Masu, Vakabauta kei na Matavuvale: na iKakalawa Kaukauwa ki na Marau Tawamudu

E a siga ka tarava na Siganisucu ena 1946 mai Santa Clara, e Utah. Me vaka ga niu se qai gonetagane lailai yabaki ciwa, au a kerei tinaqu ke rawa meu sa taura na noqu iloloma ni Siganisucu, o ya e dua na dakai titi kei na kena gasau, meu gole cake yani ka vakasasa ravete ena dua na delana e daku ni neitou vale. E sa yakavi sara toka ka sa sega ni vinakata o Tinaqu, ia mai na noqu cikecike tikoga e a vakatara meu lako ia meu na lesu mai ki vale ni bera ni buto.

Niu sa yacova yani na delana, au sa vakadreta sara e dua na gasau ni dakai titi ka tekivu meu yaqa yani vakamalua ena loma ni veivunikau boi bulabula kei na veikau tubua kau namaka tiko meu raica kina e dua na ravete me na kana voli ena veivanua buca karasi se bau drokadroka toka.

Au a kidacala ni sa ladevi au mai e dua na ravete tagane. Au a vakadretaka na gasau e a cawadru ena noqu vanalaka yani na ravete e a leve ka dro yani. E a cala na gasau o ya ka yali yani na ravete ki na loma ni veikau.

Au a lako yani ki na vanua kau nanuma ni na toka kina na gasau meu laki tomika. Au a kauta voli ga mai e lima na gasau kei na dakai titi kau sega kina ni vinakata me yali na kena oqo. Au vakaraica na vanua e dodonu me tiko kina na gasau oqo, ia e a yali kina. Au a vakasaqaqara ena vanua kece o ya, ia au a sega ga ni kunea rawa.

Sa laki dromu sara na siga ena muaira; kau sa kila ni sa na buto ena loma ga ni 30 na miniti mai oqo, kau sega ni vinakata meu lesu bera ki vale. Au vakasaqara tale na vanua e dodonu me tiko kina na gasau; kau vakacelea na veivunikau yadua, ia e a sega ga ni kune.

Sa voleka ni oti na gauna kau sa gadreva meu sa gole yani ki vale meu tiko e kea ni bera ni buto. Au sa nanuma sara meu sa masu ka kerea vua na Kalou me vukei au meu kunea na gasau. Au a qai tekiduru, bobo, ka masu vua na Tamaqu mai Lomalagi. Au a tukuna Vua niu sega ni vinakata meu vakayalia na noqu gasau vou oqo kau a kerea Vua me vakaraitaka vei au na vanua meu kunea kina.

Niu se tekiduru toka ga, au a raica sara, ni sa laurai toka mai ena vanua tubua donumaka na mataqu, au sa raica rawa na roka ni vuti ni gasau ka tabogo vakatikina toka ena taba ni kau. Au a qumia na gasau ka tekivu cici yani ki vale ka yaco yani ni se bera ni buto.

Au na sega ni guilecava vakadua na gauna talei o ya. E a sauma na noqu masu na Tamada Vakalomalagi. O ya na imatai ni gauna meu masu kina Vua me vukei au ka a vakayacora o Koya! Ena yakavi o ya au sa vulica kina meu dau vakabauta ka vakararavi vua na Tamaqu Vakalomalagi.

Ena gauna eda gadreva kina na veivuke, me vaka mada ga na gonetagane lailai yalowai ka lomaleqataka voli e dua na ka e sega ni bibi oqo, na Tamada Vakalomalagi ena rogoca na noda masu, ka solia vei keda na veidusimaki eda gadreva ka salavata kei na loloma.

O Jisu Karisito, na noda iVakabula, e kaya vei keda: “Ia mo yalomalumalumu; raica ena tubera na ligamu na Turaga na nomu Kalou, ka vakayacora na nomu kerekere.”¹

Mai na ivolanikalou e a vakasalataki keda kina o Jemesa:

“Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu vei ira kecega na tamata, a sa sega ni dauveivakadirideini; ka na soli ga vua.

“Ia me kerekere ena vakabauta, me kakua ni vakatitiqa.”²

E a vakavulica vei keda o Peresitedi James E. Faust: “Na masu vagumatua ena yalodina e sala rua ni veivosaki, ka na saga me kauta mai na Yalona me vaka na waidrodro ni veivakabulai me na veivuke ena veivakatovolei, dredre, mosi, kei na rarawa eda dau sotava kece sara.”³

Na masu sai koya e dua na ikakalawa kaukauwa ki na salatu ka muataki keda ki na bula tawamudu vata kei koya na Tamada Vakalomalagi.

Na vakabauta sa dua talega na ikakalawa kaukauwa ka bibi sara ki na noda vakabulai tawamudu!

