Te mau mana‘o

Ua tauturu te Liahona i te mau taata e rave rahi ia maitai to ratou mau oraraa. Eita e nehenehe i te taata e hinaaro nei i te oraraa maitai ia ite ore i te Parau Poro‘i a te Peresideniraa Matamua. Ua tauturu mau te Parau Poro’i a te Peresideniraa Matamua ia‘u ia faanahonaho i to‘u nei oraraa. Noa’tu e eita e nehenehe ia‘u ia hoo mai i te hoê Liahona, na te mau papa‘iraa i nehenehe ia‘u ia tai‘o i tauturu ia‘u ia riro ei taata maitai a‘e.

Abraham Adaranijo, Canada

I to‘u riroraa ei melo bapetizo-apî-hia no te Ekalesia, aita i nehenehe ia‘u ia taa hope roa i te evanelia, na roto râ i te tai‘oraa i te Liahona, ua nehenehe ia‘u ia taa i te reira na roto i te hoê haapiiraa i muri mai i te hoê haapiiraa. E faaûruhia vau e te feia o te faaite mai i te mau ohipa i tupu i roto i to ratou mau oraraa. Mauruuru i te piaraa i te mau aamu maitai o te turu i te mau parau tumu no te evanelia.

Federico G. Balut, Tamaiti., Philippines

Auê ïa haamaitairaa faahiahia e te maitai te fariiraa i te Liahona i roto i to matou mau utuafare e vairaa buka i reira e nehenehe ai ia matou ia tai‘o i te reira i roto i to matou mau taime vata e to matou mau taime varua. Te mauruuru nei au no te mau aamu faahiahia e nahea te mau taata i tera vahi e tera vahi e ora mau nei i te evanelia. Na teie e faatahoê ia matou. Na te reira e faaitoito i te toe‘a o matou ia ore e mata‘u, e na te reira e haapapû ia matou e aita matou i vai noa o matou ana‘e.

Elsie Castillo, Ecuador

Ua riro vau ei melo paruparu i roto i te Ekalesia i to‘u tamarii-rii-raa, area i to‘u taure‘are‘araa ua feruri au i te ho‘i mai. Hou a rave ai au i teie faaotiraa faufaa rahi, ua pure au e ua feruri hohonu vau eaha râ te aura ia ho‘i faahou i te Ekalesia e te mau hopoi‘a e titauhia ia rave.

Tera te taime i faaoti ai au ia tai‘o i te mau Liahona tahito. Ua tai‘o vau no te imi i te mau aamu o te faaitoito ia‘u e o te haapuai i to‘u hinaaro ia ho‘i i te ekalesia.

Na roto i te tai‘oraa i te mau aamu no te feia tei rave i te hoê â mau ohipa e o vau nei, i farii ai au e rave rahi faaitoitoraa. Te mea hau atu i te mau mea atoa, ua tauturu te mau aamu ia‘u ia ite e aita roa e taata maitai roa i roto i te ekalesia e te vai atoa nei ta‘u mau hape e ua ti‘a ia‘u ia rave i te tahi mea no te faaafaro i te reira.

Ua ho‘i mai au i teie nei i roto i te Ekalesia. Ua ite au ua riro te mau pureraa mai i mutaa ihora, e hi‘oraa maitai râ to‘u i teie nei, aua‘e te mau mana‘o ta‘u i ite i roto i te Liahona nahea e oaoa i te mau piha haapiiraa e te pureraa oro‘a.

I te mau taime atoa e tai‘o vau i te Liahona, ua mauruuru vau no te mea ua ite au i te mau pahonoraa i ta‘u mau uiraa.

Maria Pilar Santana, Dominican Republic

Te hinaaro nei au e haamauruuru ia outou no te hapono tamau noaraa mai ia‘u te ve‘a Liahona. E 93 matahiti to‘u i teie nei. Mai te mahana i bapetizohia e i haamauhia ai au, ua farii au i te ve‘a. E mea na‘ina‘i te reira na mua’tu e mea anaanataehia râ. Te oaoa nei au no te mau mea atoa i roto i te ve‘a; ua anaanatae-taa-ê-hia râ vau i roto i te mau a‘oraa a to tatou nei peropheta here. E mea faahiahia ia faaroo ia’na e piti taime i te matahiti i roto i te amuiraa rahi.

Lydia Dominguez, te mau Hau Amui no Marite