Na Sovaraki Mai ni Veivakalougatataki

E Kirtland, ena gauna era a vakatikori kina na vo ni idola ni matabete, e kaya kina na Turaga: “Raica oqo sa itekivu ni veivakalougatataki ena sovaraki vei ira na noqu tamata.”¹ Au vakavinavinakataka na kena sovaraki mai ni veivakalougatataki ka sa yacovi keda vakayadua mai vei ira na matabete ni Kalou. Mai na kaukauwa ni matabete, na vuravura oqo kei na veika kecega e tu kina, okati kina oi keda vakayadua, eda a buli mai kina. Na matabete sa ikoya e vakamatailalaitaka sara tu ga o cei o keda kei na vanua eda a tu mai kina.² Me vaka ni da luvena tagane kei na yalewa na Kalou, e tu na noda itavi duadua ga kei na cakacaka, kei na veivakalougatataki ni matabete, e a soli kina vei keda kece na veivakatautauvatataki ni veitokani, isolisoli, kei na veivakalougataki.

Ena vula itubutubu sa dromu e a papitaisotaki kina na makubui keirau goneyalewa ka vakadeitaki me dua na lewe ni Lotu. Ni sa ciqoma oti na Yalo Tabu, e a vakalougatataki ka vakatokayacataki na tacina vou goneyalewa. Na vula ka tarava, e dua tale na makubui keirau vou goneyalewa e a vakatokayacataki ka vakalougatataki. Me yacova mai na gauna oqo au raitayaloyalotaka vakawasoma na dodonu e soli ka ra marautaka na goneyalewa lalai oqori baleta ni sa vakalesui mai na matabete ni Kalou.

Au nuitaka ni o ira na makubuda goneyalewa kei na gonetagane era na tubu cake ka kila tiko ni ra a sega ka ra na sega vakadua ni ikatolu mai ni tamata dausarava na matabete. Na veivakalougatataki ni matabete, ka ra “soli vakatautauvata kivei ira na turaga kei na marama”³ e curuma, curu basikata ka vakavolivolita na nodra bula. O ira vakayadua era vakalougatataki mai na cakacaka tabu vakalotu, ka rawa vei ira vakayadua me ra marautaka na veivakalougatataki ni isolisoli vakayalo mai na bula dodonu ni matabete.

O ira taucoko na lewe ni Lotu ni Turaga yalodina era vakalougatataki vakatautauvata mai na cakacaka tabu vakalotu ni matabete. Na imatai ni cakacaka tabu vakalotu⁴ ena bula ni dua na gone e dau yaco ena gauna e se gone dramidrami kina ka vakatokayacataki ena dua na yaca kei na dua na veivakalougatataki. Ena gauna era sa yacova kina na gone na yabaki ni kilai yalodra, era sa qai papitaiso. E sega ni wasei e dua na gauna ni papitaiso me baleti ira na gonetagane kei na goneyalewa. Na cakacaka tabu vakalotu ni papitaiso vata ga o ya e vakayacori me baleta e dua na goneyalewa gone kei na dua na gonetagane gone, ka ra papitaiso ena tobu vata ga. Ena gauna era sa vakadeitaki kina ka ra ciqoma na Yalo Tabu o ira na gone o ya, na kaukauwa vata ga o ya e soli kivei ira vakayadua. Era kilikili kaya na veivuke ni kaukauwa tabu o ya ni ra yalodina ka sega tale ni dua tani na kena gaunisala.

Me vaka ni da lewe ni Lotu, eda tautauvata ga ena mata ni Turaga ena noda vakayagataka na sakaramede. Mai na noda vakabauti Jisu Karisito kei na kaukauwa ni Nona Veisorovaki ka sa vakarawarawataki ena na cakacaka tabu vakalotu o ya, e rawa kina vei keda taucoko me da veivutuni ka yaco me da vinaka cake.

Oi keda vakayadua e dodonu me da votai vakatautauvata ki na dua na veivakalougatataki ni matabete ena gauna eda tauvimate kina se ena noda gadreva na vakaikuritaki ni veitokoni mai vua na Turaga ena noda bula. E dua na goneyalewa e gadreva e dua na veivakalougatataki vakapeteriaki e vakatautauvatataki na nona dodonu me kila na nona iyatu kei na veika e kila me vaka e dua na gonetagane erau yabaki vata. Na veivakalougatataki e lako mai ki vei ira vakayadua mai vei Eparaama e kaukauwa cake sara ka bibi.

Eda vakavulici ira taucoko na gonetagane kei na goneyalewa me ra vakavakarau me ra lako ki na valetabu me rawa ni ra “ciqoma na veivakalougatataki [na] tama ni [ra] rawa me nodra na veivakalougatataki cecere ni matabete.”⁵ Ena gauna e a ciqoma kina e dua vei ira na vugoqu goneyalewa ena vica na vula sa oti na nona edaumeni ni valetabu, e kailavaka ena reki: “Au sa rawata! Ena noqu bula taucoko au a vakavulici me baleta na vakavakarau ni curu ki na valetabu, kau sa rawata!”

