Veika Sa Kavoro Me Semati

Na imatai ni vosa a cavuta o Jisu ena Nona Vunau Cecere ena Ulunivanua a kaya vei ira na vakaleqai, yalolailai, kei ira na yaloluluvu. “Sa kalougata ko ira sa yalomalumalumu,” E kaya o Koya, “ni sa nodra na matanitu vakalomalagi.”¹ Ke ko ni lewe ni Lotu i Jisu Karisito ni Yalododonu Edaidai se dua vei ira na udolu vaka udolu na vakarorogo tiko mai ena mataka nikua ka sega ni lewenilotu vata kei keimami, sa noqu vosa oqo vei kemuni ko ni sotava yadua tiko na leqa eso kei na leqa ni matavuvale, vei kemuni ko ni saga tiko mo ni taqea rawa na waluvu ni lomaocaoca ka dau kuitaki keda yani me vaka e dua na sunami vakayalo. Au via vosa vakatabakidua vei kemuni ko ni sa vakila tiko ena nomuni bula, ni sa vaka me kavoro mai, ka vaka me sa na sega ni vakavinakataki rawa tale.

Kivei kemuni kece sara oqo au sa solia vei kemuni na kena iwali dina ka talei duadua au kila. E tiko sara ga ena veikacivi rogorogo vinaka ni iVakabula kei vuravura ka a solia sara ga mai o Koya. E a kaya o Koya ena ivakatekivu ni Nona cakacaka ka a kaya tale o Koya ena kena itinitini. E a kaya vei ira na vakabauta ka a kaya vei ira na lomatarotaro tiko. A kaya vei ira na tamata kecega, se cava ga na nodra leqa yadua;

“Dou lako mai vei au koi kemudou vakayadua ga sa oca ka colata nai colacola bibi, ia kau na vakacegui kemudou.

“Vakataqara vei kemudou na noqu ivua ka vuli vei au, niu sa yalomalua ka yalomalumalumu: dou na kunea kina na vakacegu ni yalomudou.”²

Ena yalayala oqo ena ulu ni malanivosa o ya, “lako mai vei au,” sa ka bibi dina. Sai koya oqo na idola ki na sautu kei na vakacegu eda vakasaqara tiko. O koya gona ena gauna a voqataka kina na iVakabula sa tucaketale na Nona vunau ena valetabu vei ira na Nifai mai na Vuravura Vou, a kaya kina, “Ia sa kalougata ko ira sa yalomalumalumu ka lako mai vei au, ni sa nodra na matanitu vakalomalagi.”³

Ena imatai ni gauna erau a rogoca kina o Adriu kei Joni me vosa na Karisito, erau a vakauqeti sara ka muri Koya ni sa gole tani mai vei ira na tamata. Ena Nona vakila ni rau sa muri Koya tiko, e a vuki ko Jisu ka tarogi rau na tagane oqo, “A cava drau sa vakasaqara?” Erau a sauma yani, “Ko sa tiko mai vei?” E a sauma na Karisito, “Lako mai ka raica.” Ena siga ka tarava a raica tale o Koya e dua na tisaipeli, o Filipi, ka kaya vakamalua vua, “Muri au.”⁴ Ni oti vakalailai ga o ya e a laki kacivi Pita, kei ira na vo ni iApositolo ena yalo ni veikacivi vata ga o ya. “[Dou] muri au mai,”⁵ e a kaya o Koya.

Sa vaka e matata vinaka tu ni taucoko ni noda itavi kei na lalawa bibi ni noda bula vakayago e soqoni vata tu ena veimalanivosa e vica oqo mai na Nona sa vakayacora rawa tiko e vuravura na Nona veiqaravi na iVakabula. E sa kaya tiko vei keda o Koya, “Vakabauti Au, dou vuli vei Au, vakayacora ga na veika Au dau cakava. Io, ni ko ni lakova na vanua au sa lako kina,” e kaya o Koya, “eda na qai veivosakitaka na vanua ko ni lako tiko kina, kei na leqa ko ni sotava tiko kei na leqa sa tu vei kemuni. Kevaka ko ni na muri Au, Au na kauti kemuni tani mai na butobuto. Au na sauma na nomuni masu. Au na solia na vakacegu ki yalomuni.”

