Mme Ediomi ye mme Utom

Ediomi edi unyime ndinam mme utom. Unyime nnɔ edi akpan ɔnɔ mme edu uwem nnyin kiet kiet ye nte enamde ŋkpɔ ke obio. Ke efafaŋa ifiɔk emi idahaemi. Ekpri ibat mme osio uyo efaŋa ye ukara enyuŋ eyire ete ke ana nte mme owo ewɔrɔ ekpɔŋ mkpaha-ukot ndomo kiet emi ɔbɔde mmɔ unen. Edi nnyin imidiɔŋɔ tɔŋɔde ke ediwak millennium eke ifiɔk-ukpep ke mme owo eyak usuk uwɔrɔ-ufin idemowo inim man inyene akpan ufaŋ ndiduŋ ke mme obio emi etimde enim. Mme utɔ ediyak uwɔrɔ-ufin idemowo ntem enehede oto mme unyime, mme ediomi, emi etiŋde etiŋ mme emi ekerede.

Ndise

Mbon ekong.

Ndise

Mbon ufɔk-ibɔk.

Ndise

Mme enime-ikaŋ.

Ndise

Mme full-time missionary.

Emi edi usuk mme uwut-ŋkpɔ mme ediomi ke mme obio nnyin: (1) mme ebiere ikpe, (2) ekɔŋ, (3) anam utom ufɔk ibɔk, ye mme (4) enime ikaŋ. Kpukpru mbon emi edude ke mme utom emi enyene unyime—emi esimande eto uŋwɔŋɔ mme ediomi—ndinam mme utom emi enɔde mmɔ. Ukem emi edi akpanikɔ abaŋa mme missionary nnyin. Saŋa-saŋa ɔfɔŋ mme idiɔŋɔ-enyiŋ edi ndiwut nte ke andisine odu ke idak ediomi ndien ke ntre enyene ubiɔŋ utom ndikpep nyuŋ nnam utom ndien enyene ndibɔ uŋwam ke utom oro. Ntak emi asaŋade ye enye edi nditi mme andisine mme utom ediomi mmɔ. Ibɔk isineke ke saŋa-saŋa ɔfɔŋ mmɔ mme mme se mmɔ edade enɔ, ibɔhɔke edi nditi mme saŋa-saŋa ubiɔŋ utom mme andisine enyenede. Edi akpanikɔ ŋko kabaŋa mme uwut-ŋkpɔ idiɔŋɔ-ndɔ mme mkpanuen ndɔ ye utom mmɔ ke ndiwut mme andise mme nditi andisine mbaŋa mme ubiɔŋ utom ediomi.

Ndise

Mme mkpanuen ndɔ.

Se ami ntiŋde mbaŋa mme ediomi nte itiat idak isɔŋ nnɔ se idade uwem nnyin abaŋa mme ediomi edu ukpono. Itiat idak isɔŋ ye mbuk eset eke ediwak esop ukpono ye mme ŋkpɔ emi eyomde ekɔŋɔ ke mme ediomi. Ke nte uwut-ŋkpɔ, ediomi Abraham edi akpan ɔnɔ ediwak ikpɔ edu ukpono. Enye emen nsasana ifiɔk uŋwɔŋɔ ediomi Abasi ye nditɔ Esie owut. Akani Testament awak ediwut ediomi emi Abasi ekenyenede ye Abraham ye ubon esie.¹

Akpa ikpehe eke Ŋwed Mormon, emi ekewetde ke ini Akani Testament, etim owut utom mme ediomi ke mbuk eset ye edu ukpono eke Israel. Eketiŋ enɔ Nephi ete ke Israel ekewetde ke ini oro ekedi “ŋwed mme Jew, emi ɔdɔŋɔde mme ediomi Jehovah, emi enye anamde ye ufɔk Israel.”² Mme ŋwed Nephi etiŋ awak abaŋa ediomi Abraham³ ye Israel nte “mbon ediomi Jehovah.”⁴ Ewet edinam ndinam ediomi ye Abasi mme mme ada ibuot edu ukpono Abasi esin ŋko ke Ŋwed Mormon ebaŋa Nephi, Joseph ke Egypt, Edidem Benjamin, Alma, ye Etubom Moroni.⁵

Ke ini ekedide Ndifiak mmen ɔyɔhɔ gospel Jesus Christ ndi, Abasi ama okot Prophet, Joseph Smith. Nnyin ifiɔkke ɔyɔhɔ ɔyɔhɔ item emi angel Moroni ɔkɔnɔde ekpri prophet emi okosuk akade iso ndikɔri. Nnyin imifiɔk ke enye ɔkɔdɔhɔ Joseph ete ke “Abasi enyene utom ɔnɔ [enye] ndinam” ndien ke “ɔyɔhɔ ɔyɔhɔ nsi nsi Gospel” ana nte ɔwɔrɔ edi, ye “mme eŋwɔŋɔ emi ekenamde enɔ mme ete.”⁶ Nnyin ŋko imifiɔk ite ke mme ŋwed Abasi emi ekpri Joseph ekenehede okot—mbemiso eketeme enye ete asiak ufɔk Abasi—ekedi ediwak ukpep-ŋkpɔ abaŋade mme ediomi emi enye ekekabarede ke Ŋwed Mormon. Ke ŋwed Mormon edi ata akpan Ntɔŋɔ eke ɔyɔhɔ ɔyɔhɔ gospel, emi esinede Uduak Abasi enyenede ɔnɔ nditɔ Esie, ndien Ŋwed Mormon ɔyɔhɔ ye se etiŋde ebaŋa mme ediomi.

