Raica na iTinitini mai na iTekivu

Kemuni na taciqu lomani, sa dua na ka talei ka veivakayalomalumalumutaki na mai tiko vata kei kemuni ena soqoni ni vuravura raraba oqo ni matabete. Sa ka dokai meu okati vata kei kemuni. Au rokovi kemuni ka tu vei kemuni na dodonu mo ni vakaitavi ena yaca ni Kalou ka qarava na veicakacaka tabu vakalotu ka ra ivurevure bibi ni igu kei na kaukauwa tawamudu me baleta na nodra tiko vinaka na kawatamata.

Au na vosa nikua vei kemuni na cauravou vakasakiti ko ni sa vakavakarau tiko mo ni vakayacora na veisau e vuravura—o kemuni o ni sa curuma na Matabete i Eroni kei kemuni ko ni sa ciqoma oti na bubului kei na veiyalayalati tabu ni Matabete i Melikiseteki. Na matabete ko ni taura tu e dua na kaukauwa vakasakiti ni vinaka. O ni bula ena dua na gauna cecere ni bolebole kei na veigauna vinaka. Me vaka ni ko ni luvedrau vakayalo na itubutubu vakalomalagi, o ni galala mo ni vakayacora na digidigi dodonu. Ena gadrevi kina na cakacaka vakaukauwa, na bula vakaivakarau, kei na yalo nanamaki, ka na kauta mai na reki kei na galala ki na nomuni bula ena gauna oqo kei na gauna sa bera mai.

E kaya na Turaga vei Eparaama, “Raica a yacaqu ko Jiova; ia au sa kila na ka kecega mai na ivakatekivu ki na ivakataotioti; ia au na taqomaki iko tikoga” (Eparaama 2:8). Kemuni na noqu itokani gone, nikua au sa kaya kina vei kemuni kevaka o ni na vakabauta na Turaga ka talairawarawa Vua, ena vukei kemuni o Koya mo ni rawata na vanua e vinakata o Koya mo ni rawata, ka na vukei kemuni mo ni raica na kena itinitini mai na itekivu.

Meu wasea mada vei kemuni e dua na ka au a sotava ena noqu gauna ni gonetagane. Niu yabaki 11, sa biuta na neitou matavuvale na vanua ena Tokalau kei Jamani ka tekivuna e dua na bula vou ena siga ka tarava ena Ra kei Jamani. Me yacova na gauna ena lesu tale kina ko tamaqu ki na nona cakacaka dina ena matanitu, erau sa mani cicivaka toka na noqu itubutubu e dua na bisinisi lailai ni savasava ena neitou tauni lailai. Au sa qai dau veikauyaka tu na isulu sava. Me rawa vinaka na itavi oqo, au na gadreva e dua na baisikeli me dreta na qiqi bibi ni isulu. E dau gadreva voli na yaloqu me dua na noqu baisikeli vou, totoka, taliva, ka damudamu. Ia a sega tu na ilavo me vakavotukanataki kina na tatadra oqori. A qai soli vei au e dua na baisikeli bibi, rairai ca, loaloa, ka vaka tu na ose ni siviyara. Au dau veikauyaka na isulu sava ena baisikeli o ya ni bera, ka vakakina ni sa oti na vuli me vica toka na yabaki. Ena vuqa na gauna sa vaka me sega soti ni dau yaco mai na yalo nanamaki ena vuku ni baisikeli, na qiqi, se na noqu cakacaka. Ena so na gauna sa vaka me rui dau bibi ka vakatubu oca na cakacaka kau nanuma ni sa voleka ni kacabote na noqu yatevuso, ka sa vakavuqa na noqu dau cegu vakalailai meu taura na noqu icegu, Ia, au qarava tu ga na noqu itavi baleta niu kila ni keitou gadreva vakamatavuvale na ilavo e rawa mai kina, ka sai koya oqori na sala au bau cau toka kina.

