Paghanduraw sa Pagkaamahan

Dominggo kadto, ug ang akong pamilya ug ako nanambong sa pagpahinungod sa bag-ong gipanindot nga balay tigumanan sa among dapit. Mga pipila lang ka minuto sa wala pa magsugod ang miting sa sakrament, ang stake president mihangyo kanako sa pagdrayb ngadto sa among bilding sa ward, mga tulo ka kilometro ang gilay-on, aron sa pagkuha og usa ka butang nga iyang gikinahanglan. Aduna ako’y igo lamang nga panahon sa pag-adto ug sa pagbalik. Samtang nagbuhat nianang yano nga sugo, ako adunay kasinatian nga mitandog kanako sa espirituhanong paagi—usa ka talagsaong pahinumdom kon unsa ang importante.

Mga pipila nalang ka eskina duol na lang ko sa miting, ako nakakita og duha ka mga bisikleta nga nag-una kanako, ang usa dako ug ang usa gamay-gamay lang og diyutay, ang matag usa gipadagan nga hilabihang ka pas-pas. Diha dayon akong nailhan ang mga nagbisikleta. Silang duha ako gyung kaila, usa ka buotan nga brother gikan sa among ward ug ang iyang batan-ong anak nga lalaki. Sila nagdrayb padulong sa simbahan—sama sa ilang buhaton matag Dominggo.

Samtang nagtan-aw ko kanila, nahunahunaan nako ang usa ka imahe kabahin sa umaabot, kon kanang batang lalaki—ug usab ang iyang amahan—makahinumdom niadtong mga pagbisiklita. Naghunahuna ko, “Unsa ka katalagsaong ehemplo ang gihimo niining amahan ug unsa ka mahangturong impluwensya nga iyang gibuhat ngadto sa bililhon nga anak sa Dios nga gihatag kaniya. Kana nga batang lalaki,” ako namalandong, “mahimong magdako nga maghandom niana nga kasinatian, ug siguro buhaton usab niya kon siya mahimo nang usa ka amahan.”

Samtang nagtan-aw ako kanila, misantup sa akong hunahuna ang imahe sa akong mga panunduman sa akong pagkabata sa akong kaugalingong amahan, kinsa sa una mopasakay kanako sa manobela sa iyang bisikleta. Ang suod nga relasyon nga namugna gikan niining matang sa mga kasinatian usa ka nindot ug tam-is nga hinumduman.

Sa dihang miabut na ako sa simbahan, ako miabi-abi sa mga nagdrayb og bisikleta uban sa pahiyum ug midawat sa samang pahiyum samtang sila mipahayag og hilum nga kalipay pinaagi sa pagsimba. Sa miting sa priesthood niadtong hapona, nakahigayon ako sa pagpahayag niining brother unsa ang akong gibating kahimuot sa paghanduraw og matarung nga pagkaamahan nga akong nakita kaganiha. Ang iyang nawong misanag, ug siguro siya nasurprisa tungod kay ang akong gihulagway usa lamang ka sagad nga panghitabo alang kaniya.

Isip mga Santos sa Ulahing mga Adlaw, kita swerte kaayo nga makakita og usa ka hulagway sa daghang mga amahan sama niini kinsa nagpasiugda sa espiritwal ug emosyonal nga kaayohan alang sa ilang mga anak. Ug isip mga anak nga napanalanginan sa sama nga mga ginikanan, kita mobati og kinasingkasing nga pasalamat alang sa ilang yano apan lawom nga mga ehemplo ug mga sakripisyo.