Dili Mosalig sa Gahum sa Tawo

Sa pasiuna sa Doktrina ug mga Pakigsaad, atong nakat-unan ang mga limitasyon sa gahum sa tawo: “Ang mahuyang nga mga butang sa kalibutan moabut ug mopukan sa gamhanan ug mga malig-on, nga ang tawo dili motambag sa iyang isigkatawo, ni mosalig sa gahum sa tawo” (D&P 1:19). Sa pag-usab og sulti niana nga pahimangno: bisan og ikaw maalamon sa mga paagi sa kalibutan, ayaw kalimot sa gahum sa Dios.

Ang akong mga classmate sa medical school ug ako nakakat-on niana nga leksyon sa dili makalimtan nga paagi mga kapin sa 30 ka tuig na ang milabay. Ang among kasinatian nahitabo sa usa ka gamay nga lungsod sa Manzanillo, sa kasadpang baybay sa Mexico. Tuig kadto sa 1978. Ang mga sakop sa among mogradwar na nga klase sa tuig 1947, kauban sa among mga kapikas sa kinabuhi, nanambong og medical symposium.

Usa ka gabii human makompleto ang siyentipiko nga mga sesyon, usa sa mga doktor kalit lang nga nasakit og grabe. Sa walay pasidaan, daghang migawas nga dugo gikan sa iyang tiyan. Nakalitan kaayo, siya among gipalibutan, nagtan-aw sa bililhong dugo nga miagas gikan kaniya. Anaa kami, mga espesyalista sa medikal nga hanas sa bisan unsang sakit, lakip na sa doktor nga tig-opera, tig-anestisya, ug mga internist, ang matag usa adunay kaalam nga naangkon sulod sa kapin sa 30 ka tuig nga kasinatian. Unsay among mahimo? Ang pinakaduol nga hospital mao anaa sa Guadalajara, kapin sa 100 ka bukiran nga milya (160 km) ang gilay-on. Gabii na kadto. Walay eroplano nga mobiyahe. Ang pag-abuno og dugo wala na sa hunahuna tungod sa kakulang sa kagamitan. Ang tanan namong gitipon nga kahibalo dili gayud magamit aron mahunong ang iyang pagdugo. Kami gayud walay mga pasilidad o kagamitan nga gikinahanglan sa pagluwas sa kinabuhi sa among mahal nga igsoon.

Ang among nag-antus nga kauban, usa ka matinud-anon nga Santos sa Ulahing mga Adlaw, nasayud kaayo sa nahitabo kaniya. Ang iyang nawong namuti na ug nangluspad, siya mihunghong og usa ka hangyo alang sa panalangin sa priesthood. Ubay-ubay kanamo naghupot sa Melchizedek Priesthood. Gihimo dayon namo ang iyang hangyo. Gihangyo ako sa pag-seal sa gihimong pagdihog. Ang Espiritu midiktar nga siya panalanginan sa katapusan nga ang pagdugo mohunong ug nga siya makapadayon sa pagkabuhi ug makapauli sa iyang panimalay. Kadto nga panalangin gipangalagad sa pangalan sa Ginoo.

Sa pagkasunod buntag, ang iyang kondisyon maayo na. Milagro kaayo, ang pagdugo nahunong. Ang pressure sa iyang dugo mibalik na sa normal. Sulod sa duha ka adlaw, nakapauli na siya sa iyang balay. Naghiusa kami, nagpasalamat sa Ginoo alang niining pinakatalagsaong panalangin.

Usa ka yano nga leksyon ang among nakat-unan: “Sumalig ka kang Jesukristo sa bug-os mong kasingkasing; ug ayaw pagsalig sa imong kaugalingong salabutan” (Mga Proverbio 3:5). Kadto among nasinati alang sa among kaugalingon. Kini nga doktrina, balik-balik nga gitudlo diha sa mga kasulatan,¹ karon nahimo na kini namong tinuod nga kahibalo.

