Na Tamata Taucoko ena Veivanua Kecega

E dua na ka au a vulica rawa mai na wiliki ni iVola i Momani se qai vakayacori walega oqo o ya na levu ni Nona lomani keda taucoko na luvena e vuravura na Kalou. Ena imatai ni iwase e a vakacaucautaka kina na Tamada o Liai na Turaga ni “nomuni kaukauwa kei na nomuni loloma kei na nomuni yalovinaka, sa yacovi ira na lewe ni vuravura kecega,” (1 Nifai 1:14). Sa na dau vakavulica tikoga na iVola i Momani ni tarai vuravura taucoko na yalayala kei na mana ni kosipeli i Jisu Karisito. Oqo eso na kena ivakaraitaki, ka lavetaki mai na ivola o ya:

• “Ena vuku ni soro … sa vakarautaki tu mai na vakatekivu kei vuravura me ra bula kina na tamata kecega, tekivu mai na lutu i Atama, … kei ira ena gauna mai muri” (Mosaia 4:7).

• “Ia ni sa vakabulai ira na tamata ko Jisu Karisito, … sa yaco kina na tucake tale mai na mate ka ra vakabulai na tamata kecega” (Momani 9:13).

• “A sa colata ko koya na rarawa ni tamata kecega … , na tagane kei na yalewa kei na gone… . Ia sa vosota na ka kece oqo me ra rawata kina na tucaketale mai na mate na tamata kecega” (2 Nifai 9:21–22).

• “Sa tarova li e dua me vakaivotavota mai na nona veivakabulai? … E segai; ia sa solia wale vei ira na tamata kecega; ia … sa solia vei ira na tamata kecega ka sega e dua sa vakatabui vua” (2 Nifai 26:27–28).

Eda wilika talega ni “sa sorovaki talega ena nona dra na caka cala … ko ira era sa mate ka sega ni kila na vunau ni Kalou, se ko ira sa caka ca ena nodra lecaika” (Mosaia 3:11). Sa vakakina, “na dra i Karisito sa sorovaki kina o ira na [gone lalai]” (Mosaia 3:16). Na ivakavuvuli oqo ni veivakabulai kei na kaukauwa ni veivakasavasavataki ni veisorovaki ni tamata kecega ka sa valuta na vakasama ni nona loloma na Kalou sa vakabula e vica walega na tamata digitaki. Na Nona loloma vakalou sa baleta na tamata kecega. Na veivakavuvuli oqo mai na iVola i Momani e vakarabailevutaka na noda rai ka vakavukui keda sara vakavinaka ki na veika me baleta na loloma levu ni Kalou kei na kena ologi vuravura na Nona Veisorovaki vei ira na tamata taucoko ena veivanua kecega.

Na iVola i Momani e vakavulica ni noda iVakabula, “sa kacivi ira kecega me ra lako mai vua [na luveni tamata kecega] ka vakaivotavota ena nona loloma; ka sa sega ni bureitaka vua e dua sa lako mai vua, io na tamata loaloa kei na tamata vulavula, na bobula kei na taukei, tagane kei na yalewa; a sa nanumi ira na veimatanitu; ia era sa tautauvata kecega ena mata ni Kalou ko ira na Jiu kei na Veimatanitu tani” (2 Nifai 26:33; raica talega Alama 5:49).

