2010–2019
Hasi e Ehersementu di Fe Bo Promé Prioridat
2014

Hasi e Ehersementu di Fe Bo Promé Prioridat

Pa Elder Richard G. Scott

Di e Quorum di e Diesdos Apòstelnan

Imagen

No opstante tur e retonan negativo ku nos tin den nos bida, nos mester tuma tempu pa ehersé aktivamente nos fe.

Tempu Adam i Eva tabata den e Hardin di Eden, tur loke nan tabatin mester pa nan sosten tabata duná na nan den abundansia. Nan no tabatin difikultat, desafionan, ni doló. Dor ku nunka nan a eksperenshá tempu difísil, nan no tabata sa ku nan por ta felis. Nan nunka no a sinti agitashon, p’esei nan no por a sinti pas.

Finalmente Adam i Eva a transgredí e mandamentu di no kome di e fruta di e palu di konosementu di bon ku malu. Hasiendo esaki ya nan no tabata den un estado di inosensia. Nan a kuminsá eksperenshá prinsipionan di oposishon. Nan a kuminsá kontra ku malesa ku ta debilitá nan salú. Nan a kuminsá sinti tristesa i tambe alegria.

Dor di e komementu di e fruta prohibí dor di Adam i Eva, konosementu di bon i malu a keda introdusí den mundu. Nan eskoho a hasi posibel pa kada unu di nos pa bini na e mundu aki pa wòrdu probá i di tèst1. Nos ta bendishoná ku e albedrio, ku ta nos abilidat pa tuma desishon i bira responsabel pa nos desishonnan. E Kaida a trese den nos bida sentimentunan di tantu alegria komo [di] tristesa. Nos por komprondé pas, pasó nos ta sinti agitashon.2

Nos Tata Selestial tabata sa ku esaki lo pasa ku nos. Tur esaki ta parti di Su plan perfekto di alegria. El a prepará un kaminda pa medio di Su Yu perfektamente obediente, JesuCristu, nos Salbador, pa Su Ekspiashon pa superá tur tipo di difikultat ku nos por eksperenshá den mortalidat.

Nos tur ta biba den tempu di prueba. Mi no mester di menshoná tur fuente di maldat den e mundu. No ta nesesario pa deskribí tur posibel desafio i doló di kurason ku ta parti di mortalidat. Kada unu di nos ta hopi konsiente di nos propio lucha ku tentashon, doló i tristesa.

Nos a wòrdu siñá den e mundu preterenal ku nos propósito di bini aki ta pa por wòrdu di tèst, probá, i desafiá.3 Nos tabata sa ku nos lo a enfrentá e maldat di e atversario. Tin biaha nos por ta mas konsiente di e kosnan negativo di mortalidat ku esnan positivo. E profeta Lehi a siña, ”Pasó ta nesesario pa tin un oposishon den tur kos.”4 Apesar di tur e reto negativo ku nos tin den nos bida. nos mester tuma tempu pa aktivamente ehersé nos fe. Un ehersisio asina ta invitá e poder positivo i yen di fe di e Ekspiashon di JesuCristu den nos bidanan.

Nos Tata Selestial a duna nos hèrmènt pa yuda nos bini na Cristu i ehersé fe den Su Ekspiashon. Ora e hèrmènt aki bira kustumbernan fundamental, nan ta proporshoná e kaminda mas fásil pa haña pas den e retonan di mortalidat. Awe m’a skohe pa papia di kuater di e hèrmèntnan aki. Segun ku mi ta papia, konsiderá pa evaluá bo uso personal di kada unu di e hèrmèntnan; despues buska e guiá di e Señor pa determiná kon lo bo por hasi mihó uso di kada unu di nan.

Orashon

E promé hèrmènt ta orashon. Skohe pa kombersá ku bo Tata den Shelu frekuentemente. Tuma tempu tur dia pa kompartí bo pensamentunan i sentimentunan ku n’E. Kont’É tur kos ku tin di haber ku bo. E ta interesá tantu den e faseta mas importante, komo esun di mas mundano di bo bida. Kompartí ku n’E bo tur e plenitut di bo sentimentunan i eksperenshanan.

Pasó E ta respetá bo albedrio, Tata Selestial nunka lo forsa bo pa resa na Dje. Pero ora bo ta ehersé e albedrio ei i inkluí E den kada aspekto di bo bida diario, bo kurason lo kuminsá yena ku pas, pas ku ta trese felisidat. E pas ei lo manda un lus eterno riba bo luchanan. E ta yuda bo pa manehá e retonan aki for di un perspektiva eterno.

