Paghinumdom sa talagsaong mga butang sa Dios
Ikawalo nga Internasyonal nga Kompetisyon sa Art
Hunahunaa ang daghang mga gasa ug mga panalangin nga gihatag sa atong Langitnong Amahan ug ni Jesukristo ngari kanato. Pinaagi sa pag-ila niining mga gasa ug mga panalangin sa atong mga kinabuhi, kita nagpakita og balaan nga pagtahud sa Dios ug nagpalig-on sa atong tagsa-tagsa nga mga pagpamatuod. Ang atong hugot nga pagtuo mapahayag sa mga nota sa himno, sa pagporma og clay, o sa mga agi sa paintbrush.
Ang paglakaw ngadto sa pasundayag sa Ikawalo nga Internasyonal nga Kompetisyon sa Art didto sa Conference Center sa Siyudad sa Salt Lake, Utah, daw sama nga naglakaw ngadto sa usa ka miting sa pagpamatuod sa mga miyembro nga naggikan sa 44 ka mga nasud. Sa Doktrina ug mga Pakigsaad 115:5 atong mabasa, “Tindog ug pakita aron ang inyong kahayag mao ang usa ka sukaranan alang sa tanan nga mga nasud,” ug ang buluhaton niining mga artist nga Santos sa Ulahing mga Adlaw nagbuhat gyud niini.
Kining mga salmot nga himoon kausa sa tulo ka tuig nga kontest naglakip sa mga painting ug mga desinyo hinimo sa kamot nga nagpahayag sa tema nga “Paghinumdom sa Talagsaong mga Butang sa Dios.” Ang atong yutan-ong panimalay, ang gipahiuli nga ebanghelyo, ug ang talagsaong Pag-ula sa atong Manluluwas mao ang pipila sa mga hiligustan nga gibuhat sa mga artist. Gikan sa 1,089 nga mga gipang-sumiter, duol sa 200 ang napilian nga i-display, lakip na ang 20 ka Merit Award ug 18 ka Purchase Award. Bisan tuod ang pasundayag sa Conference Center nahuman na, kini mahimong makita sa internet sa ArtExhibit.lds.org. Ang pagtan-aw sa art naghatag og kahigayunan nga malig-on sa espirituhanong paagi pinaagi niining makita nga mga pagpamatuod.
Sa wala: The Child, ni Kathleen Bateman Peterson, USA, Merit Award
“Kini usa ka painting kabahin sa labing nindot nga gasa sa Dios ngari kanato—ang kinabuhi mismo.”
Ibabaw: Who Can Find a Virtuous Woman? II, ni Louise Parker, South Africa, Purchase Award
“Gusto nakong ipakita ang kasulatan sa [Mga Proverbio 31] ingon man usab ang pagsaulog sa labing importanting mga kinaiya sa mga babaye sa Africa. Sila hilabihan ka kugihan ug kamanggihatagon ug sila nakalahutay … uban sa ilang bug-os nga dignidad.”
Ubos: Love, ni Nnamdi Okonkwo, Nigeria, Merit Award
“Kining kinulit nga hinimo sa bronse usa ka pagpahinungod ngadto sa pagkainahan.”
Sa wala: I’ll Go Where You Want Me to Go, ni Ramon Ely Garcia Rivas, Ecuador, Purchase Award
“Ang usa ka tawo makakita sa batan-ong mga misyonaryo nga nagtudlo sa ebanghelyo ngadto sa usa ka pamilyang investigator nga nagpuyo sa usa ka naglutaw-lutaw nga balay hinimo sa balsa, nga mao ang sagad nga gawi sa mga tawo sa Suba sa Babahoyo didto sa Ecuador.”
Sa tuo: A Stop along the Way, ni Carmelo Juan Cuyutupa Caares, Peru
“Ang mga pioneer mibati og gamayng kalipay panahon sa ilang paglalin nga midala kanila sa paghunong makadiyot, bisan pa sa kakapoy nga ilang gibati, ug mihunong sa may agianan.”
