Mga Ideya sa Family Home Evening

“Ang Balaod sa Puasa,” p. 26: Hunahunaa ang paghimo og plano sa pamilya alang sa sunod nga Dominggo sa puasa. Desisyuni kon kanus-a ang pamilya mag-ampo aron sa pagsugod ug pagtapus sa puasa. Hisguti kon unsa kaha ang angayan ninyo nga ipuasa ug kon sa unsang paagi nga kamo mapanalanginan pinaagi sa pagpaambit sa inyong mga pagpamatuod atol sa pagpuasa. Kon ang usa ka sakop sa pamilya dili makaagwanta nga dili makakaon o makainum, hisguti ang ubang mga paagi nga siya makasalmot.

“Sa dili Pagbutang sa Pagsalig diha sa Gahum sa Tawo,” p. 40: Dapita ang mga sakop sa pamilya sa pagpaambit kon sa unsa nga paagi nga sila o laing sakop sa pamilya nahimong mas maayo nga tawo sa miaging tuig. Dapita dayon ang mga sakop sa pamilya sa paghimo og usa ka tumong nga makatabang kanila nga mamahimong unsay gusto sa Dios nga sila mahimo.

Aron sa pagpakita kon sa unsa nga paagi mapadako sa Langitnong Amahan ang atong mga paningkamot, dapita ang mas gagmay nga mga bata sa pag-alsa og butang nga bug-at. Dayon patabanga kanila ang usa ka ginikanan o mas magulang nga bata. Hain man ang mas sayon ug ngano man? Unsang matanga sa mga butang ang ato lamang mahimo uban sa tabang sa Langitnong Amahan?

“Nabitik sa usa ka Cumbuca,” p. 48: Isip usa ka pamilya, hunahunaa ang paghimo og kaugalingon nimong cumbuca nga adunay sulod nga butang nga tilinguhaon. Dayon pagpuli-puli og role-play sa “unggoy.” Hisguti kon unsaon ni Satanas pagsulay sa paglit-ag kanato, kon unsaon nga kita makalikay sa mga lit-ag, ug unsay atong mahimo kon atong makaplagan ang atong mga kaugalingon nga nabitik diha sa lit-ag.

“Ang Panalangin sa Priesthood kang Lindsay,” p. 66: Hisguti kon unsa ang mga panalangin sa priesthood, ug dapita ang mga sakop sa pamilya sa pagpaambit sa ilang kaugalingong mga kasinatian sa pagkadawat og mga panalangin sa priesthood. Mahimo kang mangutana: Unsa man ang inyong gibati sa pagdawat ninyo sa panalangin? Sa unsa nga paagi kini nakatabang kaninyo? Nganong mapasalamaton man kamo alang sa priesthood?