Kevaka walega meu a se kila ena gauna ko ya na veika au qai mai vulica ena vica na yabaki e liu, kevaka walega me a rawa niu raica mai na itinitini ena itekivu keu a marautaka vakalevu na veika oqori, ka na vakarawarawataka sara vakalevu na noqu cakacaka.

Ena vuqa na yabaki e muri, ni sa vakarau meu curu ki na mataivalu, au sa mani nanuma meu bole ga meu curu ki na Mataivalu Waqavuka ka yaco me pailate. Au dau taleitaka na vuka kau nanuma ni na rauti au vinaka meu na pailate.

Meu ciqomi ki na parokaramu oqo e dodonu meu na rawata e vica na veitarogi, ka okati kina e dua na veitarogi dredre ni kaukauwa vakayago. Era a leqataka vakalailai na vuniwai na macala ni vakadidike ka ra mani vakuria tale; e tu ena nomu yatevuso eso na imacamaca ni mavoa ka ra ivakatakilakila ni dua na mate ni yatevuso ena nomu gauna ni itabagone, ia e kunei ni ko sa vinaka ena gauna oqo. Era vakataroga na vuniwai se, veiqaravai vakacava beka a vakayacori vei au me wali kina na mate o ya. Me yacova mai na siga ni vakadidike o ya au a sega vakadua tu ni bau kila ni a tauvi au e dua na mate ni yatevuso. E qai matata mai vei au ni noqu dau vakaukauwa yago e veisiga ka cegu cagi bulabula ena noqu dau kau isulu sava, au a vakabulai kina mai na mate o ya. Kevaka a sega na kena dau soli eso tale na igu ena kena qaqi tiko na ivoce ni baisikeli bibi ko ya e veisiga kece, ka dreta cake ka dreta sobu na qiqi ena veisalatu ni neitou tauni lailai, keu a sega beka ni rawa ni laki pailate ni waqavuka ni vala ka qai yaco e muri meu kavetani ni 747 na waqavuka ni pasidia.

Eda na sega ni dau kila ena veigauna na matailalai ni noda vunilagi. Eda sega ni kila na veika e tu mai liu. Eda bula ena dua na gauna ni veilecayaki. Eda vakavolivoliti tu ena bolebole mai na veiyasana kecega. Ena veigauna eso ena dau curu lo mai vei keda na yalolailai; ena curu botolaki yani ki na noda vakanananu na vakanuinui ca; ena rawa ni curu mai na lomalomarua ena yaga ni noda cakacaka. Ena veigauna butobuto oqo ena vakasolokakana kina ki daligada ko Setani ni da na sega ni rawata na noda inaki, ni na sega ni veiraurau na noda sasaga kei na veika eda na rawata, ka na sega ni basika na duidui mai na itavi lailai eda rawata. O koya, na tama ni veika lasu kecega, ena segata me tarova na noda raica na itinitini mai na itekivu.

E kalougata, ni o kemuni na matabete gone ena Lotu i Jisu Karisito ni Yalododonu Edaidai o ni vakavulici mai vei ira na parofita, na daurairai, ka dauvakatakila ni noda gauna. Eratou kaya na Mataveiliutaki Taumada: “Keitou sa vakanuinui tu vei kemuni. Oi kemuni na yalo digitaki… . O ni se qai tekivutaka oqo na nomuni bula e vuravura. Na Tamamuni Vakalomalagi e vinakata mo ni bula marau ka me vakalesui kemuni tale ki na Nona iserau. Ena vakatau na veika ena yaco mai muri kei na bula sa bera mai ena veika o ni na digitaka ena gauna oqo” (Me iSakisaki ni iTabagone [2001], 2). “E nomu itavi mo vulica na veika e vinakata na Tamada Vakalomalagi mo cakava ka tovolea ena nomu igu taucoko mo vakayacora na Lomana” (Matabete i Eroni: Qarava Vinaka Noda iTavi Vua na Kalou [2001], 4).