“Sa kacivi ira kecega.” Eda sa kila na cava na “tagane kei na yalewa.” Eda sa kila talega na “loaloa kei na vulavula,” sa kena ibalebale na kawatamata kecega. Ia e vakacava o ira na “bobula kei na taukei?” Bobula—na veibasai ni galala—sa kena i ibalebale na vesuki tu (bobula) mai na dua ga na ka e sega ni dro rawa mai kina. Na Bobula era okati talega kina era sega ni vagalalataki mai na veivakararawataki ni yago kei na yalo. Na Bobula era okati talega kina na vakabobulataki tu ena waigaga se ena so na ivakarau. Na Bobula sai ira sara ga era sa vesuki tu ena ivalavala ca—“vakatotoganitaki tu” ka tukuni mai na dua tale na ivakavuvuli ni iVola i Momani ka vakatoka “era a vesuki tu ena ivau ni mate kei na ibulubulu“ (Alama 5:7). Na Bobula era okati kina na vakaogaogataki tu ena ivakarau se itovo e veisaqasaqa kei na vunau ni Kalou (raica Maciu 15:3–6; Marika 7:7–9; V&V 74:4–7; 93:39). Kena iotioti, na bobula era sa okati talega kina o ira era sa cokoti tu ena loma ni bai ni veivakasama cala. E a vakavulica na parofita o Josefa Simici ni da sa vunau tiko me da “sereki ira kina na vesu tu.”¹ Na Noda iVakabula “sa kacivi ira … na tamata kecega me ra lako mai Vua ka vakaivotavota ena Nona loloma,” “ka sa sega ni bureitaka vua e dua sa lako mai vua,” ia “era sa tautauvata kecega ena mata ni Kalou.”

O ira na luve ni Kalou ena veimatanitu kecega sa tu vei ira na Nona iyalayala ni na vakaraitaki Koya vei ira. Na iVola i Momani e tukuna vei keda:

“A sa vakaraitaki Koya ena kaukauwa ni Yalo Tabu kivei ira kece era sa vakabauti Koya; io kivei ira na veimatanitu, veimataqali, duivosavosa kei ira na tamata; a sa kitaka na cakacaka mana e vuqa, na ivakatakilakila kei na veivakurabuitaki ena kedra maliwa na luve ni tamata me vaka na nodra vakabauta” (2 Nifai 26:13).

Me kilai tiko ni ivakatakilakila yalataki oqo mai vua na Turaga sa baleti ira na “vei matanitu, veimataqali, duivosavosa, kei ira na tamata.” Eda sa raica tu edaidai na kena sa mai vakavotukanataki tu na veiyalayalati o ya ki na veimatanitu ka ra sa vakadonui kina na daukaulotu me ra laki veiqaravi kina, vei ira sara talega eda se bera vakadua ni tukuna vei ira na veika Vakarisito.

Kena ivakaraitaki, eda sa kila tu na veivanua sa vakatakilaitaki Koya kina na Turaga vei ira na tagane kei na yalewa ni matanitu o Rusia, era se qai sereki walega oqo mai na ivesu ni komunisi butobuto. Ena nodrau a wilika tiko kina e rua na kai Rusia na itukutuku veirawai baleti ira na Momani, erau a dui vakila e dua na yalo veivakauqeti kaukauwa sara me rau vakasaqara na vanua keimami dau lotu tiko kina. Erau a qai dui sotavi rau na daukaulotu ka lewena sara na Lotu.²

E dua na vuniwai ena dua na koro mai Nigeria e a tadra ni sa laki vunau tiko o nona itokani vinaka ki na dua na ivavakoso. Ena lomatarotaro, a gole yani ki na koro i nona itokani ena dua na Sigatabu ka kurabui ni sa raica dina sara na veika a tadra—oqo na ivavakoso e vakatokai me tabanalevu era sa vakavulici tiko mai vei nona itokani, na nodra bisopi. Ena nona taleitaka na veika sa rogoca rawa mai na nona veisiko e tarava, erau a tuberi sara ka papitaiso vata kei na watina. Ni oti e rua na vula e lewe tolusagavulu tale mai na nodrau koro era sa lewena na Lotu, ka ra sa lotu sara tiko ena nodra valenibula.

Au a sotava e dua na tagane ni vualiku kei Idia, ka se bera mada vakadua me rogoca na yaca i Jisu Karisito me yacova sara na gauna a raica kina o koya ena dua na ivolanivula ena dua na sitoa ni caka ivava. E a qai vakauqeti koya na Yalotabu me laki lewena na Lotu Protestant. Oti o ya, ena nona lako ki na dua na taoni ni vuli torocake a raica kina e dua na ivakaraitaki raraba ni dua na ilawalawa mai Amerika e vakatokai na “The BYU Young Ambassadors.” Ena gauna ni nodra vakatasuasua e a vakauqeti na yalona me gole yani ki na icurucuru ni oti na parokaramu ka na dua na tamata vakakote karakarawa ena tukuna vua na ka me na cakava. Ena sala oqo e a taura rawa kina e dua na iVola i Momani, wilika sara, ka a saumaki sara ki na kosipeli vakalesui mai. E a laki kaulotu ka sa bisopi sara.