E a kaya talega na iVakabula: “Ia na ka kecega sa dodonu dou sa kerea vei Tamaqu ena yacaqu, ka vakabauta ni dou na rawata, raica ena solia vei kemudou ko Koya.”⁴

Ena tolusagavulu na yabaki sa oti e a rogovaki kina e dua na italanoa dina ena dua na vanua ni vagalala mai Niu Siladi. Na vanua tadravi cagi ni Yanuyanu o Chatham e ciri koto ena Wasa Pasifika rauta ni 500 na maile ena ceva kei Christchurch. Era vakaitikotiko e kea e rauta ni 650 na tamata qaqa ka daucakacaka, era tu yawa yani ena gauna voravora ka galili ni gauna o ya; ka sa nona itavi e dua na vuniwai cauravou ka se qai lesi vou walega yani me na dauqaravi ira vakavuniwai.

O Shane, e dua na gonetagane yabaki walu, e a mavoa vakaca sara na uluna ena rauta ni 40 na maile mai na mua kadua sara ni yanuyanu oqo. E a takosotaki yani vakatotolo ena vanua lolobo ki na veibaravi ena idabedabe e muri ni dua na tolili makawa ki na valenibula lailai e va na kena loga. E a sa sega tu ni vakilai koya.

Ena kila vakacakacaka lailai, ka vica walega na nona iyaya ni veisele, e a sega ni vakarau tu na vuniwai cauravou oqo me qarava na mataqali leqa vakaoqo. Sa torosobu sara na ituvaki kei Shane. Sa laurai ni sa mavoa tiko na loma ni uluna ka na rawa ni vakaleqa na nona mona ke tasogo na dra. O vuniwai e se bera mada ni raica e dua na veisele ni mona, ia e a kila talega ni sa na dodonu me vakayacora ena gauna sara ga o ya na veisele—se me raica na nona mate na gonetagane lailai oqo.

Era a kacivi o ira me ra mai soli dra, ka me veidutaitaki na dra, ka me vakarautaki na ivakanunu ni yago. Na misini ni veiilovi e sa ca tu ka sa sega na kena yaga.

Sa tekivutaki na imatai ni veiqiriti ki Wellington ka sa raitayaloyalotaka tiko mai e dua na vuniwai na veisele ka me na dusimaka kina na vuniwai cauravou lomaleqa oqo me na vakayacora na veisele dredre oqo.

Sa tekivu me masu o tinai Shane. Sa masu talega o vuniwai, era sa masu na nasi, sa masu vakakina o wati vuniwai.

Sa tekivu me lesi na itavi ena gauna dredre vakaoqo. Sa veivakanunutaki o ovisa, sa ivukevuke ni vuniwai e dua na nasi, ka sa tekivu na veisele ena dua ga na Rarama ni cina ka sa buto mai na vanua.

Na imatai ni veisele, ka a vakayacori ena ririko, e a sega ni laurai kina e dua na dra ka sa gadrevi me sa sele na qavokavoka lailai nei Shane me laurai na vu ni mavoa. E vuqa tale na qiri ni veidusimaki kei na veivakadeitaki e a vakayacori vei vuniwai levu, ka sa vakayacori sara tikoga vakamatailalai na veika e tukuna tiko mai. Ni mai oti e ono na auwa ni lomatarotaro kei na oca, sa mai oti na veisele, sa mai cilumi laivi na dra ca, ka sa mai rawati na inaki. Sa sosomitaka na lomaleqa na vakacegu. Ka sa bogilevu sara.

E cauravou tama o vuniwai. E a vakasamataki iratou na nona matavuvale kei na veivakalougatataki eratou sa rawata. Sa vakavinavinakataka o koya na Nona loloma vakalou na Turaga ki na nona bula ka vakabibi ena veisobuti ni Dauveivakacegui ena loma ni 12 na auwa sa oti. Sa vakavinavinakataka o koya na veitokoni nei koya na kenadau ka a tiko e kea ia a sega ni laurai ka a wasea mai na Nona vuku cecere sega ni saumi ena gauna ni nona leqa.

Ena gauna bibi ni nuiqawaqawa vakaoqo, e a vakarautaka kina na Turaga na veidusimaki kei na vuku vua e dua na vuniwai vou me vakayacora e dua na cakamana ka vakabula e dua na gonetagane lailai, sa taleitaki sara e mata ni Turaga.

Na vuniwai cauravou o ya o Neil Hutchison, ka a masulaka na veivuke, ka tu vua na vakabauta me vakararavi vua na Turaga kei koya na vuniwai levu, ka rawa kina vua me vakayacora e dua na cakamana ena loma ni dua na veiqaravi dredre sara. E sa bisopi tiko oqo o koya ena Tabanalevu o East Coast Bays e Okaladi mai Niu Siladi.

