Edi Ifiɔk Jehovah Ete Yak Nnyin Ikpinyene Ŋwed Mormon

Ndima nditɔ-eka irenowo ye iban, nnyin iminehede inɔ-ekɔm ke ukeme mbufo ke edikot ŋwed Abasi ye Edi, Etiene Mi. Esɔsɔŋɔ ke kpukpru se mbufo enamde. Mbufo edidiana ye Abasi ye ikɔ Esie ke usen ke usen enyene nti ufɔn. “Mbufo esin itiat-idak-isɔŋ enɔ akwa utom kiet. Otode ke mkpri ŋkpɔ eyewɔrɔ ŋkpɔ emi okponde”¹

Ndikot mme ukpepŋkpɔ Andinyaŋa ke ŋwed Abasi anwam nnyin edikpuhɔ mme ufɔkiduŋ nnyin nsin ke mme itie-ubɔhɔ mbuɔtidem ye mme ebiet ukpep ikɔ Abasi.² Enye okot Spirit esin ke ufɔkiduŋ nnyin. Edisana Spirit ɔyɔhɔ ukpɔŋ nnyin ye idara³ onyuŋ akabare nnyin esin ke mme edibighe nsaŋa Jesus Christ.

Ke mme ediwak isua ekebede, kini ikotde mme ŋwed eke edisana ikɔ Abasi, nnyin imokut ɔyɔhɔ ukpepŋkpɔ emi Abasi ɔnɔde nditɔ Esie ke ofuri mme ikpɔ eyo-ini ikɔ Abasi.⁴

Ke eyo-ini kiet-kiet, nnyin imokut ɔdiɔŋɔ uwutŋkpɔ kiet. Abasi esifiak-ayak mme eriyara ikɔ Abasi Jesus Christ oto ke mme prophet Esie. Mme owo etiene mme prophet oro enyuŋ enehede ebɔ edidiɔŋ. Nte ededi, kini ebede, usuk owo etre ndikop mme ikɔ prophet enyuŋ esik idem mmɔ ekpɔŋ Abasi ye ikɔ Abasi Esie Emi edi se nnyin ikootde ntaŋ-mfep. Ekebem-iso eyarare ikɔ Abasi enɔ Adam, edi ubak nditɔ Adam ye Eve ema ewɔŋɔde ekpɔŋ Abasi ke ntaŋ-mfep.⁵ Nnyin imokut usuŋ edifiak-mmen-ndi ye ntaŋ-mfep afiakde-odu ke mme eyo-ini eke Enoch, Noah, Abraham, Moses, ye eke mbon efen.

Idahaemi, mfin emi, nnyin idu ke eyo-ini eke uyɔhɔ ini.⁶ Nkokure eyo-ini eke miditreke ke ntaŋ-mfep edi emi.⁷ Edi eyo-ini emi ke edidara Edifiak-ndi eke Andinyaŋa Jesus Christ Ɔyɔhɔ Ikaba ye ukara eke tɔsin-isua Esie.

Ntem, nso idi ukpuhɔde kabaŋa eyo-ini emi? Nso ke Abasi ɔkɔnɔ nnyin mfin emi, akpan-akpan enɔde ke ini nnyin, emi edinwamde nnyin edisaŋa mkpere Andinyaŋa ndien ikpɔŋke Enye

Ibɔrɔ kiet emi odukde esit mi edi ŋwed Abasi—ndien akpan-akpan Ŋwed Mormon: Testament Jesus Christ Efen.

Ini oro Abasi ɔkɔŋwɔŋɔde ke ididuhe akwa ntaŋ-mfep efen aba, ana nnyin itim-ikere inyuŋ ikpeme idem man ibɔhɔ ntaŋ-mfep eke idem nnyin —itide, nte President Russell M. Nelson ekekpepde ke, “Nnyin kiet-kiet inyene ubiɔŋ inɔ nkɔri ŋkpɔ Abasi eke idem nnyin.”⁸ Ke ikootde Ŋwed Mormon, ke nte nnyin inamde ke isua emi, kpukpru ini eyeda nnyin ekpere Andinyaŋa—onyuŋ anwam nnyin ndidu mkpere Enye.