Kemuni na noqu itokani, au sega ni kila e dua tale na sala me da qaqa kina se me da taqomaki kina ena drakidrakita kei na leqaleqa ni bula oqo. Au sega ni kila e dua tale na sala me da colata kina na noda icolacola bibi se kunea rawa na veika e vakatoka o Jekope ena iVola i Momani o ya na “veivakalougatataki sa vakarautaki tu me nodra na vuku kei na yalomatua sa yalosavasava.”⁶

Ena rawa vakacava vua e dua me “lako mai vei Karisito” me vakayacora kina na veisureti tudei oqo? Sa vakatakila tu na ivolanikalou e vuqa na ivakaraitaki kei na vanua a caka kina. Ko ni sa kila vinaka tu na kena a vakayacori taumada. Na kena e rawarawa ka totolo duadua sai koya na kena e vu mai na gagadre dina ni yalo, oqo na itekitekivu taumada ni noda vakabauta eda kila tu. “Ia kevaka dou sa sega ni rawa ni vakabauta,” E kaya o Alama, “dou rogoca mada ga ka vakasamataka, … de mani rawa mo dou vakabauta e vica na tikina” ena iyalayala ni Kalou me na kunea rawa e dua na vuvale—sa itekitekivu vinaka o ya. ⁷ Nuitaka tikoga, ka mo vakabauta e vica na “tikina”–ka dau nuitaka tiko na veika e se bera tiko ni laurai ena noda bula, ia sa ka dina sara eda na vakalougatataki mai kina⁸—na imatai ni ikalawa o ya, me yavutaki donu vua na Turaga o Jisu Karisito, sa isevu ka na dau ivakavuvuli tudei ni Nona kosipeli tawamudu, ka imatai ni vakanadaku mai na lomaleqa.

iKarua, me da veisautaka na veika e rawa ni da veisautaka ka rairai tiki tiko ni leqa oqo. Sa kena ilutua me da veivutuni ga, sai koya beka ga o ya na vosa e nuitaki ka veivakayaloqaqataki ena vosa Vakarisito. Eda sa vakavinavinakataka na Tamada Vakalomalagi ni da sa vakadonui me da rawa ni veisau. Eda sa vakavinavinakataki Jisu ni da rawa ni veisau, ka sa rawa ga ni da cakava rawa na ka oqo ena Nodratou veivuke vakalou. Sa dina sara ni veika eda sa rawata rawa sa sega ni vu mai na noda cakacaka. Sa vakavuqa na kena rawati ga mai na nodra cakacaka tale eso se mai na ituvaki ga ni veika ni bula oqo. Ia me da veisautaka ga na veika e dodonu me da veisautaka, ka me da vosota na kena vo. Ena sala vakaoqo ena yaco kina na Veisorovaki ni noda iVakabula me sega ni vakataotaki rawa me vakataki keda, kei na noda malumalumu. Ena laki tomana e kea o Koya.

iKatolu, ena vuqa sara na sala eda saga me da vakatotomuri Koya, ena noda taura taumada na Yacana. Na yaca o ya sa vakatikori taumada ena veiyalayalati ena cakacaka tabu vakalotu ni veivakabulai ni kosipeli. Na veika oqo e tekivu ena papitaiso ka tini ena veiyalayalati ni valetabu, kei na veika e vuqa tale eso, me vakataka na vakayagataki ni sakaramede, ka sa umanaki tu ena noda bula me ikuri ni veivakalougatataki kei na veivakavotui. Ena nona vakavulici ira na nona tamata ena gauna o ya ka sa itukutuku eda cauraka tiko ena mataka nikua, e kaya kina o Nifai, “Mo dou na muria na Luvena, ena lomamudou taucoko, … ni sa lomamudou, … mo dou taura na yaca i Karisito, … Ia mo dou kitaka na veika au sa raica [ena] kitaka na nomudou Turaga ka nomudou iVakabula.”⁹