E dua na goneyalewa lailai e Thailand e a vakananuma lesu na loloma ni Tamada mai Lomalagi. Ni sa tubu cake tiko mai, sa dau masu vakawasoma ka vakararavi Vua ena yalona dina. Ni se qai yabaki 20 tiko e a qai sota kei rau na noda daukaulotu. Na nodrau ivakavuvuli sa vakadeitaka vua ni sa lomana dina na Kalou e nanuma rawa mai na gauna a se gonelailai kina a qai papitaiso o koya ka a kaulotu tudei sara e Thailand.

E lima walega na pasede na tamata mai Cambodia era lotu Vakarisito. E dua na matavuvale ena vanua o ya eratou a vakasaqara tiko na dina. Ena dua na gauna ni a vodo basikeli tiko na luvedratou tagane yabaki 11 e a raica ni so na tagane era vakasote vulavula ka vakaneketai ni ra vakaraitaka tiko vua e dua na tamata e dua na iyaloyalo ka taroga tiko se o cei oya. E a nanuma me sa kele. Ni rai yani sa vakauqeti sara me kaya, “Oqori o Jisu Karisito, na Luve ni Kalou, ka sa lako mai me vakabulai ira na tamata.” E a qai vodo sara yani. Erau a taura e dua na vula na daukaulotu me qai kunei koya rawa kei na nona matavuvale. Edaidai sa daunivakasala tiko o tamana ena mataveiliutaki ni tabana ni kaulotu.

Ena Jiune sa oti, e dua na matavuvale lewe lima eratou a tiko ena dolavi raraba ni valenilotu vou mai Mongolia. Ni curu yani e katuba o tamadratou “e a curumi koya e dua na yalo veivakauqeti kaukauwa,” e dua na yalo veivakacegui e se bera mada ni a se sotava vakadua. Sa tuturu na wainimata. E a tarogi rau na daukaulotu na yalo talei cava o ya ka na rawa vakacava me na vakila tale. E sega ni dede eratou sa papitaiso na lewe ni matavuvale taucoko.³

Oqo e vica walega na kena ivakaraitaki. E udolu tale tu.

Na iVola i Momani e vakatavulica talega ni a mate na Dauniveibuli “ena vukudra na tamata kecega, me ra vakamalumalumutaki ira kina ki vua” (2 Nifai 9:5). Na noda vakamalumalumutaki keda vua na iVakabula sa kena ibalebale ni kevaka eda sa vosoti ena vuku ni Nona veisorovaki sa dodonu kina me da vakamuria na veiyalayalati sa tiko kina. Sa okata tu kina o Koya, na vakabauta, veivutuni, kei na papitaiso. Na kena yaco na veiyalayalati oqo ena vakatau tiko ki na noda dui gagadre, noda digidigi kei na itovo. “Ni na lako mai ki vuravura me vakabulai ira na tamata kecega kevaka era na vakabauta na nona vosa” (2 Nifai 9:21).

Sa vakarautaka tu na Turaga e dua na sala vei ira taucoko na Luvena ka sa gadreva o Koya me da lako yani Vua. Ena itinitini ni iwase ni iVola i Momani e a vakamamasu kina vakaoqo o Moronai, “Ia dou lako vei Karisito, ka biuta tani na ivalavala sa sega ni vakalotu, mo dou vinaka kina, ia kevaka dou sa biuta tani na ivalavala sa sega ni vakalotu ka lomana na Kalou ena lomamudou taucoko, kei na yalomudou taucoko, kei na nomudou igu taucoko, sa na qai rauti kemudou na nona loloma; ia na nona loloma dou sa vinaka kina e na vuku i Karisito” (Moronai 10:32).

