Tubu Cake Kivua na Turaga

Ena vica na vula sa oti, keitou a vodo tiko ena dua na motoka vata kei na rua erau sa kena marama qase daukaulotu yaloqaqa. E nodrau inaki me rau kunea na itikotiko ni dua na lewenilotu ka ra toka veivolekati ga ena loma ni dua na korolevu ena tokalau kei Amerika. Ena noqu a dabe vakatabu icegu toka e muri, na ivakarau ni igolegole ni motoka e vakarogolevutaka tikoga mai, “E gole cala, e gole cala!” Sega ni bau vakayalolailaitaki, o koya na daukaulotu e wilika tiko mai na mape ka vakatututaka tikoga mai na kena veibasogayaki ni veigaunisala ena loma ni korolevu me yacova sara ga ni sa laurai rawa na vale ni marama ka rau a yalataka tu vua me rau na mai vakavulica ena wilivola kei na volavola.

Ena nodrau ivakarau kei na itovo ni nodrau vakasama, oi rau na marama oqo erau vakavatukanataka sara ga e dua na ka ka levu cake sara mai na ivakaraitaki ni nodrau yabaki ni bula. Erau vakaraitaka na nodrau matua dina tu vakayalo.

O Ilamani, na parofita cecere ni iVola iMomani, e a vakatokayacataki rau na luvena tagane o Nifai kei Liai vei ira na nodratou kawa ka “rau sa tekivu me rau tubu cake kivua na Turaga.”¹ Eda gone se da qase, oi keda taucoko e dodonu me da vakayacora vakakina.

Na vakasama ni da tubu cake kivua na Turaga sa ikoya e dua na ka e veivakaukauwataki. E sega ni tautauvata kei na ivakarau ni tubu cake vakayago, ena sega ni rawa me da matua vakayalo me yacova sara ga ni da sa digitaka, me vaka na ka e kaya o Paula na iApositolo, me da “biuta tani na ka vagonegonea.”²

Na masumasu ena veisiga yadua kei na vulici ni ivolanikalou, vakamuri ni ivakaro kei na veiyalayalati ka a vakayacori ena papitaiso kei na valetabu era uto ni tubu cake kivua na Turaga. Eda vulica me da muria na Nona gaunisala ena noda vakayacora na veika me kauti keda vakavoleka kivua na Tamada Vakalomalagi kei na noda vakavulici ira na luveda kei ira tale eso me ra vakayacora vakakina. Me da “biuta tani na ka vagonegonea” ena noda sa digitaka me da yaco me da ivakarau Vakarisito ka qaravi ira na tani me vaka na Nona inaki vei keda.

Ena kena tuvai na Lotu ena itabagauna oqo, e a vakamacalataka na Turaga ni o ira “era papitaiso ka curu me lewe ni lotu” sai ira ka sa vakatikina, ni “e sa lomadra me ra taura na yaca i Jisu Karisito, ka qaravi Koya me yacova na ivakataotioti.”³ Na kena ibalebale o ya na kena vo “mo dou tudei sara, ka kakua ni yavala; mo dou uasivi cake ena cakacaka vinaka”⁴ ena veisiga yadua ni noda bula. Edaidai, me vaka ni sa tubu na Lotu ena 170 na matanitu e vuravura taucoko, na bolebole ni veiqaravi vei ira na tani,ena veigauna mada ga ni dredre sa gadrevi mai vei ira e lomadra dina tu me ra “tubu cake kivua na Turaga.” Na vakarabailevutaki ni Lotu oqo e sa kena ibalebale ni lewe vuqa vei keda eda na rawata na noda gauna donu me da qaravi ira era se qai curuvou.

Au a vakaitavi ena dua na ivakaraitaki ni mataqali veiqaravi tawa guilecavi ka gadrevi vakalevu mai vei ira e se qai ka vou vei ira na kosipeli ena noqu a veitokani vei rau na marama daukaulotu yalodina—vua e dua na marama yada volekata na yabaki 80 kei na dua tale sa ikoya e dua na marama itubutubu le dua ka sa sivia toka na yabaki 60—ka sega ni rawa me rau vagolei ki na veika e cala. Au a vakadinadinataka talega e dua tale na kena ivakaraitaki ena tabanalevu vata ga o ya.

