikabare isɔŋɔ-ida, isin-oruŋ, iwuhɔ, inyuŋ iduŋ ke ifure.¹⁴ Nte ebɔpde ukot-ufɔk uwem nnyin edori ke Andinyaŋa, nnyin ifɔn-iso edidu ke ndobo man ndinyene ɔsɔŋɔ ke Abasi edi Ete nnyin ke Enyɔŋ, ke nnyin idi nditɔ Esie, ndien ke Jesus Christ edi Andinyva nnyin.

Jehovah ɔnɔ mbiba ndisana ini ye ndisana ebiet man anwam nnyin ndifiɔk nyuŋ mkpep mbaŋa ata ndobo eke ukpɔŋ nnyin emi.

Nte uwutŋkpɔ, Sabbath edi edisana usen Abasi, edisana ini kiet esiode enim nditi nyuŋ mkpono Ete ke enyiŋ Eyen Esie, ndibuana ke mme edinam itie-oku, nyuŋ mbɔ nyuŋ mfiak-nam ndisana ediomi. Kpukpru udua nnyin imikpono Abasi kini ediduŋɔde ŋwed Abasi ke ufɔkiduŋ nnyin ndien ŋko nte “mbio-obio ye ikɔt Abasi”¹⁵ kini udia-ɔbɔŋ ye mme esop efen. Ke edisana usen Esie emi, ekikere, edinam, ye edu nnyin edi idɔŋɔ emi inɔde Abasi ye idiɔŋɔ ima emi nnyin inyenede inɔ Enye.¹⁶ Ofuri usen Ederi, edieke nnyin ikemede, nnyin imikeme edidu ke ndobo ndien idiɔŋɔ ke Abasi edi Ete ke Enyɔŋ, ke nnyin idi nditɔ Esie, ndien ke Jesus Christ edi Andinyaŋa nnyin.

Akpan edinam eke ukpono Sabbath nnyin edi “edika ufɔk akam nyuŋ nyak mme udia-ɔbɔŋ [nnyin] nnɔ ke edisana usen [Abasi].”¹⁷ [Mme] “ufɔk akam” emi nnyin ibohode ke Sabbath edi mme ufɔk mbono ye mme ufɔk efen emi enyimede—ndisana ebiet eke uteŋe, ntuak-ibuot, ye edibɔ-ukpep. Ekeda unen-odudu itie-oku ediɔŋ ufɔk mbono nte ebiet emi Spirit Abasi okpodude ye ebiete emi nditɔ Abasi ekpedide “ndiyene ifiɔk eke Andifak mmɔ.”¹⁸ Edieke nnyin iyimede, nnyin imikeme ndidu ke ndobo ke ndisana ebiet ntuakibuot nnyin ndien inehede itim idiɔŋɔ ke Abasi edi Ete nnyin ke Enyɔŋ, ke nnyin idi nditɔ Esie, ye ke Jesus Christ edi Andinyaŋa nnyin.

Temple edi edisana ebiet efen esiode akpan-akpan enim enɔ ntuak-ibuot ye edi-nam ŋkpɔ nnɔ Abasi nyuŋ mkpep nsinsi akpanikɔ. Nnyin imikere, inam-edinam, inyuŋ isine-ɔfɔŋ isio-isio ke ufɔk Jehovah ikan mme ebiet ekededi emi nnyin iwakde ndika. Ke edisana ufɔk Esie, edieke nnyin ikemede, nnyin imikeme ndidu ke ndobo ndien idiɔŋɔ ke Abasi edi Ete ke Enyɔŋ, ke nnyin idi nditɔ Esie, ndien ke Jesus Christ edi Andinyaŋa nnyin.

Mme akpan ntak eke nsasana ini ye edisana ebiet enehede edi ukem-ukem: man ifiak iwuk enyin ke Ete nnyin ke Enyɔŋ ye uduak Esie, ke Obɔŋ Jesus Christ ye Erisio-isop Esie, uyama odudu eke Edisana Spirit, ye mme enwɔŋɔ emi asaŋade ye nsana edinam ye ediomi eke mfiak-men-ndi ikɔ Abasi Andinyaŋa

Mfin emi ami mfiak ntiŋ ukpepŋkpɔ eke ami nkebemde iso nsɔŋɔ ntiŋɔ ŋwut. Ufɔkiduŋ nnyin enyene edidi akpatre ebuana eke mbiba nsasana ini ye edisana ebiet emi mme owo ye mme ufɔkemana ekemede edidobo enyuŋ ediɔŋɔ ke Abasi edi Ete nnyin ke Enyɔŋ, ke nnyin idi nditɔ Esie, ndien ke Jesus Christ edi Andinyaŋa nnyin. Ndikpɔŋ mme ufɔkiduŋ nnyin man ikituak-ibuot ke Sabbath ye ke ufɔk Jehovah enehede edi akpan ŋkpɔ. Edi ke nnyin edifiak nyɔŋ ufɔkiduŋ nnyin ye ekikere ŋkpɔ-Abasi ye ɔsɔŋɔ ikibɔde ke ndisana ebiet oro ye mme edinam ke nnyin idisɔŋɔ idem nnyin ke mme akpan uduak eke uwem inyuŋ ikan mme idomo emi odude ke idiɔk ererimbot nnyin emi.

Nkaiso ifiɔk-ukpep nnyin edika Sabbath, temple, ye ufɔkiduŋ enyene ediyɔhɔ nnyin ye odudu Edisana Spirit, diana ye nkaiso ye ɔsɔŋɔ ediomi ediyiri nnɔ Ete ye Eyen, ye “idorenyin uŋwana emi ɔfɔnde ama”¹⁹ ke mme nsinsi enwɔŋɔ eke Abasi.

Nte ufɔkiduŋ ye Ufɔk Abasi ebohode ɔtɔkiet edɔŋɔkiet ke Christ,²⁰ nnyin imikeme ndikop mfihe ke kpukpru edem, edi nnyin idikopke mfina ke ekikere ye ke esit nnyin. Nnyin imikeme ediduo esit nto mme ndaha ye afanikɔŋ nnyin, edi nnyin iduhe ke unana idorenyin. Ekeme edikɔbɔ nnyin, edi nnyin nko iyefiɔk ite akananam nnyin idige ikpɔŋ.²¹ Nnyin imkeme edibɔ ɔsɔŋɔ spirit man ikabare ndien isɔŋɔ, ituak-ida, inyuŋ inam akpanikɔ.

Ami ŋwɔŋɔ ke nte nnyin ibɔpde ukot-ufɔk uwem nnyin idori ke “itiat” Jesus Christ, Edisana Spirit eyediɔŋ nnyin man ibɔ ndobo ukpɔŋ eke idem nnyin ye eke ŋkpɔ-Abasi emi edinamde nnyin idiɔŋɔ inyuŋ iti ke Abasi edi Ete nnyin ke Enyɔŋ, ke nnyin idi nditɔ Esie, Jesus Christ edi Andinyaŋa nnyin, ndien ke nnyin imikeme edi-nam inyuŋ ikan mkpɔsɔŋ ŋkpɔ.

Ami mmedara nditie ntiense ke Abasi edi Ete nnyin ke Enyɔŋ, nnyin idi nditɔ Esie, ndien Jesus Christ edi Andifak nnyin ye “itiat” erinyaŋa-ukpɔŋ nnyin Ami ntiŋ ikɔ ntiense emi ke edisana enyiŋ Jesus Christ, amen.