Ang Pagpangita sa Husto nga Simbahan

Ang akong higala nga si Julyette ug ako nag-chat sa internet sa dihang iya kong gisultihan nga siya nangita og simbahan nga adunay usa ka buhi nga propeta kinsa nakig-istorya sa atubangan sa Dios. Nagtuo ako nga ang Dios mihunong sa pagpakig-istorya ngadto sa mga tawo dinhi sa yuta tungod kay kita adunay Biblia, ug nagtuo ako nga kadto paigo na alang sa atong kaluwasan.

Apan siya miingon, “Kon ang Dios dili motawag og usa ka propeta dinhi sa kalibutan, Siya mahimong usa ka bakakon, kay Siya misaad nga siya dili magbuhat og bisan unsa kon walay gitawag nga mga propeta” (tan-awa sa Amos 3:7).

Nangutana ako kaniya, “Asa man kining buhi nga propeta?” Siya wala masayud.

Misugod ako sa paghunahuna kabahin sa unsaon nato sa pagkahibalo sa husto nga simbahan. Nasayud ako nga adunay daghang nagkalain-laing mga simbahan nga Kristyano nga may lain-laing mga doktrina. Naghunahuna ako, “Nan, ang Internet adunay daghang mga kapanguhaan,” busa ako misik-sik sa “ang tinuod nga gilutos nga simbahan.” Wala ako masayud nganong mi-type ako niadtong paagiha, apan pipila ka mga ngalan sa simbahan ang migawas, apil Ang Simbahan ni Jesukristo sa mga Santos sa Ulahing mga Adlaw. Adunay daghang mga simbahan nga Kristyano sa Brazil, apan wala pa gayud ako makadungog niini nga simbahan.

Sa pagsulod sa Web site, nakabasa ako sa istorya sa 14 anyos nga batang lalaki kinsa nakakita sa Dios ug kang Jesukristo nawong sa nawong ug mihubad sa Basahon ni Mormon pinaagi sa gahum sa Dios. Wala pa gayud ako makadungog kabahin kang Joseph Smith o sa Basahon ni Mormon sukad-sukad, ug nagtuo ko nga kini makapainteres. Apan ang nakakuha sa akong atensyon mao ang Basahon ni Mormon nga naghisgut kabahin kang Jesukristo nga nagpakita sa karaang lumulupyo sa kontinente sa Amerika.

Aduna ako’y dakong tinguha sa pagbasa niining basahon, busa ako nangayo og usa ka kopya. Akong gisultihan si Julyette kabahin sa site sa internet, ug human niya mabasa ang istorya ni Joseph Smith, siya sigurado nga kining simbahan mao ang Simbahan ni Jesukristo. Siya miingon nga giandam ako sa Ginoo aron sa pagpangita sa Simbahan alang kaniya.

Nahimuot ko sa iyang konbiksyon ug gusto pud ko nga masayud sa akong kaugalingon. Nangutana ko sa akong inahan kon siya nasayud ba kabahin sa Basahon ni Mormon. Siya miingon kanako nga ang akong igsoong babaye adunay blue nga basahon gikan sa duha ka misyonaryo. Mihulam ako sa basahon ug nagbasa niini gikan sa sinugdanan hangtud sa katapusan sulod sa usa ka semana; ako dili interesado sa pagbuhat og bisan unsa pa nga butang. Unsa ka malinawon nga pagbati ang akong naangkon! Nakahinumdom ako sa usa ka saad niadtong tanan kinsa mobasa sa basahon kinahanglang mangutana sa Ginoo kon kini ba tinuod, ug Siya motubag (tan-awa sa Moroni 10:3–4).

Sayo sa buntag misulod ko sa akong lawak aron sa paghalad og pag-ampo. Mibutang ko sa akong pagsalig ngadto sa Dios ug nangutana Kaniya kon ang basahon ba tinuod, ug mibati ko og kainit sa kinahiladman. Wala ako masayud kon unsa kadto nga pagbati, apan mibati ako og hingpit nga kalipay. Nianang gabhiona ako adunay damgo diin ang usa ka propeta sa Basahon ni Mormon nagpakita. Nangutana ako kaniya kon ang basahon tinuod, ug siya miingon nga tinuod kini. Sa dihang ako mimata ako naghunahuna, “Ang Basahon ni Mormon tinuod gyud.”

Nagpangutana ako hangtud nakakita ko og usa ka tawo kinsa nasayud sa direksyon padulong sa simbahan. Usa ka Biyernes midrayb ko sa akong bisikleta padulong sa chapel, apan walay tawo didto. Nag-ampo ako alang sa panabang aron masayud kon kanus-a ang mga miting pagahimoon. Mibalik ako pag-usab sa sunod semana. Sa dihang ako miabut, usa ka tigulang nga babaye ang misulti kanako nga ang mga miting sa Simbahan pagahimoon sa mga buntag sa Dominggo. Miuli ako sa balay nga malipayon ug naghinam-hinam uban sa akong kasingkasing nga kusog kaayong nagpitik.

Sa dihang miabut ako pagka-Dominggo sa buntag, maayo kaayo ang pagdawat kanako sa mga miyembro. Nahimuot ako sa organisasyon sa Simbahan. Mibati ko og kalinaw ug hingpit nga kalipay diha sa akong kasingkasing panahon sa mga miting, ug naghangyo ako sa mga misyonaryo sa pag-adto sa among balay aron sa pagtudlo kanako. Miuli ako sa balay ug misulti sa akong inahan nga akong nakit-an ang husto nga relihiyon.

Ang mga misyonaryo mitudlo kanako kabahin sa Pagpahiuli sa ebanghelyo ni Jesukristo. Nasayud nako daan kabahin sa istorya ni Joseph Smith, busa sa dihang sila midapit kanako sa pag-ampo aron sa pagkat-on sa tinuod, misulti ako kanila nga nakadawat na ko og tubag ug misulti kanila kabahin sa akong kasinatian. Sila nahimuot sa akong pagpamatuod ug misugyot sa petsa, nga Mayo 15, 2004, alang sa akong bunyag. Sa samang higayon, ang akong higala nga si Julyette nabunyagan usab. Ang akong bunyag mao ang labing hingpit nga kalipay sa akong kinabuhi, ug ang akong higala ug ako malipayon kaayo nga among nakita ang tinuod nga Simbahan ni Jesukristo.