Na tabanalevu oqo era okati kina na veimataqali yabaki ni bula, mai na veimataqali vanua, vata kei na duidui kece sara ni ituvaki vakailavo kei na kila vaka-Lotu. E vica vei ira oqori era veiwatini ka sa yawa sara na nodra kila vakalotu ka ra ogaoga ena vuli ka tu na nodra veituvatuva osooso kei na veimatavuvale gone.

Na ka au a raica sa ikoya e dua na tina gone ka veiqaravi tiko me vaka e dua na dauveisiko ka dauveituberi kivei ira na qai curuvou mai ena tabanalevu. Ena nona meimei tiko na turaga watina vei luvedrau, e a vakaraitaka e vu ni yalona taucoko na nona loloma ni veikauwaitaki vei rau na lewe rua na marama ni Aferika. Na veikauwaitaki oqo e okati kina na nodrau vakavulici na marama oqo ena sega walega ni ivakarau ni veiqaravi ena dua na vanua vou ia na nodrau veisau vakacava talega ki na nodrau vakabauta vou vakalotu.

Mai na nona ivakaraitaki e a vakavulici rau kina na marama ni Aferika oqo na nona gadreva na Turaga me da dau veiqaravi vakaikeda. Na vosa nei Paula na iApositolo e vakamacalataka vakamalua na veika au a raica ena ivakarau ni dauveisiko ka dauveituberi kivei ira na se qai curuvou oqo: “Ia keitou a yalovinaka ena kemudou maliwa, … ni keitou sa yalololoma sara vei kemudou, … keitou sa vinakata me keitou solia vei kemudou na itukutuku vinaka ni Kalou, ia ka sega ni o koya walega o ya, a neitou bula talega, ni keitou sa lomani kemudou vakalevu.”⁵ Ena veisiko yadua, na dauveituberi gone e kauta mai na yalomarau, e dua na liga malumu dauveivukei, kei na ivaqa ni veisiko.

Ena gauna vata ga o ya, era sa duavata na marama ena kena vakarautaki na ivaqa ni veisiko me laki wasei ena nodra loma ni veivale eso tale na marama. Na vakarautaki ni veika e gadrevi, na kena vakayacori na veiqaravi ena vanua e gadrevi kina, era sa yaco me ra lewe ni iSoqosoqo ni Veivukei yalodina ka vakaitavitaki ira ena veilaveti, veivakacegui ka veivakauqeti vakaira. Au vakatitiqataka niu na rogoca na malanivosa “ia me ra duavata sara ka veilomani”⁶ ka sega ni vakasamataki iratou na lewetolu na marama mamarau, dauloloma ka vakaraitaka na cava na ibalebale ni “tubu cake kivua na Turaga ena nodratou yalodina ena veiqaravi tiko kivei ira na tani.”

Ena yasa ni tudei, yalodina ena veiqaravi, ena dua tale na sala ni da digitaka kina me da tubu cake kivua na Turaga sa ikoya na noda yalogu me da “toso ki liu”⁷ ena vakabauta— kevaka mada ga eda sega ni kila vinaka na ka me da cakava. Vakasamataki Nifai ena nona a vakaroti me taya e dua na waqa. E a vakananuna lesu na ka e a yaco:

“A sa vosa vei au na Turaga ka kaya: Mo taya e dua na waqa, ia au na vakatakila vei iko na kena icakacaka.

