Ni da Taura Nikua na Sakaramede

Au donumaka e dua na gauna talei meu veisiko ki Logan, Utah, ena Koronivuli ni Lotu ena dua se rua na yabaki sa oti. Na vale ka ra soqoni tiko kina na gonevuli, e se qai vakavoutaki walega. A tukuni vei au ni gauna era a tosoya kina na itutu ni vunau makawa o ira na tamata cakacaka, era qai raica eso na vatavata ni ra sa lati tu mai vakadede sara. Ena nodra luvata laivi na kena ilati, era a kunea kina e dua na tere ni sakaramede. E sa rairai makawa sara, baleta ni ra bilo iloilo na bilo ni sakaramede era tiko kina. E dua na bilo iloilo o ya, o ni na raica ni sa kabi toka oqo ka a soli mai vakailoloma vei au—e rairai baleta ni o au duadua ga au a sa yalomatua toka ena gauna a taurivaki kina na bilo iloiloi.

E lesu mai na vakanananu ki na veigauna talei sa oti ena gauna au raica kina na bilo iloilo. E se taurivaki sara na bilo iloilo ni sakaramede ena gauna au se yabaki 12 kina, e dua na ivakananumi talei ki na noqu bula. Na noqu siganisucu ni yabaki 12 a donumaka na Sigatabu. Ena veiyabaki yani ki liu, au dau saravi ira na dikoni ni ra veivotayaka na sakaramede, kau sa dau nanamaki tu ki na siga kalougata au na ciqoma kina na Matabete i Eroni, ka qarava na itavi o ya.

Ni sa yaco mai na siga ko ya, a tukuni sara vei au meu totolo yani ki valenilotu me keirau laki veitalanoa kei Baraca Ambrose Call, na ikarua ni daunivakasala ni matabisopi ena neitou tabanalevu. A sureti au sara o Baraca Call ki na dua na rumu ka kerei au meu cabora e dua na masu. A qai dolava na ivolanikalou ka wilika vei au na wase 13 ni Vunau kei na Veiyalayalati:

“Oi kemudrau na noqu itokani; au sa lesi kemudrau ena yaca ni Mesaia ki na itutu ni bete i Eroni, ka solia vei kemudrau na kaukauwa kei na lewa ni ilesilesi oqori; io na nodra cakacaka na agilosi dauveiqaravi, na vunautaki ni ivakavuvuli ni veivutuni kei na papitaiso ena tabadromuci ena wai me bokoci kina na ivalavala ca; raica ena tudei tu e vuravura na ilesilesi oqo; io me ra vakacabora mada vua na Turaga na isoro sa dodonu ko ira na luvei Livai.”

A tarogi au o Baraca Call meu vosa ena tikina oqo. Na noqu ivakamacala e sega ni taucoko vinaka sara, ka sa qai vakamacala tale vei au o Baraca Call ena ibalebale ni noda taura na matabete tabu. Ni sa kilikili meu taura na matabete, e sa na rawa vei au meu vakayacora na kaukauwa ka solia mai na Kalou vua na tamata. E dua e bula kilikili ki na matabete, ena rawa ni qarava vakavinaka na cakacaka vakalotu e sa lesia mai na Kalou me vakabulai kina na vuvale ni kawatamata. Na veivakadonui oqo e gole sara ga mai vua na iVakabula vakataki Koya, ka muri ira mai na sa taura tiko na matabete.

A toso vinaka sara na neirau veivakatarogi kei Baraca Call, ka ni a kauti au sara ki na soqoni ni kuoramu ni dikoni. Eratou a laki tabaka na uluqu e kea na matabisopi, ka qai solia vei au o bisopi, e bisopi ga o tamaqu, na Matabete i Eroni, ka lesi au ki na ilesilesi vakadikoni. Era a tokoni au sara na vo ni dikoni era tiko kina meu sa okati vata kei ira meu lewe ni kuoramu ni matabete.