E a vakaraitaka vei au o Bisopi Hutchison: “Au kalougata niu a sotavi Shane kei tamana ena imatai tale ni gauna, ena vica na yabaki sa oti mai Christchurch mai na siga o ya ena 1976. Sa daunilivaliva tiko ena nona kabani ga vakaikoya, ka sa sega tale ni vakila e dua na leqa mai na nona sele ena gauma o ya. Oqo e dua na turaga vinaka, kau sega ni tabonaka rawa na noqu vakasamataka tiko na mamare ni ilati ena maliwa ni bula oqo kei na kena ka tarava.”

“A sa kaya na Karisito: Kevaka dou sa vakabauti au, dou na kitaka na ka kece ga ena vukuqu.”⁵

E vakavulica vakaoqo o Elder Richard G. Scott: “Ko na tauca na vua ni vakabauta ni ko vakamuria na ivakavuvuli sa virikotora tu na Kalou ena kena inaki. E dua vei ira na ivakavuvuli oqori sai koya na nomu vakararavi vua na Kalou kei na Nona lewa me vakarautaka na veivukei ni gadrevi vakakina, se vakacava sara na roka ni bolebole o ya.”⁶

E a vakadinadinataka o Elder Robert D. Hales ni o Josefa Simici, ni a gonetagane yabaki 14, … ena nona vakabauta sega ni yavalati rawa e a vakamuria kina na ivakasala ni parofita o Jemesa me ‘kerea vua na Kalou.’ Me baleta na veikacivi vakaparofita vei Josefa, e a rairai vua na Kalou na Tamana kei na Luvena, o Jisu Karisito ka solia vua na ivakasala.”⁷

E vakayaloqaqataki keda vakaoqo o Peresitedi Thomas S. Monson: “Ni da dulaka cake vua na Turaga na noda masu yadudua kei na vakamatavuvale, me da vakayacora ena vakabauta ka vakararavi vua… . Kevaka e dua vei keda e lokuyara tiko ena vakamuri ni ivakasala me masu tikoga, sa sega tale ni dua na kena gauna donu sai koya sara ga oqo.”⁸

E sega ni dua na ka kevaka me dua mada ga na gonetagane lailai e kerea tiko e dua na ka, se dua na vuniwai sa tu e matana e dua na bolebole ni vakarusai ni bula: na Tamada Vakalomalagi ena rogoca na noda masu malumalumu, ka na solia vei keda na veivakacegui kei na veidusimaki eda vakasaqara tiko.

Na ikatolu ni ikakalawa kaukauwa ka tiki bibi ena salatu ka muataki keda me da yaco bula ki vua na Tamada Vakalomalagi sai koya na matavuvale .

E a vakavulica vei keda o Peresitedi Gordon B. Hinckley ni: “Matavuvale sa ka vakalou. E a bulia na Tamada Vakalomalagi. Sa yavutaki tu kina na veiwekani e cecere duadua vei ira kece. Ena qai yaco ga na inaki ni Turaga ena kena tauyavutaki.”⁹

E tomana tale vakaoqo o Peresitedi Hinckley: “Au veivakabauti ki na dua na matavuvale ka sa tiko kina e dua na tama ka dau wilika na nona itokani me dua na nona iyau levu duadua ka vakaraitaka vakakina; sa tiko kina e dua na marama vakawati ka na raica na watina me nona ikelekele ka ivakaukauwa, na nona tiko vinaka ka itataqomaki; ka ra tiko kina na gone era rai yani vei ta kei na ena veidokai kei na vakavinavinaka; kei ira na itubutubu era raici ira na luvedra me ra sa ka ni veivakalougatataki ka ra nanuma me dua na bolebole cecere ka dodonu ka totoka na nodra susugi cake ka karoni.”¹⁰

Au vakabauta vakaidina ni bula savasava ni matavuvale sa na yaco kina na noda loloma, yalodina, veidokai kei na noda veitokoni me dua na isasabai vakalou ka na taqomaki keda mai na gasau vidi ni tevoro. E na loma ni matavuvale, ka vakasinaiti tu ena loloma i Karisito, eda na qai kunea rawa kina na vakacegu, marau, kei na noda taqomaki mai na veika butobuto ni vuravura era vakavolivoliti keda tu.

Au sa vakadinadinataka ni matavuvale sa ikoya na yavu kei na sala me da na rawa ni vauci vata ka lesu vakamatavuvale, ki na nodrau itikotiko na noda itubutubu vakalomalagi; me da laki bula ka reki tawamudu kina.

Sa noqu masu vagumatua ni da na butuka yani na ikakalawa kaukauwa oqo ni masu, vakabauta, kei na noda matavuvale me da vakavakarau ka vukei keda me da lesu vua na Tamada Vakalomalagi ka rawata na bula tawamudu; ka me na vakayacori vakaidina sara kina na noda inaki ni mai tiko eke e vuravura, ena yaca i Jisu Karisito, emeni.