“Au Na Sega ni Nanuma Tale na Nona iValavala Ca”

Na noqu itukutuku e baleti rau e dua na tama kei na luvena tagane. O Alama, na tama, ka parofita, kei na luvena, ko Korianitoni, e dua na daukaulotu.

E rua na luvei Alama tagane—o Sipiloni, kei Korianitoni na gone duadua—eratou a kaulotu vei ira na Soramu. A rarawa vakalevu ko Alama ni sega ni rawa vei na luvena, ko Korianitoni, me bulataka na ivakatagedegede ni daukaulotu. A biuta ko Korianitoni na nona cakacaka ka lako ki na vanua ko Saironi, vei Isapela na yalewa dautagane (raica Alama 39:3).

“E sega ni yaga me nomu iulubale na tikina oqori, na luvequ. Raica a kilikili sara mo qarava tikoga na cakacaka ni kaulotu ko sa lesi kina” (Alama 39:4).

E tukuna vei luvena ko Alama ni sa kauti koya tani na tevoro (raica Alama 39:11). Na bula dukadukali “sa ivalavala ca levu sara, ka sa tautauvata ni ko sa vakadavea na dra tawa cala, se cakitaka na Yalo Tabu” (Alama 39:5).

“I na luvequ mo a kakua mada ga ni kitaka na cala bibi oqo.” E qai kaya tale, “Raica au sa vunauci iko oqo ena nomu ivalavala ca; e dina ko na rarawa kina; ia sa yaga mo kila.

“Raica ena sega ni rawa mo vunitaka na nomu ivalavala ca vua na Kalou” (Alama 39:7–8).

A vakarota vakaukauwa na luvena me rogoca na nodrau ivakasala na tuakana (raica Alama 39:10).

A tukuna vua ko Alama ni sa rui levu na nona caka ca baleta ni sa vagolei ira tani tiko era vakadikeva na lotu: “Era a sega ni vakabauta na noqu vunau ni ra raica tiko na nomu ivalavala.

“A sa kaya vei au na Yalo ni Turaga: Mo vakaroti iratou na luvemu me ratou ivalavala vinaka, ka kakua ni vagolea tani na yalodra na tamata me ra rusa kina; a ka oqo au sa vakaroti iko kina na luvequ, mo rerevaka na Kalou ka kakua sara ni kitaka na ivalavala ca” (Alama 39:11–12).

Ni sa oti na veivosataki kaukauwa ko ya, sa yaco ko Alama na tama dauloloma me ko Alama na qasenivuli. E kila o koya ni “vunautaki … ni vosa ni Kalou, me ra veivutuni kina ka ivalavala dodonu; raica sa gata na vosa ni Kalou, ka mucu na iseleiwau.” (Alama 31:5). Sa mani vakavulici Korianitoni ko Alama.

A vosa taumada me baleti Karisito: “I na luvequ, au na tukuna vei iko e vica na ka me baleta na nona lako mai na Karisito. Raica, au sa kaya vakaidina vei iko, ena lako dina mai ko Koya me bokoca na nodra ivalavala ca na kai vuravura; io sa lako mai me tukuna vei ira na nona tamata na itukutuku vinaka, me ra bula kina” (Alama 39:15).

A taroga ko Korianitoni na sala cava e dodonu me ra sa kila rawa tu yani kina ena gauna ko ya na nona lako mai na Karisito.

A sauma ko Alama, “Sa ka talei ena mata ni Kalou na tamata kecega; koi keda eda bula tiko edaidai, kei ira era na bula tiko ena gauna sa lako mai kina ko Koya?” (Alama 39:17).

A “sega tiko ni matata vinaka vei” Korianitoni, “na ivakavuvuli ni tucaketale mai na mate” (Alama 40:1).

A taroga ko Alama vua na Kalou me baleta na Tucaketale ka tukuna vei Korianitoni na iMatai ni Tucaketale kei na veitucake tale eso. “Ena yaco mai na gauna ena tucake kina mai na mate na tamata kecega” (Alama 40:4).

A vakataroga se “cava ena yaco ena loma ni gauna oqori” (Alama 40:7).

A qai tukuna vei Korianitoni, “Sa kau na yalo ni tamata kecega se vinaka se ca, ki na vanua sa vakarautaka vei ira na Kalou, o koya ka buli ira” (Alama 40:11). O ira na “ivalavala dodonu era na kune marau” (Alama 40:12), kei ira na ivalavala ca “sa curumi ira na yalo ni tevoro ka sa lewai ira sara” (Alama 40:13). Ko ira na yalododonu era na tikoga “mai parataisi, me yacova na gauna era na tucake kina mai na mate” (Alama 40:14).

