Usa ka nagbase sa Washington, D.C. nga kompanya sa advertising ug marketing miila sa usa ka serbisyo publiko nga pamahayag nga gihimo sa Simbahan. Ang “Swashbucklers,” usa ka mubo nga pasundayag mahitungod sa kaimportante sa pagka-amahan, giila tungod sa kamahinungdanon, taas nga kalidad sa produksyon, ug talagsaon nga kombinasyon sa kadasig, kakataw-anan, ug kaanindot niini, sumala sa National Media Survey. Ang serbisyo publiko nga pamahayag usa ka bahin sa serye sa Homefront. Mahimo kining makita sa MormonMessages YouTube channel, www.youtube.com/mormonmessages. Pangitaa ang “swashbuckler.”

Ang Autism Council sa Utah mipresentar sa Simbahan sa Outstanding Organization of the Year nga ganti niadtong Oktubre 14, 2009, agig pag-ila sa Disabilities Resources Web site sa Simbahan. Ang site nagtanyag og mga kapanguhaan alang sa mga tawo nga adunay mga kakulangan—sama niadtong nawad-an og pandungog, nabuta, mga problema sa pagsulti, mga kakulangan sa pagkat-on ug uban pa—ug ang ilang mga tig-amuma, pamilya, ug mga lider sa Simbahan. Ang site makita sa www.disabilities.lds.org.

Sobra sa 170 ka mga tingog gikan sa unom ka nagkalain-laing mga denominasyon, lakip na ang mga Santos sa Ulahing mga Adlaw, miapil sa usa ka pasundayag nga gitawag og “An Ecumenical Musical Gathering—One Voice in Song and Praise” sa Redmond, Washington, USA, pagka 2009. Ang Simbahang Katoliko sa St. Jude ang mipahigayon sa seremonya—nga naglakip usab sa Anglican, Presbyterian, Lutheran, ug Methodist nga mga kongregasyon—aron sa pagpasalamat sa tanang kasilinganang mga simbahan ug sa komunidad alang sa ilang suporta sa Tent City 4, usa ka lokal nga homeless camp.