Nnyin ikoot oro “duŋɔre,” ndien oro ɔfɔn sia oro esine utom. Edi inaha nte nnyin ikpep ubak mbufa akpanikɔ ke ofuri ini. Usuk-ini ndikot Ŋwed Mormon edi abaŋa ekiekere edidaiana ye Abasi kpɔt mfin emi—ndibɔk ukpɔŋ, ndisɔŋɔ ke spirit mbemiso iwɔrɔ ika ikisobo ye ererimbot, mme edikut ukɔk ke ima ikisobo ye idiɔk usen ke ererimbot.

Nnyin ikoot ŋwed Abasi man Edisana Spirit, akwa andikpep, ekeme edinehede nam nnyin ikabade-esit itiene Ete Heaven ye Jesus Christ onyuŋ anwam nnyin inehede ikabare ibiet Mmɔ.⁹

Ye mme ekiekere emi ke esit, nnyin imikeme edikere ete, “Nso ke Edisana Spirit ekekpep nnyin udua emi kini emi nnyin ikiduŋɔke Ŋwed Mormon?” ye “Didie ke emi ada nnyin ekpere Andinyaŋa?”

Emi edi nti mbume ɔnɔ nduŋɔre ikɔ Abasi ke ufɔkiduŋ. Mmɔ nko edi ata nti mbume ke editɔŋɔ class Usen-ederi ke ufɔk Abasi. Nnyin inam ukpepŋkpɔ nnyin ɔfɔn ke ufɔk Abasi Sunday oto ke ndinam ukpep nnyin ke ufɔkiduŋ ɔfɔn ke udua oro. Ntem, mme class Usen-ederi nnyin, “owo emi ɔkwɔrɔde ye owo eke ɔbɔde, efiɔk kiet eken, ndien mmɔ mbiba eyuhɔ enyuŋ edara ɔtɔkiet.”¹⁰

Se emi edi mme esisit ufaŋ eke Spirit ekesinde mi ke ekikere oto ke nduŋɔre Ŋwed Mormon eke udua emi:

• Nephi eketeme Jacob ete ekpeme mme usan emi ndien ayak mmɔ ɔnɔ … tɔŋɔde ke emana kesim emana. Ndien edieke ukwɔrɔ ikɔ okodude emi ekedide edisana, mme eriyarare … , mme nditiŋ nte prophet,” Jacob enyene “edimiŋ … mmɔ ke mme usan emi … ke ntak ikɔt [mmɔ].”¹¹

• Edikem Jacob ɔnɔ ikɔ nteinse ete, “Nnyin iduŋɔde [ŋwed Abasi], … ndien ke inyenede kpukpru mme ntiense emi nnyin inyene idorenyin, ndien mbuɔtidem nnyin inyek-ke.”¹²

Idahaemi, mme ufaŋ ŋwed emi anam mi nditi se Nephi eketiŋde ke akpa ini abaŋa mme usan brass oro ete:

“Ndien nnyin ima ibɔ mme ŋwed … ndien iduŋɔde mmɔ inyuŋ ikut ite ke mmɔ … enyene akamba udori enɔ nnyin, tutu ete ke nnyin iyenim ibet Jehovah inɔ nditɔ nnyin.

“Ke ntre, ekedi ifiɔk Jehovah ete yak nnyin imen mmɔ ye nnyin, nte nnyin isaŋade ke widerness ika isɔŋ eŋwɔŋɔ.”¹³

Idahaemi, edieke ekedide ifiɔk ɔnɔ Lehi ye ufɔk emana esie edineyen ŋwed Abasi, edi ata ukem ifɔk oro ɔnɔ nnyin mfin emi. Akwa udori ye odudu spirit eke ŋwed Abasi aka-iso inimeke ke uwem nnyin mfin emi.

Akananam iduhe mbonowo ke mbuk eke ekutde Ŋwed Mormon ye mme ŋwed Abasi nte eke nnyin inyenede.¹⁴ Iŋ, Lehi ye ufɔkemana esie ema ebɔ edidiɔŋ ke ediben mme usan brass ye mmɔ, edi mmɔ ikinyeneke oro ke ofuri tent mmɔ! Ata akpan idem Ŋwed Mormon edi enye eke idem nnyin. Edi enye eke nnyin ikootde.