Au sa vakavinavinaka vakalevu sara ena vuku ni nona veiliutaki vakauqeti na noda Peresitedi lomani ko Gordon B. Hinckley, na parofita ni Kalou ena noda gauna, kei rau na nona daunivakasala vakaturaga. Na nodratou rai vakaparofita ena vukei iko mo raica na itinitini mai na itekivu.

E lomani iko na Turaga; oqori na vuna sa solia kina vei iko na ivakaro kei na nodra vosa na parofita me dusimaki iko ena nomu ilakolako ni bula. Eso na idusidusi bibi ni nomu bula ena kunei ena ivolalailai Me iSakisaki ni iTabagone. Na irairai ni ivolalailai oqo e ganita kina na ivakamacala vakaivolanikalou o ya, “Ia ena tubu mai ena veika lalai na veika lelevu” (V&V 64:33). Na ivolalailai oqo mai na kena irairai ena via sega tu beka na kena yaga, de vica wale beka ga na sede. Ia na ivunau kei na ivakavuvuli e tukuni kina, e iyau sega ni voli rawa ena ilavo. Oi kemuni na cauravou ko ni sa yabaki 18 se sivia, kevaka sa sega ni tiko vei kemuni na ivolalailai oqo, raica me dua tale na nomuni, maroroya, ka vakayagataka. Na ivolalailai oqo e iyau talei ni veitabayabaki kecega e lewena na ivakatagedegede ka ra ivakatakarakara tabu ni noda lewena na Lotu.

Au vagolei kemuni ki na dina ni Me iSakisaki ni iTabagone, na iVoladusidusi veitokani me baleti Ira na iTubutubu kei na Veiliutaki ni iTabagone, kei na ivolatara ni valetabu ni Lotu era tabaki kece tu ena waqadra e liu e dua na iyaloyalo ni Valetabu e Salt Lake. Na valetabu sai koya na isema e vauci ira vata na veitabatamata, ena bula oqo kei na tawamudu. Era sa vakatabui na valetabu kece sara me baleta na inaki vata oqo: me veivuke ena kena rawati na cakacaka vakalou kei na lagilagi ni Kalou, na Tamada Tawamudu, “me tucake tale mai na mate na tamata kecega ka rawata na bula tawamudu” (Mosese 1:39). Na veivaletabu oqo era vale vakatabui ka dau saumi kina na veitaro tawamudu, e vakavulici kina na veika dina, ka qaravi kina na veicakacaka tabu vakalotu me rawa kina ni da bula ka kila tiko na noda isolisoli vakalou me vaka ni da luve ni Kalou ka da vakila tiko na noda rawa ni yaco me ka bula tawamudu. Na vale ni Turaga ena vukei iko mo raica rawa na itinitini mai na itekivu.

Me vaka ga ni ra ka tabu na valetabu ni Kalou, sa vakakina na yagomu. Sa kaya kina na iApositolo ko Paula:

“Dou sa sega beka ni kila ni sa vale ni Yalo Tabu na yagomudou, o koya sa curumi kemudou, o koya dou sa rawata mai vua na Kalou, ia dou sa sega ni nomudou?

“Ni dou sa voli ena ivoli: o koya oqo mo dou qai vakarokorokotaka na Kalou ena yagomudou” (1 Korinica 6:19–20).

Oi kemuni na noqu itokani ena matabete ena itabayabaki kecega kei na veivanua kecega e vuravura oqo, me da vakayagataka na noda vakasama, na noda nanuma kei na yaloda, kei na yagoda ena vakarokoroko kei na veidokai ka kilikili kaya e dua na valetabu vakatabui sa solia vei keda na Tamada Vakalomalagi.

