Na Gadrevi ni Veilomani e Cecere Sara

E dau dredre toka na vakamuri Baraca Monson. E turaga mamarau ka tamata dau cakacaka dina.

Vinaka vakalevu, kemuni na veitacini, ena vuku ni nomuni vakabauta kei na masu. Au sa vakamuduo kina.

Ena gauna sa qase kina e dua na tamata sa na malua sara na nona ivakarau. Au sa dau vakasamataka vakawasoma na ka oqo ena gauna oqo.

Au dau vakasamataka se cava mada e sa rui levu kina na veicacati ena vuravura oqo. Eda sa mai vakaitavi tiko ena veivaluvaluti rerevaki ka yali kina na bula ni tamata ka mavoa sara vakaca e lewevuqa. Ni kauti mai vakavoleka ki na vuvale sa levu kina na dokadoka, veivakasaurarataki, kei na veivosa vakacacataki; o ira na tama era cudru katakata ena veika lalai, ka sega na betena ka vakavuna me ra tagi na marama tina ka ra rere na gone.

Na veicacati vakakawa tamata e se kaukauwa cake tikoga. E tukuni vei au ni ena keda maliwa sara ga oqo sa tiko kina na ka oqo. Au sega ni kila rawa e yaco vakacava tiko. E vaka vei au ni da marautaka kece sara na ivakatakila a soli vei Peresitedi Kimball ena 1978. Au a tiko e kea ena valetabu ena gauna a yaco kina na veika o ya. Au sega tale ni vakabekataka ena noqu vakasama se ena nodra vakasama na noqu itokani ni veika sa vakatakilai mai o ya sa nanuma ka lewa ni Turaga.

Ia oqo sa tukuni vei au ni veirukaki vakamatatamata kei na veivakacacani torosobu sa rogo tiko ena keda maliwa ena so na gauna. Meu vakadeitaka vei kemuni ni sega ni rawa vua e dua na tamata e veivakacacani tiko vakaoqo me na rawa ni vakatokai koya me tisaipeli dina i Karisito. Se na rawa me vakatokai koya ni sa muria tiko na ivakavuvuli ni Lotu i Karisito. Ena rawa vakacava vua e dua e lewe tiko ni Matabete i Melekiseteki me boletaka tiko ni sa tiko vua na kaukauwa ni matabete mai vei koya e dua tale e buladodonu tiko ka duatani na roka ni yagona me sega ni dua na ka o koya?

Ena gauna kece ni noqu veiqaravi vakaleweni Mataveiliutaki Taumada au sa raica ka vosa talega ena veivakaduiduitaki sa tiko ena noda veimaliwai vakamatatamata. Sa baleti keda kece sara, ka sa dodonu me da vakavinakataka na duidui oqo.

Me da kila vakavinaka tiko ni o keda yadua eda sa luvena tagane se yalewa na Tamada mai Lomalagi o Koya sa lomani keda kece sara na Luvena.

Kemuni na taciqu, e sega ni dua na yavu ni veivakacacani vakamatatamata ena keda maliwa na leweni matabete ena Lotu oqo. Vei koya ga sa rogoca tiko na domoqu ena gauna oqo e dau vakayacora tiko na veika oqo, mo lako yani vua na Turaga ka kerea na Nona veivosoti ka mo kakua tale ni vakayacora na ka oqo.

Au sa dau ciqoma tiko eso na ivola ena veigauna eso ka vakatututaki tiko mai kina na ka era vinakata me vunautaki yani ena gauna ni koniferedi. E dua na ivola a yaco mai ena siga o ya. E volavola mai kina e dua na marama ka kaya ni a mai tini na imatai ni nona vakamau ena veisere. E a qai sotava o koya e dua na turaga e vaka me turaga vinaka ka dau veikauwataki toka. Ia, e a qai raica ni oti ga na nodrau vakamau sa vaka me leqa na nona bula vakailavo; sa lailai mai na nona ilavo, ia e sa sega ni vinakata me laki cakacaka. Sa qai yaco me sa vakaukauwataki me laki cakacaka ga na marama oqo me ratou bula kina na matavuvale.

Sa toso tiko na yabaki e se bera tikoga ni cakacaka o tagane. E a qai talanoataka o koya e rua tale na tagane erau cakava tale tikoga na ivakarau oqo, o ya ni rau besetaka na laki cakacaka ka rau sa mani laki cakacaka kina na watidrau ena siga taucoko me ra qaravi kina na vuvale.

