Enyene-odudu, Edisana Ndaha eke Ukpepŋkpɔ Christ

Ke mme isua ekebede, ŋwan mi, Ruth; eyenaŋwan nnyin, Ashley, ye ami ima ibuana ye mbon-isaŋ efen ke ndika mbre-mmɔŋ kiet ke obio Hawaii ke United States. Kayak edi ekpere mmɔŋ, mbiet-ubom kiet, emi andiwat etiede ese iso ndien akama enyene-ndidek udeŋ iba man oduri aka iso-ye-edem ke nkaŋ kiet ndien ekem ke nkaŋ eken. Uduak ekedi man awat ekesim isuɔ iba ebe mben-esuk Oahu onyuŋ afiak awat onyɔŋ. Ami mma nnyene-uko sia, nte akparawa eren, ami mma nsiwat kayak mbe mme ŋkpɔdiɔhɔ-mmɔŋ eke ikpɔ-obot. Ntaŋidem isinamke sifɔn, ndi esinam?

Adausuŋ nnyin ama ɔnɔ mme item onyuŋ owut nnyin mme kayak mmɔŋ emi nnyin idikamade. Mmɔ ema ekpuhɔ ekpɔŋ mbon eke ami nkewatde ke akpa ini. Akpakana nte ami ntie ke enyɔŋ kayak oro, edi nkutie idak esit esie. Ini eke ami ndorode ke kayak oro, udobi ufɔt idem mi ama okoŋ akan enye eke ami nkemeheke, ndien ami nkinyeneke nsɔŋɔ-nda ke mmɔŋ.

Nte nnyin iwatke iwɔrɔ, ami mma ŋwat nsɔp-nkan Ruth ye Ashley. Ke esisit ini, ami mma mbe mkpɔŋ mmɔ anyaŋ usuŋ. Ke ntaŋidem eke ediwat-mbe okim, ami mma ntre ediwat nyuŋ nda mbet mmɔ man ewat edisim mi. Akamba mbufut mmɔŋ kiet—ɔyɔŋde centimeter Duopeta¹—amia mben kayak okim ndien osio mi ɔduɔk ke mmɔŋ. Ke ini eke ŋwɔŋɔde kayak oro nim nnen-nnen nyuŋ ŋwana ndifiak ndoro ke enyɔŋ, Ruth ye Ashley ema ewat ebe mi, edi ami ndikop mmemidem ke ndifiak ntɔŋɔ ŋwat. Mbemiso ami ndinyene ukeme, mbufut efen, enye emi enehede ɔsɔŋ—ekperede centimeter Edip²—amia kayak mi onyuŋ afiak osio mi otop ɔduɔk. Ke ini eke ami ŋwanade ndinehede kayak nim, ami nkop mmemidem anamde ami nkere ke ami ndikemeke ndidɔk ndoro ke enyɔŋ.

Ke okutde ndaha mi, adausuŋ ama awat edisim onyuŋ enehede kayak mi onim, anamde emem ɔnɔ mi ndidɔk ndoro ke enyɔŋ. Ini emi enye okutde ke ami nnyeneke ukeme ediwat ke idem mi, enye ediwaŋ uruk ediduri ke kayak mi ndien ɔtɔŋɔ ediwat, ediduri mi awat ye enye. Ibighike ami mma nnyene ukeme ndien ntɔŋɔ ediwat ɔfɔn ke idem mi. Enye ama atat uruk ediduri oro osio, ndien ami ndiwat nkesim akpa isuɔ ke idem mi. Kini ndisimde, ami mma nduɔ ke isɔŋ ke ntan oro, ŋkop mmemidem.

Ke ini eboho oro eme eke eduɔk-odudu, suŋ-suŋ adausuŋ ɔdɔhɔ mi ete, “Ete. Renlund, edieke afo osuk awatde aka, ekpeme ndaha uwat fo, ami nkere ke afo eyewat ɔfɔn.” Ami mma ntiene item esie nte nnyin ikiwatde ikisim ɔyɔhɔ isuɔ iba ndien iwat ifiak ika ebiet ntɔŋɔ uwat nnyin. Inikiet mme iba adausuŋ ama esiwat adian onyuŋ ɔdɔhɔ ke ami mmewat ɔfɔn eti-eti. Ke mme ikpɔ mbufut mmɔŋ akamiade kayak okim ke mben esie, edi ami nkiwɔrɔke nduɔ.

