Na Nomu Kaulotu ena Veisautaka na Ka Kecega

Sa oti oqo e dua na yabaki ena noqu a tokoni ena koniferedi raraba. Au vakavinavinaka ena vuku ni dua na yabaki oqo kei na veika kece sara au sotava mai. Au lomana na Turaga kau vakavinavinaka vakalevu sara ena Nona isoro kei na Nona kosipeli. Au lomani Peresitedi Hinckley ka tokoni koya ni parofita ni Turaga e vuravura. Au vakadinadinataki ira na parofita kei na iapositolo ni noda gauna, vata kei kemuni na Yalododonu e veivanua kecega, kau sa solia tu na noqu bula ena Nona inaki.

Ena vica na yabaki sa oti, au a vakatarogi ira tiko na daukaulotu. A liwa tiko e dua na cava ni vulaibatabata ena gauna era lako mai ka lako tiko yani kina na daukaulotu ena loma ni siga taucoko. A veisau tiko na cava mai na uca cevata ka veisau tale. Era yaco mai na daukaulotu ena sitimanivanua mai na veikoro voleka ka lako yani ki valenilotu ena loma ni cava. Eso tale era vodo basikeli. E voleka ni sega tale ni dua e vo ena nodra mamarau. Era nona daukaulotu na Turaga. E tu vei ira na Nona Yalotabu ka ra vakila na marau ni veiqaravi Vua veitalia ga na veika era sotava tu.

Ni cava na nodra vakatarogi na veitokani daukaulotu yadua, au na sega ni guilecava vakadua na noqu sarava na nodra sa dui lesu yani ena loma ni cava me ra vunautaka na kosipeli ka cakava na veika e kacivi ira kina na Turaga. Au rawa ni raica na nodra yalodina kei na lomasoli. Au rawa ni vakila na nodra lomana na tamata kei na Turaga. Niu sarava tu na nodra sa lako yani, au vakila e dua na yalo ni loloma veivakadrukai me baleti ira kei na ka era cakava.

Ena bogi ko ya, au a tiko ena dua na soqoni ni matabete ena koro vata ga ko ya. Sa liwa tikoga na cava ka sa levu sara tu ena gauna oqo na uca cevata. Ni lagati na sere idola ni soqoni, eratou a curu yani ki loma na peresitedi ni tabana lailai ka yawa taudua, kei rau na nona daunivakasala daukaulotu, o Elder Warner kei Elder Karpowitz. Ni vakarau me ratou dabe, erau a luvata tani na daukaulotu vakasakiti oqo na nodrau isala ni batabata kei na qaniliga. Erau luvata tani na nodrau kote e taudaku. Oti erau qai dui luvata tale na ikarua ni nodrau kote ni batabata ka dabe sobu. Me vakataki ira na daukaulotu ena siga ko ya, e dina ni ca tu na draki era a marau tu na daukaulotu. Era vakila na Yalo ni Turaga ena nodra dui bula. Ena nodra veiqaravi ena inaki ni Turaga, era vakila kina e dua na mataqali loloma kei na logalogavinaka kei na reki e dredre me vakamacalataki.

Niu saravi ira na daukaulotu gone ka cecere oqo ena bogi ko ya, au vakila e dua na ka uasivi. Ena mata ni noqu vakasama au raici ira na daukaulotu kece sara ni tabana ni kaulotu ni ra lako yani ki na bogi ni vulaibatabata ko ya. Eso era tuki katuba ka sega ni ciqomi ena nodra segata me ra vakatavulica na kosipeli i Jisu Karisito. Eso era tiko ena veivale ka veituberi vei ira na tamata yadua kei na matavuvale. E dina ni tu na veika era sotava, era cakava na veika era rawata me ra vakatavuvulitaka kina na kosipeli i Jisu Karisito ki vei ira era via rogoca, ka ra marau tiko. E lako mai ki yaloqu e dua na vakanananu au sega ni rawa ni vakamacalataka sara.

