Ngano man nga ang mga tawo dihogan og lana kon sila modawat og panalangin sa priesthood?

Ang mga kasulatan kanunay nagpasabut sa pagdihog, kanunay may kalabutan sa pag-ayo sa masakiton. Pananglitan, sa Marcos 6:13 atong mabasa nga ang mga Apostoles “gihidhiran nilag lana ang daghang mga masakiton ug gipang-ayo sila.” Ug sa Santiago 5:14 atong mabasa: “Aduna ba kaninyoy nagamasakiton? ipakuha niya ang mga anciano sa simbahan, ug paampoa sila alang kaniya, nga magahaplas kaniya ug lana sa ngalan sa Ginoo.”

Ang pagdihog nagpasabut sa pagbutang og lana o haplas sa ulo o lawas sa usa ka tawo. Sa karaang panahon kini pagahimoon alang sa daghang mga rason. Usahay kini usa ka timaan sa pagkamaabi-abihon o sa pag-atiman sa lawas kanunay. Kinsa kadtong masakiton o napiang gidihogan og lana o haplas isip medisina. Apan ang pagdihog gihimo usab alang sa sagradong mga rason. Pananglitan, ang balaang pagdihog sa lana gigamit ubos sa balaod ni Moises (tan-awa sa Exodo 40:15). Ang mga propeta midihog sa mga pari ug hari, ug ang mga masakiton gidihogan sa lana isip kabahin sa paagi sa pag-ayo gamit ang hugot nga pagtuo ug pinaagi sa pagpandong sa mga kamot.

Sa Simbahan karon, ang lana sa oliba gipahinungod (gipanalangin sa mga tighupot sa Melchizedek Priesthood) alang sa sagradong mga katuyoan nga gamiton sa nagkalain-laing sagrado nga mga seremonya, lakip ang pagpangalagad ngadto sa masakiton. “Bisan og ang mga kasulatan dili piho nga nagpahayag, kita siguradong makaingon nga ang pagdihog sa lana nahimong usa ka bahin sa tinuod, gipadayag nga relihiyon sukad nga ang ebanghelyo unang gipadayag dinhi sa yuta ngadto kang Adan”.¹

Ngano man nga ang lana sa oliba mao ang gigamit kaysa laing klase sa lana? Kini wala gayud mapahayag sa piho diha sa mga kasulatan, bisan kon ang mga sambingay sa Bag-ong Tugon migamit sa lana isip simbolo sa pagkaayo ug kahayag (tan-awa sa Mateo 25:1–13; Lucas 10:34). Ang sanga sa oliba kanunay nga gigamit isip simbolo sa kalinaw, ug ang kahoy sa oliba gigamit sa kasulatan isip usa ka simbolo sa balay sa Israel (tan-awa sa Jacob 5). Ang lana sa oliba simbolo usab sa Pag-ula sa Manluluwas, tungod kay ang pait nga oliba, kon lubkon, maghatag og lana nga tam-is.