Bida Eterno—pa Konosé Nos Tata Selestial i Su Yu, JesuCristu

Hopi aña pasa mi a tuma e oportunidat pa studia e testimonionan final di e profetanan den kada dispensashon. Kada un a kompartí poderoso testimonio di Dios e Tata i Su Yu, JesuCristu.

Ora mi a lesa e testimonionan aki—i hopi otro meskos ku nan, durante e añanan—semper a toka mi kurason pa sinti kon profundo Tata Selestial ta stima Su Yu mayor i kon Jesus ta mustra Su amor pa medio di Su obedensia na e boluntat di Su Tata. Mi ta testifiká ku ora ku nos ta hasi loke tin mester pa konosé Nan i Nan amor pa otro, nos lo haña “e don mas grandi di tur e donnan di Dios”—si e bida eterno.¹ Pasobra “esaki ta bida eterno, pa nan por konosé abo e úniko Dios berdadero, i JesuCristu, ken abo a manda.”²

Kon e don esaki por ta di nos? E ta bini pa medio di revelashon personal, kua a wὸrdu bisá i siñá awe mainta

Boso ta kòrda e promé tempu ku boso tabata sa ku tabatin un Dios i por a sinti Su amor? Komo un mucha, mi a tabata wak den e shelu di strea i meditá i sinti Su presensia. Mi tabata animá pa eksplorá e beyesanan magnífiko di e kreashonnan di Dios—for di e insektonan chikí asta e palunan grandi. Ora ku mi a rekonosé e beyesa di e tera aki, mi tabata sa ku Tata Selestial ta stima mi. Mi a haña sa ku mi tabata literalmente un yu spiritual, ku nos tur ta yunan hòmber i muhé di Dios.

Kon mi a haña sa esaki? boso por puntra. E Skrituranan ta siña, “Na algun ta wὸrdu duná pa medio di e Spiritu Santu pa sa ku JesuCristu ta e Yu di Dios, i … na otronan ta wὸrdu duná pa kere nan palabra, pa nan tambe por tin bida eterno si nan ta sigui fiel.”³For di mi perspektiva, esaki no ke men ku algun hende lo ta dependé semper riba e testimonionan di otronan.

Mi mes testimonio a krese ora ku mi a siña tokante Tata Selestial i e Salbador for di siñansa i testimonio di mi mayornan, maestronan, e skrituranan—kua mi tabata lesa diligentemente—i speshalmente e Spiritu Santu. Ora ku mi a ehersé fe i obedesé e mandamentunan, e Spiritu Santu a testifiká ku loke mi tabata siña tabata bèrdat. Esaki ta kon mi a haña sa pa mi mes.

Den e proseso aki, buskando pa mi revelashon personal ta e klave. Nefi ta invitá kada un di nos pa “deleitá riba e palabra di Cristu; pasobra e palabra di Cristu lo bisa boso tur loke boso tin ku hasi.”⁴

Promé ku mi a tabatin ocho aña, mi a buska pa sa mas tokante di boutismo. Mi a lesa e skrituranan i hasi orashon. Mi a siña ku lo mi tabata bai risibí e don di e Spiritu Santu ora mi wὸrdu konfirmá. Tambe mi a kuminsá komprondé ku Dios i Cristu ta literalmente un Tata i un Yu—separá, distinto, sernan individual ken ta kompletamente unifiká den Nan propósito. “Nos ta stima [Nan], pasobra [Nan] a stimá nos promé.”⁵ I ketu bai mi a opservá kon Nan ta stima otro i traha huntu pa nos benefisio. Tende na algun di e hopi skrituranan ku ta siña nos e bèrdat aki”

Siñando tokante nos bida premortal, Tata Selestial a referí na JesuCristu komo “mi Yu Stimá, kua tabata mi Estimado i Eskohí for di e kuminsamentu.”⁶ Ora e Tata a krea e tera, El a hasié “pa medio di [Su] Yu Unigénito”.⁷

A wὸrdu bisá na Maria, mama di Jesus, ku e lo trese dilanti “e Yu Di e Altísimo.”⁸ I ora Jesus tabata un hòmber yòn, El a bisa Su mama ku E mester “ta den asuntu di [Su]Tata.”⁹ Añanan despues, ora e Salbador a wὸrdu boutisá, Tata Selestial a papia for di e shelunan, bisando, “Esaki ta mi Yu stimá, den ken mi ta komplasé.”¹⁰

Pa siña Su disípulonan hasi orashon, Jesus a papia e palabranan aki:

“Nos Tata ku ta na shelu, Santifiká sea bo nòmber.

“Bo reino bini. Bo boluntat sea hasí na tera, meskos ku ta na shelu.”¹¹

El a siña Nicodemo, “Dios a stimá e mundu masha tantu, ku el a duna su Yu unigénito.”¹² I El a splika Su milagernan bisando: “E Yu no por hasi nada di su mes, pero loke e ta mira e Tata hasi: pasobra kualke kos ku [e Tata] hasi, e kosnan aki e Yu tambe ta hasi meskos.”¹³

Ora ku e tempu di e Ekspiashon a yega serka, Jesus a hasi orashon, bisando: Tata, e tempu a yega. … Mi a glorifiká bo na tera: Mi a kaba e obra ku bo a dunami pa hasi.”¹⁴ Anto, ora ku e peso di nos pikánan a kai na Dje, El a súplika, “O mi Tata, si lo ta posibel, laga e kòpi bai for di mi; tὸg no manera mi ke, pero manera abo ke.”¹⁵ Den Su último momentunan riba e krus, Jesus a hasi orashon, “Tata, pordoná nan; pasobra nan no sa kiko nan ta hasi” i despues a sklamá, “Tata, den bo man mi ta entrega mi spiritu.”¹⁶

