E Santa Sena i e Ekspiashon

Riba [e dia] bispu di Getsémani i Kalvario, Jesus a reuní Su Apòstelnan huntu un delaster biaha pa adorá, E lugá tabata un kamber mas ariba di un kas di un disípulo na Yerusalèm, i e temporada tabata Pasku.¹

Dilanti nan tabata e kuminda di Pasku tradishonal, ku tabata konsistí di un lamchi ekspiatorio, biña, i pan sin zürdeg, emblemanan di Israel su salbashon di pasado di sklabitut i morto² i di un futuro redenshon ku mester wòrdu realisá ainda.³ Ora e kuminda tabata yegando su fin, Jesus a tuma e pan, bendishon’é i kibr’é,⁴ i dun’é na su Apòstelnan, bisando, ”Tuma, kome.”⁵ ”Esaki ta mi kurpa ku lo wòrdu entregá pa bosonan: Hasi esaki den mi memoria.”⁶ Di mes manera El a tuma e kopa di biña, ofresé un bendishon riba dje, i a pas’é pa esnan ku tabata rondon’E, bisando: ”E kopa aki ta e tèstamènt nobo den mi sanger,”⁷ ”ku ta dramá … pa e pordon di pikanan.”⁸ ”Hasi esaki den mi memoria.”⁹

Di e manera simpel aki, pero profundo, Jesus a instituí un ordenansa nobo pa e pueblo di kombenio di Dios. Ya no tabatin mester di drama sanger di animal ni mester kome karni di animal den antisipashon di e sakrifisio ku ta redimí di un Cristu ku mester a bin.¹⁰ Na lugá, emblema di karni kibrá i sanger dramá di Cristu ku ya a yega lo wòrdu tumá i komé den memoria di Su sakrifisio ku ta redimí.¹¹ Partisipashon den e ordenansa nobo aki lo nifiká pa tur un aseptashon solemne di Jesus komo e Cristu prometé i deseo di hinter kurason pa siguiÉ i warda su mandamentunan. Pa esnan ku ke tum’é asina i kondusí nan bida, morto spiritual lo ”pasa ofer” di nan, i bida eterno lo ta garantisá.

Den e oranan i dianan ku a sigui, Jesus a drenta Getsémani, a wòrdu tumá riba Kalvario, i a sali triunfante for di tumba di e Arimatheo. Despues ku El a bai, for di nan, Jesus su disípulonan den i rònt Yerusalèm tabata bini huntu e promé dia di siman pa ”kibra pan,”¹² i a hasi esaki ”konstantemente.”¹³ Ku siguridat, nan no tabata hasi esaki solamente pa kòrda nan Señor ku a bai, pero pa tambe ekspresá gratitut pa i fe den Su Redenshon maravioso di nan.

Ta signifikante ku, ora Jesus a bishitá Su disípulonan na Merka, El a instituí e santa sena serka nan.¹⁴ Hasiendo esaki, El a bisa: ”Esaki semper bosnan lo mester hasi,”¹⁵ i ”E lo ta un testimonio na e Tata ku boso semper ta kòrda Mi.”¹⁶ Atrobe, na e kuminsamentu di e Restourashon, Señor a instituí e ordenansa di e santa sena, dunando instrukshonnan na nos meskos ku esnan ku el a duna na Su disípulonan di antigwedat.¹⁷

E ordenansa di e santa sena a wòrdu yamá ” un di e ordenansanan mas santu i sagrado den e Iglesia.”¹⁸ E mester bira mas santu i sagrado pa kada unu di nos. JesuCristu Mes a instituí e ordenansa pa kòrda nos kiko El a hasi pa redimí nos i siña nos kon nos por ta meresedó di Su Redenshon i asina biba ku Dios atrobe.

Ku pan partí i librá, nos ta demostrá ku nos ta kòrda e kurpa físiko di JesuCristu—un kurpa ku a wòrdu sutá ku doló, aflikshon, i tentashon di tur sorto,¹⁹ un kurpa ku a hiba e karga di angustia sufisiente pa sangra di kada poro,²⁰ un kurpa ku su karni a kibrá i ku su kurason tabata kibrá den [e] krusifikashon.²¹ Nos ta demostrá nos kreensha ku miéntras e mesun kurpa ei tabata sosegá den morto, el a lanta bèk for di graf [i biba], pa nunka mas konosé malesa, enbehesimentu, òf morto.²² I tumando di e pan [pa nos mes], nos ta rekonosé ku, meskos ku e kurpa mortal di Cristu, nos kurpa lo wòrdu di lòs for di e lasonan di morto, lanta triunfante di graf, i wòrdu restourá na nos spiritu eterno.²³

Ku un kùp chikitu di awa, nos ta demostrá ku nos ta kòrda e sanger ku Jesus a dramá i e sufrimentu spiritual ku el a pasa aden pa e género humano. Nos ta kòrda riba e agonia ku a kousa gotanan di sangra grandi den Getsémani.²⁴ Nos ta kòrda riba e dolónan i e sota ku El a wanta na man di esnan ku a kaptur’é.²⁵ Nos ta kòrda riba e sanger ke El a drama for di su mannan, pianan, i for di su banda di kurpa na Kalvario.²⁶ I nos ta kòrda Su reflekshon personal riba su sufrimentu: Kual sufrimentu boso no sa, kon intenso boso no sa, si kon duru pa soportá.”²⁷ Bebiendo di e awa, nos ta rekonosé ku Su sanger i sufrimentu a ekspiá pa nos pikanan i ku E lo pordoná nos pikanan si nos brasa i aseptá e prinsipionan i ordenansanan di Su Evangelio.