“Ia ni sa yaco mai na gauna rerevaki ko ya, sa sega ni yaga mo qai kaya tiko, au na veivutuni ka lesu vua na noqu Kalou. Io sa sega ni yaga na nomu qai vosa vakaoqori; raica na yalo ga ko a soli iko kina ena bula oqo ena laki lewai iko tale ena bula sa bera mai” (Alama 34:34).

A tukuna vua na luvena ko Alama ni “tiko e dua na gauna mai na maliwa ni mate kei na tucaketale ni yagoda, oqo na gauna ena tiko vakawawa kina na yaloda ena rarawa se ena marau, me yacova na gauna sa lewa na Kalou me cokoti vata kina na yalo kei na yago; io era na qai tu ena mata ni Kalou ka lewai ena nodra ivalavala” (Alama 40:21).

“Na yalo”—oqori na yalo—“ena qai cokoti vata tale na yalo kei na yago, kei na yago ki na yalo” (Alama 40:23). “Ia,” e kaya o koya, “na ka oqo na luvequ, era a sa tukuna tu na parofita” (Alama 40:24). E kaya o Alama ni “e lewe vuqa era sa vakatanitaka na ivakavuvuli, ka ra sa lako sese kina” (Alama 41:1).

E qai kaya kina ko Alama: “Au sa kila na luvequ, ni tiko tale eso na ka ko sega ni kila rawa, ka sa vakaleqa tiko na lomamu—oqori na dodonu ni Kalou me totogitaki ira na tamata ivalavala ca; io ko sa nanuma tiko ni sa sega ni kilikili me ra totogitaki na tamata ivalavala ca me ra rarawa ka tawamudu.

“Ia au sa na vakamacalataka vei iko na luvequ” (Alama 42:1–2).

A tukuna vei Korianitoni me baleta na Were ko Iteni kei na nodrau Lutu ko Atama kei Ivi: “Eda sa kila eke ni rau sa muduki tani vakayago ka vakayalo mai na mata ni Turaga na noda itubutubu taumada; ia sa soli vei rau me rau lewa ga na ka me rau kitaka” (Alama 42:7).

“Sa lewai oti me mate na tamata” (Alama 42:6).

Sa qai vakamacalataka ko koya na vuna e yaga kina na mate: “Kevaka a sega na sala sa navuci tu me da vakabulai kina, (biu vakatikitiki) sa na rusa tawamudu na tamata ni sa muduki tani mai na mata ni Turaga” (Alama 42:11).

A vakavulici Korianitoni ko Alama me baleta na lewa dodonu kei na loloma soli wale: “Raica ena qai yaga walega na sala ni veivakabulai sa navuci tu, kevaka sa veivutuni na tamata” (Alama 42:13).

E vakamacalataka o koya ni “sa rawa walega me ra lomani kevaka sa sorovaki na nodra ivalavala ca; ia sa mai sorovaka na Kalou na nodra ivalavala ca na kai vuravura me ra bula kina, io me vakayacori kina na lewa dodonu ni Kalou, ni sa yalododonu ka dauloloma talega ko Koya” (Alama 42:15).

E vakavuvulitaka vei Korianitoni me baleta na ivakatagedegede sega ni veivukiyaki ni lawa tawamudu (raica Alama 42:17–25).

E vakamacalataka vakadodonu na vuna e yaga kina me dua na itotogi: “Ia sa sega ni yaga na veivutuni kevaka sa sega na itotogi, io sa tawamudu na itotogi, me vaka sa tawamudu na yalo, raica sa veibasai ni bula tawamudu, na itotogi tawamudu” (Alama 42:16).

E kila vakataki koya ko Alama na mosi ni itotogi kei na marau ni veivutuni. O koya sara ga vakataki koya a vakararawataka vakalevu sara na tamana ena dua na gauna, na tukai Korianitoni. A talaidredre ka lako voli “ka segata me vakacacana na lotu” (Alama 36:6). A mokuti koya sobu e dua na agilosi, sega ni baleta ni dodonu me vakakina ia me baleta ga na masu nei tamana kei ira tale eso (raica Mosaia 27:14).

A vakila ko Alama na mosi ni nona cala ka kaya: “Ia au sa yaluma ka rarawataka na levu ni noqu ivalavala ca, au sa qai nanuma ni a dau vunautaka ko tamaqu ni na lako mai ko Jisu Karisito na Luve ni Kalou, me bokoca na nodra ivalavala ca na kai vuravura.

