Stimá Otronan i Bibá ku Diferensianan

Durante e último dianan di Su ministerio mortal, Hesus a duna Su disipelnan lokual El a yama “un mandamentu nobo” (Huan 13:34). Ripití tres biaha, e mandamentu ei tabata simpel pero difísil: “Stima otro, manera Ami a stima boso” (Huan 15:12; tambe wak versíkulo 17). E siñansa pa stima otro tabata un siñansa sentral di e Salbador su ministerio. E di dos mandamentu importante tabata “Stima bo próhimo manera bo ta stima bo mes” (Mateo 22:39). Hesus a asta siñá, “Stima boso enemigunan” (Mateo 5:44). Pero e mandamentu pa stima otro manera E a stimá Su rebaño tabata pa Su disipelnan—i ta pa nos—un reto ku tabata úniko. “En bèrdat,” Presidente Thomas S. Monson a siñá nos aprel último, “amor ta e esensia di e evangelio, i Hesu Kristu ta nos Ehèmpel. Su bida tabata un herensia di amor.”¹

Dikon e ta tan difísil pa tin amor manera Kristu pa otro? E ta difísil pasobra nos mester biba entre esnan kende no ta kompartí nos kreensianan i balornan i obligashonnan di kombenio. Den Su gran Orashon Intersesor, ofresé nèt promé di Su Krusifikashon, Hesus a resa pa Su siguidornan: “Mi a duna nan bo palabra i mundu a odia nan, pasobra nan no ta pertenesé na e mundu aki, meskos ku Ami tampoko no ta pertenesé na e mundu aki” (Huan 17:14). Despues, na e Tata El a pidi, “Mi no ta resa pa Bo kita nan for di riba mundu, ma pa Bo protehá nan kontra e malbado” (versíkulo 15).

Nos mester biba den e mundu pero no ta di e mundu. Nos mester biba den e mundu pasobra, manera Hesus a siñá den un parabel, Su reino ta “manera zür deeg,” kende su funshon ta pa pone henter e mansa reis pa su influensia (wak Lukas 13:21; Mateo 13:33; tambe wak 1 Korintionan 5:6–8). Su siguidornan no por hasi esei si nan ta asosiá solamente ku esnan kende ta kompartí nan kreensianan i práktikanan. Pero e Salbador tambe a siñá ku si nos ta stima E, nos lo warda Su mandamentunan (wak Huan 14:15).

E evangelio tin hopi siñansanan tokante warda e mandamentunan miéntras ku nos ta biba entre hende ku diferente kreensianan i práktikanan. E siñansanan tokante kontenshon ta sentral. Ora el a resusitá Kristu a hañá e Nefitanan pleitando over di e manera di boutismo, El a duna direkshon klaru tokante kon e ordenansa aki mester wòrdu hasí. Despues El a siña nan e prinsipio importante aki:

“I no lo tin diskushon entre boso, manera tabatin ántes; ni tampoko lo tin diskushon entre boso tokante e puntonan di mi doktrina manera tabatin te awor.

“Pasobra en bèrdat, en bèrdat mi ta bisa boso, esun ku tin e spiritu di kontenshon no ta di mi, pero ta di diabel, kende ta e tata di kontenshon, i ta influensiá e kurasonnan di hende pa kontendé ku rabia, un ku otro.

“At’akí, … mi doktrina ta esaki, pa e kosnan aki wòrdu pará” (3 Nefi 11:28–30; énfasis poné aserka).

E Salbador no a limitá Su atvertensia kontra kontenshon pa esnan kende no ta wardando e mandamentu di boutismo. El a taha kontenshon pa kualkier hende. Asta esnan kende ta warda e mandamentunan no mester instigá e kurasonnan di hende pa pleitá ku rabia. E “tata di kontenshon” ta e diabel; e Salbador ta e Prens di Pas.

Di mesun manera, e Beibel ta siñá ku “hende sabí ta kalma tur emoshon” (Proverbionan 29:8). E Apòstelnan di ántes a siñá ku nos mester “buska … loke ta kontribuí na pas” (Romanonan 14:19) i papia e bèrdat den amor (Efesionan 4:15), “pasobra rabiamentu no ta hiba na un bida hustu manera Dios ta deseá” (Hakobo 1:20). Den revelashon moderno Señor a manda ku e bon notisia di e evangelio restourá mester wòrdu deklará di kada hende na su bisiña, den delikadesa i den mansedumbre (D&C 38:41), ku tur humildat, sin insultá kontra e insultadó (D&C 19:30).