Sa wala: They Did Not Doubt, ni Joseph Brickey, USA
“Oo, [ang batan-ong mga manggugubat] gitudloan sa ilang mga inahan, nga kon sila dili magduha-duha, ang Dios moluwas kanila” (Alma 56:47).
Ibabaw: We Give Thanks (Mga Proverbio 22:6), ni Elisabete Lina Miota, Brazil
“Ang pag-ampo nga gitudlo pinaagi sa mga ginikanan mao ang unang sangpit ngadto sa Langitnong Amahan nga ang 16 ka bulan nga bata makakat-on ug makapraktis.”
Sa tuo: Steps of Faith, ni Alfred Igbinigie, Nigeria
“Kining kinulit nga kahoy nagpakita sa mga kagubot sa mga Santos sa Missouri, niadtong 1838.”
Ibabaw: Agape, ni Valeriano Ugolini, Italy
“Kini nga painting usa ka biswal ug adunay simbolo nga nagpahayag sa gugma sa Dios alang sa tawo, ug ang gugma sa tawo alang sa Dios, sama sa makita sa Juan 3:16.”
Ubos: Windows of Heaven, ni Emily McPhie, USA, Purchase Award
“[Nagtan-aw sa akong gamayng anak nga babaye] nasanapan ko sa kalipay ug nakahilak. Daw ang mga bintana sa langit naabli ngadto sa iyang mga mata ug mibu-bu og gugma ug kahayag. Ang mga bata bililhon nga gasa.”
Sa wala: Martin Handcart Company, Mellor Family, ni Douglas McGarren Flack, USA
“Kining tibuok pamilya nga may siyam ka sakop naluwas sa pagpanaw paingon sa Zion.”
Sa tuo: Rooted, ni Heidi Renee Somsen, Canada
“Sama nga ang mga gamot mohawid sa kahoy ngadto sa yuta, ang mga pamilya pagabugkoson diha sa ebanghelyo sa gugma ug sa literal nga paagi pinaagi sa mga ordinansa sa templo.”
Sa tuo: Preparing for the Sabbath, ni Mthulisi Ncube, Zimbabwe
“Ang batang babaye nagbasa sa iyang mga basahunon sa kasulatan, ug ang mga babaye nanglaba sa ilang mga sinina alang sa pagpangandam sa Igpapahulay diha sa probinsya nga dapit sa South Africa.”
Ibabaw: Gethsemane Grove, ni Derek J. Hegsted, USA
“Panahon sa pagbiyahe ngadto sa Israel, nakakita ako og pundok sa mga kahoy sa oliba nga nakahimo kanako sa pagpamalandong nganong si Kristo ‘makadaghan adto man makigtigum’ sa Getsemani (tan-awa sa Juan 18:2). … Ang tanang kinabuhi [adunay] koneksyon sa Talagsaong Tiglalang. … Pinaagi sa painting, daw mao lamang ang saktong paagi sa pagpahinungod sa tanang butang nga nagpamatuod sa Iyang pagkabalaan.”
Ibabaw: Facing Eternity, ni Del Parson, USA
“Sa dihang ang adlaw hapit na matapos, ang Manluluwas namalandong sa plano sa Iyang Amahan. Ang mga palo sa mga baroto sa pangisda nagrepresentar sa mga krus nga nagpaabut Kaniya sa iyang katapusang eksena sa Iyang kinabuhi dinhi sa yuta.”
Sa wala: Teach Me to Walk in the Light, ni Ai Meng Tsai, Taiwan, Purchase Award
“Gipahayag nako ang ideya nga gipasabut niining inila nga awit sa mga bata.”
Ibabaw: Her Sins Are Forgiven, for She Loved Much, ni Roger Cushing, USA
“Ang hugot nga pagtuo ug paghinulsol sa babaye migiya kaniya sa pagpangayo og pasaylo sa Ginoo. … Pinaagi sa matubsanong gugma sa Ginoo, siya nakabaton og paglaum.”