កាលីឡេ
នៅសម័យបុរាណ និងសម័យបច្ចុប្បន្ន គឺជាស្រុកខាងជើងបំផុតនៃអ៊ីស្រាអែល គឺនៅខាងលិចទន្លេយ័រដាន់ និងសមុទ្រកាលីឡេ។ ស្រុកកាលីឡេមានចម្ងាយ ៩៧ គ.ម. ហើយមានទទឹង ៤៨ គ.ម.។ កាលពីបុរាណ ស្រុកកាលីឡេមានដីដ៏ល្អៗ និងភូមិដ៏ណែនណាន់នៅអ៊ីស្រាអែល។ ផ្លូវធំៗដ៏សំខាន់ទាំងប៉ុន្មានដែលនាំទៅឯដាម៉ាស ទៅឯស្រុកអេស៊ីព្ទ និងទៅឯភូមិភាគខាងកើតអ៊ីស្រាអែល នោះរត់កាត់ស្រុកកាលីឡេ។ ធាតុអាកាសដ៏ល្អ និងដីដ៏មានជីជាតិបានផ្ដល់នូវដំណាំ ដូចជាអូលីវ ស្រូវសាលី ស្រូវឱក និងទំពាំងបាយជូរ។ ការនេសាទនៅតាមសមុទ្រកាលីឡេផ្ដល់នូវទំនិញលក់ចេញ និងប្រភពទឹកខាងសម្បត្តិទ្រព្យជាច្រើន។ ព្រះអង្គសង្គ្រោះ ទ្រង់បានចំណាយពេលជាយូរនៅស្រុកកាលីឡេ។
សមុទ្រកាលីឡេ
សមុទ្រកាលីឡេស្ថិតនៅក្នុងភូមិភាគខាងជើងអ៊ីស្រាអែល។ បានហៅថា សមុទ្រគេនេសារ៉ែត នៅក្នុងព្រះគម្ពីរសញ្ញាចាស់ ហើយជាបឹងគេនេសារ៉ែត ឬក៏សមុទ្រទីបេរាស នៅក្នុងព្រះគម្ពីរសញ្ញាថ្មី។ ព្រះយេស៊ូវទ្រង់បានបង្រៀនបទបង្រៀនជាច្រើននៅទីនោះ (ម៉ាថាយ ១៣:២)។ សមុទ្រមានរូបរាងដូចជាផ្លែជំពូ បណ្ដោយ ២០ គ.ម. និងទទឹង ១២ គ.ម. នៅកន្លែង ធំបំផុត។ វាស្ថិតនៅ ២០៧ ម. ទាបជាងផ្ទៃសមុទ្រ ដែលជួនកាលបណ្ដាលឲ្យអាកាសជុំវិញទៅជាក្ដៅក្រៃលែង។ ខ្យល់ត្រជាក់បក់ចុះមកពីលើភ្នំ ហើយជួបនឹងខ្យល់ក្ដៅនៅលើទឹក តែងតែធ្វើឲ្យមានខ្យល់ព្យុះយ៉ាងឆាប់ៗ (លូកា ៨:២២–២៤)។