E kaya o Paula vei Timoci: “Ia kevaka e dua sa sega ni vakaraici ira na kai nona, ka vakalevu sara ko ira na nona lewe ni vale, sa cakitaka na vakabauta, ka sa uasivi cake ena ca, sa uasivi sobu ko koya sa sega ni lotu” (1 Timoci 5:8). Oqori e dua na vosa kaukauwa dina.

E kaya na Turaga ena ivakatakila ena gauna oqo:

“Sa nodra itavi na tagane me ra qaravi ira na watidra me yacova ni ra sa toki yani… .

“Raica sa nodra itavi na itubutubu ni gone me ra qaravi ira na luvedra, me yacova ni ra sa rawati ira” (V&V 83:2, 4).

Ni se qai tauyavu walega na Lotu oqo sa ra dau okati tu na tagane vakawati me ra dau qarava na nodra matavuvale. Au sa vakabauta ni sega ni dua na tagane me na vakatokai me lewenilotu vinaka ke sega ni vinakata me cakacaka me qaravi iratou kina na nona matavuvale, kevaka e rawa ni cakacaka.

Au sa tukuna oti toka na noqu sega ni kila na vuna e sa rui levu kina na veisaqasaqa kei na veicacati kei na yaloca ena vuravura oqo. Io au sa kila tu ni veika kece oqo sa cakacaka nei koya na meca. E cakacaka sara ga vei keda yadudua. E dau vakarusai ira na tamata qaqa. Mai na gauna a tauyavutaki kina na Lotu oqo sa vakayacora tiko mai kina o koya na ka oqo. E kaya vakaoqo o Peresitedi Woodruff ni:

“Au a raici Oliver Cowdery ni vaka me dau sakure kina na vuravura e ruku ni yavana. Au sega ni se bau rogoca e dua na tamata me wasea e dua na ivakadinadina kaukauwa cake mai vei koya ena gauna e tiko kina vua na veivakauqeti ni Yalo Tabu. Ia ena gauna e biuta kina na matanitu ni Kalou, ena gauna vata oqori e kasura kina na nona kaukauwa… . E a kau tani mai vua na nona kaukauwa, me vakataki Samisoni e vurei Dilaila. E kau tani mai vua na kaukauwa kei na ivakadinadina a dau rekitaka voli, ka sega ni qai rawata tale vakadua na kena taucoko ena bula oqo, e dina ni a qai mate ni sa [lewena tale tu] na Lotu” (Nodra iVakavuvuli na Peresitedi ni Lotu: Wilford Woodruff, tt. 116–117).

Au sa vakadonui meu talanoataka vei kemuni e dua na cauravou lailai ka a susugi cake ena neimani itikotiko raraba. E a sega ni lewenilotu o koya. E lewenilotu kaukauwa vata kei rau na nona itubutubu ena dua tale na Lotu.

E kaya o koya ni se tubu cake tiko a dau vakamaduataki koya eso na nona itokani YDE, ka ra vakayalolailaitaki koya ka dau vakalialiai koya.

A yaco sara me cata dina na Lotu oqo kei ira na lewena. E sega ni raica e dua na ka vinaka mai vei ira.

E a mani qai sega ni cakacaka o tamana ka me sa na toki yani. Ena itikotiko vou ni sa yabaki 17 o koya e a laki curu rawa sara ki na dua na koronivuli torocake. E kea ena imatai ni gauna ena nona bula e vakila na nodra veikauwaitaki na itokani, e dua vei ira o Richard ka kerei koya me lewena na kalavo ka kena peresitedi o koya. E kaya o koya, “Oqo na imatai ni gauna ena noqu bula me dua e kauwaitaki au mai. Au sega ni kila na cava meu cakava, ia au vakavinavinakataka niu sa lewena… . Oqo na ka au taleitaka, niu sa kila na vakaitokani. Au a masulaka tiko mai ena noqu bula taucoko meu vakaitokani. Ia oqo ni oti e 17 na yabaki na noqu wawa, sa sauma mai na Kalou na noqu masu.”

Ni sa yabaki 19 sa yaco sara me rau laki valelaca vata kei Richard ena gauna ni nodrau cakacaka ena vula i katakata. E a raica sara o koya ni dau wilika tiko ena veibogi o Richard e dua na ivola. E a taroga se ivola cava e wilika tiko. E a tukuni vua ni wilika tiko na iVola i Momani. E tomana o koya, “Au a veisautaka na italanoa ka moce sara. Oqo sara ga na ivola ka a vakacacana na noqu bula niu se gone. Au saga vagumatua meu guilecava, ia sa sivi e dua na macawa kau sega tiko ni moce rawa. Na cava e wilika tiko kina o koya ena veibogi? Au sa sega ni vosota rawa na vakatataro tiko vakaoqo ni noqu vakasama. Ena dua na bogi au a qai tarogi koya ena ka bibi cava e tiko ena ivola o ya. Na cava e tiko kina? E a qai solia vei au na ivola. Au a tukuna sara niu sega vakadua ni vinakata meu tara na ivola o ya. Au vinakata ga meu kila se cava e volai tiko kina. E a wiliwili tale mai na vanua a cegu toka kina. E a wiliki Jisu sara mai, kei na Nona rairai ki na vanua o Amerika. Au a kurabui dina. Au nanuma ga ni o ira na Momani era sega ni vakabauti Jisu.”

