Susugi ni Vakamau

Na imatai ni ituvatuva, o ya mo ni kila vakavinaka sara na yavu vakaivunau ni vakamau. Sa vakaraitaka na Turaga ni vakamau sa nodrau vauci vata vakalawa e dua na tagane kei na yalewa: “Sa vakarota na Kalou me vakawati na tamata kecega.

“Ia na tamata yadua sa kilikili me dua ga na watina; a rau na yaco me le duabau ga; ia sai koya oqo na inaki sa buli kina na vuravura.”⁴

Na veivakasama vakavuravura me na vakamacalataki vakatani kina na vakamau ena yaco kina me vakarusa na ituvatuva ni vakamau. Na veicakacaka vakaoqori e veisaqasaqa kei na ituvatuva ni Kalou.

Sai Koya ga ka a kaya: “E na vuku ni ka oqo ena biuti tamana kei na tinana o tagane, ka kabita na watina, a rau na lewedua.”⁵

E vakadeitaka tale na ivolanikalou ni “sa [sega ni] tu duadua ga na tagane ka me tu tani na yalewa, se tu duadua ga na yalewa ka tu tani na tagane ena Turaga.”⁶

Na vakamau sai koya na volau ni vakarau ni bula, na mataniwai ni dodonu, kei na yavu ni bula vakalou tawamudu. Na vakamau sa ilesilesi vakalou me dua na veiyalayalati tawamudu ka tawa cava.⁷ Sa na qai vakalou na vakamau ni sa karoni ka rokovi ena savasava. Na duavata oqori e sega walega ni baleti rau o tagane kei yalewa; sa umani tu kina na duavata ni Kalou.⁸ Na tagane kei yalewa vakawati “me rau dau veilomani ka veikauwaitaki vakaveiwatini.”⁹ O ira na gone era sucu mai ena duavata vakaveiwatini oqo era sa “nona isolisoli na Kalou”¹⁰ Na vakamau sai koya e dua na sena kubu vou ni dua na bula vakamatavuvale; oi rau na itubutubu sa kena senikau. Ka sa na yaco me totoka cake sara ni vakavolivoliti mai vei ira na makubudrau na ivutu senikau o ya. Sa rawa ki na matavuvale me tawamudu me vaka sara ga na matanitu ni Kalou.¹¹

Na vakamau sa ikoya e dua na vunau ka dua talega na ivakavuvuli ni bula vakalou.¹² Me vaka ni sa lesia na Kalou, sa ka vakalou, na veivinakati veivolekati vakayago ni veiloloma ka vakamautaki. Ia sa dau vakavuqa sara na kena dau vakacacani na isolisoli vakalou oqo. Kevaka erau dau vakatara na veiwatini na veivosa vakasisila se iyaloyalo ca me vakacacana na nodrau veivinakati, erau sa vakararawataki koya tiko na nodrau Dauniveibuli ka rau sa vakalolovirataka ka vakarusa tale tikoga na nodrau isolisoli vakalou. Na marau dina ena lako ga mai ena savasava ni tamata yadua.¹³ E vakarota vakaoqo na ivolanikalou: “Mo dou savasava.”¹⁴ Na vakamau me sa dua na veiyalayalati tudei me tuberi ira cake yani na tagane kei na yalewa vakawati me ra bula vakalou ena lagilagi vakasilesitieli.

Na vakamau e a tuvanaka na Turaga me na lako sivita yani na mate vakayago. Na Nona ituvatuva sa yaco kina me tawamudu na matavuvale ena matanitu ni Kalou. Na Nona ituvatuva sa vakarautaki kina na valetabu kei na madigi me da qaravi ira kina na bula kei na mate. Ni sa vauci e kea e dua na vakamau ena cokonaki rau e kea na tagane kei na yalewa vakawati ki na ituvatuva lagilagi ni duavata ka sa ka yaga sara ki na kena vinaka taucoko na cakacaka ni Kalou.¹⁵

Na ivakavuvuli me baleta na vakamau sa okati kina na digidigi kei na dodonu yadudua. Oi keda kece sara eda sa vauci tu ena noda dui digidigi. O ira na veiwatini era sa vakalougatataki me ra vakaluveni era sa vauci tu vua na Kalou ena nodra tuberi ira na luvedra.

Niu dau veivosaki kei ira na iliuliu ni matabete, au dau tarogi ira ena ilesilesi era dauvakaliuca. Era sa qai dau tukuna mai na nodra dui ilesilesi bibi ena Lotu era sa kacivi kina. E lailai sara era nanuma na nodra ilesilesi ena vuvale. Ia na ilesilesi vakamatabete, idola, veikacivi, kei na kuoramu sa kena inaki me vakalougatataka na matavuvale.¹⁶ Sa vakalesui mai na lewa ni matabete me rawa ni ra vauci tawamudu kina na matavuvale. O koya gona kemuni na veitacini sa ulu ni nomuni itavi vakamatabete mo ni susuga cake na nomuni vakamau—mo ni qarava, doka, rokova, ka lomani watimuni. Mo ni sa ka ni veivakalougatataki vua kei iratou na gone.

