Te Ora Nos Mira Otro Atrobe

Mi hermanonan i hermananan, nos a eksperimentá dos dia glorioso di mensahenan inspirá. Nos kurason a wὸrdu inspirá i nos fe a wὸrdu fortalesé ora ku nos a partisipá di e spiritu ku tabata presente durante di e seshonnan di e konferensha aki. Ora ku nos kaba, nos ta duna danki na Nos Tata Selestial pa e hopi bendishonnan ku El a duna nos.

Nos a wὸrdu edifiká i inspirá pa e bunita músika ku a wὸrdu duná durante e seshonnan. E orashonnan ku a wὸrdu duná a hiba nos mas serka di shelu.

Laga mi ekspresá gratitut di kurason di henter Iglesia pa nos Rumannan ku a wὸrdu relevá na e konferensha aki. Nos lo sinti falta di nan. Nan kontribushon na e obra di Señor tabata masha grandi i lo wὸrdu sintí durante futuro generashonnan.

Laga nos bai bek na nos kas ku e resolushon den nos kurason pa ta un tiki mas mihó ku nos tabata den pasado. Laga nos ta un tiki mas bondadoso i mas atento. Laga nos yuda esnan sin yudansa, no únikamente pa nos miembronan pero tambe na esnan ku no ta di nos fe. Ora ku nos ta asosiá ku nan, laga nos mustra rèspèt pa nan.

Tin esnan ku ta bringa kada dia ku desafionan. Laga nos ekstendé na nan nos preokupashon, i tambe nos man di yudansa. Ora ku nos kuida otro, nos lo wὸrdu bendishoná.

Laga nos kòrda esnan bieu i esnan ku ta malu na kas. Ora ku nos bishita nan, nan lo sa ku nan ta stimá i balorá. Laga nos sigui e mandamentu pa “sokore e debil, hisa e mannan ku ta kologá, i fortalesé e rudianan debil.”¹

Laga nos ta un pueblo di honestidat i integridat, purbando pa hasi loke ta korekto den tur tempu i den tur sirkunstansia. Laga nos ta disípulonan fiel di Cristu, ehèmpelnan di rektitut, i bira e lusnan di mundu.”²

Mi hermanonan i hermananan, mi ta duna boso danki pa boso orashonnan na mi fabor. Nan ta fortalesé mi i alsa mi ora ku mi ta esforsá ku henter mi kurashon i forsa pa hasi e boluntat di Dios i sirbié’ i sirbi boso.

Ora ku nos ta laga e konferensha aki, mi ta invoká e bendishonnan di shelu riba kada un di boso. Ku boso ku ta leu for di boso kas lo bai bek na nan ku seguridat i haña tur kos den órden. Laga nos tur meditá e berdatnan ku nos a tende, i ku nan yuda nos bira disípulonan ainda mas balente ku nos tabata promé ku e konferensha a kuminsá.

Te ora nos mira otro atrobe den seis luna, mi ta pidi pa e bendishonnan di Señor ta riba boso i, enbèrdat,riba nos tur, i mi ta hasi esaki den Su santu nòmber—hasta JesuCristu, nos Señor i Salbador—amèn.