“Si, Señor, Mi Lo Sigui Bo”

Pa Elder Eduardo Gavarret

Di e Setenta

Imagen

E Señor ta invitá nos dor di e siguiente verbonan: “Bini na ami,” Sigui mi,” Kana ku mi.” Den kada kaso e ta un invitashon pa aktua.

“Pasobra at’akí, e Señor ta otorgá na tur nashonnan, di nan mes nashon lenga, pa siña su palabra, si, den sabiduria.”¹ Awe e skritura aki ta wòrdu kumplí un bia mas awor ku a wòrdu duná na mi e oportunidat di ekspresá mi sentimentunan den mi lenga nativo.

E tabata e aña 1975, mi tabata sirbi den e Mishon di Uruguay Paraguay komo un hóben mishonero. Durante mi promé luna den mishon, e lidernan di zona tabatin un aktividat pa demostrá un prinsipio di evangelio. Kada mishonero den e zona su wowonan a wòrdu tapá, i a wòrdu bisá pa sigui un kaminda na e sala kultural. Nos por a sigui e stèm di un lider en partikular, un stèm ku nos a tende promé ku nos a kuminsá kana. Sinembargo, nos a wὸrdu atvertí ku durante e kanamentu, nos lo tende diferente stèmnan ku lo purba di konfundí nos pa hiba nos leu for di e kaminda.

Despues di algun minüt di tende e diferente sonido, papiamentu, i—meimei di tur esei—un stèm a bisa, “Sigui mi,” mi tabatin e konfiansa ku mi tabata siguiendo e stèm korekto. Ora nos a yega na e sala kultural di e kapiya, nos a wὸrdu pidí a kita e paña for di nos wowonan. Ora mi a hasi esei, mi a ripará ku tabatin dos grupo i ku mi tabata den e grupo ku a sigui e stèm robes. “El a zona kasi meskos ku e stèm korekto,” mi a bisa na mi mes.

E eksperiensha aki di 39 aña pasa tabatin un efekto duradero riba mi. Mi a bisa mi mes. “Nunka, atrobe lo mi sigui e stèm robes.” Anto mi a bisa mi mes, “Si, Señor, mi lo sigui Bo.”

Mi lo ke relatá e eksperiensha aki ku e invitashon tierno di e Salbador na nos”

“Ami ta e bon wardadó, i mi konosé mi karnénan. …

“Mi karnénan ta tende mi stem, I mi konose nan, I nan ta sigui mi.”²

E invitashon pa “siguié” ta e invitashon di mas simpel, dirèkt, poderoso ku nos por risibí. E ta bini for di un stèm kla ku no por wὸrdu konfundí.

Señor ta inabitá nos usando vários verbonan: “Bini na ami,” Sigui mi,” Kana ku mi.” Den kada kaso e no ta un invitashon pasivo; e ta un invitashon pa aktua. E ta dirigí na henter humanidat pa esun ku ta e Profeta di profetanan, e Maestro di maestronan, e Yu di Dios, e Mesias.

E Invitashon pa “Bini na Ami”

“Bini na ami, boso tur ku ta kansá ku karga pisá i lo mi duna boso sosiegu.”³

Boso ku ainda no ta miembronan di e Iglesia boso lo risibí e invitashon aki pa medio di e stèm di e mishoneronan ku e palabranan, “Boso lo lesa e Buki di Mormon? Boso lo hasi orashon? Boso lo asistí na Iglesia? Boso lo sigui e ehèmpel di JesuCristu i wὸrdu boutisá pa esnan ku tin e outoridat?”⁴ Kon boso lo kontesta na e invitashon aki awe?⁵

Mi ta invitá boso pa tende i aseptá e mensahe dor di bisa, “Si, Señor, lo mi sigui Bo!”

Carlos Badiola i su famia, di Minas, Uruguay, tabata reuní ku e mishoneronan. Dὸr ku e èldernan tabata hasi hopi pregunta durante e lès, nan a disidí pa invitá un bisiña—un mucha muhé bunita di 14 aña yamá Norma—pa yuda nan kontestá. Norma tabata un studiante dediká skol sekundario kende tabata studia e Beibel na skol e aña ei, asina ku ora e mishoneronan a hasi un pregunta, Norma a kontestá. E tabata un “investigador di oro.” E lès ku a wὸrdu siña e dia ei tabata e Palabra di Sabiduria.

Ora el a bai bèk kas despues di e lès ku e mishoneronan, Norma tabata sa loke e mester a hasi. El a bisa na su mama. “Mama, for di awor en adelante no mas kòfi ku lechi pa mi. Lechi so.” E kontesta ei tabata un manifestashon visibel di su deseo pa aseptá e invitashon pa sigui Cristu, manera a wὸrdu ekstendé pa e mishoneronan.

Tur dos Carlos Badiola Norma a wὸrdu boutisá. Despues, siguiendo e ehèmpel di Norma, su mama, tata, i rumannan tambe a wὸrdu boutisá. Norma i ami a krese huntu den un rama chikí pero poderoso. Despues, ora mi a bin bèk for di mi mishon, nos a kasa. Semper mi tabata sa ku lo tabata mas fásil pa sigui e ehèmpel di e Salbador ku n’e na mi banda.

Un ku ta un miembro di Iglesia i a aseptá e invitashon aki ta renobá e kompromiso kada siman dor di partisipá di e sakramento.⁶ Parti di e kompromiso ta inkluí pa ta honesto den nan trato i warda e mandamentunan, pa hasi esaki nan ta bisa, “Si, Señor lo mi sigui Bo!”⁷

E Invitashon pa “Sigui Mi”

“Sigui mi,” tabata e invitashon di Señor pa e hòmber lider hóben i riku. E hòmber riku a warda e mandamentunan durante su bida. Ora el a puntra kiko mas e mester a hasi, el a risibí un kontesta ku un invitashon kla: “Bini … sigui mi.”⁸ Tὸg, aunke e invitashon tabata simpel, e no tabata sin sakrifisio. E tabata rekerí esfuerso—huntu ku un desishon i akshon.

