Ua fariihia Elder Eyring e te mau tahu‘a no Shinto i te hoê vahi pererinaraa i te fenua Tapone.

Ua farerei Katsushi Toyama, e faatere tahu‘a no te hoê vahi pererinaraa no Tokyo i Meiji ia Elder Henry B. Eyring no te Pŭpŭ no te Tino Ahuru Ma Piti Aposetolo a tere haaati ai oia i te mau area no te Ekalesia i Asia i te mau motu no Patitifa.

Ua ani manihinihia o Elder Eyring, e o Elder D. Todd Christofferson no te Peresideniraa o te Hitu Ahuru e o Elder David F. Evans, Peresideni no te Area Asia Apato‘erau ia farerei ia Toyama tane no te patu i te mau e‘a turu no te maramarama e no te hamani maitai.

Ua faaite Toyama tane i teie mau ratere e aita e buka papa‘i no te parau haapiiraa a te Shinto mai te Bibilia ra e aore râ, te tahi atu mau papa‘iraa mo‘a area râ, e faaite te mau pĭpĭ i to ratou autaatiraa i te Atua na roto i te ‘aroraa i te mâ e te parau-ti‘a i roto i to ratou oraraa.

Ua parau Elder Eyring i te mau melo o te Ekalesia a Iesu Mesia i te Feia Mo‘a i te Mau Mahana Hopea Nei ia ‘aro atoa no te mâ e no te parau-ti‘a i roto i to ratou oraraa. « Ua a‘o tamau mai to tatou peropheta o Gordon B. Hinckley i te mau melo no ta tatou Ekalesia ia faariro i to ratou mau ti‘aturiraa ei tuhaa taato‘a no to ratou oraraa i te mau mahana atoa », o ta’na ïa i parau.

Ua matau mai Toyama tane i te Ekalesia i to’na farii-raa-hia i Roto Miti i te matahiti 1970 ra. Aita i maoro a‘e nei, ua faaamuhia teie nei auhoaraa i to te tahi mau tahu‘a o teie vahi pererinaraa haereraa mai i Roto Miti i te fare haapiiraa tuatoru no Brigham Young i Provo, Utaha. I te matahiti 2005, te pŭpŭ himene a BYU–Hawaii te pŭpŭ Kiritiano matamua tei haere e himene i te vahi pererinaraa no Meiji.

Ua tupu te farereiraa e Toyama tane i roto i te hoê piha iti i te vahi pererinaraa i faataahia no te mau aparauraa e te mau upoo no te mau hau e to ratou mau ve‘a huna.

Ua topahia teie vahi pererinaraa i te i‘oa no te Emepera Meiji, o tei faatere na i te fenua Tapone mai te matahiti 1867 tae atu 1912. Ua haafaito oia i te hoê hiaai no te tape‘a i te peu tumu otahi a te Tapone ma te puai no te hopoi mai i to’na fenua i roto i te ao ma‘ona.

Ua tupu te bapetizoraa matamua i te fenua Tapone i te matahiti 1902. I teie mahana ua hau atu i te 120.000 melo o te Ekalesia i te fenua Tapone. Te vai-atoa-ra e piti hiero i reira, hoê i Tokyo e hoê i Fukuoka.