Ke editiŋ-enyin ŋwat kayak oro, ami ndinyene ifure ye eti nka-iso, ŋwat mbe mme odudu mbufut mmɔŋ emi akamiade mi oto ke mben kayak oro. Ukem-ukem ukpep emi odu ke mme uwem ŋkpɔ Abasi nnyin. Nnyin ikabare ibiara ke ini nnyin idade ibet ndien akpan-akpan ke ini nnyin itreke ediwat nka iso.³ Edieke nnyin inyeneke eti ndaha ke edika iso “ŋwat” nkesim Andinyaŋa, nnyin imibɔhɔ ndien inehede inyene ukpeme sia uwem nsinsi nnyin ɔkɔŋɔ ke nnyin edibuɔt idem ke Enye.⁴

Enam ndaha ŋkpɔ-Abasi “ke ofuri ini uwem nte nnyin ikade iso iyire ke ukpep-ŋkpɔ Christ.”⁵ President Russell M. Nelson ekpep ke, ndinam ntre, “emen enyene-odudu edisana ndaha edi.”⁶ Ke akpanikɔ, akpa ŋkpɔ eke ukpepŋkpɔ Christ—oruk nte mbuɔtidem ke Ɔbɔŋ Jesus Christ, erikabare-esit, ediduk ke ebuana ediomi ye Jehovah ke uduɔk-mmɔŋ, edibɔ enɔ Edisana Spirit, ye ediyɔ nkesim utit⁷—ididihe ke edinyene ifiɔk-ukpep ke nte ini kiet, edimek mme ŋkpɔ edinam kiet. Ata akpan-akpan, “ediyɔ nsim utit” idige usuŋ efen ke ukpepŋkpɔ Christ—nte ke nnyin imikure mme akpa ŋkpɔ inaŋ ndien itre do, idita edet nnyin, ndien itie ibet mkpa. Ihn-ihn, ndiyɔ nsim utit edi edifiak nyuŋ nehede mfiak nam mme akpa ŋkpɔ efen ke ukpepŋkpɔ Christ, anamde “enyene-odudu, edisana ndaha” emi President Nelson ekemende owut.⁸

Edifiak-nam ɔwɔrɔ ke nnyin imifiak ikpep mme akpa ŋkpɔ eke ukpepŋkpɔ Christ ke ofuri eyo uwem nnyin. Mfiak-nam ɔwɔrɔ ke nnyin imibɔp idori inyuŋ inam ɔfɔn ye edifiak-nam kiet-kiet. Okposuk ke nnyin imifiak inam mme akpa ŋkpɔ oro, nnyin ikanakere ke mme ekara kpɔt kesioho nnyin edisaŋa ke usuŋ nkaiso. Edi, nnyin imisaŋa ikpere Jesus Christ ini kiet-kiet oto ke ekara oro.

Ndaha esine edisɔp ye ndausuŋ.⁹ Edieke ami mkpewatde kayak oro ke odudu ke ukwaŋ usuŋ, ami mkpekenam akwa ndaha, edi ami mkpesimke ebiet akanade nte nkesim. Ukem-ukem oro, ke uwem, nnyin inyene “ediwat” mbine Andinyaŋa man itiene Enye.¹⁰

Ana nte ebɔbɔk mbuɔtidem nnyin ke Jesus Christ ke kpukpru usen.¹¹ Edi-bɔk enye ke nte nnyin ibɔŋde akam, ikoot ŋwed Abasi, ikere ibaŋa mfɔnido eke Abasi, ikabare-esit inyuŋ itiene ntim Edisana Spirit ke kpukpru usen. Ukem nte mifɔnke ke nditre edidia kpukpru mme udia nnyin tutu ekesim Usen Ederi ndien ida esisit ini inehede idia ofuri udia eke udua oro, inɔhɔ spirit ɔsɔŋɔ ke edikpan edu edibɔk ikɔ ntiense nnyin nnɔ usen kiet ke udua.¹²

Ini nnyin inyenede ubiɔŋ inɔ mme ikɔ ntiense nnyin,¹³ nnyin iminyene ndaha ŋkpɔ Abasi ndien suŋ-suŋ idinyene ata mbuɔtidem ke Jesus Christ, ndien ukpepŋkpɔ Christ akabare edi akpan ŋkpɔ ɔnɔ ntak emi uwem odude.¹⁴ Ukem oro ke ndaha ɔsɔŋɔ ke nte nnyin iŋwanade edinim ibet Abasi inyuŋ ikabare-esit. Erikabare-esit edi ŋkpɔ-idaresit onyuŋ anam nnyin ikpep ito ndudue nnyin, emi edide ntak eke nnyin idikɔride ke nsinsi. Nnyin iminyene mme ini emi nnyin ididuɔde ke mme kayak nnyin ndien ikut idem nnyin ke ntotuŋɔ mmɔŋ. Otode erikabare-esit, nnyin imikeme ndifiak nkedoro ke enyɔŋ inyuŋ ika-iso, isehe akaŋ mbifaŋ emi nnyin ikiduɔde.¹⁵ Akpan ubak ŋkpɔ ke nnyin ikitreke ke usuŋ.

