ម៉ូសាយ, បុត្ររបស់បេនយ៉ាមីន
ជាស្ដេច ហើយជាព្យាការីសាសន៍នីហ្វៃដ៏សុចរិតម្នាក់នៅក្នុងព្រះគម្ពីរមរមន។ ម៉ូសាយបានដើរតាមតម្រាប់ដ៏សុចរិតនៃបិតារបស់ទ្រង់ (ម៉ូសាយ ៦:៤–៧)។ ទ្រង់បានបកប្រែផ្ទាំងមាស ២៤ បន្ទះ ដែលមាននូវបញ្ជីប្រវត្តិអំពីពួកសាសន៍យ៉ារេឌ (ម៉ូសាយ ២៨:១៧)។
គម្ពីរម៉ូសាយ
ជាគម្ពីរមួយនៅក្នុងព្រះគម្ពីរមរមន។ ជំពូកទី ១–៦ មានអំពីបទបង្រៀនដ៏ប្រកបដោយអានុភាពនៃស្ដេចបេនយ៉ាមីនដល់រាស្ត្រទ្រង់។ ព្រះវិញ្ញាណនៃព្រះអម្ចាស់បានសណ្ឋិតលើចិត្តគេ ហើយប្រជារាស្ត្របានប្រែចិត្តជឿ ហើយគ្មានបំណងចង់ប្រព្រឹត្តអំពើ អាក្រក់ទៀតឡើយ។ ជំពូកទី ៧–៨ ប្រាប់អំពីសាសន៍នីហ្វៃមួយក្រុម ដែលបានទៅអាស្រ័យនៅក្នុងចំណោមពួកសាសន៍លេមិន។ មនុស្សមួយក្រុមត្រូវបានចាត់ឲ្យទៅរកពួកគេ។ អាំម៉ូន ជាមេក្រុម បានរកពួកគេឃើញ ហើយបានដឹងពីរឿងនៃការវេទនារបស់គេនៅក្រោមការសង្កត់សង្កិនរបស់ពួកសាសន៍លេមិន។ ជំពួកទី ៩–២៤ រៀបរាប់អំពីការសង្កត់សង្កិននោះ និងអំពីរបៀបដែលពួកមេដឹកនាំរបស់គេ — គឺ ស៊ីនិព្វ ណូអេ និងលិមហៃ — បានរស់នៅក្រោមពួកសាសន៍លេមិនយ៉ាងណា។ ទុក្ករកម្មនៃព្យាការីម្នាក់ហៅថា អ័ប៊ីណាដៃ ក៏បានកត់ទុកដែរ។ អាលម៉ាបានប្រែចិត្តជឿកាលកាត់ក្ដីអ័ប៊ីណាដៃ។ ជំពូកទី ២៥–២៨ រៀបរាប់សារឡើងវិញនូវរឿងទាំងឡាយអំពីអាលម៉ាជាកូន និងពួកបុត្រា ៤ នាក់នៃស្ដេចម៉ូសាយបានក្លាយជាអ្នកប្រែចិត្តជឿ។ នៅក្នុងជំពូកទី ២៩ ស្ដេចម៉ូសាយបានណែនាំនូវរបៀបគ្រប់គ្រង់មួយ ដោយពួកចៅក្រមជំនួសពួកស្ដេច។ អាលម៉ា កូនប្រុសរបស់អាលម៉ាត្រូវបានរើសតាំងឲ្យធ្វើជាមេចៅក្រមទីមួយ។