Na Noda iTabatamata Tubucake Tiko Mai

Ni bula vinaka na taciqu ena matabete. Ena bogi nikua e vuravura taucoko eda soqo vata vakavoleka yani ki na veivaletabu ni Turaga me vaka e se bera vakadua ni bau yaco ena itukutuku ni kawatamata. Ena nona loloma na noda iVakabula ka veidusimaki kina vei ira na Nona parofita, sa tu kina ena gauna oqo e 122 na valetabu vei ira na nona tamata ni veiyalayalati na Turaga me ra rawata kina na nodra dui veivakalougatataki ni valetabu ka qarava kina na veicakacaka tabu vakalotu bibi me baleti ira na nodra qase era sa biuta oti na bula oqo. Ia sa levu cake tale era sa kacivaki ka ra na qai yaco mai! Keimami vakavinavinaka kina vei kemuni Peresitedi Hinckley, ena nomuni veivakauqeti ni veiliutaki ena sasaga vakaitamera oqo.

Ena dua na gauna taumada ni iVola i Momani, era a soqoni vata talega kina na lewe ni Lotu me ra dusimaki kina mai vei koya na nodra parofita ka iliuliu. Ena dua na gauna e muri ena nona bula, a kacivi ira kina na tama o Penijamini na Tui, me vakasalataki ira ka vakauqeti ira. Eda wilika mai na ika 2 ni Mosaia:

“Ia ni ra sa yaco ki na valetabu, era sa birika wavoki na nodra valelaca vakamatavuvale… .

“… Era sa birika na nodra valelaca me vakavolivolita na valetabu; a sa qara kece mai kina na nodra dui katuba, me rawa ni ra toka ga kina ka rogoca sara tiko na vosa i Penijamini na Tui” (Mosaia 2:5–6).

Au taleitaka na veika e raitayaloyalotaki ena veitikina oqo. Ni da vakaibalebaletaka kemuni na taciqu, sa qara tiko beka ki na valetabu eda sa dau lomana vakalevu? Eda sa dau lako beka ki na vakalevu me da vakaraitaka ena noda ivakaraitaki na bibi ni vanua tabu ka digitaki oqo?

Me vaka e volai ena Mosaia, era ciqoma na veimatavuvale na vosa ni Turaga mai vua na nodra parofita ena vakanuinui kei na yalodina. Sa lauti ira sara vakalevu na tamata na ivakavuvuli nei Penijamini na Tui era sa cakava kina e dua na veiyalayalati vou me ra muri Jisu Karisito.

Ia, e koto e dua na ikuri ni italanoa oqo e sega ni marautaki. Eda qai kila e muri ena Mosaia 26 me baleti ira era se gonelalai ena loma ni valelaca ena gauna a vunau kina ko Penijamini na Tui:

“A sa lewevuqa vei ira ka qai tubu tiko mai era sa sega ni kila na vosa i Penijamini na tui, ka ni ra a se lalai sara ena gauna a vosa kina vei ira na nona tamata; era sa sega talega ni vakabauta na nodra ivakavuvuli na nodra qase” (Mosaia 26:1).

Na cava a yaco ki na itabatamata a se qai tubu tiko mai ko ya, kemuni na taciqu? Na cava era sega ni ciqoma kina na gone na nodra ivalavala dodonu na tamadra? E bibi duadua, eda sa tu oqo ena vica na senijiuri ki muri, ena dua na gauna sa levu sara kina na valetabu kei na veidusimaki vakaparofita ena veigauna eso, ia ena vakacava ko ira na noda itabatamata era se qai tubu cake tiko mai? E dua beka na vuna me da kauwai kina? Io e dodonu!

Era sa ka digitaki dina na cauravou kei ira na goneyalewa era tiko eke kei na veiyasai vuravura. Sa vosa ko Peresitedi Hinckley me baleti ira:

“Au sa kaya oti vakavuqa niu vakabauta ni oqo na itabatamata uasivi duadua ni itabagone e se qai bau kila na Lotu oqo… . Era tovolea tiko me ra cakava na ka e dodonu. Era vuku ka rawa ka, savasava ka bulabula, rairai vinaka ka maqosa… . Era kila se cava na kosipeli, ka tovolea tiko me ra bulataka, era rai tikoga vua na Turaga ena Nona veidusimaki kei na veivuke” (“Na Nomu Bolebole Levu Duadua, O iko na Tina,” Liaona, Janu. 2001, 113; Ensign, Nove. 2000, 97–98).