Palihug ayaw ako laina sa pagsabut, mga kaigsoonan. Sa tinuod kita kinahanglan nga mangandam alang sa angay nga buhaton. Oo, kita kinahanglan gayud nga molihok sa atong buluhaton, bisan unsa pa ang atong pilion sa kinabuhi. Kita kinahanglang makahimo og makahuluganon nga serbisyo. Ug sa dili pa nato makab-ot kana nga kasarang, kinahanglan nato ang edukasyon. Uban kanato, ang edukasyon usa ka relihiyuso nga responsibilidad. Ang himaya sa Dios sa tinuod mao ang salabutan (tan-awa sa D&P 93:36).

Apan ang pagkat-on sa tawo adunay mga limitasyon. Ug usahay, sama sa among kahimtang sa rural Mexico, ang hiniusa nga pagkat-on sa daghang mga eksperto dili magamit sa panahon dihang gikinahanglan namo kaayo kini. Kinahanglan namong ibutang ang among pagsalig sa Ginoo.

Kadto nga kasinatian sa Mexico nakatudlo kanamo og laing importante nga leksyon. Mahitungod kini sa among labing una nga mga prayoridad ug sa labing taas nga mga katuyoan isip mga mortal nga binuhat. Among nakat-unan nga ang labing taas nga katuyoan sa usa ka doktor wala sa ospital. Alang sa usa ka abogado, dili kini diha sa korte. Alang sa usa ka piloto sa jet, dili kini ngadto sa cockpit sa Boeing 747. Ang matag gipili sa tawo nga trabaho usa lamang ka paagi alang sa utlanan; dili kini mao ang utlanan mismo.

Ang sangputanan nga angayang paningkamutan sa matag usa kaninyo mao ang pagkahimong pinakamaayo nga tawo—ang tawo nga maoy gusto sa Dios nga mahitabo kaninyo. Moabut ang adlaw nga matapos ang inyong propesyunal nga panarbaho. Ang trabaho nga inyo gayud nga gipaningkamutan nga maangkon—ang trabaho nga nagsuporta kaninyo ug sa inyong pamilya—sa umaabut dili na maoy importante alang kaninyo.

Dayon inyong makat-unan kining talagsaon nga leksyon: nga mas importante kon unsa nga matang kamo sa tawo nga mamahimo kay sa unsay inyong panginabuhian. Kon mobiya na kamo niining kinabuhia, unsay inyong nakab-ot sa kaugalingon mao ang mas importante. Ang mga kinaiya sama sa “hugot nga pagtuo, hiyas, kahibalo, pagkamapugnganon, pailub, inigsoon nga pagkamabination, pagkadiosnon, gugma nga putli, mapainubsanon, [ug] kakugi” (D&P 4:6) tanan pagatimbangon sa timbangan sa Ginoo.

Sa matag karon ug unya, pangutan-a ang inyong kaugalingon niini nga mga pangutana: “Andam na ba ako nga makighimamat sa akong Magbubuhat?” “Takus ba ako sa tanang panalangin nga Iyang giandam alang sa tanan Niyang matinud-anong mga anak?” “Nadawat na ba nako ang akong endowment ug pangbugkos nga mga ordinansa sa templo?” “Nagpabilin ba akong matinud-anon sa akong mga pakigsaad?” “Sarang ba ako alang sa pinakamahinungdanon sa tanang mga panalangin sa Dios—ang panalangin sa kinabuhing dayon?” (tan-awa sa D&P 14:7).

Kinsa kadtong mihatag og bili sa ilang hugot nga pagtuo sa Dios—kinsa kadtong misalig Kaniya—gihatagan niining saad sa kasulatan: “Himoa nga walay tawo nga mohimaya diha sa tawo, apan himoa nga siya mohimaya diha sa Dios. … Kini sila mopuyo diha sa atubangan sa Dios ug sa iyang Kristo hangtud sa kahangturan” (D&P 76:61–62). Unta kini ang pinakadestinasyon alang sa matag usa kanato.