Pagkaon alang sa Nahibiling mga Adlaw sa Semana

Samtang nagkaduol ang gradwasyon sa high school, ang akong mga higala ug ako naghinam-hinam nga nagpaabut sa among sayaw sa gradwasyon. Apan sa dihang ang among eskwelahan mipahibalo sa petsa sa sayaw, naguol ako kaayo sa pagkahibalo nga kini himoon sa Dominggo.

“Mariela, kini mahitabo lamang kausa sa tibuok kinabuhi!” usa ka higala nga misulti kanako. “Kinahanglan nga moadto ka. Dayon ayaw na gyud og palta og usab sa imong pagsimba. Apan kining kausa lang, kinahanglan kang dili mosimba ug moadto sa sayaw.”

Mipasabut ako kaniya nga kini dili lamang kabahin sa pagsimba—kini kabahin sa paggahin og adlaw ngadto sa Ginoo. Apan samtang gihunahuna nako ang iyang gisulti, naghunahuna ko, “Maayo ba kaha kon dili ako mo-obserbar sa Igpapahulay, bisan kining kausa lang?” Gani, ang akong mga higala ug ako sa dili madugay magkabulag, ug kami nagpaabut gyud niining kalihokan sulod sa daghang mga tuig. Ang sayaw magtanyag kanamo sa katapusang higayon nga magkauban sa pagsaulog.

Samtang naghunahuna ako kabahin sa akong desisyon, nakahinumdom ako nga ang akong amahan mitudlo kanako nga ang adlaw nga Igpapahulay mao ang “pagkaon” alang sa nahibiling mga adlaw sa semana. Mahimo ba gyud nakong palabyon lang ang espiritwal ug temporal nga mga panalangin nga gisaad sa Ginoo ngadto sa masulundon? Gitimbang-timbang nako ang akong mga opsyon, ug nasayud ako unsa ang angay nakong desisyon.

Ang akong mga higala wala makasabut sa dihang ako silang gisultihan kabahin sa akong desisyon nga dili moadto. Sulod sa pipila ka mga semana, mibati ako nga nawad-an og kadasig matag higayon nga makadungog ko og usa kanila nga maghisgut kabahin sa sayaw, apan nasayud ko nga ang akong pagpili husto.

Samtang ang sayaw nagkaduol, usa ka butang nga wala damha ang nahitabo. Sa pipila ka mga rason ang eskwelahan mihukom sa pag-usab sa petsa. Imbis nga himoon kini sa Dominggo sa gabii, ang sayaw pagahimoon sa Sabado sa gabii! Naghinam-hinam kaayo ko nga sa katapusan makatambong ug makasinati og nindot kaayong panahon uban sa akong mga higala. Ang nakahimo kanako nga mobati og hilabihan ka malipayon mao ang pagkasayud nga gitahud nako ang akong pasalig sa pagsunod sa Ginoo.

Mapasalamaton ako nga nakaapil ko sa sayaw, apan nakaamgo ko nga kita dili kanunay mapanalanginan niining paagi. Usahay kita kinahanglan nga mohimo og importanting mga sakripisyo alang sa ebanghelyo ni Jesukristo. Apan nakakat-on ako, ug nasayud ako karon, nga ang mahigugmaong Langitnong Amahan kanunay mopanalangin kanato sa usa ka paagi o sa lain kon kita mosunod.

Ang pag-establisar og usa ka sundanan sa pagkamasulundon sa high school naghatag kanako og dakong mga panalangin isip usa ka young adult. Ang akong iskedyul hilabihan ka daghan uban sa mga buluhaton sa kolehiyo, mga pasalig sa trabaho, ug sosyal nga mga kalihokan, apan nasayud ako nga ako adunay higayon sa pagpahulay niadtong mga buluhaton matag semana pinaagi sa paghalad sa Dominggo ngadto sa Ginoo.

Ang akong amahan sakto: Ang Dominggo usa ka talagsaong tinubdan sa espiritwal nga pagkaon. Ang pagpabalaan sa Igpapahulay kanunay gayud nga gihimo nakong prayoridad aron mabag-o nako ang akong mga pakigsaad, mapuno pag-usab ang butanganan sa espirituhanong kalig-on, ug mapalagsik ang akong hunahuna alang sa umaabut nga semana.