E a kerei koya o Richard me lagasere vata kei koya ena koniferedi ni iteki. Sa yaco mai na siga me sa tekivu kina na koniferedi. “E a vunau kina o Elder Coleman mai na imatai ni Kuoramu ni Vitusagavulu. Au a kila talega kina ni o koya [e a dua a saumaki mai]. Ni sa oti e a dreti au sara o Richard meu laki vosa vua. Au sa mani vakadonuya kau toso yani vei Elder Coleman ka a vuki ka dredre mai. Au a vakamacalataki au ka tukuna niu sega ni lewenilotu kau lako ga mai meu lagasere ena matasere. E dredre mai ka kaya ni marautaka na noqu lako mai ka kaya ni rogo vinaka na sere. Au a tarogi koya se a kila vakacava ni dina na Lotu. E a tukuna ga vakalekaleka vei au na nona ivakadinadina ka taroga kevaka au sa wilika na iVola i Momani. Au kaya ni sega. E a qai yalataka vei au ni imatai ga ni gauna au na wilika kina, au na vakila na Yalo Tabu.”

Ena dua tale na gauna erau a lako tiko o cauravou oqo kei nona itokani ki na dua na vanua. E a solia vua o Richard e dua na iVola i Momani me wilika e cake. E a cakava sara ka vakasauri ga sa vakauqeti koya na Yalo Tabu.

Sa toso na gauna ka sa qaqaco mai na nona vakabauta. Sa mani vakadonuya me sa papitaiso. Erau a saqati koya na nona itubutubu, ia a mani lako ga ka papitaiso ka lewena na Lotu oqo.

Sa kaukauwa cake tikoga na nona ivakadinadina. Ena vica walega na macawa sa oti erau a vakamau ena bula oqo ka tawamudu kei na dua na goneyalewa totoka Yalododonu Edaidai ena Valetabu e Salt Lake. E a vakayacora na nodrau vauci vata o Elder Gary J. Coleman.

Sa mai cava e kea na italanoa, ia e vuqa sara na ka talei e tiko ena italanoa o ya. E dua, o ya na ivakarau ca era a cakava vua na nona itokani gone Momani.

E tarava, na ivakarau ni nona kauwaitaki koya na nona itokani vou o Richard. Sa kena veibasai sara ga ki na kena a sotava mai liu. E a laki kauti koya me saumaki mai ka yaco sara me papitaiso ena gauna e sotava tu kina na veilecayaki.

Na cakamana vakaoqo e rawa ni dau yaco ka na yaco ga kevaka e tiko kina na lomavinaka, veidokai, kei na loloma. Na cava beka eda sa dau lomaca ka yaloca tu ga kina vei ira tale eso? Na cava beka eda sega kina ni rawa ni veimaliwai vinaka kei ira era tiko vakavolivoliti keda? Na cava beka e sa levu tikoga kina na veivakararawataki kei na veicacati? Oqo e sega ni tiki ni kosipeli i Jisu Karisito.

Eda dau butusevata kece sara ena so na gauna. Eda dau cakacala taucoko. Meu tuvanaka mada na vosa i Jisu ena masu ni Turaga: “Ni vosota na neimami ivalavala ca me vaka keimami sa vosota na nodra ivalavala ca vei keimami” (raica na Maciu 6:12; iVakadewa nei Josefa Simici, Maciu 6:13).

O William W. Phelps, ka dau veimaliwai sara vakavoleka kei Parofita Josefa e a lawakitaki koya ena 1838, ka vakavuna me laki vesuki tu mai Missouri o Josefa. Ena nona sa liaca rawa na veika butobuto a vakayacora, a volavola vua na parofita ka kerea me vosoti. E a qai vola mai vakalailai vakaoqo na parofita:

“Sa dina sara, ni sa mai yaco na rarawa ena vuku ga ni veika ko ni a cakava o ya—na bilo ni cudru, sa vakasinaiti me ra gunuva na tamata, sa vakasinaiti me vuabale ni ko sa vorati keitou.

