យ៉ូសែប ជុញ្ញ័រ ស៊្មីធ
ជាព្យាការីម្នាក់ ដែលបានជ្រើសរើសឲ្យសាងសាសនាចក្រពិត នៃព្រះយេស៊ូវគ្រីស្ទ នៅលើផែនដីវិញ។ យ៉ូសែប ស៊្មីធ បានកើតនៅរដ្ឋវ័រម៉ន្ត សហរដ្ឋអាមេរិក ហើយបានរស់នៅពីឆ្នាំ ១៨០៥ ទៅឆ្នាំ ១៨៤៤។
នៅឆ្នាំ ១៨២០ ព្រះដ៏ជាព្រះវរបិតា និងព្រះយេស៊ូវគ្រីស្ទបានលេចមកឯយ៉ូសែប ហើយលោកបានដឹងថា គ្មានសាសនាណាមួយនៅលើផែនដីជាសាសនាចក្រពិតឡើយ (យ.ស.—ប្រវត្តិ ១:១–២០)។ បន្ទាប់មកមរ៉ូណៃ ជាទេវតា ក៏បានមករកលោក ហើយបានបើកសម្ដែងប្រាប់កន្លែងលាក់ផ្ទាំងមាសទាំងឡាយ ដែលមានបញ្ជីប្រវត្តិនៃប្រជាជនពីសម័យបុរាណនៅលើទ្វីបអាមេរិក (យ.ស.—ប្រវត្តិ ១:២៩–៥៤)។
យ៉ូសែបបានបកប្រែផ្ទាំងមាសទាំងឡាយនោះ ហើយបានបោះពុម្ពចេញជាព្រះគម្ពីរមរមន នៅឆ្នាំ ១៨៣០ (យ.ស.—ប្រវត្តិ ១:៦៦–៦៧, ៧៥)។ នៅឆ្នាំ ១៨២៩ លោកបានទទួលអំណាចនៃបព្វជិតភាពពីយ៉ូហាន-បាទីស្ទ និងពីពេត្រុស យ៉ាកុប និងយ៉ូហាន (គ. និង ស. ១៣; ២៧:១២; ១២៨:២០; យ.ស.—ប្រវត្តិ ១:៦៨–៧០)។
ដូចដែលបានដឹកនាំដោយព្រះ នៅថ្ងៃទី ៦ មេសា ១៨៣០ យ៉ូសែប និងពួកអ្នកឯទៀតក៏បានរៀបចំសាសនាចក្រនៃព្រះយេស៊ូវគ្រីស្ទដែលបានសាងឡើងវិញ (គ. និង ស. ២០:១–៤)។ នៅក្រោមការដឹកនាំរបស់យ៉ូសែប សាសនាចក្របានលូតលាស់ នៅប្រទេសកាណាដា ប្រទេសអង់គ្លេស និងនៅភូមិភាគខាងកើតនៃសហរដ្ឋ ជាពិសេស គឺនៅរដ្ឋអូហៃអូ រដ្ឋមិសសួរី និងរដ្ឋអិលលីណោយ។ មានសេចក្ដីបៀតបៀនដ៏ធ្ងន់ជាប់តាមយ៉ូសែប និងពួកបរិសុទ្ធមិនថាជាពួកគេនៅទីណាក្ដី។ នៅថ្ងៃទី ២៧ មិថុនា ១៨៤៤ យ៉ូសែប និងហៃរុម ជាបងប្រុសរបស់លោក ត្រូវគេធ្វើទុក្ករកម្មនៅទីក្រុងកាតធេច រដ្ឋអិលលីណោយ សហរដ្ឋអាមេរិក។
ព្រះគម្ពីរដែលព្យាការីយ៉ូសែប ស៊្មីធបាននាំចេញមក
យ៉ូសែបបានបកប្រែភាគទាំងឡាយនៃផ្ទាំងមាស ដែលទេវតាមរ៉ូណៃបានប្រគល់ដល់លោក រីឯការបកប្រែនេះ ក៏បានបោះពុម្ពនៅឆ្នាំ ១៨៣០ ចេញជាព្រះគម្ពីរមរមន។ លោកក៏បានទទួលវិវរណៈជាច្រើនពីព្រះអម្ចាស់ ដែលរាយនូវគោលលទ្ធិសំខាន់ៗ និងការរៀបចំសាសនាចក្រ។ វិវរណៈទាំងនេះភាគច្រើន ត្រូវបានប្រមូលទុកដែល ឥឡូវនេះស្គាល់ថា គោលលទ្ធិ និងសេចក្ដីសញ្ញា។ លោកក៏បាននាំចេញមកនូវមុក្ដាដ៏មានតម្លៃមហិមា គឺជាការបកប្រែដែលបានបំផុសគំនិតចេញពីការសរសេរទាំងឡាយនៃលោកម៉ូសេខ្លះ លោកអ័ប្រាហាំខ្លះ និងពីម៉ាថាយខ្លះ ព្រមទាំងការសង្ខេបចេញពីប្រវត្តិ និងទីបន្ទាល់របស់លោកផ្ទាល់ ព្រមទាំងមាត្រា ១៣ ប្រការ អំពីគោលលទ្ធិ និងជំនឿ ដែលសាសនាចក្រជឿ។