Ena soqoni ni sakaramede ena yakavi o ya, au donumaka kina na imatai ni gauna taleitaki meu vakayagataka na matabete ka veivotayaka na sakaramede vei ira na lewe ni neitou tabanalevu. A solia vei au e dua tale na ibalebale vou ni sakaramede ena siga o ya. Niu a vakaraica tiko na tere ni soli tiko yani ena iyatu idabedabe kivei ira na lewe ni Lotu, au raica rawa ni sega ni tautauvata na itovo ni nodra taura na sakaramede o ira na lewenilotu yadua. E tiko eso era taura wale tu ga me vaka na kena ivalavala, ia e vuqa era a taura na sakaramede ena yalo vakarokoroko.

Ni toso tiko na yabaki au sa vakaitavi ena vuqa na soqoni ni sakaramede, ka sa duatani tikoga mai na kena ibalebale mai na veisoqoni e liu. Na vakayagataki ni sakaramede e solia vei keda e dua na gauna bibi ena vanua tabu. Eda vakayacora me vaka na ivunau e solia vei keda na Turaga ena wase 59 ni Vunau kei na Veiyalayalati:

“Raica sa kilikili sara mo qarauni iko vinaka me kakua ni tauvi iko na duka ni ka vakavuravura; ia mo lako ki na noqu valenisoqoni ena noqu siga ni vakacecegu ka qaravi au kina” (t. 9).

Ena ivakatekivu ni bera ni buli o vuravura, sa vakadavora tu e dua na ituvatuva na Kalou ni na vakalougatataki ira na luvena kevaka era sa talairawarawa ki na Nona ivunau. E sa kila tu o koya, ni da na temaki ena so na gauna ena veika vakavuravura ka da na gadreva me da na vakananumi tiko ena veigauna ena noda veiyalayalati kei na Nona yalayala.

E dua na imatai ni vunau a soli vei Atama o ya me qarava na Turaga ka cabora na ulumatua ni nona manumanu me isoro ki Vua. E soli na ivunau oqo me vakananumi ira na tamata ni na lako mai ki vuravura o Jisu Karisito ka na mai solia na Nona bula me isoro.

“A sa talairawarawa ko Atama ki na ivakaro ni Turaga.

“Ia ni sa oti e vuqa na bogi sa rairai vei Atama e dua na agilosi ni Turaga ka kaya: A cava ko sa vakacabo isoro kina vua na Turaga? A sa sauma ko Atama ka kaya: Au sa sega ni kila. Ia sa vakarota na Turaga meu kitaka vakakina.

“A sa vosa na agilosi, ka kaya: Na ka oqo sa ivakatakarakara ni Nona vakacabori koya na Le Duabau ga nei Tamada, o koya sa sinai ena loloma kei na dina” (Mosese 5:5–7).

Mai na gauna ko ya me yacova mai na nona gauna na iVakabula, era sa vakaroti na luvena na Tamada Vakalomalagi me ra vakacabo isoro. E sa tamusuki ena Nona sa mai solibula me veisorovaki na iVakabula. Ia ena iotioti ni bogi ni bera ni vakacavara na Nona veisorovaki, e a vakayacora na iVakabula na iVakayakavi ni Turaga, ena vukuda na kawatamata, me vukei keda me da daunanumi Koya kei na Nona Veisorovaki. Io ena ivunau makawa ni veisorovaki ka vakakina ena sakaramede, e sa vukei keda na Turaga me da na kakua ni guilecava na Nona yalayala kei na kena gadrevi me da muri Koya ka cakava na lomana.

Ena Veiyalayalati Vou e tiko kina na kena itukutuku na Turaga ni a qarava na sakaramede vei ira na Nona tisaipeli. E kunei oqo ena Maciu, wase 26:

“Ia ni ra sa kana tiko, sa taura na madrai ko Jisu, ia ni sa lotutaka oti, sa dovia ka solia vei ira na tisaipeli, ka kaya, Taura, kania; oqo na yagoqu.

“Sa qai taura na bilo ko koya, ia ni sa vakavinavinaka oti, sa solia vei ira ka kaya, Dou gunu kece kina;

“Oqo na noqu dra ni veiyalayalati vou sa liviraki ena vukudra e lewevuqa, me bokoci na ivalavala ca” (tt. 26–28).

Na iVola i Momani, ena ika 3 ni Nifai, wase 18, e solia vei keda na itukutuku matailalai ni Nona a qarava na sakaramede na Turaga vei ira na Nifai:

“A sa vakaroti iratou na nona tisaipeli me ratou kauta mai vua eso na madrai kei na waini.