Na turaga kei na marama vakayadua era gadreva me ra qarava na Turaga ka rawa me ra taura e dua na ivolatara ni valetabu me ra cakava na veiyalayalati ni talairawarawa kei na solibula. E soli vakayadua vei ira “na kaukauwa mai lomalagi.”⁶

Na cauravou kei na goneyalewa daukaulotu vakayadua ka ciqoma e dua na ilesilesi ni kaulotu ena tabaki me cakava na cakacaka ni Turaga, ka na soli vakayadua vei ira na kaukauwa me vunautaka na kosipeli i Karisito.

E dua na turaga kei na dua na marama erau vauci vata ena dua na veiyalayalati tawamudu ni vakamau ena valetabu erau na wasea vakatautauvata na veivakalougatataki ni veiyalayalati tawamudu o ya kevaka erau yalodina tiko.⁷ E a kaya na Turaga ni nodrau veiyalayalati tawamudu ena qai vakayagataki ni oti na bula oqo, ka yalataki vei rau na kaukauwa kei na bula vakalou.⁸

E kaya o Peresitedi Ezra Taft Benson, “Ena gauna era talairawarawa kina na luveda vua na Turaga ka lako ki na valetabu me ra laki ciqoma na nodra veivakalougatataki kei na veiyalayalati tawamudu ni vakamau, era na ciqoma na ituvatuva ni matabete vata ga ka a vakarautaka na Kalou vei Atama ena ivakatekivu.”⁹

Au raica na kaukauwa ni veivakalougatataki ni matabete ena gauna au a sikova kina e dua na matavuvale ka sa davo koto kina ka voleka ni mate e dua na tama gone. Era tu vakavolivoliti koya na marama watina kei ira na luvena goneyalewa rairai totoka. Ena veilalaga yadua ni rumu o ya ena tiko kina e dua na itaba ni matavuvale se valetabu. E a vakadinadinataka na tinanigone na nodratou veivakalougatataki ena nona kaya: “Keitou sa vakaukauwataki ka taqomaki mai na neirau veiyalayalati. Na neitou matavuvale keitou na vosota me tawamudu. E wanonovi keitou sobu tu mai na Turaga, ka keitou sega ni tikoga vakataki keitou.” O ira taucoko na lewenilotu era vakalougatataki vakatautauvata mai na sovaraki ni veivakalougatataki era ciqoma mai na cakacaka tabu vakalotu ni matabete.

Eda wasea vakatautauvata talega na veivakalougatataki ni isolisoli vakayalo baleta ni sa vakalesui mai na matabete. E solia vei keda na Turaga na veisolisoli kece oqo me yaga vakayadua vei keda¹⁰ ka me da veivukei kina.¹¹

E a kaya o Moronai ni “sa duidui na isolisoli, sa duidui talega na kena icakacaka; ia sa duabau ga na Kalou, o koya sa cakava na ka kecega vei ira kecega; a sa soli vei ira na tamata na ivakatakilakila ni Yalo Tabu me ra yaga kina.

“Raica sa soli vua e dua ena cakacaka ni Yalo Tabu, me vakatavuvulitaka na vosa ni vuku;

“Vua tale e dua na vosa ni kila ka, ena cakacaka tale ga ni Yalotabu;

“Vua tale e dua na vakadinata, vua tale e dua na isolisoli me vakabulai ira sa tauvimate, ena cakacaka talega ni Yalotabu.”¹²

Ena noqu tovolea tiko meu vulica na vosa vaka-Sipeni kau nanuma sara na vosa vaka- Potukali (au se kila sara niu se gonelailai), au dau masumasu ka vakila na veivuke ni Turaga ena noqu dau vosataka na veivosa oqori. Au sa dau rogoci ira tale eso na iliuliu ni Lotu kei ira na daukaulotu ena nodra wasea na nodra ivakadinadina kaukauwa ena veivosa ka ra a sega sara mada ga ni bau vulica vakalailai. Au kilai ira na tamata e a soli kivei ira na isolisoli vakayalo ni veivakabauti. Ena gauna era dau rogoca kina na kosipeli, e rorogo vakaidina sara ga ki lomadra. Au kilai ira eso tale ka a soli kivei ira na isolisoli ni vuku se na kena rawa ni vakayagataki na kila ka ena veigaunisala savasava. Eso vei ira e rawa me ra cakava na veika veivakurabuitaki, eso e tu vei ira na isolisoli me ra veivakabulai, kei ira eso ena vakaraitaki ni vakatulewa cecere.¹³

Ena gauna au se goneyalewa lailai kina, au dau sotava wasoma na tauvimate bibi. Ena veigauna taucoko o tamaqu e dau lomasoli ka kilikili me vakayagataka na kaukauwa vakabete e tu vua me vakalougatataki au kina. Ia au vakila talega ni isolisoli uasivi sara nei tinaqu e a vukea na noqu vakabulai. E a soli vakaidina vua na isolisoli ena nona a rawa ni qarava na noqu veigagadre ka vukei au meu bula mai na tauvimate. Na nona vakabauta cecere ni Turaga ena liutaki koya ena isau ni taro me baleta na veiqaravi vakavuniwai sa ikoya e dua na veivakacegui kivei au. Sa dua dina na veivakalougatataki vei au ni o rau na noqu itubutubu erau vakayagataka na nodrau isolisoli vakayalo ena yalololoma.