Ena tarava tiko na veivakavuvuli taumada oqo, na kena tadolavi vei keda e dua na isema veivakararamataki vua na Karisito ena vuqa sara na veimataqali sala dui rokaroka. O ya na masu kei na lolo kei na vakanananutaka na Nona inaki, na kena taleitaki na ivolanikalou, qaravi ira na tani. “Vukei ira sa malumalumu, vakaukauwataka na liga sa wadamele, … vakaukauwataka na duru sa malumalumu.”¹⁰ Me kena ilutua, na veilomani ena “loloma dina i Karisito sa uasivi sara,” kei na isolisoli o ya “e sega ni mudu,” sa “ubia na ka kecega, vakabauta na ka kecega, vakanuinuitaka na ka kecega, ka vosota na ka kecega.”¹¹ Mai na loloma vakaoqo, eda na qai raica kina ni noda siga ni bula ni veisalatu ki vua na iVakavuvuli kei na veigauna kece eda sasaga yani kina, se vakacava beka na kena rairai malumalumu Vua, eda sa qai raica kina ni sa saga tiko mai vakaukauwa o Koya me yacovi keda mai. Eda sa kalawa, sasaga, vakasaqaqara ka sega ni rawai rawa.¹²

Sa noqu gagadre nikua vei keda taucoko—e sega walega vei ira sa “yalomalumalumu” ia vei keda taucoko sara—me da dui bulataka vakaikeda yadua na ivakaraitaki ni Turaga. Ena so na gauna eda dau vakasaqara tu ga vakamamada na veika vakalomalagi, ni da laki vakadigova sara na veiparokaramu se itukutuku makawa se na veika ni tamata tale eso. Era ka bibi ia era sega ga ni bibi cake mai na veika eda sotava yadua, ena ituvaki dina vakatisaipeli, kei na kaukauwa e lako mai ena noda vakila taumada vei keda na cecere ni Nona veitarai.

Ko valuta tiko beka e dua na tevoro ni veivakagagai—ena tavako se waigaga se qito ilavo, se na mate veivakarusai ni iyaloyalo vakasisila? Sa leqa tiko beka na nomu vakamau se sa leqa tiko beka o luvemu? Ko veilecayaki tiko beka ena kemu ituvaki dina vakayago se sa yali beka na kemu irogorogo? O sotava tiko beka o iko se dua o lomana na mate veitauvi se lomaocaoca se mate? Se cava ga na ituvatuva tale eso o na taurivaka mo walia kina na leqaleqa oqo, sa imatai taumada mo lako mai ki na kosipeli i Karisito. Mo vakabauta tiko na iyalayala mai lomalagi. Ena vakasama o ya sa yaco kina na ivakadinadina i Alama me sa noqu ivakadinadina: “Au sa kila” e kaya o koya, “ko ira kecega sa vakabauta na Kalou sa dau vukei ira ko Koya ena nodra leqa, ka vakacegui ira mai na nodra rarawa.”¹³