Despues El a bishita e spiritunan di esnan ku a muri, den e mundu di spiritu, pa duna nan “poder pa bini dilanti, despues di su resurekshon for di e mortonan, pa drenta den reino di su Tata.”¹⁷ Despues di e Resurekshon di e Salbador, El a parse na Maria Magdalena, bisando, “Mi ta subi na mi Tata, i bo Tata.”¹⁸

Ora El a bini na e hendenan riba e kontinente Merikano, Su Tata a introdusié’ bisando, “At’akí mi Yu Stimá, den ken mi ta komplasí, den ken mi ta glorifiká mi nòmber.”¹⁹ Ora Jesus a baha entre e hendenan na e tèmpel, El a introdusí Su mes bisando: “At’akí ami ta JesuCristu. … Mi a glorifiká e Tata den tumamentu riba riba mi e pikánan di e mundu.”²⁰ Ora El a siña Su doktrina, El a splika:

“Ta e doktrina ku e Tata a dunami; i ami ta duna testimonio di e Tata, i e Tata ta duna testimonio di mi.”²¹

“En bèrdat… e Tata i ami ta unu.”²²

Nos por mira e patronchi den e skrituranan aki ku ta testifiká di e Tata i e Yu komo sernan distinto i individual? Kon, anto nan taunu? No pasobra nan ta e mes hende pero pasobra Nan ta unifiká den propósito, dediká igualmente pa trese e inmortalidat i bida eterno di hòmber.”²³

Jesus ta un Dios, tὸg kontinuamente E ta distinguí Su mes komo un ser separá, individual dὸr di hasi orashon na Su Tata i bisa ku E ta hasi e boluntat di Su Tata. Durante Su ministerio entre e Nefitanan, El a supliká, “Tata, mi no ta pidi pa e mundu, pero pa esnan kende bo a dunami for di e mundu, … pa mi por ta den nan manera abo, Tata, ta den mi, pa nos por ta unu, pa mi por wὸrdu glorifiká den nan.”²⁴

Ku esaki na mente, nos no ta sorprendí ku e Restourashon di e evangelio a kuminsá ku e aparensia di no unu pero dos sernan glorifiká. Di su Promé Vishon, e Profeta Joseph Smith a testifiká, “Un di nan a papia ku mi, yamando mi na mi nòmber i a bisa, señalando e otro—Esaki ta mi Yu Stimá. Tende na Dje.”²⁵

E Profeta yòn, ken a bai den e arboleda pa haña sana kua iglesia e mester a uni, a bai ku fe indudabel, i a sali ku e konosementu i un testigu di e úniko Dios berdadero i JesuCristu, ken Dios a manda. Joseph, manera e profetanan promé ku n’e, tabata e ora ei un instrumènt pa restourá na e mundu e konosementu ku ta guia na bida eterno.

Boso tambe por buska nos Tata Selestial i “e Jesus aki di kende e profetanan i apòstelnan a [testifiká],”²⁶ den skrituranan i den e konferensha general aki. Ora ku boso ta buska,- un testimonio personal- boso revelashon personal- boso lo deskubrí ku Tata Selestial a duna un manera special pa boso konosé e bèrdat pa boso mes: pa medio di e di tres miembro di e Deidat, un personahe di spiritu ku nos konosé komo e Spiritu Santu.

“I ora boso risibí e kosnan aki”—inkluyendo loke mi a kompartí awe—“Mi ta amonestá boso pa boso puntra Dios, e Tata Eterno den e nòmber di Cristu, si e kosnan aki no ta bèrdat; i si boso pidi ku un kurason sinsero, ku berdadero intenshon, ku fe den Cristu, e lo manifestá e bèrdat di dje na boso, pa e poder di Spiritu Santu.

“I pa e poder di Spiritu Santu boso por sa [ku seguridat] e bèrdat di tur kos.”²⁷

Rumannan, mi ta testifiká ku Nos Tata Selestial ke pa nos buska e konosementu aki awor. E palabranan di e profeta Helaman ta bini for di e stὸf: “Kòrda, kòrda ku ta riba e baranka di nos Redentor, ken ta Cristu, e Yu di Dios, ku boso mester edifiká boso fundashon … , un fundashon riba kua si hòmbernan ta edifiká nan no por kai.”²⁸ Di bèrdat, nos no lo frakasá.

E fundashon sigur ei ta JesuCristu. E ta e “Baranka di Shelu.”²⁹Ora nos edifiká nos kas riba Dje, e áwaseru di e delaster dianan por kai, e diluvio por bini, i e bientunan por supla, pero nos lo no kai. Nos no lo frakasá, pasobra nos kas i nos famia lo ta fundá riba Cristu.³⁰

Mi ta testifiká ku e hogar ei ta “un kas di gloria.”³¹ Einan nos ta reuní huntu pa hasi orashon na nos Tata Selestial den e nòmber di JesuCristu, Su Yu stimá. Einan nos ta glorifiká i duna danki na Nan. Einan nos ta risibí e Spiritu Santu i “e promesa ku [E ta duna] na [nos] di bida eterno, si e gloria di e reino selestial.”³²

Mi ta duna mi testimonio speshal ku nos Salbador, ta JesuCristu, ku E ta biba, ku nos Tata Selestial Eterno ta stima nos i ta kuida nos, ku nos tin un profeta den e dispensashon aki—si Presidente Thomas S. Monson—pa guia nos. E Spiritu Santu ta testifiká ku esaki ta bèrdat na kada un ku bai i buska e konosementu. Den e nòmber di JesuCristu, amèn.