O keda kece eda vakaitavi ena vukudra na itabagone oqo eda kila na dina ni vosa nei Peresitedi Hinckley.

Ko Elder Henry B. Eyring ena Kuoramu ni iApositolo Le Tinikarua, e tukuna vei keda e dua na ivakasala veivakarurugi, ni vosa me baleti ira na itabagone:

“E vuqa vei ira e vakasakiti na nodra matua vakayalo kei na nodra vakabauta. Ia o ira sara mada ga era uasivi duadua era vakatovolei vakaukauwa sara. Ka na yaco me dredre sara na veivakatovolei” (“We Must Raise Our Sights,” Ensign, Sepi. 2004, 14).

E dreta na noqu vakasama na ivakasala oqo ni na “dredre cake na veivakatovolei.” Ena ganiti ira na noda itabatamata era se qai tubu tiko mai na noda sasaga uasivi duadua me ra tokoni ka vaqaqacotaki kina ena nodra ilakolako ki na bula vakaitubutubu.

Ena veigauna dredre oqo, ni ra sotava na noda itabagone na veivakatovolei lelevu, e rawa ni da vuli mai vei ira na tani. Ena veimataivalu, ka vakauasivi ga ena Mataivalu e Wai kece sara e vuravura, era kila vinaka tu na kaimua kece sara e dua na malanivosa ka kaci ni veivuke vakatotolo, veitalia se cava e cakava tiko se evei na vanua e tiko kina ena waqa. Na kaci sai koya “Na tamata kece e dela ni Dreke.” E vuqa na ivalu e wai a rawati se a sega ni rawati ena ivakarau ni kena rogoci na kaci oqo.

O keda—me vaka ni da lewe ni Lotu, veiliutaki ena itabagone, tama nanamaki se tukanigone dau kauwai—ena gadrevi vei keda taucoko me da rogoca na kaci “tamata kece e dela ni dreke” ni baleti ira na noda itabagone se ko ira na cauravou kei na goneyalewa itabaqase. E dodonu vei keda me da dau vakasaqara na veigauna eso me da vakalougatataki ira kina na itabagone, se da veitaratara tiko vakavoleka vata kei ira se sega. Sa dodonu me da tomana tiko na noda veivakavulici ka vaqaqacotaki ira na tama kei na tina ena nodra itavi vakalou, vei ira na luvedra e vale. Me da dau tarogi keda ena veigauna eso, kevaka e bibi cake na soqoni ni qito o ya, na itavi qaravi, se na ileslesi ena taudaku ni vuvale mai na noda tiko vata vakamatavuvale e vale.

Oqo na gauna, kemuni na wekaqu, se na cava ga eda na cakava tiko, kei na veivanua kecega eda na lako kina, me da na kauwaitaka vakalevu cake na gadrevi ni veivaqaqacotaki, veisusu kei na ivakaraitaki vinaka vei ira kece sara na itabagone Yalododonu Edaidai, eda na sotava.

Ena neitou matavuvale keitou sa sotava e dua na mataqali gauna vakaoqo, mai vei ira na veiliutaki vakabete vinaka ka dau qaqarauni. Ena imatai ni gauna au kacivi kina ki na Vitusagavulu ena vica na yabaki sa oti, keitou a lesi me keitou toki ki Solihul, e Igiladi meu veiqaravi ena Mataveiliutaki ni iWasewase. Keirau a kauti rau na luvei keirau gone sara kei Sisita Rasband ena ilesilesi oqo. Na luvei keirau goneyalewa sa tiko ena goneyalewa itabaqase kei na luvei keirau tagane, sa yabaki 17 ka dau taleitaka na veicaqe vaka-Amerika ka dau qitotaka sara vakavinaka. Keirau sa leqataki rau sara vakalevu. E sega na itokani, sega na isema ni neitou matavuvale, ka sega na veicaqe vaka-Amerika! Au qai vakataroga toka: “Ena yaco beka me ka ni veivakatovolei dredre ki na noqu matavuvale na veika vovou keitou sotava oqo?”

