Kon ang mga Butang Ingon og Nagkasayop

Kini nagsugod sa dihang akong nawala ang Basahon ni Mormon nga gihatag sa “akong” misyonaryo, nga si Sister High, mga kapin na sa lima ka tuig ang milabay. Nasayud ko nga ako makaangkon pa og lain, apan ang akong kopya puno na sa kaugalingong nakong mga marka ug mga tandi nga pakisayran [cross-reference]. Gisukip sa tunga-tunga nga mga pahina niini mao ang gihandum nga mga kinutlo, makapanindot sa pagbati nga mubong sulat gikan sa usa ka higala, ug kopya sa akong patriyarkal nga panalangin. Bisan pa og gipangita gyud nako, apan ang basahon wala na gyud makit-i. Wala ako magtuo nga nagdanghag ko pag-ayo.

Sa wala madugay human niining panghitabo, mipahawa ko sa usa sa akong mga trabaho. Ang akong sweldo karon katunga na lang. Misaad ako sa akong mga ginikanan nga akong bayaran ang akong kaugalingong bayronon sa kolehiyo. Unsaon man nako nga makapadayon sa pag-eskwela?

Nagsunod ako sa mga sugo kutob sa akong mahimo; nganong dili man maayo ang mga panghitabo? Ang akong mga higala sa eskwelahan wala makasabut sa akong mga problema ug sa unsang paagi nga ang Simbahan wala makasulbad niini. Ang usa miingon, “Kinahanglan nimong minus-minusan ang imong pagsimba. Makatigum ka sa imong pamilite sa bus.” Ang lain miingon, “Nganong dili man sa ka mopahuway sa pagsimba og usa o duha ka bulan? Siguro imoha rang mabantayan nga wala gyud kaayo’y kalainan.”

Sa makadiyot, ang ilang mga komentaryo adunay kahulugan. Nagsugod ko sa paghunahuna kon ang akong kinabuhi mahimong mas maayo kon wala ang Simbahan.

Mibalik ako sa akong lawak sa dorm, diin nakita nako ang litrato sa akong pamilya nga gikuha panahon sa Bag-ong Tuig sa Chinese. Naghunahuna ko kon giunsa nako sila paghigugma ug sa unsang paagi sila nakapalipay kanako. Ug naghunahuna ako kabahin sa akong Langitnong Amahan, kinsa akong gihigugma ug nahigugma kanako. Nakaamgo ako nga siguro kinahanglan na nakong magpokus sa mga butang nga anaa nako kaysa sa mga butang nga wala kanako. Sa gihapon, naghunahuna ako sa unsang paagi nga akong masulbad kining mga pagsulay.

Sa wala madugay, akong gisalig ang akong mga pagbati ngadto sa akong magtutudlo sa institute, nga si Sister Ou, kinsa miingon, “Daghang mga miyembro kinsa nakasinati og higayon diin ang ‘maayo ang tanan’ nga panahon sa pagkabag-ong miyembro nahuman na ug ikaw magsugod sa pag-atubang og mga pagsulay sa hugot nga pagtuo. Ang mga kasulatan miingon, ‘Bisan pa niana ang Ginoo nakakita nga angay ang pagpanton sa iyang mga katawhan; oo, siya misulay sa ilang pailub ug sa ilang hugot nga pagtuo’ (Mosiah 23:21).”

“Busa unsa ang akong angayang buhaton?” Ako nangutana.

“Pagtuon sa mga kasulatan nga mas makugihon, ug pag-ampo nga mas matinguhaon,” siya miingon. “Ang tinuod nga hugot nga pagtuo moabut kon kamo adunay mga pagsulay ug kasakit. Ang inyong hugot nga pagtuo motubo, kamo molambo, ug ang inyong pagpamatuod molig-on.”

Mihukom ako sa pagsunod sa iyang tambag ug mibutang sa akong hugot nga pagtuo ngadto sa Dios. Naningkamot ako sa pagbuhat sama sa gitudlo sa Alma 38:5: “Tungod kay ikaw mibutang sa imong pagsalig diha sa Dios mao usab nga ikaw pagaluwason gikan sa imong mga pagsulay, ug sa imong mga kasamok, ug sa imong mga kasakit, ug ikaw pagabayawon sa katapusan nga adlaw.”

Ang nahitabo, nakakita ko og lain nga trabaho—nga mas maayo pa kaysa kaniadto. Nadugangan pa gyud, akong nakit-an ang akong kopya sa Basahon ni Mormon.

Nakakat-on ako nga ang atong mga kahigawad, mga kasubo, ug ang lisud nga mga panahon makatabang kanato sa paglambo. Kini mogiya kanato ngadto sa dakong kalipay kon, sama sa gitudlo kanako ni Sister Ou, atong ibutang ang atong hugot nga pagtuo ug pagsalig ngadto sa usa ka mahigugmaong Langitnong Amahan. Mapasalamaton kaayo ako nga naakangkon og hugot nga pagpamatuod nga ang Simbahan ug ang ebanghelyo tinuod.