Sia okotimde okot Bible, ana edi ke Joseph ama ɔfiɔk abaŋa se ŋwed mme Hebrew etiŋde abaŋa uduak Andinyaŋa “ndinam obufa ediomi ye ufɔk Israel ŋko ye ufɔk Judah.”⁷ Ŋwed Hebrew ŋko etiŋ abaŋa Jesus nte “etie ubiɔŋ ke obufa ediomi.”⁸ Akpan akpan, ekot mbuk bible abaŋade utom ke ini uwem Andinyaŋa “Obufa Testament,” ŋkpɔ emi ekutde emi adade ɔnɔ “Obufa ediomi.”

Mme ediomi ekedi akpan ke Ndifiak mmen gospel ndi. Ekut emi ke mme akpa item emi Jehovah ɔkɔhɔde ete Prophet anam ke ndisiak Ufɔk Abasi Esie. Ke ini ekesiode Ŋwed Mormon, Jehovah ama ɔnɔ ndausuŋ kabaŋa nte editimde Ufɔk Abasi Esie emi efiakde emen edi, ibihike emi ekekotde Ufɔk Abasi Jesus Christ Mme Ndisana Owo Ke Ukperedem Usen⁹. Ediyarare emi ekenɔde ke April 1830 ama eteme ete ke “edi-bɔ mme owo ke uduɔkmmɔŋ isin ke ufɔk Abasi esie” ke mmɔ “etiede ntiense” (emi ɔwɔrɔde nditie ntiense ke uteŋe) “ete ke mmɔ ke akpanikɔ etua ŋkpɔfiɔk ke ofuri idiɔk-ŋkpɔ mmɔ, enyuŋ ebeŋe idem ndida enyiŋ Jesus Christ nnɔ idem mmɔ, ke enyenede mkpebiere ndinam utom nnɔ enye tutu esim utit.”¹⁰

Kpa ediyarare emi eketeme ete Ufɔk Abasi “esobo ɔtɔkiet ke ini ke ini man edia uyo ye wine [mmɔŋ] ke nditi Ɔbɔŋ Jesus.” Ekut akpan ntak eke edinam emi ke mme ikɔ ediomi emi enimde enɔ elder mme oku emi akamade ndutim. Enye ɔdiɔŋ mme idiɔŋɔ eke uyo ɔnɔ “kpukpru ukpɔŋ mbon emi ediade enye … , man mmɔ … etie ntiense enɔ fi, O Abasi Nsi Nsi Ete, ete ke mmɔ enyime ndida nnɔ idem mmɔ enyiŋ Eyen fo, nnyuŋ nti enye kpukpru ini nnyuŋ nnim mme ibet esie emi Enye ɔnɔde mmɔ.”¹¹

Ema enɔ akpan ubiɔŋ utom mme ediomi ke Ufɔk Abasi emi efiakde emen edi obufa ke ntɔŋɔ emi Jehovah ɔkɔnɔde abaŋa akpa ediwet mme ediyarare Esie. Do Jehovah ama anam efiɔk ete ke Enye ama okot Joseph Smith koro mme andiduŋ ke ererimbot “ewɔrɔ ekpɔŋ mme edinam mi, enyuŋ ebiat nsi nsi ediomi mi.”¹² Ediyarare emi adian anam aŋwaŋa ete ke ema enɔ ibet Esie “man edi-sɔŋɔ nsi nsi ediomi mi.”¹³

Mfin emi nnyin ifiɔk ubiɔŋ utom eke ediomi ke Ufɔk Abasi emi efiakde emen edi ye edu ukpono mbon esie. President Gordon B. Hinckley ama anam edi ibio ibio se uduɔkmmɔŋ ye ndidia udia-Ɔbɔŋ nnyin inamde ke udua ke udua ete: “Ofuri mbon ufɔk Abasi emi emi edukde mme mmɔŋ baptism ekabare edi kiet ye edisana ediomi. Ini kiet kiet emi nnyin idiade udia Ɔbɔŋ eke Jehovah, nnyin ifiak idemede ediomi oro.”¹⁴

Ediwak mme etiŋ-ikɔ ke mbono emi eti nnyin ete ke, President Russell M. Nelson esiwak nditiŋ mbaŋa “usuŋ ediomi,”15emi “adade nnyin afiak ɔnyɔŋ etiene [Abasi]” ndien kpukpru abaŋa ebuana nnyin ye Abasi.”¹⁵ Enye ekpep abaŋa ufɔn ediomi ke mme edinam temple nnyin onyuŋ ebeŋe nnyin ndikut utit ke ntɔŋɔ ye “ndikere celestial.”¹⁶