Ena kena sa tugani tiko na veivakasama vakaivunau oqo, me da raica mada na ikarua ni ituvatuva—oqo na itovo sara ga ena vaqaqacotaka e dua na vakamau. Au na vakaraitaka eke na ivakaraitaki ni vakatutu ka sureti ira na veiwatini yadua me ra vakasamataka ga vakaira ka me ra bulataka ena veika era sotava vakaira.

Na noqu vakatutu e tolu na vosa cakacakataki: mo vakavinavinaka, mo dau veivosaki, ka mo vakanananu vata.

Mo dau vakavinavinaka—o ya mo cavuta “Au lomani iko” kei na “vinaka vakalevu”—e sega ni dredre. Ia na vakaraitaki ni vakavinavinaka ni loloma kei na vakamuduo oqo ena cakamana vakalevu sara mai na kena e dua walega na vakasama vinaka se veivuke. Era sa ivakatakilakila ni ivakarau talei. Ni ra vakasaqara tiko na veiwatini na veika vinaka mai vua na kena ikarua ka dau vakavinavinaka vei rau yadua, na tagane kei na yalewa vakawati erau na saga me rau sa vaka na tamata sa dau cavuti tiko ena vakavinavinaka o ya.

iKarua ni vakatutu—mo dau veivosaki vakalevu kei watimu—ni sa ka bibi talega oqo. Na veivosaki e vinaka e okati kina na taurivaki ni dua na gauna mo drau navunavuci vata. Sa gadrevi vei ira na vakawati me ra taura e dua na gauna vakataki ira me ra veirairaici, veivosaki, ka dui veirogorogoci vinaka sara. Sa gadrevi me rau duabau—ka veivukei vakatautauvata. Sa dodonu me rau susuga cake na nodrau veivinakati vakayago ka vakayalo. E dodonu me rau saga me rau veivakauqeti ka veivakatakatataki vakairau. Na duabau ni bula vakawati ena tokoni cake ni sa matata tiko na inaki. Na veivosaki e vinaka ena tarai cake talega ena masumasu. Na kena dau masulaki na cakacaka vinaka nei watimu (se gagadre) ena susuga cake na bula vakamau.

Na ikatolu ni noqu vakatutu o ya na vakanananu vata. E titobu toka na ibalebale ni vosa oqo. E vakayavutaki mai ena vosa vaka- Itali: con-, kena ibalebale “vata,” kei na-templum, sa kena ibalebale “e dua na maliwa se vanua ni vakasama”. Sai koya na yavu e a lako mai kina vosa na temple. Kevaka era na dau vakanananu vata na veiwatini—ena loma ni valetabu—era na dau nanumi tikoga ka maroroi na veiyalayalati tabu. Na veiqaravi wasoma ena valetabu kei na vulici ni ivolanikalou vakamatavuvale ena vakabulabulataka na vakamau ka vaqaqacotaka na vakabauta ena loma ni vuvale. Na vakanananu ena yaco kina me taleitaka ka lomavata (se yalovata) kei na dua tale na tamata vata kei na Turaga. Na vakanananu ena susuga cake na bula vakamau kei na matanitu ni Kalou. E kaya na iVakavuvuli, “Mo kakua ni vakasaqara na veika ni vuravura oqo ia mo vakasaqara taumada na matanitu ni Kalou, mo tauyavutaka kina na matanitu ni Kalou, ka taracake na nona ivalavala dodonu, ena qai soli na veika kecega oqo me kena ikuri.”¹⁷

Au sa sureti kemuni yadua na tamata vakawati mo ni taurivaka na vakatutu oqo mo ni susuga cake kina na nomuni veimaliwai. Me na vakatekivu ena gagadre vakaidina. Mo ni vakadeitaka rawa na ivakarau e gadrevi me vakalougatataki kina na nomuni duavata vakayalo kei na kena inaki. Me kena iusutu, mo ni kakua ni kocokoco! Mo ni ivurevure ni yalo e veinanumi kei na veivukei. Marautaka ka dau vakananuma vata na veika oqo ni sa isolisoli talei mai lomalagi.

E kaya o Peresitedi Harold B. Lee “ni cakacaka ni Turaga e bibi duadua eda na dau cakava tikoga sai koya na veika umanaki tu ena loma ni noda vuvale.”¹⁸ Me vaka a vakaraitaka o Peresitedi David O. McKay ni, “Sega tale ni dua na rawa ka ena sosomitaka rawa na leqa ni matavuvale.”¹⁹

Ena gauna ko ni sa raica rawa kina na veiwatini na ituvatuva vakalou ena nomuni duavata— ena gauna o sa vakila dina kina ni sa mai vakaduavatataki kemudrau na Kalou—ena vakarabailevutaki na nomu rai ka na vakatorocaketaki na nomu kila. Na yalo vakaoqori era sa vakamatatataki ena dua na sere kau dau taleitaka tu ga:

Sa noqu masu me na yaco me susugi cake na bula vakamau yadua, ena yaca i Jisu Karisito, emeni.