Usa ka Leksyon sa Balaang Pagtahud

Usa pa ako ka bata sa panahon sa Dakong Depresyon. Nahinumduman nako ang mga bata nga nagsul-ob og boots tungod kay wala silay mga sapatos ug gipanggutom tungod kay wala silay pagkaon. Kini ang mga panahon sa kalisud.

Ang mahayag nga paglaum nga nagsanag taliwala sa kangitngit mao ang Primary. 10 ang akong edad. Aduna ako’y talagsaon nga magtutudlo. Gihinumduman nako kadtong mga tuiga isip pinakanindot sa akong Primary, ug ako makaingon niana tungod sa talagsaon nakong magtutudlo. Dili tungod kay ang mga batang lalaki diha sa klase nalamdagan sa pagtulun-an o talagsaon ang kabuotan; kondili sukwahi niini.

Ang paghagakhak sa mga batang lalaki ug ang panagtabi sa mga batang babaye niadtong higayona tingali mao ang makaluya kaayo sa among mga lider sa Primary.

Usa ka adlaw samtang mibiya na kami sa chapel aron moadto sa among lawak klasehanan, akong namatikdan ang among Primary president nga nagpabilin. Mihunong ako ug gipanid-an siya. Milingkod siyang nag-inusara sa atubangang laray sa mga bangko, mikuha og panyo, ug misugod sa paghilak. Giduol nako siya ug giingnan, “Sister Georgell, ayaw paghilak.”

Miingon siya, “Naguol ako.”

Mitubag ako, “Unsay nahitabo?”

Siya miingon, “Dili ako makakontrolar sa mga Trail Builders (tawag sa pundok sa mga batang lalaki sa Primary).* Makatabang ka ba kanako?”

Sigurado mitubag ako, “Oo.”

Miingon siya, “O, kaanindot niana, Tommy, kon ganahan ka.”

Ang wala lang nako mahibaloi niadtong higayuna nga ako diay usa sa mga hinungdan sa iyang mga luha. Siya nakahimo og epektibong butang sa pagpaapil kanako aron makab-ot ang balaang pagtahud diha sa among Primary. Ug nahimo gayud namo kini.