Na vakararavi vakaoqo ki na ivakarau ni loloma veivueti ni Kalou sai koya sara ga na iusutu ni kosipeli e vakatavulica na Karisito. Au sa vakadinadinataka ni Veisorovaki ni Turaga ena sega walega ni na kauta tani mai vei keda na bibi ni noda ivalavala ca ia na noda icolacola talega ni loma rarawa kei na mosi, na noda loma bibi kei na lomaocaoca.¹⁴ Mai na kena ivakatekivu, na veivakabauti ena veivukei vakaoqo e dodonu me na solia vei keda e dua na kena inaki kei na sala me da vakatorocaketaki kina, e dua na isolisoli me da luvata laivi na noda icolacola bibi ka taura cake na noda sa vakabulai. Ena dau tiko ka levu sara na veika dredre ni bula oqo. Ia, o koya ga ena lako mai vua na Karisito, o koya sa kila na Domona, ka saga me cakava na veika a vakayacora o Koya, ena kunea na kaukauwa, me vaka na sere o ya,“sega ena [noda] kaukauwa.”¹⁵ Sa vakavotuya vei keda na iVakabula ni sa “ceuti [keda] ena qeteqete ni [Ligana].“¹⁶ Ena kena vakasamataki na isau ni Mate kei na Veisorovaki ena sega ni vakamacalataki rawa, au sa rawa ni yalataka vei kemuni oqo ni sa na sega ni vakanadakui keda o Koya. Ena Nona a kaya vei ira na yalo vakaloloma,” Dou lako mai vei au,” e tukuna tiko o Koya ni kila tu na sala ni bula eke kei na sala ki lomalagi. Sa kila vinaka tu o Koya baleta ni sa lakova oti mai. E kila vinaka tu o Koya baleta ni sai Koya ga na sala.

Kemuni na taciqu kei na ganequ, se cava ga na roka ni nomuni lomaleqa, yalovinaka kakua ni yalolailai ka yalovinaka mo kakua ni rawai ena rere. E dau luvuci au tu ga na gauna e a vakarau tiko ni biubiu o na luvena tagane me laki kaulotu ki Igiladi, e a mokota ni talaci Gordon na luvena cauravou o Brother Bryant S. Hinckley ka qai solia lo vua e dua na ivola e a vola wale tikoga kina e lima na vosa mai na ikalima ni wase ena Marika, “Kakua ni yalolailai,vakadinata ga.”¹⁷ Au nanuma sara na bogi o ya ena gauna sa vakatotolo yani kina na Turaga me laki vakabulai iratou na tisaipeli mai na nodratou lomarere, ka taubale yani e dela ni wai me yaco yani vei iratou, ka kaci yani, “Koi au ga; dou kakua ni rere.” E a vosa yani o Pita, “Na Turaga, kevaka sai kemuni, kacivi au meu bau yani vei kemuni e dela ni wai.” A sauma na Karisito vua ena kena ivakarau ena veigauna o ya, “Lako ga mai” a kaya o Koya. Vakasauri ga, me vaka na nona ivakarau, a lade yani o Pita e yasa ni waqa ki na wai voravora. Ena nona sa raica tiko yani na Turaga, sa cacaginagina na drau ni uluna ena cagi ka suasua na nona isulu ena wai, ia e a vinaka tu na veika kece—sa lako tiko o koya vua na Karisito. Ena gauna walega e a vakayavalati kina na nona vakabauta sa yaco mai na rere, ena gauna walega e rai tani kina mai vua na iVakavuvuli me raica na ua lelevu kei na boto ni waitui loaloa, sa qai tekivu kina me lutu dromu e wai. Ni sa rere dina a qai kaci yani, ”Na Turaga, ni vakabulai au.”

Ena yalo luluvu dina, na iVakavuvuli ni leqa kei na rere kecega, sai Koya na iwali ni lomaleqa kei na yalolailai kecega, e a dodoka yani na ligana ka taura na ligai koya na tisaipeli sa lutudromu tiko ka vunauci koya ena loloma, “O iko sa lailai na nomu vakabauta, o sa vakatitiqa ena vuku ni cava?”¹⁸

Kevaka o galili tiko, yalovinaka mo kila tiko ni sa rawa mo kune vakacegu. Kevaka o yalolailai, yalovinaka mo kila tiko ni sa rawa mo kunea na inuinui. Kevaka e malumalumu na yalomu, yalovinaka mo kila tiko ni sa rawa mo vaqaqacotaki. Kevaka e kavoro na yalomu, yalovinaka ka kila tiko ni sa rawa mo semati.

Oi keda taucoko, vakabibi o ira sa yalomalua, me da lako yani Vua ka me da vakataucokotaki, sa noqu masu ena yaca i Jisu Karisito na kai Nasareci, emeni.