Asta segun nos ta buska pa ta mansu i pa evitá kontenshon, nos no mester komprometé of diluí nos kompromiso na e bèrdatnan ku nos ta komprondé. Nos no mester entregá nos posishonnan of nos balornan. E evangelio di Hesu Kristu i e kombenionan ku nos a hasi ta pone nos inevitablemente den e ròl di kombatientenan den e bataya eterno entre bèrdat i eror. No tin área neutral den e bataya ei.

E Salbador a munstra e kaminda ora Su atversarionan a konfront’É ku e muhé kende a wòrdu gará kometiendo adulterio (Huan 8:4). Ora nan a wòrdu bergonsá di nan mes hipokresia, e akusadornan a retirá i a laga Hesus su so ku e muhé. El a trat’é ku bondat nengando pa konden’é na e momentu ei. Pero tambe El a instruyé firmemente pa “no sigui biba den piká” (Huan 8:11). Bondat amoroso ta rekirí, pero un siguidó di Kristu—meskos ku e Maestro—lo ta firme den e bèrdat.

Manera e Salbador, Su siguidornan tin biaha ta wòrdu konfrontá pa komportashon pekaminoso, i awendia ora nan ta proklamá korekto i malu segun nan ta komprond’é, nan tin biaha ta wòrdu yamá “intolerante” of “fanátiko.” Hopi balornan i práktikanan mundial ta plantia tal retonan na Santunan di e Delaster dianan. Prominente entre nan awendia ta e manera fuerte ku ta legalisando matrimonio entre e mesun sekso den hopi estadonan i provinsianan na Merka i Kánada i hopi otro paisnan rònt mundu. Nos tambe ta biba huntu ku esnan kende ni ta kere den matrimonio. Algun no ta kere den di tin yu. Otro ta oponé kualkier restrikshon riba pornografia of droganan peligroso. Un otro ehèmpel—familiar na e mayoria di kreyentenan—ta e reto di biba ku un kasá of miembro di famia ku no ta kere of asosiando ku koleganan ku no ta kere.

Den lugánan dediká, manera tèmpelnan, kasnan di alabansa, i den nos mes hogarnan, nos mester siña e bèrdat i e mandamentunan klaramente i kabalmente segun ku nos ta komprondé nan di e plan di salbashon revelá den e evangelio restourá. Nos derecho pa hasi esei ta protehá pa e garantianan konstitushonal di libertat di ekspreshon di opinion i religion, i tambe pa e privasidat ku ta wòrdu honrá asta den paisnan sin garantianan konstitushonal formal.

Den públiko, kiko personanan religioso ta bisa of hasi ta impliká otro konsiderashonnan. E práktika liber di religion ta kubri e mayoria di akshonnan públiko, pero e ta suheto na kualifikashonnan nesesario pa akomodá e kreensianan i práktikanan di otronan. Leinan por prohibí komportashon ku en general ta wòrdu mirá komo malu of inakseptabel, manera eksplotashon seksual, violensia, of komportashon terorista, asta si e ta wòrdu hasí pa ekstremistanan den nòmber di religion. Komportashon ménos penoso, miéntras ku e ta inakseptabel pa algun kreyentenan, mester simplemente wòrdu soportá si nan a wòrdu legalisá pa loke un profeta di e Buki di Mormon ta yama “e stèm di e hende” (Mosia 29:26).

Tokante e tópiko di diskurso públiko, nos tur mester sigui e siñansanan di evangelio pa stima nos próhimo i evitá kontenshon. Siguidornan di Kristu mester ta ehèmpelnan di sivilidat. Nos mester stima tur hende, ta bon skuchadónan, i munstra interes pa nan kreensianan sinsero. Aunke por ta nos no ta di akuerdo, nos no mester ta desagradabel. Nos posishon i komunikashon riba tópikonan kontroversal no mester ta kontensioso. Nos mester ta sabio ora nos ta spliká i dediká nos mes na nos posishonnan i kon nos ta influensiá otronan. Hasiendo esei, nos ta pidi ku otronan no tuma ofensa pa nos kreensianan sinsero religioso i e práktika liber di nos religion. Nos ta animá nos tur pa praktiká e esensia di lei di Señor: “Trata otro hende den tur kos meskos ku bo ke pa nan trata bo” (Mateo 7:12).

Ora nos posishonnan no ta prevalesé, nos mester akseptá resultadonan desfavorabel ku grasia i praktiká sivilidat ku nos atversarionan. Den kualkier evento, nos mester ta personanan di bon boluntat kontra tur, rechasando persekushon di kualkier forma, inkluso persekushon basá riba rasa, étnisidat, kreensianan religioso of inkreibilidat, i diferensianan den orientashon seksual.

Mi a papia tokante prinsipionan general. Awor mi kier papia tokante kon e prinsipionan aki mester wòrdu apliká den un kantidat di sirkunstansianan familiar den kua e siñansanan di Señor mester wòrdu siguí mas fielmente.

