Paglig-on sa Pagtuo ngadto sa Dios nga Amahan ug kang Jesukristo pinaagi sa Personal nga Pagtuon sa Kasulatan

“Niadtong bag-o pa kong naminyo, … giimbitar ko’g paniudto alang sa tanang Relief Society sisters sa akong ward kinsa nakabasa na sa Basahon ni Mormon o sa usa ka mubo nga libro sa kasaysayan sa Simbahan. Panagsa ra kong mobasa sa kasulatan, mao nga angayan kong motambong sa paniudto pinaagi sa pagbasa og mubo nga basahon kay sayon ra man ug kadiyot ra pud. Samtang nagkaon ko, diha ko’y grabeng pagbati nga bisan og ang basahon sa kasaysayan nindot, maayo gyud unta ‘to og ang Basahon ni Mormon ang akong gibasa. Ang Espiritu Santo miaghat kanako sa pag-usab sa akong naandan nga pagbasa sa kasulatan. Nianang adlawa misugod ko sa pagbasa sa Basahon ni Mormon, ug wala gyud ko mohunong sa pagbasa niini. … Tungod kay misugod ko’g basa sa mga kasulatan kada adlaw, nakat-on ko bahin sa akong Langitnong Amahan, sa Iyang Anak nga si Jesukristo, ug sa unsay angay nakong buhaton aron mahisama Kanila. …

“… Ang matag babaye mahimong magtutudlo sa doktrina sa ebanghelyo sa iyang panimalay, ug ang matag sister sa Simbahan nagkinahanglan og kahibalo sa ebanghelyo isip usa ka lider ug magtutudlo. Kon wala pa nimo nabatasan ang kada adlaw nga pagbasa sa mga kasulatan, sugdi kini karon ug pagtuon kanunay aron maandam alang sa inyong mga responsibilidad niini nga kinabuhi ug sa kahangturan.”¹

Julie B. Beck, kinatibuk-ang Presidente sa Relief Society.

“Ang pagtuon sa mga kasulatan makatabang sa atong mga pagpamatuod ug sa mga pagpamatuod sa atong mga miyembro sa pamilya. Ang atong mga anak karon nagtubo nga gilibutan sa mga tingog nga nag-awhag kanila sa pagbiya niana nga matarung ug sa pagtinguha, hinoon, sa pagpangita sa mga kahilayan sa kalibutan. Gawas kon sila adunay lig-on nga pundasyon sa ebanghelyo ni Jesukristo, sa pagpamatuod sa kamatuoran, ug determinasyon sa pagpuyo nga matarung, sila dali nga madala ngadto niini nga mga impluwensya. Responsibilidad nato ang pagpalig-on ug pagpanalipod kanila.”²

Presidente Thomas S. Monson.

“Gusto namo nga ang atong mga sister mahimong mga eskolar sa mga kasulatan. … Gikinahanglan ninyo ang kahibalo niining mahangturon nga mga kamatuoran alang sa kaugalingon ninyong kaayohan, ug alang sa mga katuyoan sa pagtudlo sa inyong mga anak ug sa tanan pang uban nga malakip sa inyong impluwensya.”³

“Gusto namo nga ang atong mga panimalay mapanalanginan og mga sister nga maayong mosaysay sa kasulatan—minyo ka man o dili, batan-on o tigulang, biyuda o nagpuyo kauban sa pamilya. … Mamahimong batid sa mga kasulatan—dili mopaubos sa uban, kondili mobayaw kanila!”⁴

Presidente Spencer W. Kimball (1895–1985).