Ena dua na isolisoli cecere ni Yalotabu, au vakila kina na Nona loloma, na loloma savasava i Karisito me baleti ira na daukaulotu yalodina ena veivanua kecega ka sa veisautaki au vakadua. Au kila na kena talei Vua na daukaulotu yadua. Au raica vakalailai na veika ena vakatoka beka na parofita me itabatamata daukaulotu cecere e qai bau kila ko vuravura (raica M. Russell Ballard, “Na iTabatamata Daukaulotu Levu Duadua,” Liaona, Nove. 2002, 47). Sa qai tekivu meu kila na vuna e yaga kina me laveti cake na ivakatagedegede me rawa ni ganiti ira kina na daukaulotu e veivanua kecega na veitaqomaki, veidusimaki kei na marau e sala vata kei na Yalo ni Turaga. Sa tekivu talega meu kila na vuna—me vaka ni da itubutubu, bisopi, peresitedi ni iteki kei na iliuliu tale eso—me da na cakava na veika kece eda rawata me da vukei ira kina na itabagone ena Lotu me ra kilikili kaya na veivakalougatataki ni veiqaravi vakadaukaulotu.

E vakamacalataka ko Peresitedi Hinckley na veika ena yaco ki yalodra na daukaulotu kece sara era solia na nodra bula kei na nodra cakacaka vua na Turaga ena gauna e tukuna kina na veika a sotava ena nona gauna taumada ni kaulotu . Oqori ena itekivu ni nona kaulotu ni sa tekivu yalolailai mai. E kaukauwa na cakacaka ka ra sega ni veiciqomi na tamata. Ia sa yaco mai na gauna me veisau na yalolailai ki na yalodina. Ki vua, na kena itekivu e dua na ivola mai vei tamana ka wilika kina, “I Gordon, Au sa taura na nomu ivola… . E dua ga na ka au via tukuna: Guilecavi iko ka laki veiqaravi.” Ena nona vakamacalataka na veika e qai yaco e muri, e kaya kina vakaoqo: “Au a tekiduru ena rumu lailai ko ya … kau yalayala kina niu sa na tovolea meu soli au vua na Turaga.

“Sa veisau na vuravura taucoko. Sa seyavu na kabukabu. Sa tekivu me cila ena noqu bula na matanisiga. Sa basika e dua na vakanuinui vou. Au raica na totoka ni vanua oqo. Au raica na kedra cecere na tamata… . Na veika vinaka kece sa yaco vei au me tekivu mai na gauna ko ya au rawa ni semata lesu tale ki na lewa au a vakatauca ena loma ni vale lailai ko ya …” (ena Mike Cannon, “Missionary Theme Was Pervasive during Visit of President Hinckley.” Church News, 9 ni Sepi. 1995, 4).

E tomana ko Peresitedi Hinckley ena nona kaya, “O vinakata mo marau? Guilecavi iko ka vakayali iko ki na inaki cecere oqo, ka vagolea na nomu sasaga ki na nodra vukei na tamata” (ena Church News, 9 ni Sepi. 1995, 4).

Ki vei kemuni kece na cauravou au na kaya kina, “O ni vinakata beka mo ni marau?” Kevaka e vakakina, lako mai ka duavata kei keimami, e 52 000 ka se toso tikoga, ka qaravi ira na wekamu vakadaukaulotu ni Turaga. Yalataka mo solia e rua na yabaki ni nomu bula vua na Turaga. Ena veisautaka na ka kecega. Ko na marau. Ena seyavu na kabukabu. Ena yaco mo taleitaka na itovo kei ira o kacivi mo veiqaravi ena vukudra. Ena dredre na cakacaka, ia eda na vakamamautaki ka kune marau ni da veiqaravi. Kevaka ko na yalodina ena gauna ni nomu kaulotu ka lako yani, ko na raica lesu na nomu bula ka cavuta vata kei Peresitedi Hinckley, “Na veika vinaka kece sa yaco vei au me tekivu mai na gauna ko ya, au rawa ni semata lesu tale ki na lewa au a vakatauca meu kaulotu ka solia na noqu bula vua na Turaga.”

