Tupuraa i roto i te Faaroo – Yondonjamts no Ulaanbaatar, Mongolia

Hou Yondonjamts i bapetizohia ai e haamauhia ai, ua pure tamau oia e ia amui atoa mai to’na metua tane i te Ekalesia. Ua maruururu roa oia a faaoti ai to’na metua tane ia bapetizohia oia. I muri a‘e i to’na bapetizoraa e te haamauraa, ua ite o Yondonjamts e e mea faufaa rahi roa no’na ia faaineine ia riro mai ei diakono i roto i te Autahu‘araa a Aarona. E mea faufaa rahi atoa no to’na metua tane ia farii i te autahu‘araa. Ua pure pinepine teie tamaiti apî e ia farii to’na metua tane i te autahu‘araa, e ua farii oia i te reira. Ua farii te mau taata atoa i roto i te utuafare e e taure‘are‘a haapa‘o maitai o Yondonjamts o te ite i te faufaa rahi no te pure.

Hau noa’tu i te hoê matahiti i muri a‘e te bapetizoraa e te haamau-raa-hia to’na metua tane, ua tere atu te utuafare i te hiero no Hong Kong Taina. Ua oaoa o Yondonjamts e ua taatihia to’na utuafare i roto i te hiero ia nehenehe ia ratou ia riro ei utuafare mure ore. I te hiero, ua ani oia e ia tuuhia te i‘oa o te hoê vahine i roto i te tabula i‘oa no te pure ia nehenehe i te mau taata i roto i te hiero ia pure no’na. Ua pe‘ape‘a oia no ni‘a i te avae pepe o teie vahine, e ua mauruuru oia a maitai rii mai ai taua vahine ra.

1. Hauti taora popo i roto i te ete

2. Peni i te hoho‘a

3. Hamani i te mau pepe hurio no te rima

4. Haere i te fare pureraa.

5. Amu i te tihopu raiti e te mau vine

6. Mata‘ita‘i haere i te tuhaa hitiaa o te râ o te oire.

E piahi no te piha maha, e mea au na Yondonjamts i te numera e te origami (tufeturaa i te api parau ia riro ei mau hoho‘a). Te haapii nei oia i te reo Peretane e te reo Mongolia i te fare haapiiraa. Ta’na buka au roa o te The Happy Prince papa‘ihia e Oscar Wilde. Ua parau to’na metua vahine e e piahi maitai roa oia o te haapa‘o maitai i te faaueraa. E pae minuti haere avae noa te atea o te fare haapiiraa.

I roto i te pureraa pô utuafare, e tai‘o te utuafare i te mau papa‘iraa mo‘a, e hauti i te teata taata ora, e himene i te mau himene, e uiui i te mau aamu no te Ekalesia, e amu i te maa faahaumaru. Te oaoa nei Yondonjamts i te tai‘o i roto i te Buka a Moromona no ni‘a ia Alama e pure ra ia haapii ta’na tamaiti i te parau mau e ia tatarahapa oia. E mea au na Yondonjamts i te mea e ua tatarahapa o Alama te tamaiti e ua taui i to’na oraraa (a hi‘o Mosia 27:8-31).

Te hinaaro nei o Yondonjamts ia tavini i te hoê misioni i te hoê mahana. Te faaineine nei oia ia riro ei misionare na roto i te pureraa, te tai‘oraa i te mau papa‘iraa mo‘a, te haereraa i te mau pureraa a te Ekalesia, e te tamataraa ia haapa‘o e ia vai parau-ti‘a. Te rave atoa nei oia i te mau haapiiraa no te faata‘i i te piana. No te mea ho‘i e e mea to‘eto‘e roa i Mongolia i te tau to‘eto‘e, e mea au roa te hoê misioni i te fenua Hawaii.

E fenua mou‘a te fenua Mongolia i rotopu i te fenua Taina e Rusia. O Ulaanbaatar te oire pû.

E titauhia fatata e 20 minuti no te utuafare ia tere atu na ni‘a i te pereoo uira faauta no te haere i te amaa no Bayanzurkh. I te Paraimere e mea au roa na Yondojamts ia himene e ia faaroo i te pehe. E mea oaoa atoa na’na te taime faaiteiteraa.