Mi ta kuminsá ku loke nos yunan chikitu ta siñá den nan aktividatnan di hunga. Demasiado hopi biaha hendenan no Mormon aki na Utah a wòrdu ofendé i alehá pa algun di nos miembronan kende no lo permití nan yunan ta amigu ku muchanan di otro religionnan. Siguramente nos por siñá nos yunan balornan i stándartnan di komportashon sin ku nan mester distansiá nan mes òf munstra falta di rèspèt na kualke kende ku ta diferente.

Hopi maestronan na iglesia i skol a lamentá e manera den kua algun hóbennan, inkluyendo hóbennan di nos Iglesia, ta trata otro. E mandamentu pa stima otro sigur ta inkluí amor i rèspèt entre diferente religionnan i tambe pa diferente rasanan, kulturanan, i nivelnan ekonómiko. Nos ta reta kada hóben pa evitá tèrmentu, insulto, of lenga i práktikanan ku intenshonalmente ta kousa otro doló. Tur esakinan ta violá Señor Su mandamentu pa stima otro.

E Salbador a siñá ku kontenshon ta un hèrmènt di e diabel. Esei sigur ta siñá kontra algun di e lenga aktual i práktikanan di polítika. Biba ku diferensianan di normanan ta esensial na polítika, pero diferensianan di normanan no mester inkluí atakanan personal ku ta strobá e proseso di gobièrnu i kastigá partisipantenan. Nos tur mester saka komunikashon odioso i praktiká sivilidat pa diferensianan di opinion.

E situashon mas importante na unda pa evitá kontenshon i praktiká rèspèt pa diferensianan ta den nos hogarnan i relashonnan familiar. Diferensianan ta inevitabel—algun chikitu, otro mas grandi. Tokante diferensianan grandi, suponé un miembro di famia ta den un relashon ko-habitante. Esei ta trese dos balornan importante den konflikto—nos amor pa e miembro di famia i nos kompromiso na e mandamentunan. Siguiendo e ehèmpel di e Salbador, nos por munstra bondat amoroso i ainda keda firme den e bèrdat dor di evitá akshonnan kua ta fasilitá of ta parse di kondená lokual nos sa ku ta malu.

Mi ta será ku un otro ehèmpel di un relashon familiar. Na un konferensha di staka kasi 10 aña pasa, mi a konosé un hermana kende a konta mi ku su kasá ku no ta miembro a bini iglesia huntu ku n’e pa 12 aña pero nunka a bira miembro di Iglesia. Kiko e mester hasi? el a puntra. Mi a konseh’é pa sigui hasi tur e kosnan bon i pa tin pasenshi i pa ta kariñoso ku su kasá.

Kasi un luna despues el a skirbi mi lo siguiente: “Wèl, mi a keré ku e 12 aña tabata un bon muestra di mi pasenshi, pero mi no tabata sa si mi tabata hopi kariñoso tokante esei. Asina ku pa mas ku un luna mi a praktiká mucha mas duru, i el a wòrdu boutisá.”

Bondat ta poderoso, spesialmente den un situashon familiar. Su karta a kontinuá, “Mi ta asta trata di ta mas kariñoso awor pasobra nos ta preparando pa wòrdu seyá den tèmpel e aña ki!”

Seis aña despues el a skirbi mi un otro karta: “Mi kasá a [kaba] di wòrdu yamá i apartá komo e obispu [di nos bario}.”²

Den asina hopi relashonnan i sirkunstansianan di bida, nos mester biba ku diferensianan. Kaminda ta vital, nos banda di e diferensianan aki no mester wòrdu nengá of bandoná, pero komo siguidornan di Kristu nos mester biba trankilamente ku otronan kende no ta kompartí nos balornan of akseptá e siñansanan riba kua nan ta basá. E Tata su plan di salbashon, kua nos sa pa revelashon profétiko, ta pone nos den un sirkunstansia mortal na unda nos mester warda Su mandamentunan. Esei ta inkluí stimá nos próhimo di diferente kulturanan i kreensianan meskos ku E a stimá nos. Manera un profeta di e Buki di Mormon a siñá, nos mester pusha dilanti, ku “un amor pa Dios i pa tur hende” (2 Nefi 31:20).

Kon difísil ku por ta pa biba den e konfushon rònt di nos, nos Salbador su mandamentu pa stima otro manera E a stima nos ta probablemente nos reto mas grandi. Mi ta pidi ku nos por komprondé esaki i buská pa bib’é den tur nos relashonnan i aktividatnan, den e nòmber di Hesu Kristu, amèn.