Udiana akpan ŋkpɔ ke ukpepŋkpɔ Christ edi uduɔkmmɔŋ, emi esinede uduɔkmmɔŋ eke mmɔŋ ye, otode ndori-ubɔk, uduɔkmmɔŋ eke Edisana Spirit.¹⁶ Kini uduɔkmmɔŋ edide edinam kiet, nnyin imifiak inam ediomi uduɔkmmɔŋ nnyin edi obufa ke ini nnyin idiade udia-ɔbɔŋ. Udia-ɔbɔŋ idaha itie uduɔkmmɔŋ, edi oro eyiri mme akpan ŋkpɔ ke ukpepŋkpɔ Christ—mbuɔtidem ye erikabare-esit—diana eribɔ Edisana Spirit.¹⁷ Nte nnyin inehede ibuana ke udia-ɔbɔŋ,¹⁸ nnyin imikoot Edisana Spirit isin ke uwem nnyin, ukem nte ke ini ekenamde nnyin baptism ye ndori-ubɔk.¹⁹ Nte nnyin inimde ediomo emi eketiŋde ewut ke mme akam udia-ɔbɔŋ, Edisana Spirit edikabare edi nsaŋa nnyin.

Nte Edisana Spirit enyenede akwa odudu ke uwem nnyin, nnyin idikɔri inyuŋ idifiak inam edu-uwem nnyin ɔkɔri. Esit nnyin ɔkpuhɔ. Ndaha nnyin ke ndinam idiɔk osuhɔre. Udɔŋ nnyin ke ndinam eti ɔkɔri tutu nnyin kpɔt idiyom “ndinam eti kpukpru ini.”²⁰ Ndien nnyin ke ntre idinyene odudu heaven emi iyomde man iyɔ isim utit.²¹ Mbuɔtidem ama ɔkɔri, ndien nnyin ibeŋeidem edifiak nam enyene-odudu, edisana ndaha oro inikiet efen.

Nkaiso ke ndaha ŋkpɔ-Abasi eyenem nnyin inam ndadiana ediomi ye Abasi ke ufɔk Ɔbɔŋ. Ediwak ediomi ada nnyin ekpere Christ onyuŋ ɔsɔŋɔ eyiri nnyin ye Enye. Otode ke mme ediomi emi, nnyin inyene akamba ufaŋ edinyene odudu Esie. Ndinam aŋwaŋa, ediomi uduɔŋmmɔŋ ye eke temple idige, ke esit ye idem mmɔ, ntɔŋɔ odudu. Ntɔŋɔ odudu edi Ɔbɔŋ Jesus Christ ye Ete nnyin eke Heaven. Ndinam nyuŋ nnim ediomi asiak usuŋ ɔnɔ odudu Mmɔ ediduk ke uwem nnyin. Nte nnyin inimde mme ediomi emi, nnyin ikabare idi adia-akpa ke kpukpru ŋkpɔ emi Ete Heaven enyenede.²² Ndaha oro eke edinim ukpepŋkpɔ Christ ɔnɔde idisɔŋɔke edikpuhɔ edisana uduot-obot nnyin nsin ke nsinsi akaŋa kpɔt, edi oro ŋko eyenam nnyin inwam mbon efen ke usuŋ emi odotde.

Kere-baŋa nte ɔsɔp-usɔp adausuŋ akanwamde mi ke ami mma nkeduɔ ke kayak oro. Enye idibuatke ke anyan-usuŋ ye unana uŋwam mbume, oruk nte, “Mr. Renlund, nso ke anam emi ke mmɔŋ?” Enye ikiwatke idisim ndien edisua ɔnɔ mi, ete, “Mr. Renlund, afo ukpoduhe ke ndaha emi edieke afo ekpekenehede enyene nsɔŋidem.” Enye ikitɔŋɔke ediduri kayak mi kini ami nsuk ŋwanade edidɔk nkedoro ke enyɔŋ esie. Ndien enye ikisuaha inɔ mi kiso eke eboho oro. Edi, enye ama ɔnɔ mi unwam eke ami nyomde kini eke ami nkeyomde. Enye ama ɔnɔ mi item kini eke ami mkpekopde. Ndien enye ama edi man edinɔ mi nsɔŋɔnda.