“Ia ni ratou sa lako me kauta mai vua na madrai kei na waini, sa kaya vei ira na lewevuqa ko koya me ra dabe.

“Ia ni ratou sa kauta mai na tisaipeli na madrai kei na waini, sa taura na madrai ko koya ka dovia ka lotutaka; ka solia vei iratou na tisaipeli me ratou kania.

“Ia ni ratou sa kana oti, sa kaya me ratou solia talega vei ira na lewevuqa.

“Ia ni ra sa kana oti na lewevuqa, sa kaya vei iratou na tisaipeli: Raica au na lesia e dua vei kemudou me dovia na madrai ka lotutaka, ka solia vei ira na noqu lewenilotu; io ko ira kecega sa vakabauta ka papitaisotaki ena yacaqu.

“Ia mo dou vakayacora ena kena icakacaka au sa kitaka; io me vaka au sa dovia na madrai ka lotutaka, ka solia vei kemudou.

“Dou kitaka na ka oqo me vaka au sa vakaraitaka vei kemudou, mo dou vakananumi au kina. Oqo me ivakadinadina vei Tamaqu ni dou na daunanumi au tikoga. Ia kevaka dou sa daunanumi au tikoga, ena tikoga kei kemudou na noqu Yalo Tabu.

“Ia ni sa cavuta na vosa oqo, sa kaya vei iratou na nona tisaipeli me ratou taura na bilo waini ka gunuva, ka solia talega vei ira na lewevuqa me ra gunuva.

“A ratou sa kitaka vakakina; eratou sa gunuva e liu ka qai solia talega vei ira na lewevuqa.

“Ia ni ratou sa vakayacora vakakina na tisaipeli, sa kaya vei iratou ko Jisu: Dou sa kalougata ena ka dou sa kitaka, ni dou sa vakayacora kina na noqu ivakaro; oqo sa ivakadinadina vei Tamaqu ni dou sa talairawarawa ki na noqu vosa” (tt. 1–10).

E matata vinaka sara na nona ivakaro ni sa dodonu me da gumatua ni vakayacora na nona ivakaro vei keda. Eda na namaka tale tikoga me na vakaroti keda talega mai ena gauna oqo me da taura na sakaramede. Me vaka e tukuna vei keda na Vunau kei na Veiyalayalati:

“Raica me ra dausoqoni vakawasoma na lewenilotu me ra kana madrai ka gunu waini; io me ra vakananuma kina na Turaga ko Jisu” (V&V 20:75).

Na inaki ni noda taura na sakaramede o ya me da vakavouya na noda veiyalayalati eda cakava vua na Turaga.

E vakasalataki keda kina o Elder Delbert L. Stapley ni a vosa me baleta na veiyalayalati:

“Na kosipeli ni noda Turaga o Jisu Karisito e dua na veiyalayalati mai vua na Kalou kei ira na nona tamata. Ni da sa papitaisotaki mai vua e dua sa lesia mai na Kalou, eda sa veiyalayalati me da cakava na loma ni Kalou ka muria na nona vunau… . Ni da vakayagataka na sakaramede eda sa vakavouya kina na veiyalayalati kece eda cakava vua na Turaga, ka da yalataka me da taura na yaca ni Luvena, ka me da dau nanumi Koya ka muria na nona vunau” (ena Conference Report, Okot. 1965, 14).

Na sakaramede sai koya e dua na cakacaka bibi vaka-Lotu. Ni da bula kilikili tiko ka taura na sakaramede ena yaco me da na tubucake vakayalo.

Au nanuma niu se gonetagane voli, ni dau vakatagitaki na ivakatagi totoka ena gauna e soli tiko kina na sakaramede. Era sa qai kerea na Veiliutaki me sa vakatabui na ka oqo baleta ena gole tikoga na vakanananu ki na ivakatagi ka sega ni gole ki na Nona mai solibula ka veisorovaki na noda Turaga ka iVakabula. Ena gauna a qaravi tiko kina na sakaramede, me da vakatikitikitaki vuravura. Oqo e gauna ni veivakavoui vakayalo ka me da vakila kina vakayalo na bibi ni cakacaka tabu vakalotu oqo ka vakayacori ena vukuda yadua. Kevaka eda vakawaletaka tu ga na noda taura na sakaramede, eda na sega ni vakila na tubucake vakayalo.

