O vai tei haafariu i to‘u nei Upoo?
I roto i te hoê pureraa oro‘a i Piura, Peru, i te matahiti 1972, te a‘o ra te hoê taata a‘o i te faufaa rahi no te ohipa aamu utuafare e ua tamau noa oia i te hi‘oraa mai ia‘u. I te hopea o ta’na a‘oraa, ua faahitimahuta oia ia‘u i to’na faaiteraa, « ua ite au e te rave te taea‘e Rosillo i teie nei ohipa ».
Ua iti mai i te hoê matahiti to‘u riroraa mai ei melo no te Ekalesia, ua haamau râ vau i te fâ ia haamata i to‘u iho aamu utuafare – e ere no te mea ta’na i parau no te mea râ ua ite au i te hinaaro ia rave i te reira. Ua noaa ia‘u te tabula apaparaa e maha u‘i e ua haamata vau i te uiui i to‘u mau metua e fetii no te ite i te mea ta ratou i ite. I te mau taime atoa e rave au i te ohipa no ni‘a i to‘u aamu utuafare, ua pure au e ua ani i te Fatu ia tauturu mai.
No te imi i te mau mahana poheraa o to‘u mau tupuna i te pae o to‘u metua vahine, ua tere atu vau i te oire no Zorritos, i te pae apatoerau no Peru, i reira to ratou tanu-raa-hia. Te vai nei te vahi tanuraa ma‘i i te otia o te oire, e ua vaiihohia te rahiraa o te feia pohe i roto i te mau vairaa tima.
Ua tomo atu vau i roto i te vahi tanuraa ma‘i e ua haamata vau i te hi‘o haere, aita râ vau i ite i te tahi mea. Ua faaoti ihora vau i te haere i te oire e ani i te hoê fetii mai te mea ua papû ia’na e ua tanuhia to matou nei mau tupuna i reira. I to’na parauraa mai e, ua parau vau ia’na, « eita ïa vau e ho‘i e tae noa’tu e noaa mai ia‘u taua mau tai‘o mahana ra ».
Ua ho‘i atu vau i te vahi tanuraa ma‘i e ua haamata i te ma‘imi maitai, ma te haere i te mau pae atoa o te mau vairaa e ma te tai‘o i te mau papa‘iraa atoa. Aita â i noaa ia‘u i te ite i to ratou mau vairaa, no reira ua tuturi vau i raro e ua ani i te Fatu ia tauturu mai ia‘u. Ua imi faahou vau i muri iho – ma te hoê â hopearaa. Ua rohirohi au, e te taere noa ra, e ua ti‘a ia‘u ia ho‘i ia nehenehe ia‘u ia rave i te tahi atu mau ma‘imiraa ta‘u i opua.
« E, ua rave au i ta‘u tufaa » o ta‘u ïa parau i roto ia‘u iho. E ho‘i ïa vau ma te ore i faaoti i ta‘u fâ.
Ua ineine au i te faaru‘e i taua vahi ra, e ua fariu atu vau i te uputa aua i mua. I to‘u ra haamataraa i te haere, ua ite au i na rima e piti i te tape‘araa i to‘u upoo na muri mai e ma te haafariu atu i te tahi vahi. Ua faaea to‘u na mata i ni‘a i te hoê ofa‘i menema na‘ina‘i i ni‘a noa‘e i te fenua. Ua fariu atu vau i muri no te hi‘o e o vai ra tei haru i to‘u upoo, aita râ e taata i reira.
Ua haere atu vau i te ofa‘i menema, ua tiraha vau i ni‘a i te repo, e ua tamâ ihora i te papa‘iraa. Ma te mauruuru rahi, ua tai‘o vau i te haamaramaramaraa ta‘u e imi ra : Isidro Garcia Rosillo, pohe i te 1 no atete 1934. Francisca Espinoza Berru, pohe i te 31 no tenuare 1954.
Ua hope te tia‘iraa maoro a to‘u mau tupuna no te farii i to ratou mau oro‘a faaora i te matahiti 1980. I te taime a haere atu ai ta‘u vahine faaipoipo e o vau nei i te hiero no Sao Paulo Bresil no te farii i to maua mau oro‘a hiero. I te hiero ua taatihia vau i ta‘u vahine e ua bapetizohia no to‘u mau tupuna herehia o tei pohe.
A tomo ai au i roto i te vahi bapetizoraa, ua haamana‘o vau i te ofa‘i menema na‘ina‘i i te vahi tanuraa ma‘i. Ua haere atu vau i raro i roto i te pape ma te ite e ua arata‘i te Fatu i to‘u mau taahiraa avae a ma‘imi ai au i to‘u mau tupuna.