Ang Pagbisita ngadto sa Temple Square
Ang Pakighimamat sa Kinatibuk-ang Presidente sa Primary
Kuyog kanamo niining bulana sa pagtan-aw sa importante nga dapit sa Temple Square.
Si Emma K. naggikan sa Midvale, Utah, sa pagbisita kang Sister Cheryl C. Lant, kinatibuk-ang presidente sa Primary. Sila si Emma ug Sister Lant naghisgut mahitungod sa katuyoan sa Primary samtang gilibut nila ang Building sa Relief Society. Ang Building sa Relief Society mao ang dapit diin ang mga opisina sa general presidency sa Primary, Young Women, ug Relief Society nahimutang. Kini adunay matahum nga mga display kabahin sa katuyoan ug kasaysayan niini nga mga organisasyon.
“Unsa ang maayong mga butang nga gipanghimo sa mga bata sa Simbahan?” Si Emma nangutana.
“Usa sa pinakamaayong mga butang nga ilang gihimo mao ang pagkat-on gikan sa mga kasulatan,” si Sister Lant miingon. “Sa matag Dominggo, makita nato ang mga bata nga magdala sa ilang mga kasulatan ngadto sa Primary. Giablihan nila kini, gibasa nila kini, ug nagkat-on sila direkta gikan sa mga pulong sa Ginoo kon unsa ang Iyang gusto nga ilang buhaton.”
“Unsa ang inyong gipangandoy nga ilang makat-unan sa kanunay?” Si Emma nangutana.
“Kita kinahanglan nga mas magmabination sa atong mga kaigsoonan, sa atong mga ginikanan, sa atong mga higala, ug sa tanan sa tibuok kalibutan,” miingon si Sister Lant.
Si Sister Lant mipakita kang Emma og usa ka painting ni Jesus nga kauban ang mga bata. “Mahunahuna ba ninyo ngano nga kana ang paborito nakong tan-awon sa matag adlaw kon ako mosulod sa akong opisina?” nangutana siya.
“Tingali tungod kay kini nagpakita sa gugma ni Jesus alang sa mga bata,” miingon si Emma.
“Tinuod kana,” miingon si Sister Lant. “Sa Primary, ang pinakaimportanting butang nga gusto namong itudlo sa mga bata mao nga ang Langitnong Amahan ug si Jesukristo nahigugma kanila. Ang tanang mga bata niini nga litrato naggikan sa nagkalain-laing mga dapit, busa sila ang nagrepresentar sa tanang mga bata sa tibuok kalibutan. Ang Langitnong Amahan ug si Jesus nahigugma kanatong tanan, bisan asa kita nagpuyo. Kitang tanan Iyang mga anak.”
Si Sister Lant mipakita kang Emma og upat ka litrato nga nagpakita sa panahon dihang ang Manluluwas nanalangin ug nag-ampo alang sa mga batang Nephite human Siya Gilansang sa Krus. Ang mga anghel miabut gikan sa langit ug gilibutan ang mga bata. “Kon ang mga bata makakat-on kabahin ni Jesukristo, masayud sila kon unsay angay nilang buhaton aron maduol Kaniya ug makabaton og kalinaw,” miingon si Sister Lant.
Si sister Lant miingon kang Emma nga ang pinakaunang Primary niadtong 1878 adunay kapin sa 200 ka mga bata. Karon, aduna nay kapin sa usa ka milyon nga mga bata sa Primary sa tibuok kalibutan!
Dihang si Sister Lant usa pa ka bata sa Primary, nagsul-ob siya og usa ka laso nga panapton [bandlo] sama niining naka-display dinhi. Kon siya makakompleto og mga tumong, maangkon niya ang mga timaan alang sa iyang bandlo. Karon, ang mga bata sa Primary moapil sa programa nga Faith in God.
Ang painting nga si Kristo kauban ang mga Bata gikan sa tibuok Kalibutan ni Del Parson nakabitay sa opisina ni Sister Lant. Si Sister Lant ug ang iyang mga counselors, Sister Margaret S. Lifferth ug si Sister Vicki F. Matsumori, ganahan nga motan-aw sa painting.
Mga litrato pinaagi ni Welden C. Andersen, gawas kon gipahibalo; litrato sa gawas sa Building sa Relief Society pinaagi ni John Luke; litrato sa bandlo pinaagi ni Craig Dimond; litrato sa kinatibuk-ang presidency sa Primary © Busath. com; mga paghulagway sa mapa ug mga icon pinaagi ni Dilleen Marsh; Ang Pinakaunang Miting sa Primary Association, pinaagi ni Lynn Fausett ug ni Gordon Cope, © IRI