E profeta Nefi a invitá na reflekshon propio ora el a puntra: I [Jesus} a bisa na e yunan di hòmber: Sigui mi. P’esei, mi rumannan stimá, nos por sigui Jesus a ménos ku nos ta dispuesto di warda e mandamentunan di e Tata?”⁹

E invitashon pa ‘bini na Dje,” pa tende di Su stèm, i pa sigui ta e mensahe di mishoneronan for di e kuminsamentu, yudando hopi pa kambia nan bida pa bon.

Sinkuenta aña pasa e mishoneronan a drenta e tayer di holochi di mi tata pa laga un holochi para wὸrdu drechá. Komo bon mishoneronan ta hasi, nan aprobecha di e oportunidat pa papia ku mi tata I mama tokante di e ebangelio. Mi tata a aseptá e mishoneronan, I mi mama a aseptá e mensahe I inbitashon pa sigui Cristo. For di e dia ei te na awe, el a keda aktiba den Iglesia. El a bisa, “Si, Señor, Mi Lo Sigui Bo!”

Ora ku boso ta esforsá pa bini na Dje, boso lo gana e poder pa aliviá e karganan di bida, físiko òf spiritual, i eksperensiá un kambio interno positivo ku lo yuda boso pa ta mas felis.

E invitashon pa “Kana ku Mi”

Enok a wὸrdu yamá pa prediká e evangelio na un pueblo difísil, duru di kurason. E no a sintié kualifiká. E tabatin duda ku e por a hasié . Señor a kalma su dudanan i a fortalesé su fe pa medio di e invitashon “Kana ku mi”—un invitashon ku, meskos ku un hòmber siegu ku baston of e brasa di un amigu, por guia e paso di un ku su paso no ta sigur. Dor di tuma e brasa di e Salbador i kana ku N’e, Enok a haña ku su paso a bira firme i el a bira un mishonero i profeta poderoso.¹⁰

E desishon pa “bini na ami” i “sigui mi” ta personal. Ora nos aseptá e invitashon aki, nos nivel di kompromiso ta wὸrdu hisá, i ta e ora ei nos por “kana ku N’e.” E nivel aki ta establesé un relashon mas serkano ku e Salbador—e fruta di nos aseptashon di e promé invitashon.

Norma i ami a aseptá individualmente e invitashon pa “bini na ami” i pa “sigui mi.” Anto, huntu, apoyando kada otro, nos a siña pa “kana ku N’e.”

E esfuerso i e determinashon pa busk’é’ i pa siguié’ lo wὸrdu rekompensá ku e bendishonnan ku nos tin mester.

Tal tabata e kaso di un muhé ken, ku gran esfuerso, a logra pa mishi ku e paña di e Salbador¹¹ òf di Bartimaeus, e hòmber siegu, kende su determinashon tabata faktor klave den e milager ku a tuma lugá den su bida.¹² Den tur dos kaso un sanashon di e kurpa i spiritu a wὸrdu duná

Ekstendé boso man, mishi ku Su paña, aseptá Su invitashon, bisa, “Si, Señor, lo mi sigui Bo!”—i kana ku N’e.

“Bini na ami,” “Sigui mi,” i “Kana ku mi” ta invitashonnan ku ta kontené poder inherente—pa boso por aseptá nan—pa transformá boso bida i generá un kambio paden di bo ku lo guia boso pa bisa, “[Mi] no tin mas disposishon pa hasi maldat, pero pa hasi bon kontinuamente.”¹³

Komo un manifestashon eksterno di e kambio boso lo sinti un deseo fuerte pa “yuda e debilnan, hisa e mannan kua ta kologá, i fortalesé e rudianan debil.”¹⁴

Kua pasonan nos mester tuma awe pa “kana ku N’e”?

Alimentá e deseo pa ta un mihó siguidó di Cristu.¹⁵
Hasi orashon pa e deseo aki pa boso fe den Dje lo krese.¹⁶
Haña un konosementu for di skrituranan, lumbrando e kaminda i fortalesiendo boso deseo pa kambia.¹⁷
Tuma e desishon awe pa aktua i bisa, “Si, Señor, lo mi sigui Bo!” Djis pa sa e bèrdat lo no kambia boso mundu a ménos ku boso hiba e konosementu den akshon.¹⁸
Perseverá den e desishon ku boso a tuma dor di eksperimentá e prinsipionan kada dia.¹⁹

Laga e palabranan di nos profeta stimá, Presidente Thomas S. Monson, motivá nos na akshon den nos deseo di aseptá e invitashon di e Salbador. Presidente Monson a bisa: “Ken ta e Rei di gloria, E Señor di ehérsitonan? E ta nos Maestro. E ta nos Salbador. E ta e Yu di Dios. E ta e Outor di nos Salbashon. E ta yama pa, ‘Sigui mi.’ E ta siña, ‘Bai i hasi meskos.’ E ta supliká, ‘Warda mi mandamentunan.”²⁰

Laga nos tuma e desishon awe pa oumentá nos nivel di adorashon i kompromiso na Dios, i laga nos kontestá na Su invitashon wὸrdu skuchá duru i kla: “Si, Señor, lo mi sigui Bo!”²¹ Den e nòmber sagrado di Señor JesuCristu, amèn.