Nte nnyin isinde unwam inɔ mbon efen, inaha nte nnyin ibup mme unana unwam mbume mme editiŋ inwaŋ-inwaŋ. Ediwak owo emi ekutde ukut ediɔŋɔ ete ke mmimɔ imikut ukut. Inaha nte nnyin ibiom owo ikpe; ubiere-ikpe nnyin isinke uŋwam inyuŋ isineke idara ndien ke ediwak ini esinana-akpanikɔ.

Edida idem nnyin ndomo ye mbon efen ekeme ndinam nnyin inam mme ata ndudue, akpan-akpan edieke nnyin ikerede ke nnyin iminehede ifɔn ikan mbon emi edude ke ukut. Oruk nda-ndomo oro etie nte ndaha mmɔŋ emende fi meter ita ke unana-idorenyin²³ ebe, edikut mmɔŋ emende ɔdiɔŋɔ owo fo ke meter inaŋ²⁴ ebe, edibiere ɔnɔ enye nte anam akamba idiɔkŋkpɔ, onyuŋ ekere eti abaŋa idem fo. Ke ntre, ofuri nnyin ke iŋwaŋwana edisaŋa ke usuŋ idem nnyin. Owo nnyin ndomokiet ibɔhɔ erinyaŋa.²⁵ Nnyin ikpikemeke edibɔ. Jacob, ke Ŋwed Mormon, ekekpep ete, “Ti, ke ema ekekpe emem [nnyin] ye Abasi, ke edi ye ke oto ke mfɔn Abasi ke enyaŋa [nnyin].”²⁶ Kpukpru nnyin imiyom anana-adaŋa Erisio-isop eke Andinyaŋa, idige ubak erisio-isop kpɔt.

Yak nnyin isin ofuri esit-mbɔm, eti-esit, ye ima nnyin nte nnyin inamde-ŋkpɔ ye mbon emi ekanarede nnyin ekuk.²⁷ Mbon “emi ekutde ukut enyene edifiɔk ata ima Jesus Christ owutde idem oto ke ikɔ ye edinam [nnyin].”²⁸ Nte nnyin inwamde, nnyin ana isiwak edisɔŋɔ mbon efen idem inyuŋ inwam. Kpa edieke ke owo kiet minyimeke, nnyin ika iso edinwam ke nte mmɔ enyimede. Andinyaŋa ekpep ete “oruk ntre ke mbufo enyene ndika iso mkpep ikɔ Abasi; koro mbufo ifiɔkke ŋkpɔ eke edinamde mmɔ efiak edem ekabare esit, enyuŋ etiene mi ye ofuri uduak esit mmɔ, Ami nyekɔk mmɔ udɔŋɔ; afo eyenyuŋ edi usuŋ nte edade erinyaŋa esɔk mmɔ.”²⁹ Utom Andinyaŋa nnyin edi ndikɔk udɔŋɔ. Utom nnyin edi ndima—ndima nyuŋ ŋwam ke oruk usuŋ emi adade mbon efen ekpere Jesus Christ. Emi edi kiet kotu mfri eke enyene-odudu, eti ndaha ukpepŋkpɔ Christ.

Ami nkot mbufo nte efiak-enam, ewak-ndinam, ndien enehede enam ukpepŋkpɔ Christ enyuŋ eŋwam mbon efen ke usuŋ mmɔ. Ami nnɔ ikɔ ntiense ke ukpepŋkpɔ Chriat edi akpan-ŋkpɔ ɔnɔ uduak eke Ete Heaven; edi oro, ke kpukpru ebede, ukpepŋkpɔ Esie. Nte nnyin inyenede mbuɔtidem ke Jesus Christ ye Erisio-isop Esie, nnyin imisaŋa ke usuŋ ediomi inyuŋ inyene udɔŋ ndinwam mbon efen ekabare edi nti mbet Jesus Christ. Nnyin imikeme ndi-di adia-akpa ke obio-ubɔŋ eke Ete Heaven, emi edide akpatre ŋkpɔ eke edinehede inam ukpepŋkpɔ Christ. Ke enyiŋ Jesus Christ, amen.