Mayornan, yuda salbaguardiá boso yunan dor di duna nan e protekshon di e poder di orashon familiar. Muchanan ta wòrdu bombardiá tur dia ku e maldat di luhuria, avarisia, orguyo, i un kantidat grandi di otro komportashon pekaminoso. Protehá boso yunan di e influensha diario di mundu dor di fortifiká nan ku e bendishon poderoso ku ta bin di orashon familiar. Orashon familiar mester ta un prioridat no negoshabel den nos bida diario.

Estudio di Skritura

E di dos hèrmènt ta pa studia e palabra di Dios den e skrituranan i e palabranan di e profeta bibiente. Nos ta papia ku Dios den orashon. Hopi biaha e ta komuniká bèk ku nos pa medio di Su palabra skirbí. Pa sa kon e bos di Señor ta zona i [kon e ta] sinti, lesa Su palabranan, studia e skritura, i reflekshoná riba nan.5 Hasi nan un parti integral di bo bida diario. Si bosonan ke pa boso yunan rekonosé, komprondé, i aktua riba e susuro di e spiritu, bosonan mester studia e skritura ku nan.

No sede na e mentira di Satanas ku boso no tin tempu pa studia e skritura. Buska pa tuma tempu pa studia nan. Festehando riba e palabra di Dios tur dia ta mas importante ku drumi, skol, trabou, programanan di televishon, weganan di video, i medionan sosial. Kisas bosnan mester reorganisá boso prioridatnan pa duna tempu na e estudio di e palabra di Dios. Si esei ta e kaso, hasié!

Tin hopi promesa profétiko di bendishonnan di estudio diario di e skrituranan.6

Mi ta añadí mi testimonio: si bo dediká tempu tur dia, personalmente i ku bo famia, pa studia e palabra di Dios, pas lo prevalesé den bo bida. E pas ei no lo bin di e mundu eksterior. E lo bin for di bo hogar, for di bo famia, for di bo propio kurason. E lo ta un don di e Spiritu. e lo radia for di bo pa influenshá otronan den e mundu rònt di bo. Lo bo ta hasiendo kos hopi signifikante pa añadí na e pas akumulativo den e mundu.

Mi no ta deklará ku boso bida lo stòp di tin retonan. Kòrda ku tempu Adam i Eva tabata den e hardin nan tabata librá di tur desafio, sinembargo nan no tabata kapas pa eksperenshá alegria, goso, ni pas.7 Retonan ta un parti importante di mortalidat. Dor di estudio di skritura diario, i konsistente lo bo haña pas den e agitashon rònt di bo i fortalesa pa resistí tentashon. Lo bo desaroyá fe fuerte den e grasia di Dios i konosementu ku pa medio di e Ekspiashon di JesuCristu tur kos lo wòrdu drecha di akuerdo ku e tempu di Dios.

Nochi di Hogar

Miéntras ku bo ta trahando pa fortalesé bo famia i kultivá pas, kòrda riba e di tres hèrmènt: Nochi di hogar semanal. Sea kouteloso pa no hasi bo Nochi di hogar djis algu sin importansha despues di un dia okupá. Tuma e desishon pa djaluna anochi ku bo famia lo ta na e hogar huntu pa e anochi. No laga demanda di trabou, deporte aktividatnan èkstra kurikular, tarea di skol òf nada otro bira mas importante ku e tempu ku bo ta pasa na kas ku bo famia.

E struktura di nochi di hogar no ta mes importante ku e tempu ku bo ta invertí. E Evangelio mester wòrdu siñá tantu formal komo informal. Laga pa e ta un eksperensha ku tin signifikativo pa kada miembro di e famia. Nochi di hogar ta un tempu presioso pa duna testimonio den un ambiente sigur; pa siña enseñansa, planifiká, i abilidatnan pa organisá; pa fortalesé lasonan familiar; pa desaroyá tradishonnan familiar; pa papia ku otro; i loke ta mas importante, pasa un tempu maravioso ku otro!

Den e Konferensha di aprel ku a pasa ei, Hermana Linda S. Reeves ku kurashi a deklará:”Mi mester testifiká di e bendishonnan di estudio di skritura i orashon diario i Nochi di hogar. Esakinan ta e mihó práktikanan ku ta kita strès, duna direkshon den nos bida, i duna protekshon na nos kasnan.”8 Hermana Reeves ta un hende muhé hopi sabi, Mi ta urgi boso pa gana boso propio testimonio di e tres kustumbernan aki.

Bishitá Tèmpel

E di kuater hèrmènt ta pa bai e tèmpel. Nos tur sa ku no tin un lugá mas trankilo na mundu ku den e Tèmpelnan di Dios. Si bo no tin un rekomendashon di Tèmpel, kualifiká pa bo haña unu. Ora bo tin bo rekomendashon, us’é ku frekuensha.9 Programá un tempu regular pa ta den Tèmpel. No laga niun hende ni nada prevení bo pa ta einan.