Idahaemi ami ntiŋ mbaŋa mme ediomi ke temple. Ke ndinam ubiɔŋ utom esie ndifiak mmen ɔyɔhɔ ɔyɔhɔ gospel Jesus Christ ndi, Prophet Joseph Smith ama abiat ediwak isua ke akpatre eyo uwem esie ke ndinɔ ndausuŋ nte edibɔpde temple ke Nauvoo, Illinois. Oto ke enye Jehovah ama ayarare mme edisana ukpep-ŋkpɔ, item, ye mme ediomi ɔnɔ mbon editiene enye man enam utom ke mme temple. Mbon emi ekebɔde endowment akana nte ekpep mmɔ uduak edinyaŋa eke Abasi enyuŋ ekot mmɔ ete enam mme edisana ediomi. Mbon emi ekenamde akpanikɔ enɔ mme ediomi oro ema eŋwɔŋɔ nsi nsi uwem enɔ mmɔ, emi “kpukpru ŋkpɔ edide eke mmɔ” ndien mmɔ “eyedu ke iso Abasi ye Christ esie ke nsi nsi.”¹⁷

Ekenam mme edinam endowment ke Temple Nauvoo mbemiso ekebin mme adaiso nnyin esio ete etɔŋɔ ɔwɔrɔ etop isaŋ mmɔ ndika mme obot ke Edem Usop Utin. Nnyin iminyene mme ikɔ ntiense ito ediwak mme adaiso oro ete ke odudu emi mmɔ ekebɔde ke ntak emi mmɔ ekedide kiet ye Christ ke mme endowment mmɔ ke Temple Nauvoo ama ɔnɔ mmɔ ukeme ndika ɔwɔrɔ etop isaŋ mmɔ nnyuŋ nyene itie mmɔ ke Edem Usop Utin.¹⁸

Mbon emi ebɔde endowment ke temple enyene ubiɔŋ utom ndisine garment temple, ɔfɔŋ emi owo mikwe koro esinede enye ke idak enyɔŋ ɔfɔŋ. Enye eti mbon emi ebɔde endowment abaŋa mme nsasana ediomi emi mmɔ enamde ye mme edidiɔŋ emi eŋwɔŋɔde enɔ mmɔ ke edisana temple. Man ekan enam edisana uduak emi, eteme nnyin ete isine mme garment temple kpukpru ini, ibɔhɔke ke mme idaha emi owo mikanke inyaŋa ikpɔŋ. Ke ntak emi mme ediomi minyeneke nduɔk-odudu, ekut ndisioŋo mme garment nte ndikaŋ mme ubiɔŋ utom ediomi ye mme edidiɔŋ emi esaŋade ye mmɔ. Ke ubɔk eken, mbon emi esinede mme garment mmɔ ke akpanikɔ enyuŋ enimde mme ediomi temple mmɔ eka iso esɔŋɔ utom mmɔ nte mme mbet eke Ɔbɔŋ Jesus Christ.

Ndise

Mme ndise temple.

Ufɔk Abasi Jesus Christ Mme Ndisana Owo ke Ukperedem Usen ke ebɔp mme temple ke ofuri ererimbot. Uduak mmɔ edi ndidiɔŋ nditɔ ediomi Abasi ye ukpono ke temple ŋko ye mme edisana ubiɔŋ utom ye odudu ye mme isio-isio edidiɔŋ eke editie nnɔ Christ emi mmɔ ebɔde ke ediomi.

Ndise

São Paulo Brazil Temple.

Ediɔŋɔ Ufɔk Abasi Jesus Christ nte ufɔk Abasi emi esɔŋde eyire ndinam mme ediomi ye Abasi. Ediomi odu ke mme edinam erinyaŋa-ukpɔŋ ye edimenede kiet kiet eke mfiak-men-ndi Ufɔk Abasi emi enamde. Edinam uduɔkmmɔŋ ye ediomi esie edi mme akpan ŋkpɔ ndiduk obio ubɔŋ celestial. Mme edinam ye mme ediomi temple emi esaŋade ye mmɔ edi mme akpan ŋkpɔ enɔ edimenere ke obio ubɔŋ celestial, emi edide nsi nsi uwem, enɔ emi okponde akan kpukpru mme enɔ Abasi.”¹⁹ Emi edi akpan utom eke Ufɔk Abasi Jesus Christ Mme Ndisana Owo ke Ukperedem Usen.

Ami metie ntiense mbaŋa Jesus Christ, emi edide ibuot Ufɔk Abasi emi, onyuŋ ɔbɔde mme edidiɔŋ Esie ɔnɔ kpukpru mbon emi enimde mme ediomi mmɔ. Ke enying Jesus Chrst, amen.