E tukuna vei keda na iVolatabu na nona a vakayacora na Kalou e dua na veiyalayalati kei Eparaama ka yalataka vua ni vukuna ga ena yaco na “veimataqali kecega” se “veimatanitu” e vuravura me ra na vakalougatataki (raica Vakatekivu 12:3; 22:18). Na ka eda vakatoka me Veiyalayalati vaka-Eparaama sa tadolava kina e dua na sala ni veivakalougatataki digitaki na Kalou vei ira taucoko na Luvena ena veivanua kecega. E vakatavulica na iVolatabu ni “kevaka dou sa nei Karisito, dou sa qai kawa i Eparaama, kei na itaukei me vaka na vosa ni yalayala” (Kalatia 3:29; raica na Eparaama 2:10). Na iVola i Momani sa yalataka tu vei ira taucoko era na ciqoma ka vakamuria na veikacivi ni Turaga me ra “veivutuni ka vakabauta na Luvena” na tamata veiyalayalati ni Turaga (2 Nifai 30:2). Oqo e dua na veivakavotui kaukauwa me baleta ni da sa vutuniyau se kawa se dua tale na ka eda vinaka cake kina me da na laki vakabauta kina ni da sa “uasivi cake mai vua e dua tale” (Alama 5:54; raica talega Jekope 3:9). E dina sara, sa vakarota tiko na iVola i Momani, “Dou kakua ni nanuma ni sa uasivi cake e dua mai vua tale e dua, se me dua e nanuma ni sa uasivi cake o koya mai vua tale ka dua” (Mosaia 23:7).

E vakatavulica na iVolatabu ni so vei ira na kawa i Eparaama era na veikauyaki yani “ki na matanitu kecega e vuravura” “ena kedra maliwa na matanitu kecega,” mai na “dua na iyalayala kei vuravura ka yacova na kena iyalayala ka dua” (Vakarua 28:25, 37, 64) Sa vakadeitaka tu na ivakavuvuli oqo na iVola i Momani, ka sa tukuna kina ni o ira na kawa i Eparaama era na “veiseyaki na mataqali i Isireli e delai vuravura … ena kedra maliwa na veimatanitu” (1 Nifai 22:3).

Na iVola i Momani e sa vakavukui keda cake me baleta na cakacaka ni iVakabula ena kena yacovi ira rawa na Nona qele ni sipi era sa veiseyaki. Me ikuri ni Nona cakacaka ena vanua eda sa kila tu oqo me o Tokalau e Loma, e volai ena iVola i Momani na Nona rairai mai kei na Nona ivakavuvuli vei ira na Nifai ena vanua o Amerika (raica 3 Nifai 11–28). E kea a tokaruataka kina o Koya ni sa vakarota vua na Tamana me laki sikovi ira na lewe ni sipi tale ka dua ka ra sega ni lewenivanua o Jerusalemi (raica 3 Nifai 16:1; Joni 10:16). E a kaya talega o Koya ni na laki sikovi ira tale eso “era sa [sega] mada ni rogoca na [Domona]” (3 Nifai 16:2–3). Me vaka a parofisaitaki ena veisenijiuri sa oti (raica 2 Nifai 29:12), e a vakaraitaka na Turaga vei ira na Nona tisaipeli mai Amerika ni na laki “vakaraitaki [Koya]” vei ira “na mataqali i Isireli era sa yali tu; ia era sa sega ni yali vei Tamaqu, ni sa kauti ira ko Koya ki na vanua era sa tiko kina” (3 Nifai 17:4).

Na iVola i Momani sa ivakadinadina cecere ni Turaga e sa dau lomani ira na tamata kecega ena veivanua kecega. E sa tukuna tu ni “na vakaraitaki Koya kina vei ira na veimatanitu kecega” (1 Nifai 13:42). “Dou sa sega beka ni kila ni sa vuqa na matanitu ka sega ni dua walega?” a kaya vakaoqo na Turaga vua na parofita o Nifai.

“Dou sa sega beka ni kila ni koi au na Turaga ka’u sa buli ira na tamata kece ga, ka’u sa nanumi ira era sa tiko e na veiyanuyanu ni wasawasa; kau sa lewa na lomalagi e cake kei na vuravura e ra; ka’u sa tukuna yani na noqu vosa vei ira na luveni tamata, io ki na veimatanitu?” (2 Nifai 29:7).

