Taime faaiteiteraa

Eaha ïa te rahi o to oe oaoa

Na Elizabeth Ricks

« Oia atoa to outou maramarama; ia anaana ïa i mua i te aro o te taata nei, ia hi‘o ratou i ta outou parau maitai, e ia haamaitai i to outou Metua i te ao ra » (Mataio 5:16)

Ua ite anei outou e ia opere ana‘e outou i te tahi mea mai te hoê monamona aore râ hauti, e farii outou i te hoê mana‘o maitai? E mea papû te reira. E nehenehe ta outou e opere i te mau mea taa ê atu i te monamona e te hauti, mai te ite. E nehenehe te opereraa i te ite e hopoi mai i te oaoa rahi – eiaha ana‘e i te taata o te farii ra, i te taata atoa ra o te horo‘a ra. Te huru ite maitai roa‘e e ti‘a ia opere o te evanelia ïa a Iesu Mesia.

Ua farii o Ashley, e iva matahiti to’na, i te oaoa i te faaiteraa i te evanelia. I muri a‘e i to Ashley ani-raa-hia ia opere i te Buka a Moromona, ua faahoro atu to’na metua tane ia’na i te fare o to’na taata faatere fare haapiiraa, e ua horo‘a atu o Ashley ia’na te hoê Buka a Moromona. Ua horo‘a atoa’tu o Ashley i te mau misionare te i’oa o taua taata faatere fare haapiiraa. Auê ia te oaoa o ta Ashley i farii! ( A hi‘o « Nine-Year-Old Member Missionary », Hoa, Tiurai 1997, 42-43.)

Te mea faufaa rahi roa‘e o ta outou e nehenehe e opere o te evanelia ïa Iesu Mesia. Ua pii te Fatu ia Oliver Cowdery e David Whitmer ia poro i te evanelia. Ua haamaramarama Oia no ni‘a i te oaoa o ta raua e farii :

« E mai te mea e hope to orua pue mahana i te pororaa i te parau tatarahapa i teie nei mau taata, e ia aratai mai orua, i te hoê noa a‘e varua taata ia‘u nei, aue ho‘i to orua oaoa rahi i pihai iho ia’na i roto i te basileia o to‘u Metua!

« E i teie nei, mai te mea ua rahi to orua oaoa i te varua taata hoê a‘e o tei arata‘ihia mai e orua ia‘u nei i roto i te basileia o to‘u Metua, eaha’tura â ïa te huru o to orua oaoa rahi ia rahi noa’tu â ta orua varua taata e arata‘i mai ia’u nei! » (PH&PF 18:15-16).

Te faaite ra tatou i to tatou faaroo ia Iesu Mesia ia faaite ana‘e tatou i te evanelia ia vetahi ê. Eaha ia te oaoa rahi o ta tatou e farii ia tauturu ana‘e tatou ia vetahi ê ia ite ia Iesu Mesia e i te fanahonahoraa a to tatou Metua i te Ao ra.

Ohiparaa

A papa‘i i to outou io‘a i raroa‘e i te hoê o te hoho‘a o te mau misionare. A tapû i te reira, e a tapiri atu i ni‘a i te hoê parau paari. I roto i te pureraa pô utuafare, a tuu i te hoho‘a o te misionare i pihai iho i te hoho‘a tata‘itahi, e a haamaramarama i to outou utuafare mea nahea te taata i roto i te huru tata‘itahi e riro ai ei misionare. A ani i to outou utuafare ia hauti mai i te mau hi‘oraa i roto i te mau hoho‘a aore râ i roto i te mau huru ohipa ta ratou e mana‘o ra e ia vaiiho ia outou ia hauti mai i te faaiteiteraa i te evanelia.

Te mau mana‘o no te taime faaiteiteraa

1. A faaineine e rave rahi mau api parau na‘ina‘i o ta outou i papa‘i i ni‘a iho te mau ohipa e ravehia o te faaite i te hoê hi‘oraa maitai aore ra ino. A vaiho i te tahi mau tamarii ia huti tata‘itahi i te hoê api parau na‘ina‘i mai roto mai i te hoê afata. Ia tai‘o mai ratou te hoê i muri mai i te tahi. A vaiho i te mau tamarii ia faaoti i te huru o te hi‘oraa o te ohipa, e hi‘oraa maitai anei aore râ mea ino anei. A pia atu te mau api parau na‘ina‘i i ni‘a i te iri tabula i raro a‘e anei i te papa‘iraa « hi‘oraa maitai » aore râ « hi‘oraa ino ». Teie te hoê faahi‘oraa, « e oomo vau i te ahu tano » e piahia ia i raro a‘e i te « hi‘oraa maitai », e « i te tahi mau taime e parau ino vau » e piahia ia i raro a‘e i te « hi‘oraa ino ». A tauturu i te mau tamarii ia imi, ia tai‘o, e ia tamau i te Mataio 5 :16. A faaite i to oe iteraa papû e ua faaite mai o Iesu Mesia i te hi‘oraa no tatou paatoa.
2. A ani i te mau tamarii ia haamana‘o i te hoê taime i faaroo ai ratou i te tahi atu mau taata i te faaiteraa i to ratou iteraa papû. A faataa atu ia ratou e noa’tu te vai ra te pureraa no te faaiteraa i te iteraa papû, e nehenehe ta tatou e faaite i to tatou mau iteraa papû i te tahi atoa atu mau taime. A hi‘o 2 Timoteo 1 :7-8. Ua parau te peresideni Gordon B. Hinckley, « te ti‘aturi nei au e tuu te mau melo tata‘itahi i teie mau parau i te hoê vahi e nehenehe ai ia’na ia ite atu i te mau po‘ipo‘i atoa i te omuaraa o taua mahana ra. (« Be Not Afraid », Liahona, Febuare. 2005, F2). Ua parau oia e horo‘a mai teie mau parau ia tatou te itoito, te faaroo, e te puai. A vaiho i te mau tamarii ia papa‘i i te irava 7 e te tufaa matamua o te irava 8 no te hopoi atu i te fare e ia tuu atu i te hoê vahi e nehenehe ai ia ratou ia ite atu i te reira i te mau po‘ipo‘i atoa. A tauturu i te mau tamarii ia ite i te puai o te mau iteraa papû o te mau peropheta e te mau aposetolo. Mai te mea te vai ra, a faafaroo ia ratou te hoê iteraa papû tei haruharuhia no roto mai i te amuiraa rahi aore râ te hoho‘a teata Special Witnesses of Chris (Ei mau ite taa ê no te Mesia). Aore râ a tai‘o i roto i te Liahona.

Nota : Mai te mea aita outou e hinaaro i te umutu i te mau api mai roto mai i te ve‘a, e nehenehe teie hauti e nene‘ihia mai roto mai i te iteneta i www.lds.org. No te reo Peretane, a pata i te « Gospel Library ». No te tahi ê atu reo a pata i « Languages ».