Sa taleva tiko vei keda ko Peresitedi Hinckley ni sega walega ni ko ira na daukaulotu gone e baleti ira na veivakalougatataki oqo. E dau vakasakiti na nodra veiqaravi na veiwatini ka ra gadrevi vakalevu sara. E dina ni ra sega ni vakacolati na goneyalewa me ra veiqaravi, e kaya na Peresitedi: Eda gadreva me so na goneyalewa. E dau vakamatalau na cakacaka era qarava …” (“Ki Vei Ira na Bisopi ni Lotu,” Vuli ni Veiliutaki e Vuravura Raraba, 19 ni June 2004, 27). Eda kila talega ni ra tu eso, era sa vagalalataki kina ena vakarokoroko mai na veiqaravi oqo, ena vuku ni nodra bula se na veika tale eso. Eda lomani ira ka kila ni na vakarautaka ko Tamada Vakalomalagi na veivakalougatataki me veisosomitaki ki na nodra bula ena nodra veiqaravi ena veisala tale eso ka bula yalodina tikoga.

Ena dua na yabaki sa oti, a kerei ira kina na itubutubu, ko ira na bisopi kei na peresitedi ni tabana o Elder Ballard me ra cakacaka vata ka vukea e dua tale na cauravou, me kedra ikuri o ira era sa vakarautaki ira tu me ra veiqaravi, me yaco me ra bula kilikili ka kacivi mai na veitabanalevu kei na tabana yadua ena Lotu. (raica “Me Dua Tale” Liaona, Me 2005, 71). E vuqa era sa yavala mai. Me vaka ni da iliuliu, sa dodonu me da yalataki keda tale me da muria na kerekere vakauqeti oqo.

Kemuni na taciqu kei na ganequ, e vuqa na bisopi vinaka era sa cakava tiko mai ena dua na gauna balavu na veika sa kerea o Elder Ballard. Ena tolusagavulu na yabaki sa oti a qiri ka sureti au kina ki na nona valenivolavola o Bisopi Frank Matheson. Ena vuku ni ituvaki ni vuravura, sa vakaiyalayala walega kina na levu ni daukaulotu e rawa ni vakauta e dua na tabanalevu, ia sa galala tale e dua na vanua, ka sa nona itavi me vakatura yani e dua tale na daukaulotu. E kaya vei au ni ratou sa masumasu tiko kei rau na nona daunivakasala. E kaya vei au ni nanuma ni sai koya oqo na gauna e vinakati au kina na Turaga meu kaulotu. Au a kurabui. E se bera vakadua ni bau dua me tukuna vei au ni tiko e dua na ka e vinakata na Turaga meu cakava. Au vakila na ivakadinadina ni Yalo ni Turaga ni dodonu meu lako, ia meu lako sara ga oqo. Au kaya vua na Bisopi, “Kevaka e vinakata na Turaga meu laki kaulotu, au na lako.”

Vei au, e veisau na veika kece. A seyavu dina na kabukabu ka yaco mai ki na noqu bula na marau kei na reki. Ena dua na sala, na veika kece sa yaco me tekivu mai na siga ko ya e yaco ena vuku ni yalayala a vakayacori me qaravi na Turaga kei ira na luvena ka solia e rua na yabaki ni noqu bula ki na Nona cakacaka.

Au na kaya tale, Lako mai ka duavata kei keimami. Lako mai ka savasava. Lako mai ka marau. Lako mai ka vakila na veika sara ga e kaya na Turaga ni ka bibi (V&V 15:6) vei iko ena nomu bula ena gauna oqo. Lako mai ka mo tiki ni itabatamata daukaulotu levu duadua e se qai bau kila ko vuravura.

Oqo na cakacaka ni Turaga. E bula tiko na Tamada mai Lomalagi kei na Luvena, ko Jisu Karisito, e liutaka ka dusimaka tiko na cakacaka oqo nikua. Na veika oqo au vakadinadinataka, ena yaca i Jisu Karisito, emeni.