“Au sa qai kaya: Oi kemuni na Turaga, evei meu na vakasaqara mai kina na kaukamea me vakawaicalataki meu bulia kina na iyaya ni cakacaka vakamatai?”⁸

E a sega ni taroga o Nifai se na cakacaka cava me caka. Ia, ena kena ituvaki oqo, e a vakadinadinataka, me vakataki ira eso tale, na rai e loma ka matua vakayalo oqo: “Ia eda sa kila kina ni sa kilikili me da muria na ivunau ni Kalou. Ia kevaka era sa muria na vunau ni Kalou ko ira na luve ni tamata, ena vakani ira ka vakaukauwataki ira ko Koya, ka vakarautaka talega na sala me ra rawata kina na ka sa vakarota vei ira.”⁹ Me vakalekalekataki, e a vakasaqara o Nifai e dua na kena iwali e vinaka cake mai na kena sogoti na gaunisala baleta ni a kila—e a kila—ni kena icakacaka oqo ena tubu cake kina kivua na Turaga, na Kalou e rawa ka na vukei koya me vakayacora na veivakaro yadua e ciqoma.

Ena tabanalevu vata ga e loma ni korolevu o ya, au a raica rawa kina e dua na mataqali vakabauta malumu, veikauwaitaki ka dauloloma ni dua na bisopi ka sega ni vakaotia na gauna ena veivakayalolailaitaki me baleta na gagadre vakaitamera ni kena sa tubu cake tikoga mai na kedra iwiliwili na curuvou. Ia, e a toso tikoga ki liu ena nona vakasoqoni ira vata tiko na lewe ni kuoramu ni Matabete i Eroni kei na Melikiseteki era sa matua vinaka tu me ra veivuke ena nodra vakarautaki ira na curuvou mai Aferika kei America vaka-Letina ki na nodra itavi vakamatabete. O ira na turaga vovou era vakavulici me ra taura vakacava na veitere ena kena veivotayaki tiko na sakaramede, na nodra tekiduru ka vakalougatataka ena vakarokoroko na madrai kei na wai. Ena nodra tuberi vakalevu, ka vakawasoma o ira na itabagone tagane, vakatovotovotaki vata kei ira na veivosa ni masu ni sakaramede me rawa ni ra na vakila ena yalodei na nodra veivotayaka tiko. Oti o ya, me ra duavata, o ira taucoko na turaga me ra veivosakitaka na kena vakatatabutaki na bibi ni cakacaka tabu vakalotu oqo ni matabete.

Eda a sa sotava taucoko na veika eda vakaraitaka ena noda yalodei me da qaravi ira na tani kei na noda yalogu me da toso ki liu ena vakabauta. Ena nona a qiri mai na turaga watiqu me tukuna mai ni sa veisau na neirau ilesilesi vakadaukaulotu ki na dua na itavi ni bolebole ki Aferika, au a sauma lesu yani, “E rawa meu cakava oqori. Au nanuma ni rawa meu cakava oqori.” Au a vakaraitaka ena noqu vosa na noqu guta meu toso ki liu ena vakabauta—ka nuitaka vakadua tale na veivuke ni Turaga. Au a vakaraitaka na noqu yalogu meu “tubu cake kivua na Turaga.”

Me vaka ga na bisopi yalodina o ya, oi rau na marama yalodina oqori, kau na vakadinadinataka, ena toso tikoga ni ilakolako oqo ena tubu cake kivua na Turaga, eda na kerei me da cakava taucoko na veika eda rawa ni vakayacora, ena so na gauna, ena levu cake sara mai na noda kila se me da cakava vakacava. Na veibolebole e rawa me veivakatovolei ka vakavuqa na kena sega ni kilai na vuna. Ia na vuki cala ena dau yaco ka tu ga, sega ni na levei rawa, o ira era tovolea me ra Vakarisito vakaidina—ka tudei na nodra na veiqaravi kivei ira na tani—ka ra yalogu me ra toso tikoga ki liu ena vakabauta—e rawa me voqa lesu mai na vakaitamera ni dina vakayalo e a wasea o Nifai ena kena tomani tikoga na nona taya na waqa: “Koi au … au sa dau … masu vua na Turaga; a sa vakatakila vei au na Turaga na veika lelevu.”¹⁰ Na kena vakaraitaki “na veika lelevu”—sa dua dina na isolisoli, sa dua dina na veivakalougatataki kivei ira era digitaka me ra “tubu cake kivua na Turaga.” Me noda na bula malumalumu, dauloloma, tudei tu ena matua vakayalo, sa noqu masu ena yalomalumalumu, ena yaca i Jisu Karisito, emeni.