Sa yalataka vei kemuni na parofita ni noda gauna, kemuni na noqu itokani, ena nomuni sa rokova tiko na ivakatagedegede e tukuni ena Me iSakisaki ni iTabagone ka “bulataka na dina e tu ena ivolanikalou, ena qai rawa ni o ni qarava na nomuni itavi ena yalomatua kei na maqosa ka vosota na ka ni veivakatovolei ena nomuni kaukauwa taucoko. Ena vukei kemuni kina na Yalo Tabu… . O ni na bula kilikili ka lako ki na valetabu mo ni laki qarava na nomuni cakacaka tabu vakalotu. Ena rawa ni nomuni na veivakalougatataki oqo kei na vuqa tale” (Me iSakisaki ni iTabagone, 2–3).

Eda kila ni na dau rokova na nona yalayala na Kalou. Eda na gadreva me da qarava na noda itavi me da rawata kina na Nona veivakalougatataki. E vakavuvulitaka na Parofita ko Josefa Simici, “Ni da sa muria e dua na ivakaro, ena vakalougatataki keda na Kalou ena ka sa yalataki tu kina” (V&V 130:21).

Na lewenilotu kece sara e gadreva me lako ki na valetabu, veitalia na nona yabaki, ena gadreva me vakarautaki koya ki na veika tabu oqo. Era na taroga na nomu bisopi kei na peresitedi ni iteki, o ira era taura tu na idola ni dodonu vakabete ka ra turaganilewa ena Lotu. Na veitaro bibi oqo era na oka kina na, O dau dina beka? O bula kilikili tiko li? O dau rokova tiko beka na Vosa ni Vuku? O dau muria li na lawa ni ikatini? Ka, o dau tokoni ira li na vakaitutu ena Lotu? Na isau ni veitaro oqo ena tukuna na nomu ivakarau ni bula kei na nomu ivalavala.

Oi kemuni na tagane gone sobu o ni na sega beka ni vakila ni ivakatagedegede e virikotora na Turaga ena taro ni ivolatara ni valetabu era viavia tautauvata ga kei na ivakatagedegede o ni na kunea ena Me iSakisaki ni iTabagone. Ena veigauna ni vakacegu ia ena veigauna talega ni veitemaki cecere, na ivakatagedegede oqo kei na veidusimaki ni Yalo Tabu ena vukei kemuni mo ni digidigi vakadodonu me baleta na vuli, na nomuni itokani, nomuni isulusulu kei na kemuni irairai, na veivakamarautaki, na veika vakaitukutuku kei na Initaneti, na nomuni ivosavosa, ivakarau dodonu ni veigadivi, kei na bula savasava ni veimoceri, na dina, rokovi ni Siga ni Vakacecegu, kei na veiqaravi ena vukudra na tani. Na ivakarau ni nomuni bulataka na ivakatagedegede eso oqori ena vakaraitaka e levu na ka me baleta o cei o kemuni kei na cava o ni sasagataka tiko mo ni rawata.

E vinakati kemuni na Turaga, oi kemuni na noqu itokani gone, mo ni gadreva mai vu ni yalomuni mo ni maroroya na ivakatagedegede eso oqo ka bula ena dina ni kosipeli ka kunei ena ivolanikalou. Ni o ni vakayacora vakakina, o ni na raibaleta yani na gauna oqo, ka ko ni na raica na nomuni vunilagi serau ka totoka vata kei na veigauna vivinaka kei na kena itavi cecere. Ena lomamuni mo ni cakacaka vakaukauwa ka vosota vakadede, ka na basika na yalo nanamaki me baleta na bula. Ko ni na raica ni nomuni sala ni bula ena kauti kemuni taumada ki na vale ni Turaga ka mo ni qai lako yani ka kaulotu mo ni matataka kina na iVakabula ki na vanua cava ga ena talai kemuni yani kina ko Koya. Ni sa oti na nomuni kaulotu ko ni na cokonaka ka tuvalaka na nomuni bula ena ivakatagedegede vata ga. O koya, o ni na raica kina ena mata ni yalomuni ni ko ni sa curuma na Vale ni Turaga me baleta e dua na vakamau kei na matavuvale tawamudu. Ena veisau na veika ko ni vakaliuca ena bula me veisotari kei na veika bibi e solia vei keda na iVakabula. Ka na vakalougatataki kemuni na Kalou ka dolava na mata ni nomuni vakasama me rawa ni ko ni raica na itinitini mai na itekivu.