Ora bo ta den tèmpel, skucha e palabranan di e ordenansanan, skrudiñá nan, resa riba nan, i buska pa komprondé nan nifikashon. E tèmpel ta un di e mihó lugánan pa yega na komprendimentu di e Ekspiashon di JesuCristu. Buska É einan. Kòrda ku mas tantu bendishon ta bin di dor di duna bo mes nòmbernan di bo famia na Tèmpel.

E kuater hèrmènt aki ta kustumbernan fundamental pa sigurá bo bida den e poder di e Ekspiashon di JesuCristu. Kòrda ku nos Salbador ta e Prínsipe di Pas. Pas den e bida mortal aki ta bin di Su Sakrifisio ekspiatorio. Si nos konsistentemente resa mainta i anochi, studia nos skritura diariamente, tene nos nochi di hogar tur siman, i asistí na tèmpel regularmente, nos lo ta aktivamente kontestando Su invitashon pa ” Bini na Dje.” Mas nos desaroyá e kustumbernan aki, mas ansioso Satanas lo ta pa lastimá nos pero ménos lo ta tambe su abilidat pa hasi esaki. Dor di uso di e hèrmèntnan aki, nos por ehersé nos albedrio pa aseptá e plenitut di Su donnan di Su Sakrifisio ekspiatorio.

Mi no ta sugeriendo ku tur di e luchanan di bida lo desaparesé si boso hasi e kosnan aki. Nos a bin den e bida mortal presisamente pa krese dor di prueba i tèst. Desafionan ta yuda nos pa bira mas manera nos Tata Selestial, i e Ekspiashon di JesuCristu ta hasi posibel pa soportá e desafionan.10 Mi ta testifiká ku si nos bini aktivamente na Dje, nos lo resistí kada tentashon, kada doló di kurason, kada desafio ku nos enfrentá, den e nòmber di JesuCristu, amèn.

Notanan

  1. Wak Moises 5:11.

  2. Wak Moises 4–5.

  3. Wak Abraham 3:25.

  4. 2 Nefi 2:11.

