Kinatibuk-ang Komperensya

Ayaw kalimti: ang kinatibuk-ang miting sa Young Women pagahimoon karong Marso 27, ug ang kinatibuk-ang komperensya mahitabo karong Abril 3 ug 4.

Unsa ang kinatibuk-ang komperensya? Kini usa ka miting sa Simbahan sa tibuok kalibutan, nga ipahigayon kaduha sa usa ka tuig—sa katapusang adlaw sa unang semana sa Abril ug Oktubre. Imbis nga motambong sa regular nga mga miting sa Simbahan pagka Dominggo, ang mga miyembro magpundok aron sa pagdawat og tambag gikan sa propeta, sa iyang mga magtatambag, sa Napulog Duha ka mga Apostoles, ug uban pang mga lider sa Simbahan.

Ang kinatibuk-ang komperensya mahitabo sa Siyudad sa Salt Lake, Utah, ug ipamulong ngadto sa upat ka mga sesyon nga tag-duha ka oras alang sa tanang mga miyembro ug usa ka sesyon nga duha ka oras alang sa mga naghupot sa priesthood. Ang pipila ka mga miyembro sa Simbahan motambong sa komperensya diha sa may 21,000 ka mga lingkuranan sa Conference Center, apan ang kadaghanan makadungog niini pinaagi sa sibya. Ang pipila ka mga dapit makatan-aw sa kinatibuk-ang komperensya nga live. Ang ubang mga dapit makadawat og girekord nga video o audio sa komperensya sulod sa labing dali nga panahon human sa orihinal nga mga sibya. Pagpakisayud uban sa inyong mga lider sa priesthood o sa www.conference.lds.org alang sa impormasyon kabahin sa mga oras ug dapit sa sibya.

Human sa komperensya, kamo makabasa ug makatuon sa mga mensahe sa kinatibuk-ang komperensya sa Mayo ug Nobyembre nga mga isyu sa Liahona.

Ang kinatibuk-ang miting sa Young Women—usa ka miting sa tibuok Simbahan alang sa batan-ong mga babaye nga nag-edad og 12 hangtud 18, sa ilang mga inahan, ug sa mga lider sa Young Women—pagahimoon sa Marso matag tuig , ug ang kinatibuk-ang miting sa Relief Society pagahimoon sa Septyembre. Kining duha ka miting isibya sa Sabado sa gabii usa ka semana sa dili pa ang kinatibuk-ang komperensya.