A yaco mai na kena isau ena dua na ilesilesi taumada a soli vei au. Au a kerei meu laki vosa vei ira na daukaulotu ena Koronivuli ni Veivakarautaki ki na Kaulotu e Preston, Igiladi. Au a qiriti Peresitedi White ena koronivuli, kau marau ni sa kila tiko o koya na ituvaki ni noqu matavuvale. A vakatura mai me keirau kauti rau yani na luvei keirau ena neirau lako yani ki Preston. Ni keitou yaco yani ki kea a sureti luvequ tagane kei na luvequ yalewa me rau vosa talega vei ira na daukaulotu! Sa dua na ka taleitaki vei rau me rau wasea na nodrau ivakadinadina me baleta na cakacaka ni Turaga!

Ni sa oti, ka keimami veivakamocetaki kei ira na daukaulotu, keitou a gole ki na Valetabu totoka e Preston Igiladi ka toka voleka ga ki na Koronivuli ni Veivakarautaki ni Kaulotu. Ni keitou toso voleka yani ki na katuba levu erau sa tucake tu ko Peresitedi kei Sisita Swanney, na peresitedi ni valetabu kei na metereni. Erau kidavaki keitou ka vakacurumi keitou yani ki na valetabu ena: “I Elder Rasband, dou na taleitaka beka vakamatavuvale mo dou veipapitaisotaki vei ira na mate?” Sa dua na vakasama uasivi! Keitou veiraici ka ciqoma ena vakavinavinaka. Ni keitou sa qarava oti na veicakacaka tabu vakalotu, ka keirau se tiko voli ga ena tobu ni veipapitaisotaki kei na luvequ ka tonawanawa tu na matai keirau ena wainimata ni marau kei na reki, e biuta na ligana ki tabaqu ka kaya, “Ta, na cava tou a sega ni bau cakava kina vakaoqo e liu?”

Au vakasamataka na qito veicaqe kei na iyaloyalo keirau dau lakova vata, na veigauna vinaka keirau wasea vata—io na veivakanananu marautaki kei na ivalavala bibi me da tara cake.

Ia, au kila ni a rawa me keitou vakuria eso tale na veika vakayalo vakaibalebale vakalevu cake vata kei rau na luvei keirau me vaka na veika keitou a sotava mai Preston ena siga ko ya. Au vakavinavinaka kina vei ira na veiliutaki vakabete dau veikauwaitaki ka gugumatua, au kila mai na gauna ko ya ni na sega ni dua na leqa ki na noqu matavuvale mai Iurope. Eda sa vakavinavinaka kina vakalevu vei ira na lewe vuqa na veiliutaki ena matabete kei na goneyalewa era dau gugumatua ka lomani ira tikoga na luvei keirau kei na luvemuni.

Ni da raica e dua tale na itabagauna ni iVola i Momani, a bula ko Nifai ena dua na gauna ka a dredre toka kina vei ira eso na lewe ni nona matavuvale me ra dau talairawarawa, duavata, ka yalodina. E kila dina sara ko koya na kena gadrevi me ra dau kauwaitaki na gone ena itabatamata ka qai tubu cake tiko mai. A kaya ena dua na gauna e muri ena nona bula:

“Ia eda sa tukuni Karisito ka rekitaki Karisito, ka vunautaki Karisito ka parofisaitaki Karisito; ia eda sa vola na ka sa vakatakilai vei keda, me ra kila kina na noda kawa na sala me bokoci kina na nodra ivalavala ca” (2 Nifai 25:26).

Au masuta me vaka ni da matabete ni Kalou me da cakava koi keda yadua na veika kece sara ena noda kaukauwa me da vakavulici ira na noda itabagone, se na ivurevure cava ga me ra na raica kina na vakabokoci ni nodra ivalavala ca, io na Turaga ko Jisu Karisito. Me da rogoca koi keda yadua ena noda sasaga dina sara na “Tamata kece e dela ni Dreke” me baleta na nodra vakabulai na noda itabatamata era qai tubu cake tiko—e dina sara e ganiti ira na noda sasaga uasivi duadua.

Au vakadinadinataka ni oqo na Nona Lotu dina na Turaga, ka dusimaka tiko ko Koya mai vua na noda parofita lomani, io ko Gordon B. Hinckley, o koya au lomana ka tokona. Ena yaca i Jisu Karisito, emeni.