“Ia, niu sa nanuma rawa na ka oqo, au sa masuti Koya ena yaloqu taucoko ka kaya: Oi kemuni Jisu na Luve ni Kalou, ni lomani au mai, raica au sa yaluma sara ka kune rarawa, ka sa vesuki au na ivesu ni mate.

“Ia niu sa vakacabora oti na noqu masu lo oqo, sa oti mai na noqu yaluma kei na noqu rarawataka na noqu ivalavala ca.

“Raica sa tuburi au na marau kau sa kunea na rarama sa talei sara; a sa takali vakadua na noqu rarawa ka sa vuabale sara na noqu marau!

“Ia, i na luvequ, au sa kaya vei iko, sa sega na ka me vakatauvatani vata rawa kei na levu ni noqu yaluma. Raica au sa kaya talega vei iko, ni sa yaco na veisau oqo sa sega na ka e vakatauvatani vata rawa kei na levu ni noqu marau… .

“Ia me tekivu mai na gauna ko ya me yacova sara oqo, au sa dau cakacaka tikoga vagumatua, ka vunauci ira na tamata me ra veivutuni ka saumaki mai; ia me ra tovolea talega na marau a yaco vei au; raica au sa gadreva sara me ra sucu vou tale ga vua na Kalou, ka me ra vakasinaiti ena Yalo Tabu” (Alama 36:17–21, 24).

A tarogi Korianitoni ko Alama, “Ko nanuma li ni sa rawa ni veisaqasaqa na loloma kei na lewa dodonu?” (Alama 42:25), ka vakamacalataka kina ena Veisorovaki i Karisito ena rawa kina ni rau vakayacori ruarua ena lawa tawamudu.

“Ena veivakauqeti ni Yalo Tabu” (V&V 121:43; raica talega Alama 39:12), sa vosataki Korianitoni kina vakaukauwa sara. Ia, ni sa tini na nona vakavuvulitaka vakamatata ena vosota na veivakavuvuli bibi oqo ni kosipeli, sa qai yaco mai na loloma vakalevu sara.

A vakavuvulitaki ena ivakatakila na Parofita ko Josefa Simici ni “sa sega ni kilikili me vakayacori na cakacaka vakabete ena ivakarau kaukauwa se vakasaurara, ia me vakayacori ga ena veivakauqeti, na vosota vakadede, na yalomalua, na yalomalumalumu, kei na loloma e sega ni veivakaisini;

“Io ena yalo e veidokai kei na yalomatua, raica ena rarama sara kina na yalona, ka sega vua na veivakaisini kei na ilawaki—

“Me veivunauci vakaukauwa sara ena veivakauqeti ni Yalo Tabu; ia me kusarawa me lomani koya tale a vunauca, kevaka e sega sa na okata ko koya me kena meca;

“Io me kila ko koya ni sa kaukauwa cake na nomu lomadina ka malumalumu na ivesu nei mate” (V&V 121:41–44).

E kaya ko Alama: “Ia na luvequ, mo kakua tale ni vakalewa na vunau ni Kalou. Mo kakua ni vakalewa na vunau ni Kalou me iulubale ni nomu ivalavala ca; ia mo vakabauta sara ka rokova na vunau ni Kalou, na nona loloma kei na nona vosota vakadede; io mo vakamalumalumutaki iko me vaka na kuvu ni soso” (Alama 42:30).

Na tukai Korianitoni, ka yacana talega ko Alama, e dua vei ira na bete era a dau qarava tu na Tui ca ko Noa. A rogoca na nona vakadinadinataki Karisito ko Apinatai na parofita, ka saumaki mai. Ni sa cudruvi tu me mate, a dro tani mai na itikotiko vakatui ca ko ya ka vakavuvulitaki Karisito. (Raica Mosaia 17:1–4.)

Ia oqo ko Alama, ni sa tama sa kerea tiko na luvena ko Korianitoni me veivutuni.

Ni oti na nona vosataka vakaukauwa na luvena ka vakavulica ena yalo vosota ena ivunau ni kosipeli, sa qai kaya ko Alama na tama dauloloma, “Ia oqo na luvequ, me kakua tale ni vakaleqa tiko na lomamu na veika oqo, ia mo kauwaitaka ga na nomu ivalavala ca ka veivutunitaka sara” (Alama 42:29).