“Ia, sa gunuvi na bilo, sa yaco na lewa ni Kalou, ia keitou se bula tikoga, ka keitou sa vakavinavinakataka kina na Turaga… .

“Ena vakabauti ni nomu vakatutusa, ka vakadinati ni nomu veivutuni, au sa na marau tale meu na dodoliga yani ena veiyaloni, ka rekitaka na lesu mai nei koya sa yali.

“Na nomu ivola a wiliki vei ira na Yalododonu ena Sigatabu sa oti, ka a kerei kina na nodra nanuma, ka sa Vakadeitaki kina, me sa vakaduavatataki tale o W. W. Phelps.

“‘Raica oqo, taciqu vinaka, sa cava na ivalu,

“‘Daru veitokani mai liu, me tomani tale na veitokani’” (Josefa Simici, iVakavuvuli nei Parofita Josefa Simici, digitaka ka vakarautaka o Joseph Fielding Smith, [1976], 165–66).

Kemuni na taciqu, oqo na yalo, e vakamacalataka na Parofita, e dodonu me da susuga cake ena noda bula. Ena sega ni rawa me da na vakawaletaka. Eda sa lewena tiko na Lotu ni noda Turaga. Sa tiko na noda ilesilesi Vua, ka vakakina vei keda kei ira na tani. Na vuravura makawa ka ivalavala ca oqo e gadrevi ira tu na tamata qaqa, tamata dodonu, na tamata vakabauta ka ivalavala dodonu, na tamata ena rawa me veivosoti ka guilecava.

Ia oqo, au sa mai tinia kau sa marautaka niu sa kila ni ivakaraitaki kei na italanoa au sa tukuna oqo e sega ni tukuna tiko na nodra ivakarau kei na nodra itovo e dua na wiliwili levu ni noda tamata. Au sa raica tu ena veivanua kecega na ivakaraitaki totoka ni veilomani kei na veikauwaitaki me baleti ira na tani.

Ena macawa sa oti e a vutucoqa na olo oqo vei ira na goneyalewa totoka era saga tiko me ra bulataka na kosipeli. Era dau veilomani vakaira. Era vakasaqara me ra veivakaukauwataki. Era sa isakisaki ni nodra itubutubu kei na vuvale era tadu mai kina. Era sa yacova tiko yani na bula vakamarama, ka ra na kauta voli ena nodra bula na veika talei ka sa uqeti ira tiko ena gauna oqo.

Ni vakasamataka mada na veika vinaka lelevu era sa cakava na marama ni iSoqosoqo ni Veivukei. Na mawe ni nodra cakacaka vinaka e teteva yani na veiyasai vuravura. Era dodoliga yani na marama ka solia na nodra gauna, ena loloma veikauwaitaki, kei na nodra iyau me ra vukei kina na tauvimate kei na dravudravua.

Ni vakasamataka mada na parokaramu ni welefea ena nodra veivuke na bole ena vakau ni kakana, isulu, kei na veika tale eso kivei ira era vakaleqai tu.

Ni vakasamataka mada na rabailevu ni noda veivuke vakamatatamata ena kena curuma yani na taudaku ni lewe ni Lotu ki na veimatanitu dravudravua e vuravura. Na veiravuti ni mate na misila sa vakawabokotaki ena so na vanua mai na nona veivuke na Lotu oqo.

Mo ni raica mada na cakacaka ni iLavo Vure ni Vuli ena kena vakabulai ira e udolu mai na ivesu ni dravudravua ki na rarama ni vuku kei na torocake.

Sa vakakina ena noqu rawa ni vakavotuya vei kemuni na nodra gugumatua vakaitamera o ira na tamata vinaka ni Lotu oqo ena nodra vakalougatataka na nodra bula eso na tamata, kei na dodoliga yani ki na veiyasai vuravura vei ira na dravudravua kei na vakaleqai.

Sa sega ni tini rawa na veika vinaka eda na dau cakava, kei na noda veivakauqeti vei ira eso. Me da kakua ni vakayacora na veika vakatani se na veika torosobu. Me da masulaka na veivakaukauwataki, me da masulaka na veivaqaqacotaki kei na gagadre ni vukei ira na tani. Me da vakaudreva yani na rarama ni kosipeli ena veigauna kece kei na veivanua kecega, ka me na cila mai vei keda na Yalotabu ni Dauveivueti.

Ena vosa ni Turaga vei Josua: kemuni na veitacini “mo kaukauwa ka qaqa; mo kakua ni rere, se yalolailai: ni sa tiko vata kei iko ko Jiova na nomu Kalou ena veiyasana kecega ko sa lako kina” (Josua 1:9).

Ena yaca i Jisu Karisito, emeni.