Sa vakavulica vakakina o parofita Alama ni “sa solia na Turaga ki na veimatanitu na nodra dui vanua kei na vosa me tukuni kina vei ira na nona vunau; io kei na veika sa kila ko Koya sa ganiti ira; ia eda sa kila sa veivunauci na Turaga ena veika sa dodonu ka dina” (Alama 29:8).

Na Turaga e sega walega ni vakaraitaki Koya ki vei ira na veimatanitu kecega, sa vakaroti ira talega me ra vola na Nona vosa:

“Dou sa sega beka ni kila ni sa vakadinadinataki ena nodrau itukutuku e rua na matanitu ni sai au na Kalou, ka’u sa nanuma vakatautauvata na matanitu kecega? Ia sa tautauvata na noqu itukutuku mai na dua na matanitu ki na dua tale… .

“Au sa vakarota na tamata kecega … me ra vola na vosa au sa tukuna vei ira… .

“Raica au na vosa vei ira na Jiu era na vola; kau na vosa talega vei ira na mataqali i Nifai; era na vola; ka’u na vosa vei ira e so tale na mataqali i Isireli ko ira au sa kauta tani, era na vola; ia kau na vosa talega vei ira na veimatanitu kecega e vuravura, era na vola” (2 Nifai 29:8, 11–12; raica talega 1 Nifai 13:38–39).

Me kena ikuri, na iVola i Momani e vakavulica ni o ira kece na ilawalawa oqo era na vola na kedra itukutuku tale eso tale na tamata (raica 2 Nifai 29:13).

Sa isoqoni ni veika oqo ni Turaga ena vakayacora ga na Nona ivakavuvuli veivakauqeti oqo ka sa solia vei ira na Luvena ena veimatanitu kecega me kau mai me ra bula kina na tamata kecega. Oqo ena okati kina na Nona rairai na Turaga sa tucake tale vei ira eda vakatoka me ra mataqali i Isireli era sa yali tu kei na Nona vakatakila vei ira taucoko na kawa i Eparaama. Na kena kunei na iVola Vivigi ni Wasawasa Mate e vakaraitaka tiko e dua na sala ena kena rawa ni yaco na ka oqo.

Ni dau kau mai na itukutuku vou—ka sa vaka na ka sa parofisaitaki—me vaka eda sa vakabauta tiko era na sega ni cakitaka ka a yaco taumada ki na iVola i Momani baleta ni sa tu rawa vei ira na iVolatabu (raica 2 Nifai 29:3–10). Me vaka a tukuna na Turaga vua e dua na parofita ena ivola o ya, “E dina ga au sa vosataka oti e dua na vosa, dou kakua ni nanuma niu sa sega ni rawa meu vosataka tale e dua na vosa; ia e sa bera ni oti na noqu cakacaka; ka na sega talega ni oti ni sa oti yani na tamata” (2 Nifai 29:9).

Sa dina sara, na kosipeli sa baleta sara na tamata taucoko ena veivanua kecega —veimatanitu kecega kei na tamata kecega. Eda sa sureti taucoko.

Eda sa bula donuya tu oqo na siga a parofisaitaki tu mai ni na kau sobu mai na ivalavala dodonu mai lomalagi ka tubu e vuravura na dina “me vaka sa ubi vuravura na waluvu,” ka vakasoqoni ira mai na digitaki “mai na iyalayala vava kei vuravura” (Mosese 7:62). Sa mai tu oqo na iVola i Momani me tukuna tiko vei keda na veiyalayalati ni Turaga, me ra vakabauta na tamata kecega ni “ko Jisu na Karisito, na Kalou Tawamudu, ka sa vakamataliataki Koya vei ira na veimatanitu kecega” (ulu ni iVakamacala ni iVola i Momani). Oqo na ikuri ni noqu vakadinadinataki Koya kei na Nona cakacaka ena yaca i Jisu Karisito, emeni.