Ke nkukut Lehi eke eto uwem, Lehi ekpep nnyin ufɔn eke ifiɔk-ukpep idem nnyin ye ima Abasi. Ke enye ama akadia mfri oro, Lehi okut ŋwan esie, Sariah, ye nditɔ iren esie Nephi ye Sam ke esisit ayan-ebiet ko.

“Mmɔ eda nte mmɔ ifiɔkke ebiet mmɔ ekpekade.

“… Ami ŋkot mmɔ,” Lehi ete, “ndien ami ndɔhɔ mmɔ ke ɔkpɔsɔŋ uyo nte yak mmɔ etiene mi, enyuŋ edia mfri oro, emi eke ɔfɔnde akan kpukpru mme mfri eken.

“ Ndien … mmɔ ema edi etiene mi enyuŋ edia mfri oro.”¹⁵

Ami mmema uwutŋkpɔ eke Lehi kabaŋa edidi ete ye eka ke ofuri esit. Sariah, Nephi ye Sam ekedu nti, ndinen uwem. Edi Jehovah ama enyene ŋkpɔ se inehede ifɔn, ŋkpɔ ekenehede eniŋe ɔnɔ mmɔ. Mmɔ ikifiɔkke ebiet emi edikutde oro, edi Lehi ama ɔfiɔk. Ntem enye okot mmɔ “ye ɔkpɔsɔŋ uyo” ete etiene eto uwem oro enyuŋ edia mfri enɔ idem mmɔ. Ndausuŋ esie ekedi aŋwaŋa-aŋwaŋa. Unana edifiɔk ndomokiet ikpiduhe.

Ami ndi ibɔrɔ eke mbiet orukedidi ete ye eka ke ofuri esit.¹⁶ Ini eke ami nkedide ekpri eyeneren, ekpedi isua Duopekiet mme Duopeba, eka mi edibup mi ete, “Mark, ndi afo emediɔŋɔ ke idem fo, otode ke Edisana Spirit, ete ke ikɔ Abasi edi akpanikɔ?”

Mbume esie ama akpa mi idem. Kpukpru ini ami mmesiŋwana edidi “eti eyeneren,” ndien ami nkekere ke oro ekem. Edi eka mi, ukem nte Lehi, ama ɔdiɔŋɔ ke mmoyom ediwak ŋkpɔ efen. Ami nnyene ndinam nyung ndiɔŋɔ nnɔ idem mi.

Ami mbɔrɔ ke ami nkinyeneke ifiɔk-ukpep oro kaŋa. Ndien enye ibietke nte ekenehede odu ke mkpaidem ke ibɔrɔ mi.

Enye ndien etiŋ ikɔ eke ami ndiduak-ke edifre. Ami mmeti ikɔ esie nsim mfin emi ete: Ete ke Enyɔŋ oyom fi ɔdiɔŋɔ ɔnɔ idem fo. Edi ana nte afo esin ukeme oro. Afo enyene ndikot Ŋwed Mormon onyuŋ ɔbɔŋ akam ɔdiɔŋɔ oto ke Edisana Spirit. Ete ke Heaven eyebɔrɔ akam fo.”

Ɔfɔn, Akananam ami nkotke Ŋwed Mormon. Ami nkikereke ke ami mma mkpon nkem ndinam oro. Edi eka mi ama ɔdiɔŋɔ sifɔnde.

Mbume esie ama esin udɔŋ ke esit idem mi man ndiɔŋɔ nnɔ idem mi.

Ntre, okoneyo kiet-kiet, ke ubet-ufɔk eke ami mbuanade ye nditɔ-eka mi iren iba, ami nyedomo ikaŋ eke ibuot bed mi nyuŋ nkot ibuot-ŋwed kiet ke Ŋwed Mormon. Ekem, ke nimmede ikaŋ oro, ami nyewɔrɔ ke bed mi ntɔŋɔ-edɔ nyuŋ mbɔŋ-akam. Ami mma mbɔŋ akam ke ofuri esit ye akwa udɔŋ nkan nte ami nkesinamde ke akpa. Ami mbup Ete ke Heaven nte mbɔk ayak mi ndiɔŋɔ akpanikɔ ekedude ke Ŋwed Mormon.