A tukuna ena dua na gauna o Elder Melvin J. Ballard:

“Au sa vakadinadinataka ni tiko e dua na yalo ena qaravi ni soqoni ni sakaramede ka dau vakatakatara na yaloda mai uluda ki yavada; o na vakila ni sa kauta laivi na bibi ni yalo, ka luvata laivi na icolacola. E tarava mai na yalo na vakacegu kei na reki ka sai koya oqo na ka e gadrevi ena kena vakayagataki na kakana vakayalo oqo” (“The Sacramental Covenant,” Improvement Era, Okot. 1919, 1027).

Ni da bula kilikili ka taura na sakaramede, eda na nanuma na nona solibula na noda Turaga ka iVakabula, ni a solia na Nona bula ka colata na ivalavala ca kei vuravura me rawata na veivakalougatataki tawamudu. Eda sa taura na yaca ni Noda iVakabula ka yalataka me da na daunanumi Koya tikoga ka muria na nona ivunau—o ya “mo dou muria na vosa kecega sa lako mai na gusu ni Kalou” (V&V 84:44).

Kemuni na itubutubu, sa nomuni itavi mo ni tubera na nomuni matavuvale ena bibi ni nodra lakova na soqoni ni sakaramede ena veimacawa. E dodonu me vakayacori tiko ena veimacawa. E gadrevi ena matavuvale kece sara me vakavoui ka ra soli igu me ra bulataka na kosipeli me vaka na nona ivakavuvuli na iVakabula. Ni vakarautaki vinaka, na matavuvale, era na lakova na soqoni ni sakaramede ena yalo e vakarokoroko, ka ra vakavinavinakataka ni ra sa donumaka tale e dua na soqoni ni sakaramede.

Au nanuma na ka a sotava neitou matavuvale ena dua na neitou gade ki na dua na itikotiko ni gade. Keitou a gade tiko ka yacova na Sigatabu, ka veitaratara sara me keitou laki tiko ena soqoni ni sakaramede ena valenilotu ka voleka e kea. E vakatalega kina o ira na lewe drau era gade tale tikoga e kea. E sinai vutucoqa na valenilotu. Ni bera ni tekivu na soqoni, a veisureti o bisopi vei ira na dikoni era tiko rawa ka vakaisulu vakavinaka, me ra veivuke ena veivotayaki ni sakaramede. Era lewe levu na gole cake ena sote vulavula kei na neketai, ka ra vakasalataki sara ena nodra qaravi na iwiliwili levu o ya. A qaravi vinaka na cakacaka tabu vakalotu oqo ena yalo vakarokoroko kei na vakanomodi. Niu a saravi ira tiko na lewenilotu, au raica rawa ni vuqa e tarai ira sara ga na yalo ni soqoni.

Ni keitou lesu ki na itikotiko ni gade e kilai tani na duidui ni itavi e qaravi ena Sigatabu kei na sigawale. Era kele ka vesu tu ga na waqa ena wavu; e lala sara na tobu ni sisili; ka rakorako dina na nodra isulusulu ni Sigatabu. O ira kece na matavuvale oqori era raica na kena yaco na yalayala ni Turaga; ni ra a lako ki na vale ni sokalou ena Nona sigatabu ka vakavouya na nodra veiyalayalati me ra muria na ivunau, era sa rawa ni taqomaki ira mai na duka ni vuravura (raica V&V 59:9).

Me da dui tugana sara ki lomada me toroicake na noda rokova na Sigatabu. Me rabailevu na noda kila na bibi ni noda taura na sakaramede kei na kena yaga ki na noda bula. Me da dau nanumi Koya tikoga ka muria na nona ivunau, ka ni na solia vei keda na kaukauwa me rawati na inaki ni bula oqo ka solia na inuinui ni bula tawamudu. Oqo na cakacaka ni Turaga ka da vakaitavi kina. E bula na Kalou. Sa i Jisu na Karisito, na iVakabula kei vuravura. Eda sa vakadonui me da tiki ni ituvatuva cecere vakosipeli oqo, o koya ka sa dua na tikina bibi na sakaramede. Ena yaca i Jisu Karisito, emeni.