Te haamana‘oraa o Gilberto te metua tane fetii

I te taime a haamata ai au i te haapii no ni‘a i te ohipa no te oro‘a no te feia i pohe, ua faaûruhia vau na te here rahi o ta‘u tane i faaite no to’na mama ruau i te hi‘oraa e ua ravehia to’na mau oro‘a hiero. Na te reira i faaanaanatae ia‘u ia haapii rahi atu â no ni‘a i to‘u iho mau tupuna. I te mau matahiti mai te reira mai taime, e rave rahi mau taea‘e e mau tuahine, e tae noa’tu te mau taata i te pû aamu utuafare i pihaiho i to‘u fare i Guadalajara, Mexico, i tauturu mai ia‘u ia haapii i te rave i te ohipa no to‘u mau tupuna.

I te matahiti 1991 ua farii au i to‘u nei haamaitairaa patereareha e ua faauehia vau e e ti‘a ia‘u ia haape‘ape‘a no to‘u mau fetii tei pohe e ia horo‘a i to‘u taime no ratou. Ua haamau vau i te hoê fâ ia rave i te reira ohipa, na te reira i arata‘i ia‘u ia aparau i te mau mahana atoa i to‘u na metua e ere te melo no te Ekalesia. Ua ani pinepine au i te mau uiraa no ni‘a i to‘u utuafare, ua nehenehe noa râ i to‘u metua vahine ia parau mai ia‘u no ni‘a i to‘u papa ruau e mama ruau.

I te hoê mahana ua parau mai to‘u metua vahine e ua roohia te metua tane fetii Gilberto, te tuaana o to‘u metua tane, i te ma‘i mafatu. Ua parau mai to‘u metua vahine, « ua ite au e e hinaaro oia i te paraparau ia oe. E mea rahi te mau mea ta’na e haamana‘o ra, e e nehenehe ta’na e horo‘a ia oe te mau haamaramaramaraa e rave rahi no ni‘a i te utuafare ».

I to’u taniuniuraa ia’na i te fare utuuturaa i reira oia e faaea ai, ua pahono mai ta’na vahine e ua parau mai oia e e mea ino roa to‘u metua tane fetii e eita e nehenehe ia’na ia paraparau. Ua horo‘a’tu vau ia’na i to‘u tapa‘o faaitoito e ua parau atu vau ia’na e e pure vau no raua e to raua utuafare.

I te mahana i muri a‘e ua niuniu faahou vau i te fare utuuturaa. I to‘u maere rahi, ua pahono mai to‘u metua tane fetii i te niuniu.

Ua parau atu vau « Tonton Gilberto! Ua niuniu vau no te parau atu ia oe e ua pure tuutuu ore au e ia maitai mai oe e ua here au ia oe »,

Ua pahono maira oia « mauruuru rahi roa , Bibi ». « Ua ara vau i teie po‘ipo‘i e e mea maitai rahi roa vau. A faaite mai na eaha te parau apî ».

Ua parau atu vau ia’na to‘u anaanatae no te ite i te mau i‘oa o te mau melo no te utuafare no te fenua Arabia e Lebanona mai. Ua tano to‘u metua vahine no ni‘a i te huru haamana‘oraa a to‘u metua tane fetii. Ua ite oia i te mau i‘oa, te mau tai‘o mahana e te mau vahine no na u‘i e maha i te pae o te utuafare a to‘u metua tane.

I to’u vaihoraa i te niuniu paraparau, ua ite au e riro ta maua nei aparauraa e aparauraa hopea i rotopu ia maua i roto i teie nei oraraa. Ua tano vau. Ua haamaitai mai ra te Fatu ia maua toopiti ia nehenehe ia‘u ia farii i te haamaramaramaraa i hinaarohia e au; no te faatahoê i to matou utuafare – i teie nei e a muri noa’tu.