Na nomuni bulataka na ivakatagedegede e virikotori ena Me iSakisaki ni iTabagone ena vakavuna na nomuni logalogavinaka ena vukumuni. Vola na ivakatagedegede eso oqori e yalomuni kei na nomuni vakanananu, ka bulataka. Veidutaitaka na ivakatagedegede yadua oqori ki na vanua o ni sa koto kina nikua. Vakarorogo ki na Yalotabu, o koya ena vakavuvulitaka vei kemuni na veika o ni gadreva mo ni cakava mo ni yaco kina mo ni vakataki Jisu vakalevu cake. Kevaka o ni raica rawa na vanua e gadrevi kina na veisau, cakava sara na veisau; kakua ni lokuyara. Vakayagataka na veivutuni dina kei na isolisoli kei na kaukauwa ni Veisorovaki i Jisu Karisito me vakasavasavataka na veika oqori ka tarova tiko nomuni rawata na vanua dina e dodonu mo ni rawata. Kevaka e rairai dredre vei kemuni na iwalewale oqori, vosota toka; e yaga sara vakalevu. Sa yalataka vei kemuni na Turaga me sa vakayacora vua na Parofita ko Josefa: “Mo kila sara na luvequ ni ko na kalougata vakalevu, kevaka ko sa vosota rawa na veika kece oqo” (V&V 122:7).

Kemuni na tukadra, tamadra, vugodra, tacidra, kei na nodra itokani lomani na noda itabagone, e rawa ni da veivuke sara vakalevu ena kena iwalewale oqo. E vakavuvulitaka o Penijamini na Tui ni ena gauna eda sa saumaki dina kina na itubutubu eda na “Vakavulici ira me ra ivalavala dodonu ka yalomatua; [ka] vakavulici ira talega me ra dauveilomani ka dauveivukei” (Mosaia 4:15). Sa dau tukuni tu ni, “Na veivakavulici ena ivakaraitaki sa ikoya e dua na sala ni veivakavulici.” Au na kaya, “Na veivakavulici ena ivakaraitaki sa ikoya e sala uasivi duadua ni veivakavulici.”

Ni yalovinaka ka vakavulici ira na noda itabagone ena nomuni ivakaraitaki ni o ni matabete sa kilikili tu mo ni curu ki na valetabu. Na nomuni bula vinaka, na nomuni loloma vua na Kalou ke ira na tamata, na nomuni ivakadinadina bulataki ni kosipeli vakalesui mai kei Jisu Karisito ena kaukauwa ka na rawai ira na noda itabagone, ka na vukei ira me ra raica rawa na itinitini mai na itekivu.

Kemuni na noqu itokani gone lomani, ni yalovinaka ka vakataucokotaka na vinaka ni nomuni bula ena nomuni bulataka na ivakategedegede oqo sa solia na parofita ni noda gauna. Ni ko ni sa vakayacora vakakina, sa na tekivu mo ni rokova na matabete ka vakarau mo ni vakayacora na veisau e vuravura, mai na dua na ikalawa ki na dua tale, mai na dua na siga ki na dua tale. O sa na butuka tale tu ga kina na sala dodonu mo ni na lesu yani kina ena rokovi vei Tamada Vakalomalagi.

Kemuni na noqu itokani dauveiqaravi ena matabete, au yalataka vei kemuni nikua, ena nomuni muria na iwalewale oqo, ena vukei kemuni na Turaga mo ni na vakavuavuaivinakataka cake na nomuni bula mai na kena o ni na rawata vakataki kemuni. Ka na dau vukei kemuni mo ni raica na itinitini mai na itekivu

Na veika oqo au vakadinadinataka me vaka niu dua na iApositolo ni Turaga, na noda iVakabula ena yaca tabu i Jisu Karisito, emeni.