  5. Wak Doctrina y Convenios 18:36; wak tambe versíkulonan 34–35.

  6. Algun ehèmpel ta inkluí:Presidente Thomas S. Monson a bisa:” Si nos lesa i skrudiñá e skrituranan, nos por eksperenshá e dushi susuro di e Spiritu na nos alma. Nos por haña kontesta na nos preguntanan. Nos ta siña di e bendishonnan ku ta bini dor di warda e mandamentunan di Dios. Nos ta haña un testimonio di nos Tata Selestial i di nos Salbador, JesuCristu, i di Nan amor pa nos. Si estudio di Skritura ta bai kombiná ku nos orashonnan, nos por sa ku siguridat ku e Evangelio di JesuCristu ta bèrdat. … Si nos kòrda resa i tuma tempu pa bira pa e skrituranan, nos bida lo ta infinitamente mas bendishoná i nos karganan lo wòrdu hasí mas leve. (“We Never Walk Alone,” Ensign òf ”No te dejaré, ni te desamparé”Liahona, Nov. 2013, 122).Presidente Gordon B. Hinckley a bisa:” sin reserva mi a primintí bosonan ku si kada unu di bosonan lo warda e programa simpel aki, no opstante kuantu biaha bosonan a yega di lesa e Buki di Mormon, den boso bida i den boso hogar un porshon mas grandi di e spiritu di e Señor, un resolushon fortifiká pa kana den obedensia di su mandamentunan, i un testimonio mas fuerte di e realidat bibu di e Yu di Dios” (“A Testimony Vibrant and True,” Ensign òf ”Un testimonio vibrante i verdadero,”Liahona, Aug. 2005, 6).Presidente Howard w, Hunter a bisa: ”Famianan ta wòrdu bendishoná di gran forma, ora tatanan i mamanan sabí ta trese nan yunan pa nan lesa di e páginanan di e biblioteka di skritura huntu, i despues diskutí abierto, riba e historianan i pensamentu bunita di akuerdo ku e konosementu di nan. Hopi biaha hóbennan i e chikitinnan tin un komprenshon asombroso di i un apresio pa e literatura básiko di religion” (“Reading the Scriptures,” Ensign, Nov. 1979, 64).Presidente Ezra Taft Benson a bisa:”Hopi biaha nos ta hinka hopi esfuerso tratando di oumentá e nivel di aktividatnan den nos Estakanan. Nos ta traha diligentemente pa lanta e porsentahe di esnan ku ta asistí na e reunion nan sakramental. Nos ta traha pa haña un porsentahe mas haltu di nos hóbennan riba mishon. Nos ta lucha pa drecha e kantidat di esnan ku ta kasa den Tèmpel. Tur e esfuersonan ta di aploudí i importante [a e kresementu di e reino. Pero ora miembronan individualmente i famianan ta emergí nan mes den eskritura regular i konstante, e otro arianan di aktividat lo bin outomátikamente. Testimonionan lo krese. Kompromisonan lo wòrdu fortalesé. Famianan lo wòrdu fortalesé. Revelashon personal lo bin” (“The Power of the Word,” Ensign, Mei 1986, 81).Presidente Spencer  W. Kimball a deklará: ”Mi ta haña ku ora mi bira indiferente ku mi relashon ku divinidat i ora ta parse ku no tin un orea Divino ta skuchando i no bos divino ta papiando ku ami ta leu, hopi leu. Si mi sumergí mi mes den e skrituranan e distansha ta bira mas chikitu i e spiritualidat ta regresá. Mi ta haña mi mes stimando mas intenso esnan ku mi mester stima ku hinter mi kurason, i mente i forsa, i stimando nan mas, mi ta haña ku ta mas fásil pa sigui nan konseho.” (Teachings of Presidents of the Church: Spencer W. Kimball [2006], 67).Presidente Marion G. Romney a bisa: “Mi ta sinti un siguransa ku si, den nos hogarnan, mayornan lo lesa di e Buki di Mormon ku orashon i regularmente, tantu riba nan mes komo huntu ku nan yunan, e spiritu di e buki tremendo ei lo plama den nos hogarnan i riba tur ku ta ei den. E spiritu di e kontenshon lo bai. Mayornan lo konsehá nan yunan ku mas amor i sabidoria. Yunan lo ta mas responsabel i sumiso na e e konsehonan di nan mayornan. Rektitut lo krese. Fe, speransa i karidat- e amor puru di Cristu- lo abundá den nos hogarnan i bidanan, tresiendo nan spiritu [ku a] lanta, goso i alegria” (“The Book of Mormon,” Ensign, Mei 1980, 67).Presidente Boyd K. Packer a bisa: “Doktrina di bèrdat, [ora e wòrdu] komprondé, ta kambia aktitut i komportashon. E studio di e doktrina di e evangelio lo mehorá komportashon mas lihé ku un estudio di komportashon por mehorá komportashon” (“Do Not Fear,”Ensign òf (No Temáis)Liahona, Mei 2004, 79).Elder David A. Bednar a bisa: “Kada orashon familiar, kada episodio di estudio di eskritura ku famia, i kada nochi de hogar ta un pasa di e kuashi riba e duki di nos almanan. Niun evento por parse di ta ainda mas impreshonante òf memorabel. Pero meskos ku e hel i e kolo di oro i e maron di e kuashi di e pintura ta komplementá otro i ta produsí un piesa di arte impreshonante, asina nos konsistensha den hasi e kosnan aparentemente chikí por kondusí na resultadonan spiritual” (“More Diligent and Concerned at Home,”Ensign òf (“Más diligentes y atentos en el hogar”) Liahona, Nov. 2009, 19–20).

  7. Wak 2 Nefi 2:13.

  8. Linda S. Reeves, “Protection from Pornography—a Christ-Focused Home,” Ensign òf Liahona, Mei 2014, 16–17.

  9. Presidente Howard W. Hunter a bisa: “Den e spiritu ei mi ta invitá tur Santu di Delaster Dianan pa wak e Tèmpel di e Señor komo un símbolo di bo miembresia. Ta e deseo mas grandi di mi kurason pa laga tur miembro di e Iglesia digno pa drenta e Tèmpel. Esaki lo agradá e Señor si kada miembro adulto lo ta digno pa –i ta karga ku nan- un rekomendashon di Tèmpel vigente. E kosnan ku nos mester hasi i ku nos no mester hasi p ata digno di un rekomendashon ta e mesun kosnan ku ta sigurá ku nos ta kontentu komo individual i komo famia. Laga nos ta un pueblo ku ta asistí na Tèmpel. Bishitá e Tèmpel mes frekuente ku bo sirkunstanshanan personal ta pèrmití. Tin un potrèt di un Tèmpel den bo hogar ku bo yunan por mir’é. Siña nan di e propósito di e kas di Señor. Laga nan planifiká for di nan promé añanan pa bai einan i pa keda digno di e bendishon ei. (“Exceeding Great and Precious Promises,” Ensign, Nov. 1994, 8)

  10. Wak 2 Nefi 2:2.