P’esei, ku pan i awa, nos ta wòrdu rekordá riba e Redenshon di Cristu pa nos di morto i piká. E sekuensha di pan promé i awa na di dos lugá no ta inkonsekuente. Partisipando di e pan, nos ta wòrdu rekordá di nos propio resurekshon personal ku ta inevitabel, ku ta konsistí di mas ku solamente e restourashon di kurpa ku spiritu. Dor di e poder di resurekshon, nos tur lo wòrdu restourá den presensha di Dios.²⁸ E realidat ei ta presentá na nos e pregunta fundamental di nos bidanan. E pregunta fundamental ku ta enfrentá nos tur no ta si nos lo biba pero ku ken nos lo biba despues di morto. Miéntras ku kada unu di nos lo regresá den presensia di Dios, no ta tur lo keda serka Dje.

Durante di e mortalidat, kada unu di nos lo bira manchá ku piká i transgreshon.²⁹ Nos tabata tin pensamentu, palabranan, i obranan ku tabata ménos virtuoso.³⁰ En korto, nos lo ta impuro. I e konsekuensha di impuro den presensha di Dios, Jesus a hasi e esaki perfektamente kla: ”Nada impuro por biba  … den su presensha.”³¹ E realidat ei a wòrdu eksponé na Alma e Hóben, ku, ora [el a wòrdu] konfrontá pa e angel, tabata asina tormentá, dor di su impuresa ku e tabata tin e deseo pa keda ekstinguí tantu di alma i kurpa, pa [e] no por wòrdu hibá pa komparesé den e presensia di … Dios.”³²

Partisipando di e awa di santa sena, nos ta wòrdu siñá kon nos por wòrdu hasí limpi di piká i transgreshon i asina ta den presensha di Dios. Dor di e dramamentu di Su sanger inosente, JesuCristu a satisfasé e demanda di hustisia pa kada un piká i transgreshon. El a ofresé pa hasi limpi si nos lo tin fe den Dje, sufisiente pa repentí; aseptá tur e ordenansanan i kombenionan di salbashon, kuminsando ku boutismo; i risibí e Spiritu santu. Ora nos risibí e Spiritu Santu, nos ta limpiá i purifiká. Jesus a splika e doktrina aki bon kla:

”Nada impuro por drenta den e reino [di Dios]; … nada ta drenta den Su sosiegu salvo ku ta esnan ku a laba nan bistí den mi sanger. …

”Awor esaki ta e mandamentu: Repentí, bosonan tur, te na e ekstremonan di mundu, i bin na mi i wòrdu boutisá den mi nòmber, ku boso por wòrdu santifiká dor di a risibí e Spiritu Santu, ku bosonan por para sin mancha dilanti di mi den e delaster dia.”³³

Esaki ta e doktrina di Cristu.³⁴ Ora nos risibí e doktrina aki i biba konforme esaki, nos ta en efekto labá den e sanger di Cristu i wòrdu limpiá.³⁵

Dor di e orashonnan di santa sena, nos ta ekspresá nos aseptashon pa e doktrina aki di Cristu i nos kompromiso pa biba di akuerdo ku n’e. Den nos petishon na Dios, nos Tata Eterno, nos ta deklará ku nos ”semper [lo] kòrda” Su Yu presioso. Promé, nos ta testifiká di nos ”disponibilidat” pa kòrda. Despues nos ta testifiká kiko nos ”ta” kòrda. Hasiendo esaki, nos ta hasiendo kompromisonan solemne pa ehersé fe den JesuCristu i den Su Redenshon di nos di morto ku piká.

Ademas nos ta deklará ku nos lo ”warda Su mandamentunan.” Esei ta un kompromiso solemne pa arepentí, Si nos pensamentunan, palabranan, i akshonnan ta ménos di loke ku nan mester tabata den dianan ku a pasa, nos ta komprometé nos mes di nobo pa alinia nos bida mas serka ku esun di Dje den e dianan benidero.

Despues, nos ta deklará ku nos ”ta dispuesto pa tuma riba [nos] e nòmber di [E] Yu.”³⁶ Esei ta e kompromiso solemne pa someté nos mes na su outoridat i pa hasi Su obra, ku ta inkluí risibí pa nos mes tur ordenansa i kombenio ku ta salba.³⁷

Ora nos komprometé nos mes na e prinsipionan aki, nos ta wòrdu primintí den e orashonnan di santa sena ku nos lo ”tin Su Spiritu huntu ku [nos].”³⁸ Risibiendo e Spiritu atrobe ta un bendishon ku ta perfekshoná pasó e Spiritu ta e agente ku ta limpia i purifiká nos di piká i transgreshon.³⁹

Rumannan, e evento di mas importante den tempu i eternidat ta e Ekspiashon di JesuCristu. Esun ku ta logra e Ekspiashon, a duna nos e ordenansa di santa sena pa yuda nos no solamente kòrda pero tambe reklamá e bendishonnan di e supremo akto di grasia aki. Partisipashon regular i honesto den e ordenansa sagrado aki ta yuda nos pa brasa i biba e doktrina di Cristu despues di boutismo i di tal manera kontinuá i komplementá e proseso di santifikashon. Di bèrdat, e ordenansa di e santa sena lo yuda nos pa perseverá fielmente te na final i risibí e plenitut di e Tata di mes manera ku Jesus, grasia riba grasia.⁴⁰

Mi ta duna mi testimonio di e poder di JesuCristu pa redimí nos tur for di morto i piká i di e poder di ordenansanan di Su saserdosio, inkluyendo e santa sena, pa prepará nos pa ”wak e kara di Dios, ku ta nos Tata, i biba.”⁴¹ Ku nos por risibí e santa sena e siguiente siman, i kada siman despues, ku deseo mas profundo i un propósito mas sinsero, mi ta roga den e nòmber di e Señor JesuCristu, amèn.