Ena rarawa kei na madua, sa biu sobu kina ko Korianitoni me “vakamalumalumutaki [koya] me vaka na kuvu ni soso” (Alama 42:30).

Sa vakacegui ko Alama, na tamai Korianitoni ka nona iliuliu talega vakabete, ena nona sa veivutuni ko Korianitoni. Sa laveta tani na icolacola vakadomobula ni kilai yalona ena nona cala ka colata voli na luvena ka vakauti koya lesu ki na buturara ni kaulotu: “Raica na luvequ, sa lesi iko na Kalou mo vunautaka na nona vosa vei ira na tamata oqo… . Ia mo lako yani ka vunau ena yalodina… . Ia me vakalougatataki iko na Kalou mo rawata kina na nomu itavi” (Alama 42:31).

Sa lako ko Korianitoni ka tomani rau na tuakana ko Ilamani kei Sipiloni, ka rau a tiko vata kei ira na veiliutaki vakabete. Ena ruasagavulu na yabaki ka tarava ena vanua ki na vualiku, a se cakacaka tikoga ena yalodina ena vuku ni kosipeli. (Raica Alama 49:30; 63:10.)

Sa dua na vuravura ivalavala ca eda bula kina, ka dodonu me ra na vakasaqara kina na luveda na nodra gaunisala. Na bolebole ni iyaloyalo kei na ivola vakasisila, na veilecayaki ni tagane se yalewa, na bula dukadukali, na veivakalolomataki vei ira na gone, na vakayagataki ni waigaga, kei na veika kecega sa tu e veivanua kecega. Ena sega ni rawa ni da dro tani mai na kedra revurevu.

Eso era lakova yani na veitemaki ena nodra yalo tarotaro, oti era vakatovolea, ka so e yaco sara me ra tacori ka bobula kina. Sa oti na nodra inuinui. Sa tamusuka ko vu ni ca na vua ni nona cakacaka ka vesuki ira.

Ko Setani na dau veivakacalai, na dauveivakarusai, ia na nona qaqa e lekaleka ga.

Era dau kaya na agilosi ni tevoro vei ira eso ni ra sucu mai ki na dua na bula era na sega ni dro tani rawa mai kina ka ra vakauqeti me ra bula ivalavala ca. Na lasu levu duadua sai koya ni ra na sega ni rawa ni veisau se veivutuni ka ra na sega ni vosoti. E sega ni rawa ni dina o ya. Era sa guilecava na Veisorovaki nei Karisito.

“Ia, sa mai mate na Turaga na nomudou iVakabula; io sa mai colata na nodra ivalavala ca na tamata kecega me ra veivutuni kina ka lesu tale vua” (V&V 18:11).

Na Karisito na Dauveibuli, na Dauveivakabulai. Na veika a cakava, ena rawa ni vakavinakataka. Na kosipeli i Jisu Karisito e kosipeli ni veivutuni kei na veivosoti (raica 2 Nifai 1:13; 2 Nifai 9:45; Jekope 3:11; Alama 26:13–14; Moronai 7:17–19).

“Raica sa ka talei ena mata ni Kalou na tamata kecega” (V&V 18:10).

Na itukutuku oqo ni dua na tama kei na luvena cidroi, ka tauri mai na iVola i Momani: E Dua Tale na iVakadinadina kei Jisu Karisito, e dua na mataqali, e dua na iwalewale, ka ivakaraitaki.

Oi keda yadua e tiko na Tamada Vakalomalagi dauloloma. Ena nona ituvatuva ni veivakabulai na Tamada, “era na sega ni biu laivi sara vakadua” ko ira era tarabe ka lutu (na draunipepa ni ulutaga ena iVola i Momani).

“Raica sa ka levu vakaidina na nona marautaki ira era sa veivutuni!” (V&V 18:13).

“Raica koi au na Turaga au sa sega sara ni vakadonuya na ivalavala ca; ia” (V&V 1:31–32), e kaya na Turaga, “Raica ko koya sa veivutunitaka na nona ivalavala ca, ena vosoti, ia koi au, na Turaga, au na sega ni nanuma tale” (V&V 58:42).

E dua tale beka na malanivosa me talei se veivakacegui cake, ka sinai ena inuinui, mai na malanivosa oqori ena ivolanikalou? “Ia koi Au na Turaga, au na sega ni nanuma tale na nona ivalavala ca” (V&V 58:42). Oqori na ivakadinadina ni iVola i Momani, ka sai koya oqori na noqu ivakadinadina vei kemuni, ena yaca i Jisu Karisito, emeni.