E Señor Tin un Plan pa Nos!

Tumando desishonnan ku por afektá nos bidanan i [di] esnan ku nos ta stima sin e vishon mas grandi di nan konsekuensianan por krea riesgonan. Pero, si nos ta proyektá e posibel konsekuensianan di e desishonnan den e futuro, nos por mira ku mihó klaridat e mihó kaminda pa tuma den e presente.

Komprondiendo kken nos ta, di kon nos ta aki, i kiko e Señor ta spera di nos durante a bida aki lo yuda nos pa yega e vishon mas grandi ku nos mester.

Nos por haña ehèmpelnan den e skrituranan kaminda un vishon mas grandi a duna klaridat tokante kua kaminda mester tuma.

Moises a papia ku e Señor kara pa kara, i a siña tokante di e plan di salbashon, i asina a komprendé su papel komo profeta di e unifikashon di Israel.

I Dios a papia ku Moises, bisando: Awor, Mi ta e Señor Dios Todopoderoso. …

I lo Mi mustra bo e obra di mi mannan. …

I mi tin un obra pa bo, Moises, mi yu (Moises 1:3–4, 6).

Ku e komprendementu aki, Moises tabata por perserverá hopi añanan di tribulashon den a desierto i guia Israel bèk na su kas.

Lehi, e profeta grandi di e Buki di Mormon, a soña un soño, i den su vishon el a siña di su mishon pa guia su famia na e tera primintí.

“I a sosodé ku e Señor a manda mi tata, asta den un soño, pa e tuma su famia i bai den e desierto.

“… I el a sali bai den e desierto [i a laga atras], e tera di su herensia, i su oro, i su plata, i su kosnan presioso” (1 Nefi 2:2, 4).

Lehi a keda fiel na e vishon aki apesar di e difikultatnan di e biahe i ku e tabatin ku laga su bida konfortabel pa tras na Yerúsalèm.

E Profeta Jose Smith ta otro ehèmpel grandi. Pa medio di hopi revelashon, kuminsando ku e Promé Vishon, e tabata por a kompletá su mishon di restorá tur kos (wak Joseph Smith—History 1:1–26).

I kon ta ku nos? Kiko e Señor ta spera di kada unu di nos?

Nos no mester wak un angel pa optené komprenshon. Nos tin e skrituranan, e tèmpel, profetanan bibiente, nos bendishon patriarkal, lidernan inspirá, i, mas ku tur kos, e derecho pa risibí revelashon personal pa guia nos desishonnan.

E mihó kamindanan kasi nunka ta esnan mas fásil. Hopi biaha, e ta e kontrario. Nos por wak e ehèmpelnan di e profetanan ku mi a kaba di menshoná.

Moises, Lehi, i Jose Smith no tabatin bidanan fásil i tòg di e hecho ku nan desishonnan tabata korekto.

Nos ta dispuesto pa paga e presio di nos desishonnan? Nos ta prepará pa sali nos zonanan di komodidat pa alkansá un lugá mihó?

Bolbiendo na e eksperiensha ku mi bendishon patriarkal, mi a yega na e konklushon den e tempu ei ku mi tabatin mester di buska edukashon adishonal i apliká pa un beka na un universidat Merikano. Si mi wòrdua selekshoná, lo mi mester a laga mi trabou, bende tur kos ku nos tabatin, i bai biba na Merka komo un studiante ku beka pa dos aña.

E èksamennan manera TOEFL i GMAT and bira e promé desafio pa mi vense. El a tuma tres aña largu di preparashon, hopi ”no”, i algun ”kisas” promé ku mi a wòrdu akseptá na e universidat. Ainda mi ta kòrda e yamada di telefon ku mi a risibí na final di e di tres aña for di e persona responsabel pa mi beka.

El a bisa, “Carlos, mi tin un algun bon notisia i un algun mal notisia pa bo. E bon notisia ta ku bo ta entre e tres finalista di e aña aki,” Solamente tabatin un lugá habrí e tempu ei. “E mal notisia ta ku un di e kandidatonan ta e yu di un hende importante, e otro ta e yu di un otro hende importante, i despues ta bin abo.”

Lihé mi a kontest’é, “I ami … ami ta un yu di Dios.”

Felismente e mayornan terenal no tabata e faktor desisivo parentela, i mi a wòrdu akseptá e aña ei, den 1992.

Nos ta yunan di Dios Todopoderoso. E ta nos Tata, E ta stima nos, E tin un plan pa nos. Nos no ta akinan den e bida aki pa malgastá nos tempu, bira bieu, i muri. Dios ke pa nos krese i alkansá nos potensial.

Den e palabra di Presidente Thomas S. Monson: “Kada un di bosnan, soltero, of kasá, no importá e edat, tin e oportunidat pa siña i krese. Ampliá bosnan konosementu, tantu intelektual komo spiritual, te na estatura kompleto di bosnan potensial divino.” (“The Mighty Strength of the Relief Society,” Ensign, Nov. 1997, 95).

Lehi a hasi mas ku algunr di intentonan pa yuda Laman i Lemuel komprendé e importansia di e kambio ku nan tabata hasi. E hecho ku nan no a kompartí e vishon di nan tata a kousa ku nan a keha durante su biaha. Nefi, di otro banda, a buska e Señor pa e por wak loke su tata a wak.

I a sosodé ku despues ami, Nefi, a tende tur e palabra di mi tata, konserniente e kosnan ku el a wak den su vishon,…ami…tabata deseá ku ami por wak tambe, i tende, i sa e kosnan ei, pa medio di e poder di e Spíritu Santu. (1 Nefi 10:17).

Ku e vishon ei, Nefi no solamente por a vense e desafionan di su biaha pero tambe [por a] guia su famia ora esaki tabata nesesario.

E ta probabel ku ora nos disidí di tuma un sierto kaminda, e hende ku nos ta stima lo ta afektá i algun lo kompartí e resultadonan di e desishon ei . Lo ta Ideal, nan lo mester wak e meskos ku nos i kompartí nos mesun konvikshonnan. Esaki no semper ta posibel, pero ora e ta sosodé, e biaha ta mas fásil.

Den e eksperiensha personal ku mi a ilustrá, sin duda mi tabatin mester di e apoyo di mi kasá. E yunan ainda tabata chikí i no tabatin hopi pa bisa, pero e apoyo di mi kasá tabata esensial. Mi ta kòrda, ku promé, Mónica i ami tabatin ku diskutí e kambio di plannan te ora el a sinti kómodo i komprometé [su mes]. E vishon kompartí aki a hasié no solamente apoyá e kambio pero pa bira un parti esensial den su éksito.

Mi sa ku e Señor tin un plan pa nos den e bida aki. E konosé nos. E sa loke ta mihó pa nos. Djis pasó e kosnan ta bayendo bon no ker men ku nos no mester konsiderá ku tin algu mihó. Si nos ta sigui biba manera nos ta bibando, e bendishonnan primintí lo wòrdu kumplí?

Dios ta biba. E ta nos Tata. E Salbador JesuCristu ta biba, i mi sa ku solamente pa medio di Su sakrifisio ekspiatorio nos por haña e forsa pa vense nos desafionan diario. Den e nòmber di JesuCristu amèn.