Tɔŋɔde ke ini eke ami nketɔŋɔke edikot Ŋwed Mormon, ami ndikop ke Ete ke Heaven enyene-ifiɔk abaŋa ukeme mi. Ndien ami nkop ke ami mmenyene ufɔn nnɔ Enye. Nte ami nkotde nyuŋ mbɔŋde akam, ekikere ndɔŋesit, emem edidoro mi ke idem. Ibuot-ŋwed ke ibuot-ŋwed, unwana mbuɔtidem ama ɔkɔri ayama ke eit ukpɔŋ mi. ke ini akade iso, ami ndifiɔk ke mme ekikere emi ekedi mme ɔsɔŋɔ akpanikɔ okotode Edisana Spirit.¹⁷ Ami ndidiɔŋɔ nnɔ idem mi ke Ŋwed Mormon edi akpanikɔ ndien ke Jesus Christ edi Andinyaŋa ererimbot. Ami mmenem esit ke nti ikoot eke eka mi.

Ifiɔk-ukpep emi eke edikot Ŋwed Mormon nte eyen-eren ama ɔtɔŋɔ usuŋ ediduŋɔ ŋwed Abasi emi akade iso ndidiɔŋ uwem mi edisim usen emi. Ami nsuk nkokot Ŋwed Mormon nyuŋ ntɔŋɔ-edɔŋ ke akam. Ndien Edisana Spirit esifiak onyuŋ afiak ɔsɔŋɔ mme akpanikɔ esie.

Nephi eketiŋ oro nnen-nnen ete: Ekedi ifiɔk Jehovah ete ke nnyin inyene ndimen ŋwed Abasi nsaŋa ye nnyin ke ofuri uwem nnyin. Ŋwed Mormon edi “adaha-ɔsɔŋɔ” emi anamde eyo-ini okpuhɔ ɔkpɔŋ kpukpru mme eyo-ini emi ekebede. Nte nnyin ikotde Ŋwed Mormon inyuŋ itiene odu-uwem prophet, ntaŋ-mfep eke idem owo ididuhe ke uwem nnyin.¹⁸

Ikoot oro man edi eitene eto uwem ke edisɔŋɔ mmum ikɔ Abasi idige ikoot otode Lehi ɔnɔ ufɔkemana eise kpɔt, inyuŋ idige ikoot otode eka mi ndikot nyuŋ mbɔŋ akam kpɔt kabaŋa Ŋwed Mormon. Enye edi ikoot otode prophet nnyin, President Russell M. Nelson, ɔnɔ nnyin owo kiet-kiet.

“Enye ɔŋwɔŋɔ ke nte afo adade akam oduŋɔ Ŋwed Mormon kpukpru usen, afo eyenam nti ubiere—kpukpru usen. Meŋwɔŋɔ ke nte afo ekerede ke eist abaŋa se edikotde, mme window heaven eyebere, ndien afo eyebɔ mme ibɔrɔ ɔnɔ mbume fo ye ndausuŋ ɔnɔ uwem fo.”¹⁹

Edi akam mi yak edikot Ŋwed Mormon ke isua emi edi-di idara ye edidiɔŋ inɔ nnyin owo kiet-kiet ndien eyeduri nnyin ekpere Andinyaŋa.

Ete eke Heaven odu-uwem. Jesus Christ edi Andinyaŋa ye Andifak nnyin. Ŋwed Mormon ɔdɔŋɔ mme ikɔ Esie onyuŋ emen ima Esie edi. President Russell M. Nelson edi odu-uwem prophet Abasi ke isɔŋ mfin emi. Ami mmediɔŋɔ ke mme ŋkpɔ emi edi akpanikɔ otode ke ɔsɔŋɔ ntiense eke Edisana Spirit, edide akpa ntiense eke ami nkɔbɔde kini nkotde Ŋwed Mormon nte ekpri eyen-eren. Ke enyiŋ Jesus Christ, amen.