E a kaya o Peresitedi Wilford Woodruff ni, “sa ikoya na dodonu ni veituraga kei na marama vakayadua ena matanitu oqo me ra marautaka na yalo ni parofisai, ka sa ikoya na Yalo ni Kalou; kei na yalodina e vakaraitaka na veika era yaga me baleta na nodra vakacegui kei na veivakayalomalumalumutaki ka dusimaki ira ki na nodra itavi ni veisiga yadua.”¹⁴

Na veivakalougatataki ni matabete e yaco rawa kina kivei ira na tamata yadua era tabaki me ra veiqaravi ena itutu cava ga ni Lotu ni Turaga ka ciqoma na “kaukauwa, itavi, kei na veivakalougatataki e semati vata kei na nodra itutu.”¹⁵

E sega ni wili rawa na veisolisoli vakayalo ka duidui ka ra lako mai vei keda ena noda vakasaqara ka vakayagataki ira ena kena gauna donu. Eda marautaki ira baleta na kaukauwa ni Yalo Tabu, ka tiko kina ka wavokita ka curuma vakamatailalai na noda bula.¹⁶

Mai na veivakalougatataki ni matabete, e vakaraitaka vei keda na Turaga ni o Koya e “nanumi ira vakatautauvata.”¹⁷ Ena noqu dau veilakoyaki tu, e vakawasoma na noqu dau laki sikovi ira na lewenilotu ena nodra dui veivale. Eso na veivale oqori era itikotiko rawarawa sara. Taumada au na kaya lo e lomaqu: “Na cava beka na vuna au mai vakalougatataki kina ena dua na vale ka sa tu kina na livaliva kei na iyaya ni wai ni matavuvale oqo e sega sara mada ga ni bau tu voleka e nodratou vale na wai? E lomani iratou beka vakalailai na Turaga me vakatautauvatani mai na Nona lomani au?”

Ni oti o ya, ena dua na siga au a dabe volekata toka e dua na marama ena loma ni valetabu ka vakaitikotiko ena dua na vale e vakaloloma toka. E rua na auwa na noqu dabe toka e yasana. E vakawasoma na noqu dau raica na yaloka ni matana rairai totoka ka raica rawa ni tiko kina na loloma ni Turaga. Ena gauna e sa oti kina na neirau cakacaka ena valetabu, e yaco vei au e dua na kilai yaloqu kaukauwa sara. Ena veivakalougatataki tawamudu kece sara, ena bibi cake sara ni noda dodonu kei na veigauna donu, eda a tautauvata kecega. Au a “veivutuni ka papitaiso”¹⁸ e vaka talega kina o koya. E a tu vei au na isolisoli vakayalo, e vakatalega kina o koya. E a tu vei au na gauna donu meu veivutuni, e vakatalega kina o koya. Au a ciqoma na Yalo Tabu, e vakatalega kina o koya. Au a ciqoma na cakacaka tabu vakalotu ni valetabu, e vakatalega kina o koya. Kevaka beka me keirau a sa biuta ruarua na vuravura oqo ena gauna o ya, keirau na tadu ruarua sara ga yani vakatautauvata e mata ni Turaga ena neirau veivakalougatataki kei na rawa ka vakayago.

Na veivakalougatataki ni matabete e sa dua na veivakatautauvatataki cecere sara. Na veivakalougatataki oqori era tautauvata kece sara me baleti ira na turaga kei na marama, me baleti ira na gonetagane kei na goneyalewa; era tautauvata me baleti ira na vakawati kei na dawai, vutuniyau kei na dravudravua, me baleti ira na yalomatua kei ira na yalowai, me baleti ira na kilai levu kei ira na tawa kilai.

Au vakavinavinakataka ni veivakatautauvatataki tawa yalani kei na loloma ni Kalou, e soli kina vei ira taucoko sara na turaga kei na marama na tautauvata ni veitokani, isolisoli, veivakalougatataki, kei na rawa ka vakayago mai na cakacaka tabu vakalotu ni matabete kei na isolisoli vakayalo. Me baleti ira na matabete, ka sa vakamatailalaitaki ka curuma ka wavokita na noda bula, na kaukauwa vakayadua, na veiyalayalati vakayadua eda gadreva me da cakava ena cakacaka ni noda bula ka lesu tale ki na noda itikotiko vakalomalagi ka sa sovaraki mai buradelada. Ena yaca i Jisu Karisito, emeni.